ဒေါ ဂုဝ် 35

လွင် ဇဝ်ဖြာ ကွယ် ရိုမ် ဒူပ် အာကူပ်

1ဝါယ် အန် တီ ဇဝ်ဖြာ ဝီ ကာလာင် ဂြုဝ်း ဒီ အာကူပ်။ အန် တဝ်း၊ “တဲး မဲ ယိတ့် ဟာဝ် ခဲင် မိူင် ဘေဒါအေန်၊ တဲး မဲ ကွယ် ဒီ တီ၊ ဘူင် ကာစှူင့် လှူ ဒီ ဇဝ်ဖြာ။ ဒဲင် ကာစှူင့် တီ၊ မဲ လုဝ် လှူ ဒီ ဇဝ်ဖြာ အီ ဟဲ့ တး ကာပ့လုး ဒီ မဲ ဒေါ တဝ် မဲ ဒီ အီကတ် မဲ။”

2ပန် တီ အာကူပ် ဝီ ကာလာင် ဒီ ဂေ ဒွန် အီ၊ ခဲ့ ကွယ် န့ဟူမ် အန်။ အန် တဝ်း၊ “တဲး ဘေ ဝဲန် အာရိုပ် ဇဝ် ပီ ကြိုပ် ဒူအီ မျုဝ် ဟဝ်၊ ပီ အုန် ဘေ ဒေါ လေး အေ ခဲင် မိူင် အီ ဟဝ်။ တဲး ဘေ ဘော တာ အိုမ်၊ စှိုပ် ခြိုင် ကာမာယ်။ 3ဟဲ့ ဟွတ့် ပန် တီ အေ ဒီ ဘော ယိတ့် ဟာဝ် ဟုဝ့် မိူင် ဘေဒါအေန်။ အေ ဟီ ဇမ် မိူင် တီ၊ အုဝ် ဒီ ဘူင် ကာစှူင့် လှူ ဒီ ဇဝ်ဖြာ။ အုဝ် ဒီ လှူ ဒီ အန် ဇဝ် အီ မုး ဇဝ်ဖြာ အီ ထူမ် ဂြုဝ်း အုဝ် ဒေါ ဇမ် အုဝ် ဒုက် တွိုန်။ အန် ဘော မုး ဇဝ်ဖြာ အီ ကွယ် ရိုမ် ဒူပ် အုဝ် ဒေါ ဟာဝ် အုဝ် ဘဲန် ပ့လုဝ့် ဘဲန် ပ့လုဝ့်။” 4အာကူပ် တွိုန် ဟဲ့ ဟွတ့် ကာလာင် ပါယ် တီ ဂေ ဘော ဒိုဝ်း အာရိုပ် ပီ ကြိုပ် ဂေ ခဲင် မိူင် အီ ဟဝ် ပီ ဘ့လေး အုန် ဂေ ဒွန် မျုဝ်။ ဂေ ဘော ဒိုဝ်း ဘ့လေ ဟျုဝ့် ဂေ၊ ဒွါ တူတ့် ဒီ အန်။ အန် ယီ ဒိပ် တူတ့် နာ ခြိုမ် ဟေ ထေရေပ် အီ ကွယ် ကာတတ် မိူင် ဆေခေမ် တွိုန်။ 5ဂေ ဟဲ့ ဟွတ့် ဘူင် ဇိုဝ် တီ ဒွန် မျုဝ်၊ ဂေ ဝီ ယိတ့် ဟာဝ် ဒူင် စိူဝ် ဘေဒါအေန်။ ဇဝ်ဖြာ ယီ ဘူင် တဲး ဂေ အီ ဟဝ် ဝီ ယုဝ် ဂေ။ ခုဝ်၊ ဂေ တူ ဝီ ဒူပ်၊ တူ ဝီ ယ ကာဂုဝ်း ဒီ ဂေ ဂွန် အာကူပ် တွိုန်။

6ပန် တီ အာကူပ် ဘော ဇမ် မိူင် လူဆာ။ န့ မုး မိူင် အီ ကွယ် ခဲင် ကာဒါယ် မိူင် အီ စိူဝ် မိူင် ကာနန့်။ မိူင် လူဆာ တီ ဘော စိူဝ် မိူင် ဘေဒါအေန်။ ဘော အန်၊ ဘော ဂေ ဒူအီ ဒွန် အီ အီ ဟာဝ် ရိုမ် ဒူပ် အန်၊ ဂေ ဘော တး ဇမ် ဒီ တီ။ 7အန် ဝီ ဘူင် ကာစှူင့် လှူ ဒီ ဇဝ်ဖြာ။ အန် တဝ်း “ဒူင် တီ မုး ဒူင် ကွယ် ဇဝ်ဖြာ။” ပါယ် တီ အန် ဘော လှုဝ်း ဒေါ ဟဲ့ ကာပ့လုး ဇဝ်ဖြာ ဒီ အာကူပ် ဒေါ တဝ် လေး အန် ဒီ ဒူင် ကွယ် အီကတ် အန် အီ စိူဝ် အာဆုဝ်။

8ဂေ ဟဲ့ ဟွတ့် လှူ ဒီ ဇဝ်ဖြာ ဒီ တီ၊ န့ မုး နာင် ဒေဘုဝ်ရာ အီ မုး မှာယ် နာင် ဘဲက် တွိုန်၊ အန် ဘော ယမ် ဒေါ အန် တီ။ ဂေ ဝီ ဒိပ် ဒုဝ် ဘူင့် အန် နာ တေတ့် မိူင် ဘေဒါအေန် တွိုန်။ ဒူင် တီ၊ န့ မုး ခြိုမ် ဟေ ထေရေပ်။ ပန် တီ ဂေ တဲး ဟေ တီ စိူဝ် ‘ဟေ အီ မုး ဒူင် ယာမ် အီ။’

9ဒေါ ကွယ် ဂေ ဒီ တီ၊ ဇဝ်ဖြာ ဝီ ကာပ့လုး ဒီ အာကူပ် ပေါ အူ ဇေန့်။ န့ မုး အာ ဇေန့် ဇဝ်ဖြာ ဟဲ့ ကာပ့လုး ဒီ အန် ဝါယ် လေး အန် ခဲင် မိူင် ဖာဒါန်အာရာမ် ။ ဇဝ်ဖြာ ဝီ မွင့်ကာရာ ဒွါ ဒီ အန်။ 10အန် တဝ်း၊ “မဲ စိူဝ် အာကူပ်။ အူ ပူင့် အာတိုဝ် အုဝ် တူ ဝီ တဲး မဲ စိူဝ် အာကူပ်။ အုဝ် ဒီ တဲး မဲ စိူဝ် အာအီဆာရေလ။” ပန် တီ ဂေ ဒွန် အီ ဒဲ့ အန် စိူဝ် အာအီဆာရေလ။

11ဇဝ်ဖြာ ဝီ ကာလာင် ဒီ အန် တဝ်း၊ “အုဝ် မုး အန် ဇဝ် အီ တာင် လွှိုမ် တူတ့်၊ အာဝ် မိုဝ်း အီ တာင် လွှိုမ် အုဝ်။ အုဝ် ဒီ တဲး မဲ မိုဝ်း လှုက်လှာန် ကိူန်၊ တဲး အာမျုဝ် မဲ ကြဲ ဒီ ဘဲန် ဒူအီ ကိူန်။ မဲ ဒီ ဘဲန် ဂုန့် ဒင် အာမျုဝ် ဒူအီ ဘဲန် မျုဝ် ဘဲန် မျုဝ်။ ဂေ လှုက်လှာန် မဲ၊ ဂေ ဒီ ဘော ဘဲန် ခုန်ဒီခမ် အီ အိုပ် အာမျုဝ် ဒူအီ ဂေ တီ။ 12မိူင် ပဲ့ ဟဲ့ ဒွါ အုဝ် ဒီ အာဘြာဟမ် ဘော အာဆဲက် တွိုန်၊ အုဝ် ဒီ ဝီ ဒွါ ဒီ မဲ။ ဘော မဲ၊ ဘော လှုက်လှာန် မဲ၊ ဂေ ဒီ ပွိုန် မိူင် တီ။” 13ဇဝ်ဖြာ ဟဲ့ ဟွတ့် ကာလာင် ဂြုဝ်း တီ ဒီ အာကူပ်၊ အန် ဝီ ဟုဝ့် နာ ဒဲင်၊ လေး ဒူင် ကာလာင် အန် ဂြုဝ်း ဒီ အာကူပ်။

14အာကူပ် ဝီ ဘ့လေး ကာအုန် ဒီ ဒူင် ကာလာင် ဇဝ်ဖြာ ဂြုဝ်း ဒီ အန်။ အန် ဒိုဝ်း မာဝ် တာင် ဘ့လေး၊ တဲး န့ ဘဲန် ကာအုန်။ ဟဲ့ ဟွတ့် အန် ဒိုဝ်း ပီ ဒီ လှူ ဒီ ဒျီင်၊ လှုဝ် နာ ဒဲင် မာဝ် တီ။ အန် ဘော ဒိုဝ်း နာမန်၊ ဖဝ်း နာ ဒဲင်၊ တဲး န့ ဘဲန် ဒူင် ဘွတ်။ 15ဒူင် ကာလာင် ဇဝ်ဖြာ ဂြုဝ်း ဒီ အန်၊ အန် စိူဝ် ဘေဒါအေန်။

လွင် နာင် ရာအေန် ဂါယ် အာဆဲက် ဟဲ့ ယမ်

16ပန် တီ ဂေ ဘော ဖိုင် ဝီ လေး ဒူင် စိူဝ် ဘေဒါအေန် တွိုန်၊ ဟာဝ် ပေါ ပ့လုဝ့်။ ဒေါ ဇမ် ဂေ နာ ကာတတ် မိူင် အေဖာရာတ်၊ နာင် ရာအေန် တွိုန် မိုဝ်း ဂွန် ပေါ အူ ဝီ။ 17ဒေါ ဂွိုတ် ဂွန် အန်၊ န့ ညှာပ် ကာဆဝ်။ နာင် ရာအေန် ဘော ဆဝ် ကာဆဝ်။ ဒေါ အန် တီ န့ မိုဝ်း ယာ အီ လိုမ်လာ အန်၊ တဝ်း ဒီ အန်၊ “တဲး မဲ ဒါခိုယ်၊ ကွဲ့ ယုဝ်။ ဘော ခါ နီ မဲ မိုဝ်း ဂွန် အီမာယ်။” 18အန် ယီ နပ်၊ အန် ဟဲ့ ငှာ ဒီ ယမ်။ ခုဝ်၊ အန် တဲး ဂွန် အန် တီ စိူဝ် အာဘေနအုဝ်နီ။#35:18 ‘အာဘေနအုဝ်နီ’ ခဲင် ဂြုဝ်း ဟဲဘြဲ၊ လွင် ဒါင် အန် မုး ‘ဂွန် အီ တဲး အုဝ် ဇမ် ဒုက်’ ဂုန့် အန် ယီ တဲး အန် စိူဝ် အာဘေန်ယာမ်။#35:18 ‘အာဘေန်ယာမ်’ ခဲင် ဂြုဝ်း ဟဲဘြဲ၊ လွင် ဒါင် အန် မုး ‘ဂွန် အီ တဲး ဂါမ် အုဝ် ဘွတ်’

19ပန် တီ နာင် ရာအေန် ဘော ယမ်။ ဂေ ဝီ ဒိပ် ဒုဝ် ဘူင့် အန် ဒေါ ဟာဝ် ဂေ ဒူပ် န့တေန့် အီ ဇမ် မိူင် အေဖာရာတ်။ န့ ဘော စိူဝ် ဘေတ်လဲမ်။ 20အာကူပ် တွိုန် ဝီ ဘ့လေး ကာအုန် ဒီ ဘာရေဝ် အန်။ ပါယ် တီ ကော ဇမ် အာတိုဝ် ဟဲ့ ပွိုန် ယိုဝ် ဘာရေဝ် နာင် ရာအေန် တွိုန်။

21အာကူပ် ဝီ ယိတ့် ဟာဝ် မိူင် မိက်ဒါန်အေဒေ၊ ဟာဝ် ချ ချြီ့ မိူင် တီ။ 22ဒေါ ကွယ် အာကူပ် တွိုန် ခူပ် မိူင် တီ၊ အာရူဘေန် ဟာဝ် ပြာ ဒီ လာယ် နာင် ဘီလာ၊ အီ မုး အီဘိုန့် တျီ့ ဂုန့် အန်။ အာကူပ် ဘော နပ် လွင် အန် တီ။

23အာကူပ် ယီ မိုဝ်း ဂွန် အီမာယ် ဂိုဝ် ဒီ အာ ဝီ။ ဂေ ဂွန် နာင် လေအာ မုး အာရူဘေန်၊ အီ မုး ဂွန် ဒင် အာကူပ်။ ဟဲ့ ဟွတ့် န့ ဘော မုး အာဆီမေအူန်၊ အာလေဝီ၊ အာယူဒါ၊ အာအီဆာခါ ဘော အာဇေဘူလူန်။

24ဂွန် အီမာယ် နာင် ရာအေန် မုး အာယုဝ် ဂါယ် အာဘေန်ယာမ်။

25ဂွန် အီမာယ် နာင် ဘီလာ အီ မုး မှာယ် နာင် ရာအေန် ဘော မုး အာဒါန် ဂါယ် အာနာပ်ထာလီ။

26ဂွန် အီမာယ် နာင် ဆီဖာ၊ အီ မုး မှာယ် နာင် လေအာ ဘော မုး အာဂတ် ဂါယ် အာဆေန်။

အာ တီ မုး ဂွန် အီမာယ် အာကူပ် တွိုန် ဒွန် အီ။ ဂေ ဟဲ့ ဂွိုတ် ခဲင် မိူင် ဖာဒါန်အာရာမ် ။

27အာကူပ် တွိုန် ယီ တး ဇမ် ဒူင် ကွယ် အာဆဲက် အီ မုး ဂုန့် အန်။ ဒူင် ကွယ် အန် တီ၊ န့ စိူဝ် မမ်ရေ။ န့ ဘော စိူဝ် ကီရီယာတ်အာဘာ အီ မုး မိူင် ဟေဘြုဝ်။ ဒူင် တီ မုး ဒူင် ကွယ် အာဘြာဟမ် ဂါယ် အာဆဲက်။ 28အာဆာက် အာဆဲက် တွိုန် ဘော နုဝ့် အူ မာယဝ်း ဒီ အာ ဂိုဝ် ဆီနမ်။ 29ဟဲ့ ဟွတ့် ပန် တီ အန် ဘော ယမ်၊ ဟာဝ် ကွယ် ရိုမ် ဒူအီ အာမျုဝ် အန်၊ အီ ဟဲ့ ဒွိုမ် ကွယ် ဒီ အာတ့် အန်။ ဒေါ ယမ် အန်၊ အန် ဟဲ့ ကတ်။ နဝ်း အန် ဟဲ့ ဆိန်။ ဂွန် အန် အာဆုဝ် ဂါယ် အာကူပ်၊ ဂါယ် ဘော ဟာဝ် ဒိပ် ဂုန့် ဂါယ်။

Currently Selected:

ဒေါ ဂုဝ် 35: pce

Highlight

Copy