Akte 14

In Ikoonio

1Tas selwiche is paseyert in te xtat Ikoonio. Phaulus un Barnabë sin in ti sinakook kang un hon soo xeen kexproch tas fiile yute un aach tii woo khee yute waare keklaapt hon. 2Awer ti yute woo net keklaapt hon, hon tii woo khee yute waare uf kehetst keeche ti kriste. 3Ti aphostle sin fiil tsayt in Ikoonio keplip, mit koraaj am xpreche iwer te Hër Yeesus. Un te Hër hot ketsaycht tas tëne sayn mensaaj iwer tëm sayne knaate woer waar, wayl eyer hot tëne ti macht kep fer kroose wunere se mache. 4Ti pewooner fon te xtat waare keteelt: phaar hon ti yute tsuu kextan un anere hon ti aphostle tsuu kextan.

5Tan hon tii woo khee yute waare un ti yute, mit sayn xëfe, resolweyert ti aphostle xlecht se pehantle un toot xmayse mit xteen. 6Wii Phaulus un Barnabë tas se wise kriit hon, sin se auskeris noo Listra un Dërbe, xtet fom tistrikt Likaoonia, un fer ti nachparx rechioone. 7Un too hon se te ewankeelium aankesaat.

In Listra un Dërbe

8In te xtat Listra waar en man woo imer am sitse waar, wayl eyer laame fiis hat. Eyer waar laam uf ti welt khom un hot nii kang kehat. 9Tee man hot Phaulus sayn wërter keheyert, un Phaulus hot kesiin tas tee keklaapt hot tas eyer kuriert kewe khont. Tan hot Phaulus tëm xtram aan kekukt 10un saat in hat xtim:

— Xtay uf un playp xteen!

Te man is uf kehupst un hot aankefang se keen. 11Wii tas folek kesiin hot was Phaulus kemach hat, hon se aankefang se xraaye, in sayn aychne xprooch:

— Ti kote hon ti mënxlich forem kenom un sin runer khom pis uns!

12Ti hon te naame Jupiter kep fer Barnabë un Merkurio fer Phaulus, wayl es waar Phaulus woo am xpreche waar. 13Jupiter sayne thëmpel waar kraat am inkang fon te xtat, un te priister fon tëm kot hon okse un pluume krëns keprung pis ans toer fon te xtat. Tee un tas folek wolte tas fii xlachte in en relichioos seremonii un opfere fer Barnabë un Phaulus. 14Wii ti tswaay aphostle tas se wise kriit hon, hon se sayn tsaych feris, sin tswixe tas folek kexprung un hon kexraayt:

15— Froynte, warom sayt teyer tas am mache? Meyer sin ploos mënxe, wii teyer. Meyer sin hier te ewankeelium am aan saan fer aych tas teyer tas tings in xtich lose solt woo fer niks tiine tuut. 16In te ferkangne tsayt hot Hërkot kelos tas ale foleke uf sayne aychne weech kang weere. 17Awer Hërkot tsaycht imer weyer eyer is torich tas kuute tings woo eyer macht: is tee woo te reen fom himel xikt un ti ërnte in te richtich tsayt; is tee weyer imer naarungs mitel kept fer aych un filt ayer hërts mit frayt.

18Toch mit ales was ti aphostle kesaat hate, hon se ti layt khaum tsurik kehal kriit fer net tas fii kaput mache fer tëne en opfer mache. 19Phaar yute woo fon te xtet Antiokia un fon Ikoonio khom waare hon tas folek uf sayn sayt keprung kriit, hon Phaulus mit xteen kexmis un hon em pis aus ti xtat kexlept, wayl se ketënkt hate eyer weyer kextorep. 20Awer, wii ti kriste sich um tëm rom kesamelt hon, is eyer uf kextii un is noch mool in ti xtat kang. Un am neekste taach sin Phaulus un Barnabë noo te xtat Derbe kang.

Te tsurik weech noo Antiokia fon Siiria

21Phaulus un Barnabë hon te ewankeelium aankesaat in Dërbe, un fiil pewooner fon tee xtat hon Yeesus sayn wort aankenom. Tëm noo sin se tsurik kang noo te xtet Listra, Ikoonio un Antiokia fon Pisiitia. 22Tii hon muut un koraaj fer ti kriste kep tas se xtram am klaawe playwe solte. Un hon aach keuntericht tas mer fiil layte mit mache mus tas mer khan in te Himels Raych khome. 23In yeete khërich hon ti aphostle fiirer inkextelt. Tii hon kepeet, faste kemach un hon ti fiirer ap kep uf Hërkot sayne xits, an weem tii keklaapt hate.

24Tan sin Phaulus un Barnabë te tistrikt fon Pisiitia torich kang un sin pis an ti prowins fon Panfiilia khom. 25Hon tas Wort aan kesaat in Perge un tan sin se runer noo em meer kang, pis Ataalia. 26Fon too aan sin se mit poot noo Antiookia fon Siiria kefaar, woo sii ap kep waare fer Hërkots knaate, fer ti aarwat woo se yets fërtich am mache waare. 27Wii se tort hiin khom sin, hon se ti kans kemaynte samer keruuf un hon fertseelt ales was Hërkot kemach hat torich tëne. Un hon fertseelt wii Hërkot te weech uf kemach hat tas tii woo khee yute sin aach klaawe khënte. 28Un sin lang tsayt too keplip mit Yeesus sayn aanhënger.

Currently Selected:

Akte 14: NTHunsrik

Highlight

Copy