إنجيل متّى 11

الفصل حضاش

1ملّي كمّل يَسوع الوَصايا ديالو نالتلامد ديالو الطناش، مشى من تمّاك باش يعلّم ويبشّر في المُدُن ديالوم. 2وْيوحَنّا، ملّي سمَع وْهُوَ في الحبس بأعْمال المسيح، صيفط لو التلامد ديالو 3باش يسقصيواه: "واش أنتينا هُوَ الّي ماجي أَوْلا نتسنّاو واحد يَخُر؟" 4ردّ عليهُم يَسوع وْقالّوم: "مْشيو وْخبرو يوحَنّا بْهَد الشي الّي كتسمعوه وْكتشوفوه. 5العُميان رجعو كيشوفو والعُرَج كيمشيو والمبْراصين كيتصفّاو والصمكين كيسمعو والميّتين كيرجعو بالروح والمساكن كيتبشّرو بْخبَر الخير. 6وْمبروك الّي ما كَيعتَر شي بْسبابي."

7ملّي مشاو التلامد د يوحَنّا، يَسوع بدا كيهدَر مع ديك الجماعة على يوحَنّا: "شنّو خرجْتو تشوفو في الخلا؟ شي قصبة كيحرّكاْ الريح؟ 8وَلكن شنّو خرجْتو تشوفو؟ شي رَجل لابس جلّابة رفيعة؟ راه الّي لابسين الجلالب الرفيعة هُمَ في الديور د الملوك. 9وَلكن شنّو خرجْتو تشوفو؟ شي نَبي؟ إيّاه، كنقول لكُم وْحسَن من واحد النَّبي. 10هَدا هُوَ الّي كَتبو عليه: «ها انا كنصيفط المرسول ديالي قدّامك، الّي غادي يوجّد الطريق ديالك قدّامك.»#11‏:10 هَد الاقتباس من سفر النَّبي ملاخي 3‏:1. 11كنقول لكُم الحقّ، ما كاين حتّى واحد من بين الّي اتّولدو من شي مراة كبَر من يوحَنّا المَعْمَدان، وَلكن الصغير في مُلك السماوات، هُوَ كبَر منّو. 12من أيّام يوحَنّا المَعْمَدان حتّى نْدابا، الناس كيهجمو على مُلك السماوات والعنافين كيحاولو يخطفوه بالدراع. 13حيت الأَنْبياء كاملين والشريعة تنبّأو حتّى نْيوحَنّا. 14وِادا بغيتو تقبلوه، راه هَدا هُوَ إيليّا الّي كان غادي يجي. 15الّي عندو الودْنين باش يسمع، لازم يسمع. 16لِمّن نشبّه هَد الجيل؟ كيشبه نْشي عيال ݣالسين في الأسواق كيعيّطو نْصحابوم، 17كيقولو: «غيّطْنا لكُم وْما شطحْتو شي، نوّحْنا لكُم وْما حزنْتو شي.» 18حيت جا يوحَنّا ما كياكل شي وْما كيشرب شي، وْكيقولو: «فيه شي جنّ.» 19جا اِبن الإنسان كياكل وْكيشرب، وْكيقولو: «راه هَدا واحد الرَّجل وكّال وْسكايري، مصاحب مع القبّاطة د الضرائب والمُدْنبـين.» والحكْمة كتبرّراْ الأعْمال ديالاْ."

20ديك الساعة بدا يَسوع كيوبّخ المُدُن الّي عمل فيهُم الأغْلبيّة د المُعْجزات ديالو الّي، واخّا هَيداك، ما تابو شي. 21"الويل لِلِك، آ كورَزين! الويل لِلِك، آ بيت صَيدا! حيت كَكانو تعملو في صور وْصَيدا المُعْجزات الّي تعملو فيكُم، كَكانو تابو شحال هَدي في الخيش والرماد. 22وَلكن كنقول لكُم بلّي الحالة د صور وْصَيدا غادي تكون في يوم الدين ساهلة من الحالة ديالكُم. 23وانتينا، آ كَفْرِناحوم، واش ما غادي شي تتعلّى نالسما؟ لا، غادي تهوّد نالهاوية. حيت كَكانو تعملو في سَدوم المُعْجزات الّي تعملو فيك، كَكانت بقات حتّى ناليوما. 24وَلكن كنقول لكُم بلّي الحالة د أرض سَدوم غادي تكون في يوم الدين ساهلة من الحالة ديالكُم."

25في ديك الساعة جاوب يَسوع وْقال: "كنحمدك، آ بابا، ربّ السما والأرض، حيت خبّعْتِ هَد الأُمور على الحُكَماء والعُلَماء وْبيّنْتِها نالعيال الستيتْوين. 26نعم، آ بابا، حيت عجبك يكون هَيداك. 27بابا سلّم لي كُل شي. وْما كاين حتّى واحد الّي كيعرف الِابن من غير الآب، وْما كاين حتّى واحد الّي كيعرف الآب من غير الِابن، وهَداك الّي بغى الِابن يورّيه لو. 28آجيو نْعندي، أنتُمَ الّي تعْبانين وْعليكُم بزّاف د التقال، وانا غادي نعطيكُم الراحة. 29رفدو النير ديالي عليكُم وْتعلّمو منّي. راه أنا طيّب وْمتواضع القلب، وْغَد تجبرو الراحة نْراسكُم. 30حيت النير ديالي ساهل والحمل ديالي خفيف."

Currently Selected:

إنجيل متّى 11: ary

Highlight

Copy