Mateus 18
18
Weyer is te importanteste
Markus 9.33-37; Lukas 9.46-48
1In tëm momënt sin ti tisiple ticht pay Yeesus khom un hon kefroot:
— Weyer is te importanteste im Hërkots Raych?
2Yeesus hot en khint keruuf, hot tas tëne foer aan kextelt 3un saat:
— Ich fersichere aych tas tas woer is: wën teyer ayer leewe net ferënere tuut un net ekaal wii ti khiner kept, khomt teyer nii in te Himels Raych. 4Tas importanteste persoon im Himels Raych is tas woo sich erniitricht un kept ekaal wii tas khint. 5Un tee woo, wayl eyer mayn aanhënger is, en khint wii tas aan nëme tuut, is mich am aan nëme.
Te kefoer fon te sinte
Markus 9.42-48; Lukas 17.1-2
6Wën yemant xult traan hot tas eene fon tëne kleene woo an mich klaawe mich in xtich lost, weyer peser fer tas persoon teet ins tiifste plats fom meyer kexmis kewe mit en xweere xteen am hals kepun. 7Ay fon te welt weche tings woo macht tas ti mënxe mich in xtich lose! Tas tings mus paseere, awer owee fon tëm woo xult too traan hot!
8— Wën een fon tayn hënt ore eene fon tayn fiis macht tas tuu in sinte falst, xnayt se ap un xmays em wech! Wayl is peser tas tuu ins eewiche leewe khomst oone een hant ore eene fuus als ti tswaay hënt un ti tswaay fiis hon un ins eewiche fayer kexmis kewe. 9Wën eens fon tayn aue tich in sinte fale macht, tuu tas raus rope un xmays es wech! Wayl is peser wëns tuu ins eewiche leewe rin khomst mit ploos een au als ti tswaay hon un ins hels fayer keworef kewe.
Te ferloerne xoof
Lukas 15.3-7
10— Past uf, lost khee eene fon tee kleene oone acht! Ich fersichere aych tas tëne sayn ëngle imer pay mayn Fater sin, tee woo im himel is. 11(Wayl te Soon fom Man is khom fer se rete weyer ferloer is.)
12— Was mënt teyer? Was macht en man woo hunert xeef hot un een fon tëne sich ferleere tuut? Meecht eyer net ti noyn un noyntsich am kraase lose uf em përich un teet te ferloerne xoof suuche keen? 13Ich fersichere aych tas tas woer is: wën tee se fine tuut, kept eyer fiil mee froer weche tëm xoof als weche tëne noyn un noyntsich woo sich net ferloer hon. 14Soo aach ayre Fater, woo im himel is, woo net wil tas khee ëne fon tëne kleene sich ferleere sol.
Te pruuter woo sinte macht
15— Wën tayne pruuter keeche tich sinte macht, kee un tsaych tëm was eyer ferkheyert kemach hot. Awer mach tas in priwaat, ploos unich aych tswaay. Wën tee persoon tayne konseel aan nëmt, tan host tuu tayne pruuter tsurik kriit. 16Awer, wën tee tich net aan heyert, hool een ore tswaay persoone mit, fer se mache was ti Hayliche Xrifte xike. Ti saan: “Yeete pexultichung mus fersichert kewe mit en wort fon weenichstens tswaay tsayer”. 17Awer, wën te persoon woo sinte kemach hot net ti persoone aan heyert, tan saa ales fer ti khërich. Un, wën tee net ti khërich aan heyert, pehantel iim wii en pakaan ore wii en xtayer kaseerer.
Ti macht fer erlaupnis kewe ore ferpiite
18— Ich fersichere aych tas tas woer is: was teyer ferpiite tuut uf te eyert, kept ferpoot im himel, un was teyer erlaupnis kept uf te eyert wërt erlaupnis kriin im himel.
19— Un fersichere aych tas tas aach woer is: yeetes mool woo tswaay fon aych woo uf te eyert sayt es selwiche ferlange tuut in kepeet, tas wërt te Fater, woo im himel is, mache. 20Wayl, woo tswaay ore tray paysamer sin in mayne naame, too sin ich pay tëne.
Te xlechte knecht
21Tan is Pheeter ticht pay Yeesus khom un hot kefroot:
— Hër, wii oft mus ich mayne pruuter, woo keeche mich sinte kemach hot, fertsaye? Siwe mool?
Yeesus hot keantwort:
22— Nee! Net ploos siwe mool fertsaye, awer sipstich mool siwe. 23Wayl te Himels Raych is wii en kheenich woo aprechnung ferlangt hot fon sayn knechte. 24Klaych am aanfang hon se tëm yemant keprung woo milioone silwerne nikle xultich waar. 25Awer te knecht hot khee kelt fer tas petsaale. Tan, fer ti xulte petsaalt kriin, hot sayne hër, te kheenich, keortnet tas te knecht ferkhaaft keept als sklaawe mit sayn fraa un sayn khiner un tas sayn kans aychentum ferkhaaft keept. 26Awer te knecht hot sich foer te hër kekniit un ferlangt: “Say ketulich mit mich, hër, un ich tuun aych ales petsaale.”
27Te hër hot em ketauert, hot sayn xulte fertsayert un hot em fort keen kelos. 28Te knecht waar khaum too fort un hot ëne fon sayn aarwat khameraate ketrof woo tëm hunert silwerne nikle xultich waar. Tee hot sayne khameraate an te xtros kehool un hot aankefang tee se xitle, am saan: “Petsaal was tuu mich xultich pist!”
29— Tan hot sayne khameraate sich foer tëm aan kekniit un ferlangt: “Say ketulich mit mich un ich tuun tich ales petsaale.”
30Awer, tee hot net tsuu kesaat. Kraat es keeche teel, hot te anere in ti katee kexikt pis eyer ti xulte petsaale teet. 31Wii ti anere knechte kesiin hon was paseyert waar, hon se sich rewolteyert un sin pay te hër kang fer ales tëm fertseele. 32Tan hot te hër tee knecht keruuf un saat: “Xlechte knecht! Tuu host meyer ferlangt, un tesweche hon ich tayn kanse xulte fertsayert. 33Also, soo hest tuu mise tayne khameraate aach petaure, soo wii ich tich petauert hon.”
34Te hër is aarich wuutich kep un hot te knecht in ti katee kexikt fer kextrooft kewe pis eyer ales petsaalt het.
35Un Yeesus hot xlus kemach, am saan:
— Is tas was mayne Fater, woo im himel is, mache tuut mit aych wën yeete ëne net sayne pruuter hërtslich fertsaye tuut.
Currently Selected:
Mateus 18: NTHunsrik
Highlight
Share
Copy
Want to have your highlights saved across all your devices? Sign up or sign in
2022 Sociedade Bíblica do Brasil
