Malaki 2
2
Ni-kaana Wɛ kaanem tiina bam ŋwaane
1Paŋwa Tu Baŋa Wɛ nam ta na jege kolo se o ta ta dedaane abam kaanem tiina bam to mo tento:
2“Abam nam ye se á ta‑á zuli amo yere dem mo. Abam nam ná ve se á ke konto, amo wó sɔɔle lwarem a yage abam yuu ne. Ko ná ye wo-laaro telo á na yeini á jwoŋi amo jeŋa ne to, amo wó jwoori a pipiri-te se te ji sɔɔlem á baŋa ne. Chega ŋwaane to, amo maŋe a sɔɔle mo a yage á yuni ne, kokuri abam ba jege yi-seena de á kaanem totoŋe dem. 3A ta lage a waare abam dwi dem mo. Á ná jaane vara mo se á ba á ma á ke kaanem á pa-ne, amo wó kwei ba na-beinnu tem a ma feiri á yibia ne, se a laam daare a dole abam a yage tampuuri yuu ne. 4Amo pɛ abam ni-kaana yanto se á wane á lɔre we ni-sɛɛm delo amo dedaane á nabaaro Levi na ke daane to wó taa vei yiga mo.#Jeelim 3:11-13; 25:12
5Ni-gwonim delo amo dedaane Levi dwi dem déem na zo daane to ye se de ja ŋwea dedaane yazura mo de ba ba tei ne. Banto totoŋe mo ye se ba taa zuli amo yere dem. Ba ma seene ba ke konto dwoŋi. 6Levi dwi dem bere chega mo ye ba ve vwa fɔm. Ba ŋwea kam tɔge chwoŋa, ye ba sɛ amo ni, pa se nɔɔna dedɛ mo pipiri ba yage wɛleera totoŋa. 7Kaanem tu mo jege yeino Wɛ wonnu seeni ye o nii te baŋa ne. Nɔɔna maa wó taa vei o tei ne se o bere-ba, wonto na ye Paŋwa Tu Baŋa Wɛ tontoŋeno to ŋwaane.
8Ko nam ná ye abam, ko dae konto mo á jege á ke. Abam kwei chwoŋa kalo Wɛ na pɛ abam se á ta‑á tɔge to mo á yage. Á berem dem maa pae se nɔɔna dedɛ tusi amo yiga ne. Ko dɛ laŋa kam konto ne mo ye abam chɔge ni-sɛɛm delo amo dedaane Levi na zo daane to. 9Konto ŋwaane mo pɛ se a pa nɔɔna maama chuli abam ye ba ta gwooni abam. Kokuri abam ve amo ni dem mo ye á kuri nɔɔna daane de á na bere-ba tei to.”
Paŋwa Tu Baŋa Wɛ na tage tei to mo konto.
Baŋa Wɛ lage se chega kam mo taa toŋa
10Debam maama dae kwo dedoa bia mo na? Ko dae Wɛ dedoa mo naane debam maama na? Konto to, ko wó ke tɛ mo se debam taa baare da-kwaga ne ye dé daare dé chɔge ni-sɛɛm delo dé nabaara bam na tiŋi de Wɛ to? 11Abam Judah tiina bam ywori Wɛ kwaga ne mo de á na jege wo-zɔɔna á ke Jerusalem wone dedaane Isarele teo kom maama ne to. Á ta chɔge chullu á ma‑á biini Wɛ diga kam o na swoi to dedaane á na kwei kaana balo na yeini ba kaane dwi-gɛ tiina jwona to se ba taa ye abam kaana to. 12Amo lwoori Wɛ mo nenɛɛne nɔn-dwoa bam konto dwonna maama wó ti Isarele tega baŋa ne, de ba na maŋe ba jaane pɛɛra ba tui ba pae Paŋwa Tu Baŋa Wɛ to de.
13Abam ta jege woŋo dedoo mo á ke. Abam yeini á jeeri Wɛ bimbini dem baŋa ne mo, ye á keera á ta daare á lwoi yi-na bare-bare. Á laam maa tɛ á we, Baŋa Wɛ ve se o jwoŋi á pɛɛra yam. 14Abam nam tɛ á we, bɛŋwaane mo á pɛɛra yam wo su Wɛ yi ? Ko ye Baŋa Wɛ na maane baaro maama na ke tei o pa kaane wolo o na di o nɔn-donne maŋa kam ne to ŋwaane mo. Baaro maama jwoori o lɔ o kaane wom kwaga ne mo, ye wonto ye kaane wolo o na pwooli kampwola Wɛ yiga ne o pa‑o to. 15Wɛ nam ke nmo dedaane n kaane wom se á ta‑á ye yera dedoa mo. Ko dae chega na? Bɛ nam mo pa se o lage se abam ta‑á ye woŋo dedoa? Ko maama mo ye se abam wane á lo bia se ba taa ye Wɛ nɔɔna. Nii n yuu ne se n yé yage kaane wolo n na di n ma n ke kaane n nɔn-donne maŋa kam ne to laŋa tetare ne. 16Paŋwa Tu Baŋa Wɛ wom na ye Isarele tiina Wɛ to maa we, “Amo chula se balo a na pɛ ba ye dedoa to yage daane. Baaro ná jege puseŋa konto dwoŋi de o kaane, a vae o ni taane mo.” Konto, ta‑á yere-na á tete. Baro yé lɔ o kaane wom kwaga ne.#Matiyu 19:4-9
Bora borem dɛ dem
17Abam laam maŋe á pa Baŋa Wɛ yera mo chɛ de á na kare á ŋɔɔne wonnu telo to. Á nam ta tɛ mo we á yeiri á na ke tei á pa o yera chɛ to. Ko na ye tei to, abam kare á ŋɔɔne we, Baŋa Wɛ boŋe lanyerane mo o pae lwarem-keira ye o ba waare-ba. Abam ta maa bwei we, “Wɛ wolo na zege de chega to wo yei ne mo?”
Currently Selected:
Malaki 2: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
