Matiyu 3
3
Jɔn na pɛ nɔɔna sɛɛm ye o bere-ba tei to
Maake 1:1-8; Luka 3:1-9; Jɔn 1:19-28
1Nɔɔno wodwoŋi déem mo wora, o yere mo Jɔn. Wonto déem yeini o pae nɔɔna sɛɛm mo. O ma ba o zoore Judea kagoa kam ne, ye o yɔɔre o bere nɔɔna Wɛ chega kam. 2O maa yeini o tɛ o bere-ba se ba leiri ba wo Wɛ ŋwaane, se maŋa kam laam yia se Wɛ telaao paare dem ba o nɔɔna baŋa. 3Jɔn ye wolo Wɛ sampwora Izaya na maŋe o ŋɔɔne o taane faŋa faŋa to we:
“Nɔɔno mo wora o kaase o kwora kagoa yuu ne ye o we,
‘Zaŋe-na á fɔge á kwɛ dé Teiru wom chwoŋa kam
o na lage o ba o tɔge da to.
Pa-na se chwei selo o na lage o tɔge to
fɔge se yɔɔre lanyerane.’ ”#Izaya 40:3
4Jɔn déem zoore gɔrɔ kolo ba na sɔge de kone koro to mo. O maa jege tankila o ma ja o teiŋa. O wodiu mo ye kayere de tooro. 5Nɔɔna dedɛ maa yeini ba nwoŋi Jerusalem, de Judea teene dem maama, de Jɔdan buga kam ni jei sem, ba vei o tei. 6Ba na tui o tei to, ba maa tɛ jaja ba na ke ba tusi tei to. O laam maa pae se ba zoore Jɔdan buga kam wo se ba jwoŋi sɛɛm Wɛ ŋwaane.
7Jɔn ma na we Farisi tiina de Saduka tiina dedɛ yɔɔre ba tui o tei se ba jwoŋi sɛɛm. O ma ta de-ba o we:
“Abam nye de basankwe na dura se se lu mini wone tei to. Wɔ mo bere abam se á kwaane á lu waarem delo Wɛ na lage o pa nabiina to? 8Abam nam jege se á ta‑á tɔge kikia yalo na wó bere we á seene á leiri á wo to mo. 9Abam yé ta‑á boŋa á pa á tete we, abam ye Abaraham dwi tiina, ye Wɛ bá pa á na waarem. A tɛ abam we konto dae kolokolo. Wɛ ná laga, o wó wane o pa se kandwa yanto de leiri ya ji Abaraham dwi tiina.#Jɔn 8:33 10Nɔɔno nam maŋe o jege dwooru o jeŋa ne se o taa mae o gwoni teeni mo o de tega ne. Tio kolo maama na ba leiri bu-ŋona to, o jege se o gwoni-ko mo o de tega ne, ye o kwei-ko o de mini wone se ko di.
11Amo nam mae na mo a pa abam sɛɛm se ko bere we abam leiri á wo de á tusim dem. Ko daare wolo na lage o saŋe amo kwaga o ba to nam tiini o dwoi amo. A wo maŋe se a zeeri o nɛ natera de. Wonto nam ná lage o pa abam jwoŋi sɛɛm, ko wó taa ye Wɛ Sin-laao kom dedaane mini mo o ma o ke konto.#Kikia 1:5 12Wonto maa zei da-lɔŋɔ se o ma mage o mena, se o laam chaare ka maama o pɛ o ke o tula ne, ye o daare men-swanno tem o zwɛ de mini delo na ba di de dwei to. Mo o na lage o pɔɔre nɔɔna daane o ke-ba tei.”
Yezu jwoŋi sɛɛm
Maake 1:9-11; Luka 3:21-22
13Jɔn déem na wo Jɔdan buga kam ni ne to, Yezu ma nwoŋi Galili laŋa kam o vo da se o de jwoŋi sɛɛm o tei ne. 14Jɔn déem ma kwaane se o pipiri Yezu boboŋa, ye o ta ded‑o o we, “Amo mo jege se a jwoŋi sɛɛm nmo tei ne. Ko ke tɛ mo ye nmo ba amo tei se n jwoŋi sɛɛm?” 15Yezu ma leiri‑o we, “Yage se ko taa ye konto leile. Ko maŋe se dé ke konto, se dé wane dé tɔge kolo maama na jege chega Wɛ tei ne to mo.” O laam ma sɛ.
16Yezu na jwoŋi sɛɛm konto to, o ma yɔɔre o nwoŋi na bam wone. O laam ma na wɛyuu na pore o baŋa ne, ye o na Wɛ Sin-laao kom na nwoŋi da ko maa beene o baŋa, ye ko nye de kunkwoŋa tei.#Izaya 11:2-3 17Kwora laam ma ŋɔɔne Wɛ telaao ne ka we,
“Wonto mo ye amo bu-doa a na jege o swono to.
O kikia su amo yi.”
Currently Selected:
Matiyu 3: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
