أعمال الرُسُل 7

الفصل السابع

1وْقال رئيس المسؤولين في بيت المَقْدس: "واش هَد الأُمور د بالصّحّ؟" 2وْقال إسْتِفانوس: "آ الرجال الخوت والوالِدين، سمعوني. اللّٰه المجيد ظهَر نإبراهيم ملّي كان باقي في مَسوبوطَميا#7‏:2 يعني، البلاد بين النهرين، الّي هي دابا العراق. قبل ما يسكن في حاران، 3وْقال لو اللّٰه: «خرج من بلادك وْمن عند أهلك وآجي نالبلاد الّي غادي نورّيها لك.»#7‏:3 هَد الاقتباس من سفر التكوين 12‏:1. 4ديك الساعة خرج من بلاد الكَلْدانيّين وْسكن في حاران، وْمن بعدما مات باباه، رحّلوْ اللّٰه من تمّا نْهَد البلاد فاين أنتُمَ ساكنين دابا. 5وْما عْطاه فيها حتّى شي وَرت، واخّا غير سطمة، وَلكن وَعدوْ باش يعطيها لو مِلك لِلو وْنالدرّيّة ديالو من موراه، ملّي باقي ما كان عندو حتّى شي ولد. 6وْقال اللّٰه هَيدا: «الدرّيّة ديالك غادي تكون برّانيّة في واحد البلاد غريبة ويردّوهُم عبيد ويعدّبوهُم أربع مية عام. 7والأُمّة الّي غادي تسْتَعبدوم، غادي نحاسباْ أنا، وْمن بعد ديك الشي غادي يخرجو من ديك البلاد.»#7‏:7 هَد الاقتباس من سفر التكوين 15‏:13‏-14. وْقال اللّٰه: «ديك الساعة غادي يعبدوني في هَد الموطَع،»#7‏:7 هَد الاقتباس من سفر الخروج 3‏:13. 8وْعْطاه عهد الطهارة. وْهَيدا إبراهيم ولد إسحاق وْطهّروْ في النهار التامن، وإسحاق ولد يَعْقوب ويَعْقوب ولد الجدود الطناش.

9"إيوا، الجدود حسدو خاهُم يوسف وْباعوه نْشي ناس الّي ادّاواه نْمصر. وْكان اللّٰه معاه، 10وْحرّروْ من المشاكل ديالو كاملة وْعْطاه النعْمة والحِكمة قدّام فِرْعون مَلِك مصر، وْهُوَ ردّوْ حاكم على مصر وْعلى الدار ديالو كاملة.

11"في ديك الوقت جا واحد الجّوع كبير على البلاد د مصر كاملة وْكَنْعان وْكان الضيق كبير، والجدود ديالنا ما جبرو ما ياكلو. 12وْملّي سمَع يَعْقوب بلّي كاين الزرع في مصر، صيفط جدودنا المرّة الُولى. 13وْفي المرّة التانية، يوسف ظهّر راسو نالخوت ديالو، وْفِرْعون عرف الأصل د يوسف. 14وْصيفط يوسف باش يجيبو يَعْقوب باباه وْكُل الأهل ديالو، الّي كانو خمسة وْسبعين واحد. 15وْهوّد يَعْقوب نْمصر وْمات تمّاك هُوَ وْجدودنا، 16وْرحلو نْشَكيم وْدفنوهُم في القبَر الّي شراه إبراهيم بواحد التمن مقبول من بَني حَمور في شَكيم. 17وْملّي قرّب وقت الوعد الّي حلف اللّٰه بِه نإبراهيم، كان الشعب كيزيد وْكيكتَر في مصر، 18حتّى جا واحد المَلِك يَخُر في مصر الّي ما عرف شي يوسف، 19وْغدر هَدا بالشعب ديالنا وْلزّم عليهُم يسمحو في الصبيان ديالوم باش يموتو.

20"وْفي ديك الوقت، خلق موسى وْكان مرْضي عند اللّٰه، وْتربّى تلت شهور في الدار د باباه. 21وْملّي سمحو فيه، ربّاتوْ بنْت فِرْعون وْكان فحال ابْناْ. 22وْتعلّم موسى الحِكمة كاملة د المصريّين وْكان قوي في الكلام والفعل. 23وْملّي كمّل أربعين عام، بغى يزور خوتو، بَني إسْرائيل. 24وْملّي شاف واحد المصري كيظلم واحد مِنّوم، حامى عليه وانْتَقم نالمغْلوب وْقتل المصري. 25وْظنّ موسى بلّي خوتو غادي يفهمو بلّي اللّٰه غادي يحرّروم على يَدّو، وَلكن هُمَ ما فهمو شي هَيداك. 26ولّا غدّا موسى فاجأ جوج د الإسرائليّين الّي كانو كيتدابزو، وْبغى يصالحوم، وْقالّوم: «آ الرجال، أنتُمَ خوت. علاش كتظلمو بعضيّاتكُم؟» 27والرَّجل الّي كان كيظلم يَخُر دفَع موسى وْقال لو: «شكون عملك حاكم وْقاضي علينا؟ 28واش بغيتِ تقتلني فحال ما قتلْتِ المصري البارح؟»#7‏:28 هَد الاقتباسات من سفر الخروج 2‏:13‏-14. 29وْملّي سمَع هَد الكلام، هرب موسى نْأرض مِدْيان وْكان برّاني فيها، وْتمّاك ولد جوج د الولاد.

30"وْملّي ݣازَتْ أربعين عام، ظهَر لو ملاك الرَّبّ في الصحرا قريب من جبل سيناء، في اللهبة د العافية في واحد العلّيقة. 31وْملّي شاف موسى ديك الشي، تعجّب. وْملّي كان كيقرّب باش يشوفوْ مزيان، جا عندو صوت الرَّبّ: 32«أنا إلَه جدودك، إلَه إبراهيم وإلَه إسْحاق وإلَه يَعْقوب.» وْتّرْعد موسى من الخوف وْما زعَم شي يشوف. 33وْقال لو الرَّبّ: «حيّد الصبّاط من رِجلك حيت الموطَع فاين أنتينا واقف هُوَ أرض مقدّسة. 34أنا شفْتْ بالتحقيق عداب الشعب ديالي في مصر وْسمعْت الشكاوي ديالوم وْنزلْتْ باش نحرّروم. آجي دابا باش نصيفطك نْمصر.»#7‏:34 هَد الاقتباسات من سفر الخروج 3‏:5‏-7 و10.

35"هَدا موسى الّي رفضوه وْقالو لو: «شكون عملك حاكم وْقاضي علينا؟» هَدا هُوَ الّي صيفطوْ اللّٰه حاكم وْمُنجّي على يد الملاك الّي ظهَر لو في العلّيقة. 36هَدا خرّجوم من مصر وْهُوَ كيعمل العجايب والعلامات في أرض مصر وْفي البحَر الأحمر وْفي الصحرا أربعين عام.

37"هَدا هُوَ موسى الّي قال نْبَني إسْرائيل: «اللّٰه غادي يجيب واحد النَّبي فحالي من بين الخوت ديالكُم.»#7‏:37 هَد الاقتباس من سفر التثنية 18‏:15. 38وْموسى بْنفسو كان في المجْمع في الصحرا، مع الملاك الّي كان كيتكلّم معاه في جبل سيناء وْمع جدودنا، وْهُوَ الّي قبل الكلمات الحيّة باش يعطيها نّا. 39وَلكن جدودنا ما بغاو شي يطيعوه وْرفضوه، حيت رجعو نْمصر في قلبوم. 40وْقالو نْخاه هارون: «عمل نّا الآلِهة الّي تسبقنا، حيت هَدا موسى الّي خرّجنا من أرض مصْر ما كَنْعرفو شي شنّو وقَع لو.»#7‏:40 هَد الاقتباس من سفر الخروج 32‏:1 و23. 41ديك الساعة عدّلو واحد العجل وْقدّمو لو الدبايح، وْفرحو بالأعْمال د يَدّوم. 42وْسمَح فيهُم اللّٰه، وْدفعوم باش يعبدو النجوم د السما، فحال ما هُوَ مكتوب في كتاب الأَنْبياء: «آ دار إسْرائيل، واش لِلي أنا دبحْتو الدبايح والقرابـين مدّة أربعين عام في الصحرا؟ 43رفدْتو معكُم الخيمة ديال "مولوك" حتّى هو، والنجمة د الإلَه ديالكُم "رَمْفان،" والأصْنام الّي عدّلْتوها باش تعبدوها. على ديك الشي أنا غادي نْنفيكُم من بابل لْهيه.»#7‏:43 هَد الاقتباس من سفر النَّبي عاموس 5‏:25‏-27.

44"وْكانت مع جدودنا في الصحرا خيمة الشهادة الّي صنعاْ موسى كيفْما آمر اللّٰه على حسب الشكل الّي شافوْ. 45وْجدودنا، ملّي قبطو الخيمة، دخّلوها بْقيادة يشوع، ملّي ملكو البلاد من الأُمَم الّي طردوم اللّٰه من قدّام وَجهوم، وْبقات تمّا حتّى نالأيّام د داود. 46وْداود جبر النعْمة قدّام اللّٰه وْطلب باش يوجّد بيت العبادة نالإلَه د يَعْقوب، 47وَلكن سُليمان هُوَ الّي بنى لو الدار. 48واخّا الإلَه العالي ما كيسكن شي في الديور الّي مصنوعين باليَدّين، فحال ما كيقول النَّبي: 49«السّما هُوَ العرش ديالي والأرض هي الموطَع د رِجلي. شنّي هي الدار الّي غَد تبنيو لي؟ كيقول الرَّبّ، وْشنّو هُوَ الموطَع د راحتي؟ 50واش ماشي يَدّي الّي صنعَتْ هَد الأُمور كاملة؟»#7‏:50 هَد الاقتباس من سفر النَّبي إشعيا 66‏:1‏-2.

51"آ قاصحين الأعْناق، ناس بالقلوبة والودْنين بلا طهارة! أنتُمَ كتعملو فحال جدودكُم، وْدائمًا كتعارضو الروح القُدُس. 52شكون هَدا من الأَنْبياء الّي ما تعدّاو شي عليه الجدود ديالكُم؟ هُمَ قتلو الّي سبقو وْخبرو بالمجي د المتّاقي، الّي أنتُمَ دابا سلّمْتوه وْقتلْتوه، 53أنتُمَ الّي قبطْتو الشريعة على يد الملائكة وْما عملْتو شي بِها."

54ملّي سمعو هَد الشي، طار لوم بزّاف وْغزّزو السنان ديالوم عليه. 55أمّا إسْتِفانوس شاف في السما وْهُوَ معمّر بالروح القُدُس، وْشاف مجد اللّٰه وْيَسوع واقف على الّيمين د اللّٰه، 56وْقال: "ها انا كنشوف السما مفتوحة وِابن الإنسان واقف على الّيمين د اللّٰه!" 57ديك الساعة غوّتو بْصوت عالي وْشدّو الودْنين ديالوم وْهجمو عليه مجموعين، 58وْخرّجوه على برّا من المدينة وْرجموه. والشهود عملو الحوايج ديالوم حدا الرِّجلين د واحد الشاب مسمّي شاول. 59وْملّي كانو كيرجمو إسْتِفانوس، هُوَ دعى وْقال: "يا رَبّي يَسوع، قبل الروح ديالي!" 60وْطاح على الركابي ديالو وْغوّت بْصوت عالي: "يا رَبّي، ما تحسب شي عليهُم هَد الدنب!" وْملّي قال هَد الشي مات.

Currently Selected:

أعمال الرُسُل 7: ary

Highlight

Copy