ဒေါ ဂုဝ် 32
32
လွင် အာကူပ် ဝီ ယိုဝ် အီကတ် အန်
1အာကူပ် တွိုန် ဘော ဟာဝ် ဒူပ် န့တေန့် အန်။ ဒေါ ဟာဝ် အန်၊ န့ မိုဝ်း အာမူ အာမာတ် ဇဝ်ဖြာ၊ ဂေ တး ဇမ် ဒူင် ကွယ် အန်။ 2အန် ဘော ယိုဝ် ဂေ၊ အန် တဝ်း၊ “ဒူင် တီ မုး ဒူင် ချ ဇဝ်ဖြာ။” ခုဝ်၊ အန် တဲး ဒူင် တီ စိူဝ် မာဟာနာအိမ်။#32:2 ‘မာဟာနာအိမ်’ ခဲင် ဂြုဝ်း ဟဲဘြဲ၊ လွင် ဒါင် အန် မုး ‘ဒူင် ချ’
3ပန် တီ အာကူပ် တွိုန် ဝီ တိုယ် မင် အီ တဲး ဂေ ယဲတ့် ဒီ အာတ့်၊ ဟာဝ် ဇမ် ခဲင် မိူင် ဆေအီ အီ မုး ဒူင် ကွယ် အီကတ် အန်။ န့ မုး မိူင် ဂေ ဒူအီ အေဒူမ်။ 4အန် စ်ု ဂေ ဘူင် ပါယ် နီ။ အန် တဝ်း၊ “ဘေ လုဝ် ဟာဝ် ဒူင် ကွယ် ဒါ ကာညာ အုဝ် အီ စိူဝ် အာဆုဝ် တဝ်း၊ ‘မှာယ် မဲ အီ စိူဝ် အာကူပ်၊ အန် တဝ်း ဒီ မဲ၊ “အုဝ် ဟဲ့ ဘဲန် ခဲတ့်၊ ကွယ် ခဲင် ကာင် အာလပ်။ ကော ဇမ် အာတိုဝ်၊ အုဝ် ဟဲ့ ကွယ် ရိုမ် ဒူပ် အန်။ 5အုဝ် ဟဲ့ ပွိုန် မာမက် ဂေ မာလာ၊ မာဘူ ဘော မာပဲ၊ အုဝ် ဟဲ့ ပွိုန် မှာယ် အီ မုး အီမာယ် ဘော အီဘိုန့်။ ဒေါ တီ နီ အုဝ် ဟဲ့ တိုယ် မှာယ် အုဝ် တဲး ဂေ ကာလာင် တူတ့် လွင် အန် တီ ဒီ ဒါ ကာညာ အုဝ်၊ တဲး အန် ကာဝေ အုဝ်။”’”
6ဒေါ ဝီ တး ဇမ် ဂေ ဒူင် ကွယ် အာကူပ် တွိုန် ဂေ တဝ်း၊ “ယေ ဟဲ့ ဟွတ့် ဇမ် ဒူင် ကွယ် အီကတ် မဲ အီ မုး အာဆုဝ်။ အန် ဒီ တး ဒူင် ကွယ် အေ တဲး အန် ရွုး မဲ။ အန် မိုဝ်း ဒူအီ ဖွုန် မာယဝ်း ဝီ အီ တး ဒူပ် အန်။”
7ပန် တီ အာကူပ် တွိုန် ဘော မိုဝ်း နဝ်း မှဲ၊ နဝ်း ယုဝ် ကာဆဝ်။ ခုဝ်၊ အန် ဝီ ကာယဝ်း ဂေ ဒူအီ အီ ဒူပ် အန် တဲး ဂေ ဘဲန် အာ ဖိုင်။ ဘော ဂေ မာဘူ မာပဲ၊ ဘော မာမက် ဘော မင်ပြွင့် ကာဟာတ့်၊ အန် ကာယဝ်း တူတ့် ပါယ် တီ။ 8အန် တဝ်း၊ “ဆေ အာဆုဝ် ဒီ ကာပပ် အူ ဖိုင်၊ ဆေ အန် ဘော ကာဂုဝ်း ဒီ ဂေ၊ န့ ဂိတ် ပေါ အူ ဖိုင်။ ဂေ ပွိုန် ဒီ တဝ် ဟာဝ်။”
9ပန် တီ အာကူပ် ဝီ ဆာခိုဝ် တဝ်း၊ “အိုယ် မဲ ဇဝ်ဖြာ၊ မဲ မုး ဇဝ်ဖြာ ပီ ကြိုပ် ဂုန့် ဒင် အုဝ် အီ စိူဝ် အာဘြာဟမ်။ မဲ ဘော မုး ဇဝ်ဖြာ ပီ ကြိုပ် ဂုန့် အုဝ် အီ စိူဝ် အာဆဲက်။ မဲ ဇဝ်ဖြာ၊ မဲ ဟဲ့ တဝ်း ဒီ အုဝ်၊ ‘ဆေ မဲ ဝေန့် ခဲင် မိူင် မဲ၊ ဝီ ကွယ် ရိုမ် ဒူပ် ဝေါဝဲ မဲ၊ အုဝ် ဒီ ဝီ ဘူင် နာ မွှိုမ် ဒွါ ဒီ မဲ။’ 10န့ တူ ကာအာပ် မဲ ကာဝေ အုဝ်၊ ဘူင် နာ မွှိုမ် ဒွန် မျုဝ် ဇိုဝ် တီ ဒီ အုဝ်။ အာတ့် နီ ဒေါ ကာလုဝ်း အုဝ် ဘ့လဲင် အိုမ် ယောဒါန် တီ၊ အုဝ် မိုဝ်း မီ န့ကြွုန် အုဝ်။ ဒေါ တီ နီ ဂေ အာမျုဝ် အုဝ် ဟဲ့ ဘဲန် အာ ဖိုင်။ 11ဒေါ တီ နီ အုဝ် ယီ မှာန့်၊ တဲး မဲ ဇဝ် ချွတ် အုဝ် ဒီ အီကတ် အုဝ် အီ စိူဝ် အာဆုဝ်။ အုဝ် ဟဲ့ ယုဝ် ကာဆဝ် အန်။ အုဝ် ယုဝ် အန် ဒီ တး ငဝ်း ဝဲန် ဘော အုဝ် ဘော ဂွန် အုဝ် ဘော မာ ဂေ။ 12မဲ ဇဝ်ဖြာ ယီ ဟဲ့ တဝ်း၊ ‘အုဝ် ဒီ ဘူင် နာ မွှိုမ် ဘဲန် မျုဝ် ဘဲန် မျုဝ် ဒီ မဲ။ အုဝ် ဒီ ဘော တဲး ဂေ လှုက်လှာန် မဲ ကိူန် ခဲ့ ကိူန် ကာဟာတ့် အီ ကွယ် ဒီ နမ်မုက်ဆာရာ။ ကော ဟူ ပဲ ဒီ တိး။’”
13ပန် တီ ခဲင် မှိုဝ် အာကူပ် ဝီ ကွယ် ဒူင် ဆာခိုဝ် အန်။ အန် ဝီ ယွတ် ဒုဝ် ဆတ်ဒါဝါ အန်၊ ရဝ်း ဘဲန် ဒုဝ် ဘဲန် ဒုဝ်၊ တဲး အန် ဒွါ ဘဲန် ခေါဆွင် ဒီ အီကတ် အန်။ 14န့ မုး မာပဲ အာဟျာင် အာ မာယဝ်း ဒုဝ်၊ အာလူင့် အာ ဂိုဝ် ဒုဝ်၊ မာဘူ အာဟျာင် အာ မာယဝ်း ဒုဝ်၊ ဂေ အာလူင့် အာ ဂိုဝ် ဒုဝ်၊ 15မင်ပြွင့် ကာဟာတ့် အူယ် ဂိုဝ် ဒုဝ် ဘော ဂွန် ဂေ၊ မာမက် အာဟျာင် ဖွုန် ဂိုဝ် ဒုဝ် ဘော မာမက် အာလူင့် ဂိုဝ် ဒုဝ်၊ မာလာ အာဟျာင် အာ ဂိုဝ် ဒုဝ်၊ ဘော အာလူင့် ဂိုဝ် ဒုဝ်။ 16အန် ဒိုဝ်း တူတ့် ဒုဝ် ဆတ်ဒါဝါ ဂေ တီ၊ ဒွါ ဒီ မှာယ် အန်၊ တဲး ဂေ ဟာဝ် ယဲတ့် ဒီ အာတ့်၊ တဲး ဂေ ဟာဝ် အူ မျုဝ် အူ ဖိုင်။
17အန် ဝီ စ်ု မှာယ် အီ ယဲတ့် ဒီ အာတ့် တဝ်း၊ “ဆေ အီကတ် အုဝ် အီ စိူဝ် အာဆုဝ် ဒီမွှတ် မဲ၊ ဆေ အန် ဒီ ဘော တဝ်း၊ ‘မဲ မုး မှာယ် အာဆေ။း နာ မှဝ် မဲ ဒီ ဝဝ့်။း ဒုဝ် ဆတ်ဒါဝါ ပီ တိုယ် မဲ၊ န့ မုး ကြုဝ်ကြာမ် အာဆေ။း’ 18ဘေ ဘော လုဝ် တဝ်း၊ ‘ဒုဝ် ဆတ် ဂေ တီ မုး ဒုဝ် ဆတ်ဒါဝါ မှာယ် မဲ၊ အီ စိူဝ် အာကူပ်။ န့ မုး ခေါဆွင် ပီ တိုယ် အန် ဒွါ ဒီ ဒါ ကာညာ အန်၊ အီ စိူဝ် အာဆုဝ်။ အာကူပ် တွိုန် ယီ ဒူပ် ဒီ ပန်။’”
19ဘော ဂေ ဒူအီ အီ တိုယ် ဒုဝ် ဆတ်ဒါဝါ ဘဲန် ဖိုင် ဘဲန် ဖိုင်၊ အန် စ်ု ဂေ တဝ်း ပါယ် တီ။ အန် တဝ်း ဒီ မှာယ် အန် ဒွန် အီ၊ “ဆေ ဘေ ကာတုန့် အာဆုဝ် တွိုန်၊ ဘေ လုဝ် ကာလာင် ပါယ် တီ။” 20ဘေ ဘော လုဝ် တဝ်း၊ “ဘော မှာယ် မဲ၊ အီ စိူဝ် အာကူပ် တွိုန်၊ အန် ဒီ ဒူပ် ဒီ ပန် ယေ။” အန် ထာင် ခဲင် နဝ်း အန်၊ “အုဝ် ဒီ ဒွါ ခေါဆွင် ယဲတ့် ဒီ အာတ့် အုဝ်၊ တဲး န့ တဲး နဝ်း အန် ဝီ ဒါခိုယ်၊ အာဝ် ဟူ မိုဝ်း နဝ်း ရူ ဒီ အုဝ်။” 21ပါယ် တီ အာကူပ် ဟဲ့ တိုယ် ခေါဆွင် ယဲတ့် ဒီ အာတ့် အန်။ ခဲင် မှိုဝ် တီ အန် ယီ ကွယ် ဒူင် ချ ဂေ။
လွင် အာကူပ် ကာလုတ့် ဒီ ဇဝ်ဖြာ
22ခဲင် မှိုဝ် တီ၊ အာကူပ် ယီ ယိတ့်၊ ဒိုဝ်း အီဘိုန့် အန် အာ ဝီ ဘော မှာယ် အီဘိုန့် အန် အာ ဝီ။ အန် ဘော ဒိုဝ်း ဂွန် အီမာယ် အန် ဂိုဝ် ဒီ အူ ဝီ၊ ဘော ကြုဝ်ကြာမ် အန် တူတ့် ဒွန် မျုဝ်၊ တိုယ် ဂေ ဟာဝ် ကာလုဝ်း ဘ့လဲင် အိုမ် ယာဘူက်။ 23ခဲ့ ပီ မိုဝ်း အန်၊ အန် ဒိုဝ်း တူတ့်၊ တိုယ် တဲး န့ ဇမ် နာ တ ဘ့လဲင် အိုမ် တီ။ 24အန် အူ ဝီ ယီ ကွယ် ဒီ ပန်။ ပန် တီ န့ မိုဝ်း ဒါ အူ ဝီ တး ကာလုတ့် ဒီ အန်၊ တဲး ကော ဇမ် ပြဲ ဝး။ 25ဒါ အီ တွိုန်၊ အန် ကော နပ်၊ အန် တူ ပဲ အာကူပ် တွိုန်၊ အန် ဝီ မး ညွယ် အာကူပ်၊ တဲး န့ ကော ကာလေတ့်။ 26အန် ဘော တဝ်း၊ “တဲး မဲ ဘ့လေး အုဝ်။ ပြဲ ဟဲ့ ဝး။”
အာကူပ် တွိုန် ယီ တဝ်း၊ “အာတ့် ဘ့လေး အုဝ် ဒီ မဲ၊ တဲး မဲ မွင့်ကာရာ ဒွါ ဒီ အုဝ်။”
27ဒါ အီ တွိုန် ဝီ တဝ်း ဒီ အာကူပ်၊ “မာဆေ ပီ စိူဝ် မဲ။း”
အန် ဝီ တဝ်း၊ “အုဝ် စိူဝ် အာကူပ်။”
28ဒါ အီ တွိုန် ဝီ တဝ်း၊ “အူ ပူင့် အာတိုဝ် မဲ အာဝ် ဟူ စိူဝ် အာကူပ်။ အုဝ် ဒီ တဲး မဲ စိူဝ် အာအီဆာရေလ။ အုဝ် ဒီ တဲး မဲ စိူဝ် ပါယ် တီ ခုဝ်၊ မဲ ဟဲ့ လာယ် ကာလုတ့် ဒီ အန် ဇဝ်၊ ဘော ဒီ ဂေ ဒူအီ။ မဲ ယီ ဟဲ့ ပဲ။”#32:28 ‘အီဆာရေလ’ ခဲင် ဂြုဝ်း ဟဲဘြဲ၊ လွင် ဒါင် အန် မုး ‘အန် ကာလုတ့် ဒီ ဇဝ်ဖြာ’
29အာကူပ် ဝီ ဒီမွှတ်၊ “မာဆေ ပီ စိူဝ် မဲ။း”
အန် ဝီ တဝ်း၊ “မှဝ် မ့ပါယ် ပီ ဆီ နပ် မဲ စိူဝ် အုဝ်။း” ပန် တီ အန် ဘော မွင့်ကာရာ တဲး ဒီ အာကူပ်။
30အာကူပ် တွိုန် ယီ တဲး ဒူင် တီ စိူဝ် ပေနူအေန်။ အန် တဲး ဒူင် တီ စိူဝ် ပါယ် တီ ခုဝ်၊ အန် တဝ်း၊ “ဇဝ်ဖြာ ဟဲ့ တဲး အုဝ် ယိုဝ် နာ အန်။ အန် ယီ တူ ငဝ်း ဝဲန် အုဝ်။ အန် ဟဲ့ တဲး အုဝ် အိမ်။”#32:30 ‘ပေနူအေန်’ ခဲင် ဂြုဝ်း ဟဲဘြဲ၊ လွင် ဒါင် အန် မုး ‘နာ ဇဝ်ဖြာ’
31ပန် တီ ပြဲ ဘော ဝီ ဘ့လာင်၊ အာကူပ် လေး ဒီ ဒူင် စိူဝ် ပေနူအေန် တွိုန်။ အန် ယီ ဟာဝ် ကျီင် ကေး ခုဝ်၊ ညွယ် အန် ဟဲ့ ကာလေတ့်။ 32ကူပ် ဟဲ့ မး ဇဝ်ဖြာ အာကူပ်၊ တဲး ညွယ် အန် ကာလေတ့်၊ ကော ဇမ် အာတိုဝ်၊ ဂေ ဒူအီ အီဆာရေလ တူ ဟူမ် ယင် အီ ဒိုက် ဒီ ညွယ် ဒုဝ် ဆတ်ဒါဝါ။
Currently Selected:
ဒေါ ဂုဝ် 32: pce
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
