ဒေါ ဂုဝ် 21
21
လွင် နာင် ဆာရာ မိုဝ်း ဂွန်
1ဇဝ်ဖြာ ဝီ ဟာဝ် ဒူင် ကွယ် နာင် ဆာရာ၊ ဘူင် ပီ ဒွိုမ် ကာလာင် အန်။ 2ပန် တီ နာင် ဆာရာ ဒဲ ဘာဒိက် ဆန်ထေ။ ဒေါ ဇမ် အာခြာဝ် ပီ ဒွိုမ် ကာလာင် အန် ဇဝ်၊ နာင် ဆာရာ ဝီ ဂွိုတ် ဂွန် အီမာယ် ဒေါ ဟဲ့ ကတ် ကာဆဝ် အီမာယ် အန်။ န့ ဘော ဘဲန် တူတ့် ပီ ကာလာင် အန် ဇဝ် ခါ အာတ့် နူ။ 3ဂွန် နာင် ဆာရာ တီ၊ အာဘြာဟမ် တဲး အန် စိူဝ် အာဆဲက်။#21:3 ‘အာဆဲက်’ လွင် ဒါင် အန် ခဲင် ဂြုဝ်း ဟဲဘြဲ လေး ‘ကာညး’ 4န့ ဘော ဇမ် ဆီငဲ န့ဒါ၊ အာဘြာဟမ် ဝီ ဒိုဝ်း ဂွန် အန်၊ ဆွာ့ ဝဲန် ဟုန် လခါနာ အန်၊ တဲး န့ ပီ ပဲ့ ဟဲ့ စ်ု ဇဝ်ဖြာ အန် ဘူင်။ 5ဒေါ ပွိုန် အန် ဂွန် အီမာယ် တီ၊ အာဆာက် အာဘြာဟမ် တွိုန် ဟဲ့ နုဝ့် အူ မာယဝ်း ဆီနမ်။
6နာင် ဆာရာ ဝီ တဝ်း၊ “ဇဝ်ဖြာ ဟဲ့ တဲး အုဝ် ကာညး ဒေါ တီ နီ။ အာဆေ ယိုဝ် လွင် အန် တီ၊ အန် ဘော ဒါခိုယ် ပီ အုဝ်။” 7အန် ဝီ ကာလာင် ပေါ အူ မျုဝ်။ အန် တဝ်း၊ “ဆေ န့ မိုဝ်း ဒူအီ အီ တဝ်း ဒီ အာဘြာဟမ် လွင် နာင် ဆာရာ ဒီ ဟျီင် ဂွန်၊ န့ တူ မွှိုမ် ညှိုမ်။ အုဝ် ယီ ဟဲ့ ပွိုန် ဂွန် အာဘြာဟမ် ဒေါ ဟဲ့ ကတ် အန်။”
လွင် အာဘြာဟမ် ဆုတ့် အာဆာမာန် ဂါယ် မာ အန် လေး ခဲင် ကာင် အန်
8ဂွန် နာင် ဆာရာ ယီ ကြဲ ဒီ တာင်၊ အန် ဘော ဝဲန် ပူ။ ဆီငဲ အန် တီ ဂေ ဘူင် ဘ့လွယ် တာင်၊ ဟျီင် အီ ဟူမ်။ 9အူ ဆီငဲ နာင် ဆာရာ တွိုန် ယီ ယိုဝ် အာဆာမာန်။ အန် မုး ဂွန် အာဘြာဟမ် ဂါယ် နာင် ဟာဂါ၊ အီ မုး အာမျုဝ် ဒူအီ အဲဂိုပ်။ အန် ဘော ထူမ် ဂြုဝ်း ပီ နဲန အာဆာမာန် ဒီ အာဆဲက် အန်။ 10ပန် တီ အန် တဝ်း ဒီ အာဘြာဟမ်၊ “တဲး မဲ ဆုတ့် မှာယ် တီ ဘော ဂွန် အန်၊ တဲး ဂါယ် လေး ဟာဝ် တ ကာင် အေ။ ဂွန် အန် အာဝ် ပွိုန် ပ့လု ဂုန့် အန် ပီ ဂွန် အုဝ်။”
11အာဘြာဟမ် တူ အိုင် ဂြုဝ်း တီ။ အန် ကာဝေ အာဆာမာန်၊ အီ မုး ဂွန် အန်။ 12ဇဝ်ဖြာ ယီ ကာလာင် ဂြုဝ်း ဒီ အာဘြာဟမ် တွိုန် တဝ်း၊ “ကွဲ့ တဲး နဝ်း မဲ က့လိုဝ် လွင် ဂွန် မဲ ဂါယ် မှာယ် မဲ။ တဲး မဲ ထူမ် တူတ့် ပီ ကာလာင် နာင် ဆာရာ ဒီ မဲ။ ဘော ဂေ ဂွန် အာဆဲက် တွိုန်၊ ဂေ ဒီ ဘဲန် လှုက်လှာန် မဲ။ 13ဘော ဂွန် မဲ၊ အီ မုး ဂွန် မှာယ် မဲ၊ အုဝ် ဒီ တဲး အန် ဘဲန် ဂုန့် ဒင် ဂေ ဒူအီ အာမျုဝ် တာင်။”
14အန် ဇဝ် ဟဲ့ ဟွတ့် ကာလာင် ပါယ် တီ ဆိန့်ဝး အာဘြာဟမ် စေဝ် ယိတ့်။ အန် ဘော ဒိုဝ်း ပီ ဒီ ဟူမ်၊ ဒိုဝ်း ဘော အိုမ်၊ ဟပ် ခဲင် ကာပဝ် တာင်။ ဟဲ့ ဟွတ့်၊ အန် ဘော ဒိုဝ်း ကြုဝ်ကြာမ် တီ ဘော ဂွန် အန်၊ ဘ့လေး ဒီ ယ နာင် ဟာဂါ။ ဟဲ့ ဟွတ့်၊ အန် ဆုတ့် ဂါယ် လေး ခဲင် ဒူင် ကွယ် အန်။ နာင် ဟာဂါ ယီ ဝိန် ဒီ လဲ ခဲင် ပြဲ ကာဟဝ်း အီ စိူဝ် ဘီရာဆေဘာ။
15အာဝ် လှေန့် အိုမ် အီ ကွယ် ခဲင် ကာပဝ် အန် ဘော တူတ့်။ အန် ဝီ ဘ့လေး ဂွန် အန် နာ ခြိုမ် ကာရာမ်။ 16အန် ဝီ ဟာဝ် ပေါ အီ စဲက်၊ တုတ့် ကာချြီ့ ဒူင် ကွယ် ဂွန် အန်။ အန် ထာင်၊ “အုဝ် အာဝ် ခမ် ဒီ ယွတ် ဂွန် အုဝ် ပန် ဒီ ယမ် အန်။” ဒေါ ကွယ် ချြီ့ အန်၊ အန် ဝီ စုး ဒီ ယာမ်။
17ဇဝ်ဖြာ ယီ ထူမ် ဂြုဝ်း ပီ ဒဲ့ ဂွန် တီ။ အာမူ အာမာတ် ဇဝ်ဖြာ အူ ကာဒင် အီ ကွယ် ဂါင်ဟြာဝ် ဝီ ဒဲ့ နာင် ဟာဂါ တွိုန်၊ တဝ်း ဒီ အန်၊ “အိုယ် မဲ နာင် ဟာဂါ၊ မဲ လုဝ် မာဆေ။း ကွဲ့ ယုဝ်။ ဇဝ်ဖြာ ဟဲ့ ဟွတ့် ထူမ် ဂြုဝ်း ပီ ကာလာင် ဂွန် မဲ ဒူင် ကွယ် အန်။ 18တဲး မဲ ယိတ့်၊ ဒိုဝ်း ဂွန် မဲ၊ စွယ် အန် ဟာဝ်။ အုဝ် ဒီ ဘူင် တဲး အန် ဘဲန် ဂုန့် ဒင် အာမျုဝ် ဒူအီ တာင်။”
19ပန် တီ အန် ဇဝ် ဘူင် တဲး ငါယ် အန် ဘ့လာင်။ အန် ဘော ယိုဝ် အိုမ် ခိုမ်။ အန် ဘော ဟာဝ် တဝ့် အိုမ်၊ ဟပ် ခဲင် ကာပဝ် အန်၊ ဝီ ဒွါ ဘော ဂွန် အန် ဒျီင် ဖဲ။
20ဇဝ်ဖြာ ယီ ကွယ် ရိုမ် ဒူပ် ဂွန် တွိုန်။ အန် ကြဲ ဒီ တာင်၊ ကွယ် ခဲင် ပြဲ ကာဟဝ်း၊ ဘဲန် ဒူအီ ဘန့် အ။ 21အန် ကွယ် ခဲင် ပြဲ ကာဟဝ်း အီ စိူဝ် ဖာရာန်။ မာ အန် ဘော ဟြေတ့် ဒွါ အီဘိုန့် ဒီ အန် အီ တး မိူင် အဲဂိုပ်။
လွင် အာဘြာဟမ် ဂါယ် ခုန်ဒီခမ် အာဘီမေန်
22ဒေါ အန် တီ န့ မိုဝ်း ခုန်ဒီခမ် အာဘီမေန် ဂါယ် ဘုဝ် အီ အိုပ် ဒါ ဆိုက် အန် အီ စိူဝ် အာဖီဆွန်။ ဂါယ် တး ကာလာင် ဂြုဝ်း ဒီ အာဘြာဟမ်။ ဂါယ် တဝ်း၊ “မဲ ဘော ဘူင် မာဆေ၊ ဇဝ်ဖြာ ကွယ် ရိုမ် ဒူပ် မဲ ဘော စွယ် မဲ။ 23ခုဝ်၊ တဲး မဲ ဒွါ ကာဒိက် ဆတ်ဇာ ဒီ အုဝ်၊ တဲး ဘော ဇဝ်ဖြာ ထူမ်။ ဆိန့် ဒေါ တီ နီ ဟာဝ် နာ အာတ့်၊ တဲး မဲ ဘူင် နာ မွှိုမ် ဒီ အုဝ် ဘော ဒီ လှုက်လှာန် အုဝ်။ အုဝ် ဟဲ့ ဘဲန် ဂိုက် မဲ။ ပါယ် တီ တဲး မဲ ဝီ ဘဲန် ဂိုက် အုဝ်၊ ဘဲန် ဘော ဂိုက် ဂေ ဒူအီ ခဲင် မိူင် ဒူင် ကွယ် မဲ ဘဲန် ခဲတ့်။”
24အာဘြာဟမ် ဝီ တဝ်း၊ “အုဝ် ဒီ ဒွါ ကာဒိက် ဆတ်ဇာ ဒီ မဲ။”
25အာဘြာဟမ် ယီ ကာလာင် ဒီ ခုန်ဒီခမ် အာဘီမေန် လွင် မှာယ် အန်။ ဂေ ဟဲ့ ခြဲ အိုမ် ခိုမ် အူ ပ့လုဝ့်၊ တူ တဲး အီ ဟဝ် တဝ့် အိုမ်။ 26ခုန်ဒီခမ် အာဘီမေန် တွိုန် ယီ တဝ်း၊ “အုဝ် တူ နပ် အာဆေ ဟဲ့ ဘူင် ပါယ် တီ။ မဲ မိူဝ် တူ တဝ်း မာဆေ ဒီ အုဝ်၊ ဘော အီ ဟဝ် တူ ဒွိုမ် ကာလာင် မာဆေ လွင် အန် တီ။”
27ပန် တီ အာဘြာဟမ် ဝီ ဒိုဝ်း မာဘူ ဂေ မာမက်၊ ဒွါ ဒီ ခုန်ဒီခမ် အာဘီမေန်၊ တဲး အီ နပ်၊ ဂါယ် ဟဲ့ လာယ် ဖြူမ်။ 28ပန် တီ အန် ဝီ ဘ့လေး အုန် ဂွန် မာဘူ ဘူ ဒုဝ်။ 29ခုန်ဒီခမ် အာဘီမေန် ဝီ ဒီမွှတ် တဝ်း၊ “မာဆေ န့ မုး လွင် ဒါင် အန် တီ။း မှဝ် န့ ပါယ် ပဲ့ ဟဲ့ ဒိုဝ်း မဲ ဂွန် မာဘူ ဘူ ဒုဝ် တီ။း”
30အန် ဝီ တဝ်း၊ “ဂွန် မာဘူ ဘူ ဒုဝ် တီ၊ မဲ လုဝ် ဒိုဝ်း။ အုဝ် ဒွါ ဂေ ဒီ မဲ၊ တဲး န့ ဘဲန် လက်ဆာနာ အန်၊ တဲး ဒွန် အီ နပ်၊ ကာဒဝ် အိုမ် ခိုမ် တီ၊ န့ မုး ကာဒဝ် အိုမ် ခိုမ် အုဝ်။”
31ကူပ် ဟဲ့ လာယ် ဒွါ ဂေ ကာဒိက် ဆတ်ဇာ ဒီ တီ၊ ဂေ ဟဲ့ တဲး အိုမ် ခိုမ် တီ စိူဝ် ဘီရာဆေဘာ။#21:31 ‘ဘီရာဆေဘာ’ ခဲင် ဂြုဝ်း ဟဲဘြဲ၊ လွင် ဒါင် အန် လေး ‘အိုမ် ခိုမ် ပီ လာယ် ဖြူမ် အီ’ ခုဝ်၊ ဒူင် တီ ဂေ ဟဲ့ လာယ် ဒွါ ကာဒိက် ဆတ်ဇာ။
32ပါယ် တီ ဘော အာဘြာဟမ် ဘော ခုန်ဒီခမ် လာယ် ဖြူမ် ဒီ တဲး ဒူင် တီ စိူဝ် ဘီရာဆေဘာ။ ဟဲ့ ဟွတ့်၊ ခုန်ဒီခမ် အာဘီမေန် ဂါယ် ဘုဝ် အီ အိုပ် ဒါ ဆိုက် အန်၊ ဂါယ် ဝီ ဝေန့် ခဲင် မိူင် ဖီလီထီ။ 33အာဘြာဟမ် မိူဝ် ဆမ် ဟေ ထေရေပ် အူ ကာဒင် ဒီ ဒူင် စိူဝ် ဘီရာဆေဘာ တီ။ ဒူင် တီ အန် ဘော ကြိုပ် ဇဝ်ဖြာ အီ အိမ် ဆေဆေ။ 34ဝါယ် အန် တီ အာဘြာဟမ် ဝီ ကွယ် လှေန့် ခဲင် မိူင် ဖီလီထီ တွိုန်၊ ဘဲန် ခဲတ့် ခဲင် မိူင် တီ။
Currently Selected:
ဒေါ ဂုဝ် 21: pce
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
