أعمال الرُسُل 1

الفصل الأوّل

1الكلام الُوّل كتبْتوْ، يا ثاوْفيلُس، على كُل حاجة الّي يَسوع بدا كيعملاْ وْكيعلّم بِها، 2حتّى نالنهار الّي اتّرفع فيه من بعدما وصّى بالروح القُدُس الرُّسُل الّي اختاروم. 3وْيَسوع وَرّاهُم نفسو عاود بْبزّاف د الحُجَح الحقيقيّين من بعدما تعدّب وْهُوَ كيظهَر لوم أربعين يوم وْكيتكلّم على مُلك اللّٰه. 4وْملّي كان مجمّع معهُم، وصّاهُم ما ي‍مشيو شي من أُورُشَليم، وَلكن يتسنّاو ديك الشي الّي وَعد بِه الآب الّي "سمعْتوه مِنّي، 5حيت يوحَنّا غطّس بالما، أمّا أنتُمَ غَد تْتغطّسو بالروح القُدُس من دابا شي أيّام قليلة." 6في ديك الساعة هَدوك الّي كانو مجمّعين معاه سقصاواه وْقالو: "يا رَبّ، واش في هَد الوقت غادي تجدّد المُلك نإسْرائيل؟" 7وْقالّوم: "ما عندكُم شي الحقّ تعرفو الأزمنة والأوْقات الّي عملوم الآب بالسلْطة ديالو، 8وَلكن أنتُمَ غَد تقبطو القوّة ملّي ينزل عليكُم الروح القُدُس وْغَد تكونو شهود لِلي في أُورُشَليم وْفي كُل اليَهوديّة والسامِرة وْحتّى نالطرف الاخّر د الدنيا."#1‏:8 "ملّي ينزل عليكُم الروح القُدُس": في هَد النصوص "الروح القُدُس" هُوَ الروح د الله وعلى هَد الشي تصريف الفعل مدكّر.

9وْملّي قال هَد الشي وْهُمَ كيشوفوه، اتّرفع نالعلو حتّى غطّاتوْ واحد السحابة من قدّام العينين ديالوم. 10وْملّي كانو هازّين العينين ديالوم في السما وْهُوَ كيبعّد، قرّبو جوج د الرجال وْوَقفو حداهُم بالحوايج بُيَط 11وْقالو لوم: "آ الرجال الجَليليّين، مالكُم واقفين كتشوفو في السما؟ هَدا يَسوع، الّي اتّرفع قدّامكُم نالسما، غادي يرجَع هَيدا كيفْما شفْتوه طالع نالسما." 12ديك الساعة رجعو نأُورُشَليم من الجّبل الّي مسمّي جبل الزيتون، الّي هُوَ قريب نأُورُشَليم مسيرة سبت.#1‏:12 يعني تقْريبًا كيلومتر 13وْملّي وَصلو، طلعو نالبيت في الفوقي الّي كانو كينزلو فيه. تمّاك كان بُطْرُس ويَعْقوب وْيوحَنّا وأَنْدَراوس وْفيلِبُّس وْتوما وْبَرْثولُماوس وْمتّى ويَعْقوب بن حَلْفى وْسِمْعان الغيور ويَهودا بن يَعْقوب. 14هَدو كاملين بْقلب واحد كانو كيداومو على الصلاة مع النسا وْمَرْيَم يمّاه د يَسوع وْمع الخوت ديالو.

15وْفي ديك الأيّام ناض بُطْرُس فوسط الخوت، وْكانو الّي حاضرين تقْريبًا مية وْعشرين واحد، وْقال: 16"آ الرجال الخوت، كان لازم يتكمّلو الكتوبة الّي تكلّم بِها الروح القُدُس من قبل بْدقوم داود على يَهودا، الّي ݣوّد نْهَدوك الّي شبّرو يَسوع، 17وْكان محسوب معنا وْكان حقّو في هَد الخدمة. 18(هَدا شرى واحد الفدّان بالأُجرة د الظلم، وْطاح وْهُوَ كيشوف قدّامو وانشقّ من الوسط وْتهرّقو المصارن ديالو كاملين. 19وْرجع ديك الشي معروف عند سكّان أُورُشَليم كاملين حتّى تسمّى ديك الفدّان باللُغة ديالوم "حقل دَما" يعني فدّان الدم.) 20حيت مكتوب في كتاب المزامير: «ترجَع الدار ديالو خربة وْما يسكن فيها حتّى واحد والخدْمة ديالو يشبّراْ واحد يَخُر.»#1‏:20 هَد الاقتباس من المزمور 69‏:25. 21على هَد الشي واجب يرجَع شي واحد شاهد معنا بالقيامة، وْخصّوْ يكون من ديك الرجال الّي ترافقو معنا الوقت كامل ملّي كان الرَّبّ يَسوع كيمشي وْكيجي فوسطنا، 22من المعموديّة د يوحَنّا حتّى نالنهار فاش اتّرفع علينا." 23واقتَرحو جوج د الرجال: يوسف الّي مسمّي بارسابا، الّي كيقولو لو يوسْتُس، وْمَتِّياس. 24وْصلّاو هَيداك: "يا رَبّ، أنتينا كتعرف القلوبة د الناس كاملين، ورّي نّا شكون من هَد الجوج الّي اختارْتِ 25باش يقبط حقّو في هَد الخدمة ويكون رَسول فْعوط يَهودا، الّي مشى نالموطَع ديالو." 26من بعد ضربو العود وْجا العود في مَتِّياس وْتّحسب مع الحضاش د الرُّسُل.

Currently Selected:

أعمال الرُسُل 1: ary

Highlight

Copy