မထ 3
3
လွင် ဒါ ဆာရာ အာယောဟာန် ဟုဝ် ဒါရာ ဇဝ်ဖြာ
1ဒေါ အန် တီ န့ မိုဝ်း ဒါ ဆာရာ အာယောဟာန်၊ အီ စိုပ် ဒူအီ ခဲင် အိုမ်။ အန် တး ဟုဝ် ဒါရာ ဇဝ်ဖြာ ခဲင် ပြဲ ကာဟဝ်း အီ ကွယ် ခဲင် အိူင် ယူဒါ။ 2အန် တဝ်း၊ “တဲး ဘေ လှုဝ်း ဘော ဝဲန် မှာပ် ဘေ။ အာခြာဝ် ဒီ အိုပ် ဇဝ်ဖြာ ကာဒါယ် ဟဲ့ ကာတတ် ဒီ တး။” 3ဒူအီ အီ ဘျာန် ဂြုဝ်း ဇဝ်ဖြာ၊ အီ စိူဝ် အာအီဆာယ တွိုန်၊ အန် ဟဲ့ ဒွိုမ် ကာလာင် လွင် ဒါ ဆာရာ အာယောဟာန်။ အန် ဟဲ့ ဒွိုမ် တဝ်း၊
“န့ ဒီ မိုဝ်း ဒူအီ အူ ဝီ ဒီ ကာလာင် ဂြုဝ်း ခဲင် ပြဲ ကာဟဝ်း၊ ‘တဲး ဘေ မ့ပြာယ် န့တေန့် ပီ လုဝ် ဝဝ့် ဇဝ်ဖြာ။ ဘူင်၊ တဲး န့ ဆိူဝ်။’”
4ဒါ ဆာရာ အာယောဟာန် တွိုန်၊ အန် တာ ခြိုင် ဟိုက် မင်ပြွင့် ကာဟာတ့်၊ တာ ဆဲ့ ဟုန်၊ ပက် ဒီ ညွယ် အန်။ အန် မိူဝ် ဟူမ် မာ အာဇူင့် ဘော ငါမ် မာဖျီန်။#3:4 အာခြာဝ် ဒေါ အန် တီ ဂေ ဒူအီ အီ ဘျာန် ဂြုဝ်း ဇဝ်ဖြာ ဘောကာဂ့လျီတ် စှိုပ် ခြိုင် ဇိုဝ် တီ ဘော ဟူမ် ပီ ဒီ ဟူမ် မျုဝ် တီ။ 5ဂေ ဒူအီ အီ ကွယ် ခဲင် မိူင် ယေရူဆာလဲမ်၊ ဘော ဂေ အီ ကွယ် ခဲင် အိူင် ယူဒါ ဘော အိူင်၊ ဘော ဂေ ဒူအီ အီ ကွယ် ကာတတ် ဘ့လဲင် ယောဒါန်၊ ဂေ ဘောကာဂ့လျီတ် လေး ဒူင် ကွယ် ဂေ၊ ဟာဝ် ထူမ် ဒါ ဆာရာ အာယောဟာန်။ 6ဂေ မိူဝ် ကာလာင် မှာပ် ဂေ၊ တဲး အာယောဟာန် စိုပ် ဂေ ခဲင် အိုမ် အီ စိူဝ် ဘ့လဲင် ယောဒါန်။
7န့ ယီ မိုဝ်း ဂေ ဒူအီ ခဲင် ဖိုင် ဖာရီဆဲ ဘော ဂေ ဒူအီ ခဲင် ဖိုင် ဆာဒူခဲ၊ ဂေ ကိူန် တး ဒူင် ကွယ် အာယောဟာန် တွိုန်၊ တဲး အန် စိုပ် ဂေ ခဲင် အိုမ်။ ဒေါ ယိုဝ် အန် ဒူအီ ဇိုဝ် တီ၊ အန် ဝီ တဝ်း ဒီ ဂေ၊ “အိုယ်၊ ဘေ အီ ပီ အာမျုဝ် ဟန့် ငျီန်။ အာဆေ ဟဲ့ တဝ်း ဒီ ဘေ၊ ဘေ ဒီ ပွိုန် ဒီ လေး တဝ် ဆေ ဇဝ်ဖြာ ဟီ ရူ ကာဆဝ် ဒီ ဘေ နာ အာတ့် နီ။း 8ဘော ပီ ဘူင် ဘေ ဘော ဂြုဝ်း ပီ ကာလာင် ဘေ၊ ဘေ လုဝ် တဲး န့ ကာရမ်။ တဲး ဘေ ဝဲန် နဝ်း ဘြိမ် ဘေ၊ ဒိုဝ်း နဝ်း ကာမာယ်။ 9ကွဲ့ တဲး ဘေ ပီခိုက် နဝ်း ဘေ ကူပ် တဝ်း ဘေ၊ ‘ဒါ အာဘြာဟမ် မုး ဂုန့် ဒင် ယေ။’ အုဝ် တဝ်း ဒီ ဘေ၊ ဆေ ဘေ တူ ဒူပ် ဆီချာ ဇဝ်ဖြာ ပီ ဂေ လှုက်လှာန် အာဘြာဟမ် အာခါခ်ု၊ ဇဝ်ဖြာ ဒီ ဘူင် တဲး မာဝ် ဂေ နီ ဝီ ဘဲန် လှုက်လှာန် ဒါ အာဘြာဟမ် တွိုန်။ 10ဒေါ တီ နီ၊ န့ ပီ မိုယ် ဟဲ့ ဟွတ့် ကွယ် ဒီ ဒင် ဟေ။ ဟေ ဒွန် ကာဒင် အီ တူ မိုဝ်း ဘ့လေ မွှိုမ်၊ ဂေ ဒီ ဂ်ု ဝဲန်၊ ဝီ ဒုဝ့် ခဲင် ငဝ်၊ တဲး န့ ကာဆိုမ်။
11အုဝ် စိုပ် ဘေ ခဲင် အိုမ်၊ တဲး န့ ဘျ၊ ဘေ ဟဲ့ လှုဝ်း မှာပ် ဘေ၊ ဝဲန် မှာပ် ဘေ။ န့ ယီ မိုဝ်း အူ ဝီ၊ အန် ဒီ ဝီ တး ဝါယ် အုဝ်။ ပွုန် အန် ဆီ တာင် လွှိုမ် ပွုန် အုဝ်။ ခူဒိန့် အန် မိူဝ်၊ အုဝ် ညှမ် ကာအာပ် ဂူင့်။ အန် ဒီ ဘော တဲး နဝ်း ဖွိုမ် ဇဝ်ဖြာ အိုပ် ဘေ။ ပီ ဒီ ဘူင် အန် ဒီ ဘေ ပေါ အူ မျုဝ်၊ န့ ဘော ပီ ဒူအီ ဒင် ခြိဝ် ခဲင် ငဝ်၊ ထာရွင် တဲး န့ ဘွတ်။ 12န့ ဘော ပီ၊ အန် ဂူင့် န့ဆူက် အန်၊ တဲး အန် ဆူက် ယွိုမ် ငှုဝ် ခဲင် ကာင်နဝ်း၊ တဲး န့ ဂိတ် မီ ဘူင့် ငှုဝ် ဒီလူယ်။ ဟဲ့ ဟွတ့်၊ အန် ဒီ ကာဇု ငှုဝ် တီ ခဲင် ဂြွာ။ ဒျီပ် ငှုဝ်၊ အန် ယီ တူ လုဝ်။ အန် ဒီ ဒုဝ့် ဝဲန် ခဲင် ငဝ် အီ တူ နပ် ဒီ ယတ်။” ခဲ့ တီ အာယောဟာန် တွိုန် ကာလာင် လွင် ဇဝ် ယေဆူ။
လွင် ဇဝ် ယေဆူ ခမ် ဒီ စိုပ် ခဲင် အိုမ်
13ဝါယ် အန် တီ ဇဝ် ယေဆူ လေး ခဲင် အိူင် ဂါလီလေ၊ ဟာဝ် ဇမ် ဒီ ခူပ် ဘ့လဲင် ယောဒါန်၊ တဲး အာယောဟာန် စိုပ် အန် ခဲင် အိုမ်။ 14အာယောဟာန် ဝီ ထေဝ် ဒီ ခြဲ အန် တဝ်း၊ “န့ မုး အုဝ်၊ အီ လုဝ် မဲ စိုပ် အုဝ် ခဲင် အိုမ်။ မှဝ် န့ ပါယ် ပီ တး မဲ ဒီ အုဝ်။း” 15ဇဝ် ယေဆူ ဝီ တဝ်း၊ “တဲး မဲ ဘူင် ပါယ် တီ။ အာယ်၊ န့ ကာအာပ် ဘူင် ပါယ် တီ၊ တဲး န့ ဘဲန် ပီ အိုင် ဇဝ်ဖြာ။” ဝါယ် အန် တီ အာယောဟာန် ဝီ ဖြူမ်။
16အာယောဟာန် ဟဲ့ ဟွတ့် စိုပ် ဇဝ် ယေဆူ ခဲင် အိုမ်၊ အန် ဇဝ် ဝီ လေး ခဲင် အိုမ် အူ ဇေန့်။ ဒေါ အန် တီ ဂါင်ဟြာဝ် ဘော န့ ဝိုဝ်း။ အန် ဘော ယိုဝ် နဝ်း ဖွိုမ် ဇဝ်ဖြာ အီ ပီ မာဘ့လူယ်၊ တး လူင် ဒဲင် အန်။ 17န့ ဘော မိုဝ်း ဂြုဝ်း ဇဝ်ဖြာ လေး ခဲင် ဂါင်ဟြာဝ်။ န့ တဝ်း၊ “ဝီ တီ မုး ဂွန် ပီ ရွက့် အုဝ်။ ပီ ဘူင် အန် ဟဲ့ လဝ့် နဝ်း အုဝ်။”
Currently Selected:
မထ 3: pce
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
