ဒေါ ဂုဝ် 13
13
လွင် အာဘြာမ် ဂါယ် အာလူတ် လာယ် ကာယဝ်း
1ဝါယ် အန် တီ အာဘြာမ် ဝီ လေး ခဲင် မိူင် အဲဂိုပ်၊ ဟုဝ့် ကွယ် နာ ကွာ။ ဘော အန် ဘော အီဘိုန့် အန် ဘော ကြုဝ်ကြာမ် အန်၊ ခဲ့ ပီ မိုဝ်း အန် တူတ့် ဒွန် မျုဝ်၊ ဘော အာလူတ် တွိုန်၊ ဂေ ဘောကာဂ့လျီတ် ဟာဝ် ရိုမ် ဒူပ် အန်။ 2အာဘြာမ် တွိုန် ယီ ခြမ် ကာဆဝ်။ ဘော ဒုဝ် ဆတ်ဒါဝါ ဘော ရွိုန် ဂေ ခြိဝ်၊ အန် ဟဲ့ မိုဝ်း ကိူန် ကာဆဝ်။
3အန် ဝီ ကြဲ ဒီ ကာထုဝ့် ဝိဝ်၊ တဲး အန် ကော ဝီ ဇမ် ဒွန် ပ့လုဝ့် အီ မုး ဒူင် ဒွိုမ် ကွယ် အန် အာတ့် ဟာဝ် အန် မိူင် အဲဂိုပ်။ ဟဲ့ ဟွတ့်၊ အန် ဝီ ဇမ် ဒူင် ချ အန် ခါ အာတ့် အီ စိူဝ် ဘေဒါအေန်၊ အီ ကွယ် ဒီ ကာတဲ မိူင် ဘေဒါအေန် ဂါယ် မိူင် အာယီ။ 4အာတီ မုး ဒူင် ပဲ့ ဟဲ့ ဘူင် အန် ကာစှူင့် လှူ ဒီ ဇဝ်ဖြာ။ အန် ဟဲ့ ဟွတ့် ဝီ ဇမ် ဒူင် ကွယ် အန် တီ၊ အန် ဝီ ကြိုပ် ဇဝ်ဖြာ။
5ယီ မုး အာလူတ် တွိုန် အီ ဟဲ့ ဒူပ် အာဘြာမ်။ ဘော အန် ဟဲ့ မိုဝ်း မာဘူ ဂေ မာမက်။ ဘော ထိုပ် ဘိက် ဘဲန် ကာတု ဘဲန် ကာတု အန် ဟဲ့ မိုဝ်း။ 6မာန် မိူင် ဒူင် ကွယ် ဂါယ်၊ န့ ယီ တူ ကာဝဝ်း၊ န့ တူ ဂ့လိုမ် အာဒါ ခဲ့ ပီ လုဝ် ဂါယ် ဘော အာ ဝီ။ ကြုဝ်ကြာမ် ဂါယ်၊ ပီ မိုဝ်း ဂါယ်၊ န့ ဟဲ့ ကိူန်၊ ခုဝ်၊ ဂါယ် တူ ပွိုန် ကွယ် လာယ် ကာချြီ့။ 7ဂေ မှာယ် အီ ဟျီင် ဒုဝ် ဆတ် အာဘြာမ် ဘော ဂေ အီ ဟျီင် ဒုဝ် ဆတ် အာလူတ်၊ ဂေ လာယ် ကာလုတ့် ဘဲန် ဇေန့် ဘဲန် ဇေန့်။ ဒေါ အန် တီ ဘော ဂေ ဒူအီ အာမျုဝ် ကာနန့် ဘော ဂေ ဒူအီ အာမျုဝ် ဖေရေဆိတ်၊ ဂေ ဆီ ကွယ် ခဲင် မိူင် တွိုန်။
8ပန် တီ အာဘြာမ် တွိုန် ဝီ ကာလာင် ဂြုဝ်း ဒီ အာလူတ်။ အန် တဝ်း၊ “အာယ် အာ ဝီ ဟဲ့ မုး အူ ဝေါဝဲ၊ ကွဲ့ တဲး အာယ် လာယ် ကာလုတ့်။ ဘော ဂေ ဒါ အီ ဟျီင် ဒုဝ် ဆတ် မဲ ဘော ဂေ ဒါ အီ ဟျီင် ဒုဝ် ဆတ် အုဝ်၊ ကွဲ့ တဲး ဂေ လာယ် ကာလုတ့်။ 9မာန် မိူင် ဟဲ့ တာင် တူင့် ကာဆဝ်။ တဲး မဲ ကာယဝ်း ဒီ အုဝ်။ ဆေ မဲ တဝ်း ဒီ ဟာဝ် ဘ့လာက် အာဂ၊ အုဝ် ဒီ ဟာဝ် ဘ့လာက် အာအး။ ဆေ မဲ ဆီ ဟာဝ် ဘ့လာက် အာအး၊ အုဝ် ဒီ ဟာဝ် ဘ့လာက် အာဂ။”
10အာဘြာမ် ဟဲ့ ဟွတ့် ကာလာင်၊ အာလူတ် တွိုန် ဝီ ယွတ် မိူင် ဘော မိူင်။ အန် မိူဝ် ယိုဝ် ဂ့လင် အီ ကွယ် ခူပ် ဘ့လဲင် ယောဒါန် ကော ဇမ် မိူင် ဇုဝ်အာန်။ ကာဒါယ် တီ ဟဲ့ ဘွတ်။ န့ မိုဝ်း အိုမ် ကိူန် ဒီ တီ။ ဒူင် တီ န့ ပါယ် နီ။ အာတ့် ဝဲန် ဇဝ်ဖြာ မိူင် ဆုဝ်ဒူမ် ဂါယ် မိူင် ဂုဝ်မုဝ်၊ ကာဒါယ် ခဲင် မိူင် တီ ဟဲ့ ပီ ကာပိုမ် ပီ ဘူင် ဇဝ်ဖြာ။ န့ ဘော ပီ မိူင် အဲဂိုပ်။ 11ခုဝ်၊ အာလူတ် ဘော ရဝ်း မိူင် ဘော မိူင် အီ ကွယ် ခူပ် ဘ့လဲင် ယောဒါန်။ အန် မိူဝ် ယိတ့် အူ ဇေန့်၊ ဟာဝ် နာ လေး ဆီငဲ။ ပါယ် တီ အာဘြာမ် ဂါယ် အာလူတ် လာယ် ကာယဝ်း။ 12အာဘြာမ် ကွယ် ခဲင် မိူင် ကာနန့် တွိုန်။ အာလူတ် ယီ ဟာဝ် ကွယ် ဒီ ဂ့လင် အီ ကွယ် ခူပ် ဘ့လဲင် ယောဒါန် တွိုန်။ အန် ဝီ ဆမ် ထိုပ် ဘိက် အန် ကော ဇမ် ခူပ် မိူင် ဆုဝ်ဒူမ်။ 13ဂေ ဒူအီ ကွယ် ခဲင် မိူင် ဆုဝ်ဒူမ် တွိုန်၊ ဂေ ယီ မိူက် ကာဆဝ်။ ဇဝ်ဖြာ ဘော ယိုဝ်၊ မှာပ် ဂေ ဟဲ့ ကိူန်။
14ဝါယ် ဟဲ့ ဟွတ့် အာလူတ် ကာယဝ်း ဒီ အာဘြာမ် တွိုန်၊ ဇဝ်ဖြာ ဝီ တး ကာလာင် ဂြုဝ်း ဒီ အန် တဝ်း၊ “တဲး မဲ ယွတ် ဆီချာ၊ ယွတ် ဒူင် ကွယ် မဲ၊ တဲး မဲ ဘော ယွတ် နာ ကွာ နာ တေတ့်၊ ယွတ် ဘော နာ လေး ဆီငဲ၊ နာ ဂေတ့် ဆီငဲ။ 15ကာဒါယ် ပီ ယိုဝ် မဲ ဒွန် နာ ဒွန် ပ့လုဝ့်၊ အုဝ် ဒီ ဒွါ တူတ့် ဒီ မဲ၊ တဲး န့ ဘဲန် မာန် မိူင် မဲ။ ဘော ဂေ လှုက်လှာန် မဲ၊ ဂေ ဒီ ပွိုန် ကာဒါယ် တီ၊ တဲး ကော ဇမ် ဒွန် စုဝ် ဒွန် ဘာန်။ 16လှုက်လှာန် မဲ၊ ဂေ ဒီ ဘြဲ ကိူန်၊ တဲး န့ ကိူန် ပီ ကာပုး ဒဲင် ကာဒါယ်။ အာဆေ ပဲ ဒီ တိး ကာပုး အီ ကွယ် ဒဲင် ကာဒါယ်၊ အန် ဒီ ဘော ပဲ ဒီ တိး ခဲ့ ကိူန် လှုက်လှာန် မဲ တီ။ 17တဲး မဲ ယိတ့် ဒေါ တီ နီ၊ ဟာဝ် ဝိန် ဒီ လဲ ဘော မိူင်၊ တဲး မဲ ဟာဝ် ခဲ့ တူင့် ခဲ့ ကာဝဝ်း မိူင်၊ အုဝ် ဒီ ဒွါ တူတ့် ဒီ မဲ။”
18ဇဝ်ဖြာ ဟဲ့ ဟွတ့် ကာလာင် ပါယ် တီ အာဘြာမ် ဝီ ယိတ့်၊ ဒိုဝ်း ဘော ထိုပ် ဘိက် အန်၊ ဟာဝ် ချ ဘဲန် ပ့လုဝ့် ဘဲန် ပ့လုဝ့်။ ဟဲ့ ဟွတ့်၊ အန် ဝီ ဟာဝ် ကွယ် ခြိုမ် ဟေ ထေရေပ် အီ ကွယ် ဒီ ဂ့လင် အီ စိူဝ် မမ်ရေ။
Currently Selected:
ဒေါ ဂုဝ် 13: pce
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
