ꤜꤢꤨꤊꤢ꤬ 10

ꤛꤢꤩ꤬ꤏꤛꤢꤨ ꤕꤜꤝꤢ꤭ꤡꤝꤢ ꤊꤣꤧ꤬ꤛꤢꤧ꤭ ꤞꤥ꤭ꤞꤝꤢꤒꤣ꤬ꤏꤣꤧ꤭ ꤔꤢꤧ ꤞꤤꤔꤣꤧ꤭

1ꤓꤥ꤭ꤚꤣꤧ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤔꤝꤢꤓꤢꤧ꤬ ꤚ꤫ꤥ꤬ꤢꤩ ꤕ꤫ꤥ꤬ ꤟꤣꤧ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤘꤣ ꤢ꤬ꤚꤥ꤬ ꤞꤥ꤭ꤞꤝꤢꤒꤣ꤬ꤏꤣꤧ꤭ ꤔꤢꤧ ꤞꤤꤔꤣꤧ꤭#10:1 ꤜꤤ꤬ꤖꤢ ꤗꤢꤨ꤮ ꤑꤢꤔꤢꤨ꤬ꤋꤢꤩ꤭ ꤒꤣꤧ꤬ꤟꤢꤩ꤬ꤟꤢꤩ꤬ꤔꤣꤧ꤬, ꤢ꤬ ꤚꤢ꤭ ꤞꤥ꤭ꤞꤝꤢꤒꤣ꤬ꤏꤣꤧ꤭꤯ ꤚꤣꤧ꤬ ꤢ꤬ ꤔꤢꤪ꤭ꤡꤝꤢ ꤛꤢꤩ꤬ꤞꤤ꤭ ꤒꤣ꤬ꤖꤥ꤬ ꤔꤢꤧ ꤞꤤꤔꤣꤧ꤭ ꤚꤣꤧ꤬ ꤢ꤬ ꤔꤢꤪ꤭ ꤡꤝꤢ ꤚ꤫ꤣꤧ꤬ ꤜꤢꤪ꤭ ꤛꤢꤩ꤬ꤞꤤ꤭ ꤘꤣ ꤘꤢꤪ꤭ ꤕꤝꤢ꤭ꤒꤣ꤬ꤘꤢꤪ꤭ ꤢ꤬ꤊꤢꤨ꤭, ꤠꤤ꤭ ꤕꤝꤢ꤭ꤒꤣ꤬ꤠꤤ꤭ ꤢ꤬ꤊꤢꤨ꤭ ꤔꤢꤧ ꤜ꤫ꤢꤩ꤬ꤥ꤬ ꤕꤝꤢ꤭꤮ ꤒꤣ꤬ꤖꤥ꤬ ꤙꤣꤧ ꤜ꤫ꤢꤩ꤬ꤥ꤬ ꤘꤣ ꤙꤢꤧ꤬ꤡꤢꤩ꤬ ꤊ꤫ꤢꤦ꤬ꤚꤢꤩ꤭ ꤡꤝꤢ ꤣꤧ꤭ꤔꤣꤧ꤬ ꤒꤣꤧ꤬ꤟꤢꤩ꤬꤯ 2ꤢ꤬ ꤟꤢꤩ ꤕ꤫ꤢꤩ꤬ ꤛꤢꤩ꤬ꤞꤤ꤭ ꤔꤢꤧ, “ꤜ꤫ꤢꤩ꤬ꤊꤢꤩꤙꤥ ꤢ꤬ꤜ꤫ꤢꤩ꤬ꤥ꤬ ꤥ꤬ꤢꤩꤜꤥ꤬, ꤗꤢ꤬ꤔꤢꤧꤚꤣꤧ꤬ ꤖꤚꤢꤩ꤬ꤊꤢꤩꤙꤥ ꤥ꤬ꤕꤣꤧ꤬ꤒꤤ꤮ ꤔꤢꤧ꤬ꤡꤣꤧ꤯ ꤚꤣꤧ꤬ ꤊꤝꤤ꤭ ꤜꤢ꤭ꤋꤢꤧ꤭ ꤜ꤫ꤢꤧ꤬ꤙꤢꤧ꤬ꤡꤢꤩ꤬ ꤔꤢꤧ ꤢ꤬ ꤊ꤫ꤢꤦ꤬ ꤔꤢꤪ꤭ꤟꤢꤧ꤭ ꤖꤚꤢꤩ꤬ꤊꤢꤩꤙꤥ ꤒꤣꤧ꤬ꤟꤢꤩ꤬ ꤘꤣ ꤢ꤬ꤜ꤫ꤢꤧ꤬ꤋꤢꤨ꤬ ꤣꤧ꤭ꤔꤣꤧ꤬ ꤔꤤ꤮꤯#ꤗꤢꤞꤢꤧ ꤉:꤃꤇-꤃꤈ 3ꤡꤝꤢꤗꤣꤧ꤭! ꤠꤢꤧ꤭ ꤕꤜꤝꤢ꤭ꤡꤝꤢ ꤟꤣꤧ ꤞꤤ꤭ ꤟꤢꤨ ꤢꤨ꤭ ꤕꤜꤝꤢ꤭ꤡꤝꤢ ꤞꤤꤗꤤ꤬ ꤒꤣꤧ꤬ꤟꤢꤩ꤬ ꤘꤣ ꤓꤝꤤ꤬ꤗꤤ꤬ ꤒꤣꤧ꤬ꤟꤢꤩ꤬ ꤢ꤬ꤊꤜꤢꤩ꤭ꤔꤣꤧ꤬ ꤟꤣꤧ꤯#ꤗꤢꤞꤢꤧ ꤁꤀:꤁꤆ 4ꤚꤢꤦ꤭ꤕꤛꤢ꤭ ꤙꤢꤩ꤬ꤙꤢꤩ꤬, ꤕꤛꤢ꤭ꤕꤤ꤬ ꤙꤢꤩ꤬ꤙꤢꤩ꤬, ꤋꤢꤧ꤬ꤖꤢ ꤙꤢꤩ꤬ꤙꤢꤩ꤬, ꤖꤛꤢꤡꤝꤢꤔ꤫ꤤ꤬ ꤒ꤫ꤢꤧ꤬ ꤒꤣ꤬ꤡꤣ꤬꤮ ꤒ꤫ꤢꤧ꤬ꤗꤢꤩ꤬ ꤔꤤ꤮꤯ ꤙꤣꤧ ꤞꤤ꤭ ꤡꤝꤢ ꤘꤣ ꤊꤜꤢꤧꤜꤥ꤬ ꤢ꤬ꤋꤢꤩ꤭ꤔꤣꤧ꤬, ꤡꤝꤢ ꤥ꤬ꤊꤥ ꤟꤢꤩꤗꤥ꤬ꤟꤢꤩꤚꤢꤧ ꤒ꤫ꤢꤧ꤬ ꤢꤨ꤭ ꤒꤣ꤬ꤖꤚꤢꤩ꤬꤮ ꤒ꤫ꤢꤧ꤬ꤗꤢꤩ꤬ ꤔꤤ꤮꤯

5“ꤙꤣꤧ ꤞꤤ꤭ ꤡꤝꤢꤔꤥ꤭ ꤘꤣ ꤟꤤ꤬ ꤒꤣ꤬ꤗꤢꤩ꤭ꤗꤢꤩ꤭ ꤢ꤬ꤊꤢꤨ꤭ ꤋꤢꤩ꤭ꤔꤣꤧ꤬, ꤟꤢꤩꤚ꤫ꤣꤧ꤬ꤜꤣ ꤔꤢꤧ, ‘ꤒꤢꤩ꤬ꤞꤤꤕꤜꤢꤪ꤬ ꤒꤣꤧ꤬ꤡꤣꤧꤒꤣꤧ꤬ꤡ꤫ꤢꤨ꤬ ꤊ꤫ꤢꤦ꤬ ꤥ꤬ ꤘꤢꤦ꤬ ꤘꤣ ꤟꤤ꤬ꤣꤧ꤭ ꤒꤣ꤬ꤗꤢꤩ꤭ ꤢ꤬ꤊꤢꤨ꤭ ꤔꤤ꤮!’ ꤟꤢꤩ ꤜꤢ꤭ꤋꤢꤧ꤭ ꤟꤢꤨꤔꤣꤧ꤬ ꤔꤤ꤮꤯ 6ꤊꤣꤧ꤬ꤛꤢꤧ꤭ ꤘꤣ ꤢ꤬ ꤗꤥ꤬ ꤒꤢꤩ꤬ꤖꤚꤢꤩ꤭ꤒꤢꤩ꤬ꤘꤢꤦ꤭ ꤊꤢꤩ꤬ ꤥ꤬ ꤙꤣꤧꤔꤣꤧ꤬ ꤒꤣ꤬ꤖꤚꤢꤩ꤬ ꤟꤢꤩꤔꤣꤧ꤬ꤗꤢ꤬, ꤢ꤬ ꤊ꤫ꤢꤦ꤬ ꤔ꤫ꤤ꤬ꤙꤢꤩ꤬ ꤘꤢꤦ꤬ ꤔꤢꤧ꤬ ꤒꤢꤩ꤬ꤟꤢꤩꤗꤥ꤬ꤟꤢꤩꤚꤢꤧ ꤢ꤬ ꤒꤢꤩ꤬ꤖꤚꤢꤩ꤭ꤒꤢꤩ꤬ꤘꤢꤦ꤭ ꤣꤧ꤭ꤔꤣꤧ꤬ ꤕꤢ꤭꤯ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤗꤥ꤬ ꤒꤢꤩ꤬ꤖꤚꤢꤩ꤭ꤒꤢꤩ꤬ꤘꤢꤦ꤭ ꤊꤢꤩ꤬ ꤥ꤬ꤒꤥ꤬ ꤟꤢꤩꤔꤣꤧ꤬, ꤔꤢꤧ꤬ ꤒꤢꤩ꤬ꤟꤢꤩꤗꤥ꤬ꤟꤢꤩꤚꤢꤧ ꤒꤢꤩ꤬ꤖꤚꤢꤩ꤭ꤒꤢꤩ꤬ꤘꤢꤦ꤭ ꤣꤧ꤭ꤔꤣꤧ꤬ ꤢ꤬ ꤊ꤫ꤢꤦ꤬ ꤊꤢ꤬ꤋꤛꤢ꤭ꤒꤥ꤭ ꤋꤛꤢ꤭ꤞꤢꤧ ꤘꤢꤦ꤬ ꤘꤣ ꤔꤢꤧ꤬ ꤥ꤬ ꤕꤢ꤭꤯ 7ꤥ꤬ ꤙꤣꤧ ꤟꤤ꤬ꤔꤣꤧ꤬ ꤒꤣ꤬ꤗꤢꤩ꤭ ꤢ꤬ꤊꤢꤨ꤭ ꤚꤣꤧ꤬ ꤟꤤ꤬ꤙꤢꤧ꤬ꤡꤢꤩ꤬ ꤘꤣꤧꤢꤩ꤬ꤘꤣꤧꤥ꤭ ꤞꤤ꤭ ꤤ꤭ꤒꤢꤩ꤭ꤒꤢꤩ꤭꤮ ꤙꤢꤩ꤬ꤙꤢꤩ꤬, ꤒꤣꤧ꤬ꤚꤢꤨ ꤢꤩ꤬ ꤜꤢ꤭ꤋꤢꤧ꤭, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤖꤚꤢꤩ꤬ꤗꤢꤩ꤬ꤒꤢꤩ꤬ꤖꤢꤨ ꤒꤣ꤬ꤖꤚꤢꤩ꤬ꤔꤣꤧ꤬, ꤢ꤬ ꤒꤥ꤭ꤙꤢꤩ꤬ ꤔ꤫ꤤ꤬ꤙꤢꤩ꤬ ꤔꤢꤧ꤭ ꤢ꤬ꤋꤝꤢꤢ꤬ꤊꤢꤩ꤬꤯ ꤡꤝꤢꤜꤢꤩ꤭ꤥ꤬ꤗꤣꤧ꤭ ꤢꤨ꤭ꤟꤤ꤬ ꤒꤣ꤬ꤗꤢꤩ꤭ ꤓꤥ꤭ ꤒꤣ꤬ꤗꤢꤩ꤭ ꤒ꤫ꤢꤧ꤬ꤗꤢꤩ꤬ ꤔꤤ꤮꤯

8“ꤞꤤ꤭ ꤡꤝꤢꤔꤥ꤭ ꤘꤣ ꤠꤤ꤭ ꤒꤣ꤬ꤠꤤ꤭ꤠꤤ꤭ ꤢ꤬ꤊꤢꤨ꤭ ꤙꤢꤪꤋꤢꤩ꤭ꤒꤢꤩ꤭꤮ ꤙꤢꤩ꤬ꤙꤢꤩ꤬ ꤔꤣꤧ꤬, ꤢꤨ꤭ ꤊꤢꤩ꤬ ꤢꤩꤗꤥ꤬ꤏꤢꤦ꤬ ꤞꤤ꤭ ꤊꤢꤩ꤬ꤟꤢꤩꤚꤣꤧ꤬, ꤢꤨ꤭ ꤘꤣꤧꤢꤩ꤬ ꤞꤤ꤭ ꤤ꤭ꤒꤢꤩ꤭ꤒꤢꤩ꤭꤮ ꤙꤢꤩ꤬ꤙꤢꤩ꤬ ꤔꤣꤧ꤬, ꤒꤣꤧ꤬ꤚꤢꤨ ꤢꤩ꤬ ꤜꤢ꤭ꤋꤢꤧ꤭꤯ 9ꤛ꤫ꤢꤧ꤬ꤥ꤬ꤗ꤫ꤢꤩ꤬ ꤕ꤫ꤢꤩ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ꤏꤝꤤꤢ꤬ꤏꤢꤩ꤭ ꤙꤣꤧ ꤠꤤ꤭ꤔꤣꤧ꤬ ꤒꤣ꤬ꤠꤤ꤭ ꤢ꤬ꤊꤢꤨ꤭ ꤔꤣꤧ꤬꤯ ꤚꤣꤧ꤬ ꤟꤢꤩꤏꤥ꤬ ꤕ꤫ꤢꤩ꤬ ꤊꤣꤧ꤬ꤛꤢꤧ꤭ ꤥ꤬ ꤙꤣꤧꤔꤣꤧ꤬ ꤒꤣꤧ꤬ꤟꤢꤩ꤬ ꤔꤢꤧ, ‘ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ꤚꤢꤩ꤭ ꤕꤣꤓꤣꤧ꤭ꤕꤣꤊ꤫ꤢꤩ꤬ ꤢ꤬ꤗ꤫ꤢꤪ꤬ꤔꤣꤧ꤭ꤗ꤫ꤢꤪ꤬ꤞꤢꤩ꤭ ꤔꤣꤧ꤬ ꤢ꤬ ꤟꤢꤧ꤭ꤒ꤫ꤥ꤬ꤖꤢꤦ꤬ ꤟꤣꤧ ꤔꤢꤧ ꤞꤤ꤭ ꤟꤣꤧ꤯’ 10ꤗꤢ꤬ꤔꤢꤧꤚꤣꤧ꤬ ꤙꤣꤧ ꤞꤤ꤭ ꤡꤝꤢꤔꤥ꤭ ꤘꤣ ꤠꤤ꤭ ꤒꤣ꤬ꤠꤤ꤭ꤠꤤ꤭ ꤢ꤬ꤊꤢꤨ꤭ ꤋꤢꤩ꤭ꤔꤣꤧ꤬, ꤢꤨ꤭ ꤊꤢꤩ꤬ ꤢꤩꤗꤥ꤬ꤏꤢꤦ꤬ ꤞꤤ꤭ ꤒꤥ꤬ ꤊꤢꤩ꤬ꤟꤢꤩꤚꤣꤧ꤬, ꤡꤝꤢ ꤘꤣ ꤊꤜꤢꤧꤘꤢꤨ꤬ꤊꤢꤨ꤭ ꤔꤣꤧ꤬, ꤚꤣꤧ꤬ ꤡꤝꤢ ꤟꤢꤩ ꤔꤢꤧ, 11‘ꤞꤤ꤭ ꤠꤤ꤭ꤊꤢꤨ꤭ ꤟꤢꤩ꤬ꤗꤢꤦ꤬ ꤘꤣ ꤢ꤬ ꤙꤢꤧꤗꤢ꤬ ꤕꤢꤩ꤬ ꤋꤢꤧ꤬ꤛꤢ꤭ꤜꤢꤩ꤭ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤕꤢꤩ꤬ ꤞꤥ꤭ꤒꤢ꤭ꤊꤢꤧ꤭ ꤕ꤫ꤢꤩ꤬ꤟꤣꤧ ꤞꤤ꤭ ꤟꤣꤧ꤯ ꤕꤢꤩ꤬ ꤞꤤꤛ꤫ꤢꤦ꤬ ꤔꤢꤪ꤭ꤞꤤꤑꤢꤩ꤭ ꤞꤤ꤭ ꤔꤢꤧ ꤕꤢꤩ꤬ ꤘꤢꤧ꤬ꤊꤢꤧ꤭ꤟꤣꤧ ꤞꤤ꤭ ꤟꤣꤧ꤯ ꤗꤢ꤬ꤔꤢꤧꤚꤣꤧ꤬ ꤒꤥ꤭ꤗꤢ ꤜꤢ꤭ꤋꤢꤧ꤭ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ꤚꤢꤩ꤭ ꤕꤣꤓꤣꤧ꤭ꤕꤣꤊ꤫ꤢꤩ꤬ ꤢ꤬ꤗ꤫ꤢꤪ꤬ꤔꤣꤧ꤭ꤗ꤫ꤢꤪ꤬ꤞꤢꤩ꤭ ꤔꤣꤧ꤬ ꤢ꤬ ꤟꤢꤧ꤭ꤒ꤫ꤥ꤬ꤖꤢꤦ꤬ ꤟꤣꤧ꤯’#ꤗꤢꤞꤢꤧ ꤁꤀:꤇-꤁꤄, ꤗꤢ꤬ꤊꤢꤨ ꤆:꤈-꤁꤁, ꤜꤢꤨꤊꤢ꤬ ꤉:꤃-꤅ 12ꤠꤢꤧ꤭ ꤟꤢꤩ ꤞꤤ꤭, ꤏꤢ꤮ ꤡꤢꤪꤗꤣꤧ꤬ꤚꤢꤧ꤬ ꤘꤣꤧꤡꤢ꤭ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤕꤢ꤭ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤊ꤫ꤢꤦ꤬ ꤞꤤꤛꤢꤪ꤬ꤚꤣꤧ ꤜꤣ ꤕꤢ꤬ ꤡꤣꤧ ꤠꤤ꤭ꤎꤢ꤬ꤘꤥ꤬ ꤣꤧ꤭ꤔꤣꤧ꤬ ꤔꤢꤧ ꤢ꤬ ꤞꤤꤛꤢꤪ꤬ꤚꤣꤧ ꤠꤤ꤭ꤣꤧ꤭ ꤒꤣ꤬ꤠꤤ꤭ꤔꤣꤧ꤬ ꤕꤢ꤭꤯#ꤗꤢꤞꤢꤧ ꤁꤀:꤁꤅

ꤠꤤ꤭ ꤘꤣ ꤢ꤬ ꤛ꤫ꤢꤦ꤬ꤢꤩ꤬ꤒꤥ꤬ ꤒꤣꤧ꤬ꤟꤢꤩ꤬

(ꤗꤢꤞꤢꤧ ꤁꤁:꤂꤀-꤂꤄)

13“ꤠꤤ꤭ꤋꤢꤪꤚꤢ꤬ꤞꤢꤩ꤬ꤖꤢꤨ ꤞꤤ꤭꤮, ꤒꤢꤩ꤬ꤘꤣꤧꤡꤢ꤭ ꤊ꤫ꤢꤦ꤬ ꤟꤢꤧ꤭ꤙꤢꤩ꤬ ꤗ꤫ꤢ꤬ꤔꤤꤔꤢꤧ꤬ ꤡꤣꤧ ꤞꤤ꤭ ꤕꤢ꤭꤯ ꤞꤤ꤭ ꤠꤤ꤭ꤙꤢꤩ꤬ꤞꤢ꤬ꤎꤢꤧꤘꤢ꤬ꤖꤢꤨ ꤒꤣꤧ꤬ꤟꤢꤩ꤬ ꤙꤢꤩ꤬ꤙꤢꤩ꤬, ꤒꤢꤩ꤬ꤘꤣꤧꤡꤢ꤭ ꤊ꤫ꤢꤦ꤬ ꤟꤢꤧ꤭ꤙꤢꤩ꤬ ꤊꤣꤧ꤭ ꤡꤣꤧ ꤞꤤ꤭ ꤕꤢ꤭ꤕꤢ꤭꤯ ꤒꤢꤩ꤬ꤒꤣꤧ꤬ꤊꤜꤤ ꤘꤣ ꤠꤢꤧ꤭ ꤘꤣꤧꤜꤥ꤭ ꤕ꤫ꤢꤩ꤬ ꤟꤣꤧ ꤞꤤ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤠꤢꤧ꤭ ꤊꤢꤩ꤬ ꤘꤣꤧꤜꤥ꤭ ꤒꤥ꤭ꤙꤛꤢ꤬ ꤘꤣ ꤠꤤ꤭ꤓꤢꤛꤣ꤬ ꤔꤢꤧ ꤠꤤ꤭ꤎꤤꤘꤥ꤬ ꤟꤢꤩꤔꤣꤧ꤬ꤗꤢ꤬, ꤓꤣꤧ꤭ꤖꤢꤨꤊ꤫ꤢꤩ꤬ꤖꤢꤨ ꤙꤣꤧꤔꤣꤧ꤬ ꤒꤣꤧ꤬ꤟꤢꤩ꤬ ꤊꤜꤢꤩ ꤥ꤬ꤔꤢꤧ꤭ꤥ꤬ ꤘꤣ ꤊꤢꤨꤖꤢꤩ꤬ꤗꤢꤦ꤬ꤋꤢꤨ꤬ ꤚꤣꤧ꤬ ꤛꤢꤩ꤬ꤞꤤ꤭ ꤊꤜꤢꤩ ꤊꤢꤦ꤭ꤞꤢꤧꤓꤢꤧ꤬ ꤟꤣꤧ꤬ꤡꤢ꤬ꤒꤣꤧ꤬ꤖꤚꤢꤨ ꤘꤣ ꤢ꤬ ꤘꤣꤧꤜꤥ꤭ ꤔꤢꤧ ꤛꤢꤩ꤬ꤞꤤ꤭ ꤛꤢꤧ꤬ ꤚꤣꤧ ꤜꤢ꤬ꤋꤢꤧ꤭ ꤢ꤬ꤔ꤫ꤢꤩ꤬ ꤟꤣꤧ, ꤛꤢꤩ꤬ꤞꤤ꤭ ꤊ꤫ꤢꤦ꤬ ꤗꤢꤩ꤬ ꤜꤢ꤭ꤋꤢꤧ꤭ ꤟꤢꤨꤣꤧ꤭ ꤑꤢ꤭ꤜꤥ꤬ꤟꤣꤧ꤯#ꤛꤢ꤬ꤏꤛꤢꤛꤢ꤬ ꤂꤃:꤁-꤁꤈, ꤛꤣ꤬ꤟꤢꤩꤎꤢ꤬ꤊꤢꤩꤜꤢ꤬ ꤂꤆:꤁-꤂꤈:꤂꤆, ꤡꤛꤥ꤬ꤢꤩꤜꤢ꤬ ꤃:꤄-꤈, ꤢ꤬ꤗꤥ꤬ꤎꤣ꤬ ꤁:꤉-꤁꤀, ꤞꤣ꤬ꤋꤢ꤬ꤚꤣ꤬ꤛꤢ꤬ ꤉:꤂-꤄ 14ꤏꤢ꤮ ꤒꤢꤩ꤬ꤘꤣꤧꤡꤢ꤭ ꤢ꤬ꤗ꤫ꤢꤪ꤬ꤔꤣꤧ꤭ ꤟꤢꤧ꤭ꤒ꤫ꤥ꤬ ꤕꤢ꤭ ꤚꤣꤧ꤬, ꤠꤤ꤭ꤓꤢꤛꤣ꤬ꤖꤢꤨ ꤔꤢꤧ ꤠꤤ꤭ꤎꤤꤘꤥ꤬ꤖꤢꤨ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤞꤤꤛꤢꤪ꤬ꤚꤣꤧꤜꤣ ꤔꤢꤧ ꤞꤤ꤭ ꤕꤢ꤭꤯ 15ꤠꤤ꤭ꤊꤢ꤬ꤕꤢꤩ꤬ꤚꤢ꤬ꤔꤢꤪ꤬ꤖꤢꤨ ꤞꤤ꤭꤮, ꤞꤤ꤭ ꤒꤣꤧ꤬ꤔꤢꤩ꤬ꤚꤣꤧ ꤡꤣꤧ ꤜꤢ꤭ꤋꤢꤧ꤭ ꤞꤤ꤭ꤔ꤫ꤢꤩ꤬ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤘꤢꤧ꤬ꤓꤢꤧ꤬ꤜꤥ꤭ ꤒ꤫ꤥ꤬ ꤡꤣꤧ ꤞꤤ꤭ ꤘꤣ ꤗꤢꤪꤋꤢꤨ꤬ ꤟꤢꤧ꤭? ꤢ꤬ ꤘꤢꤧ꤬ꤓꤢꤧ꤬ꤜꤥ꤭ ꤒ꤫ꤥ꤬ ꤔꤢꤧ ꤞꤤ꤭ ꤒꤥ꤬꤯ ꤢ꤬ ꤊ꤫ꤢꤦ꤬ ꤠꤤ꤭ꤒꤢ꤭ꤊꤢꤧ꤭ ꤞꤤ꤭ ꤘꤣ ꤗꤢꤪꤚꤢ꤬ꤕꤢꤪ꤬ꤒꤢꤧ꤬ꤊꤢꤨ꤭ ꤕꤢ꤭!”#ꤛꤢ꤬ꤏꤛꤢꤛꤢ꤬ ꤁꤄:꤁꤃-꤁꤅

16ꤛꤢꤩ꤬ꤏꤛꤢꤨ ꤟꤢꤩ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤏꤣꤧꤞꤤꤔꤣꤧ꤭ ꤣꤧ꤭ꤒꤣꤧ꤬ꤟꤢꤩ꤬ ꤔꤢꤧ, “ꤊꤣꤧ꤬ꤛꤢꤧ꤭ ꤘꤣ ꤢ꤬ ꤔ꤫ꤤ꤬ꤘꤢ꤭ ꤞꤤ꤭ꤍ꤫ꤥ꤬ ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤗ꤫ꤢ꤬ꤟꤣꤧ ꤢ꤬ ꤔ꤫ꤤ꤬ꤘꤢ꤭ ꤟꤣꤧ ꤠꤢꤧ꤭ꤍ꤫ꤥ꤬ ꤟꤣꤧ꤯ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤓꤢꤩꤏꤢꤦ꤬ꤊꤢꤧ꤭ ꤞꤤ꤭ ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤢ꤬ ꤓꤢꤩꤏꤢꤦ꤬ꤊꤢꤧ꤭ꤟꤣꤧ ꤠꤢꤧ꤭ ꤟꤣꤧ꤯ ꤚꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤓꤢꤩꤏꤢꤦ꤬ꤊꤢꤧ꤭ ꤠꤢꤧ꤭ ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤢ꤬ ꤓꤢꤩꤏꤢꤦ꤬ꤊꤢꤧ꤭ꤟꤣꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤔꤢꤪ꤭ꤟꤢꤧ꤭ꤜꤢꤧ꤬ ꤠꤢꤧ꤭ ꤣꤧ꤭ꤔꤣꤧ꤬ ꤒꤣ꤬ꤖꤚꤢꤩ꤬ ꤟꤣꤧ꤯”#ꤗꤢꤞꤢꤧ ꤁꤀:꤄꤀, ꤗꤢ꤬ꤊꤢꤨ ꤉:꤃꤇, ꤜꤢꤨꤊꤢ꤬ ꤉:꤄꤈, ꤛꤥ꤭ꤟꤢ꤬ ꤁꤃:꤂꤀

ꤊꤣꤧ꤬ꤛꤢꤧ꤭ ꤞꤥ꤭ꤞꤝꤢꤒꤣ꤬ꤏꤣꤧ꤭ ꤔꤢꤧ ꤞꤤꤔꤣꤧ꤭ ꤊꤢ꤬ꤋꤛꤢ꤭ ꤒ꤫ꤥ꤬

17ꤊꤣꤧ꤬ꤛꤢꤧ꤭ ꤞꤥ꤭ꤞꤝꤢꤒꤣ꤬ꤏꤣꤧ꤭ ꤔꤢꤧ ꤞꤤꤔꤣꤧ꤭ ꤊꤢ꤬ꤋꤛꤢ꤭ꤒ꤫ꤥ꤬ ꤜꤢ꤭ꤋꤢꤧ꤭ ꤔꤢꤧ ꤒꤢꤩ꤬ꤞꤤꤊꤣꤧ꤬ꤜꤢꤪꤊꤣꤧ꤬ꤖꤢꤦ꤭꤯ ꤚꤣꤧ꤬ ꤛꤢꤩ꤬ꤞꤤ꤭ ꤟꤢꤩ ꤙꤢꤧ꤬ꤡꤢꤩ꤬ ꤔꤢꤧ, “ꤙꤢꤧ꤬ꤡꤢꤩ꤬, ꤙꤣꤧ ꤕꤢꤩ꤬ ꤕꤥ ꤔꤢꤧ ꤔꤢꤧ꤬ꤗꤝꤤ꤭ ꤢ꤬ꤋꤢꤩ꤭ꤔꤣꤧ꤬, ꤜꤥ꤭ꤔꤢꤩꤜꤥ꤭ꤔꤢ꤬ ꤚꤣꤧ꤬ ꤢ꤬ ꤡꤢꤨ꤭ꤢꤩ꤬ ꤡꤣꤧ ꤕꤢꤩ꤬ꤍ꤫ꤥ꤬ ꤡꤣꤧ꤯”

18ꤛꤢꤩ꤬ꤏꤛꤢꤨ ꤟꤢꤩꤏꤢꤦ꤬ ꤛꤢꤩ꤬ꤞꤤ꤭ ꤔꤢꤧ, “ꤠꤢꤧ꤭ ꤗꤢꤧꤓ꤫ꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤗꤢꤩ꤬ꤕ꤫ꤢꤩ꤬ ꤜꤥ꤭ꤔꤢꤩꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤊꤢꤨ꤬ꤊꤜꤢꤪ ꤚꤣꤧ꤬ ꤢ꤬ ꤥ꤬ ꤘꤣ ꤗꤢꤪꤋꤢꤨ꤬ ꤜꤣꤧ꤬ꤒꤢ꤭ ꤞꤢꤧ ꤡꤣꤧ ꤔꤢꤧ ꤒꤣꤧ꤬ꤛ꤫ꤢ꤬ꤙꤢꤪ ꤔꤣꤧ꤬ ꤡꤣꤧ꤯ 19ꤔ꤫ꤤ꤬ꤘꤢ꤭ ꤜꤢ꤭ꤋꤢꤧ꤭! ꤞꤢꤧꤟꤢꤨ ꤞꤤ꤭ ꤊ꤫ꤢꤦ꤬ ꤋꤢꤩ꤭ꤛ꤫ꤤ꤬ꤡꤝꤢ ꤘꤣ ꤚ꤫ꤢꤨ꤬ꤒꤣꤧ꤬ꤟꤢꤩ꤬ ꤔꤢꤧ ꤘꤢꤧ꤭ꤗꤢꤩ꤬ꤒꤣꤧ꤬ꤟꤢꤩ꤬ ꤢ꤬ꤋꤢꤨ꤬ ꤕꤢ꤭, ꤚꤣꤧ꤬ ꤞꤤ꤭ ꤊ꤫ꤢꤦ꤬ ꤗꤢꤩ꤬ꤕ꤫ꤢꤩ꤬ꤊꤢꤧ꤭ ꤜꤥ꤭ꤔꤢꤩꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤊꤢꤨ꤬ꤊꤜꤢꤪ ꤘꤣ ꤢ꤬ ꤞꤤꤓꤢꤩ꤬ ꤞꤤ꤭ ꤣꤧ꤭ꤒꤣ꤬ꤘꤥ꤭ ꤢ꤬ ꤒꤢꤩ꤬ꤖꤚꤥ꤬ꤒꤢꤩ꤬ꤖꤚꤢꤧ꤬ ꤒꤣꤧ꤬ꤟꤢꤩ꤬ ꤜꤢꤪ꤭꤮ ꤕꤜꤤ꤭ ꤢ꤬ꤑꤢꤩ꤭ ꤕꤢ꤭ꤔꤣꤧ꤬ ꤚꤣꤧ꤬, ꤠꤢꤧ꤭ ꤘꤣꤧꤟꤣꤧ ꤞꤤ꤭ ꤒꤢꤩ꤬ꤖꤚꤥ꤬ꤒꤢꤩ꤬ꤖꤚꤢꤧ꤬ ꤟꤣꤧ꤯ ꤚꤣꤧ꤬ ꤒꤢꤩ꤬ ꤘꤣ ꤢ꤬ ꤊ꤫ꤢꤦ꤬ ꤗꤢꤩ꤬ꤙꤢꤩ꤬ꤗꤢꤩ꤬ꤏꤢꤩ꤭ ꤞꤤ꤭ ꤔꤣꤧ꤬ ꤢ꤬ ꤥ꤬ꤕꤢ꤬ ꤒꤣ꤬ꤡꤣ꤬꤮ ꤒꤥ꤬꤯#ꤓꤢꤨ꤬ꤞꤢꤩꤓꤢꤧ꤬ ꤉꤁:꤁꤃ 20ꤗꤢ꤬ꤔꤢꤧꤚꤣꤧ꤬, ꤜꤥ꤭ꤔꤢꤩꤜꤥ꤭ꤔꤢ꤬ ꤒꤣꤧ꤬ꤟꤢꤩ꤬ ꤡꤢꤨ꤭ꤢꤩ꤬ ꤞꤤ꤭ꤍ꤫ꤥ꤬ ꤋꤝꤢ꤬ꤋꤛꤢ꤭ꤚꤣꤧ꤬ ꤞꤤꤋꤚꤢꤦ꤭ ꤜꤢ꤭ꤋꤢꤧ꤭ ꤒ꤫ꤢꤧ꤬ꤗꤢꤩ꤬ ꤔꤤ꤮꤯ ꤞꤤꤋꤚꤢꤦ꤭ ꤜꤢ꤭ꤋꤢꤧ꤭ ꤘꤣ ꤢꤨ꤭ ꤚꤢ꤭ꤗꤢ ꤥ꤬ ꤟꤣꤧ ꤞꤤ꤭ꤗꤝꤤ꤭ ꤘꤣ ꤗꤢꤪꤋꤢꤨ꤬ ꤣꤧ꤭ꤔꤣꤧ꤬꤯”

ꤛꤢꤩ꤬ꤏꤛꤢꤨ ꤞꤤꤋꤚꤢꤦ꤭ꤞꤤꤜꤢꤪ꤭

(ꤗꤢꤞꤢꤧ ꤁꤁:꤂꤅-꤂꤇, ꤁꤃:꤁꤆-꤁꤇)

21ꤙꤣꤧꤔꤣꤧ꤬ꤋꤢꤩ꤭, ꤘꤣ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤛ꤫ꤢꤧ꤬ꤛꤥ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ꤚꤣꤧ꤬ ꤛꤢꤩ꤬ꤏꤛꤢꤨ ꤜꤣꤙꤢ꤭ ꤔꤢꤧ ꤒꤢꤩ꤬ꤞꤤꤋꤚꤢꤦ꤭ꤞꤤꤜꤢꤪ꤭ ꤚꤣꤧ꤬ ꤢ꤬ ꤟꤢꤩ ꤔꤢꤧ, “ꤊꤣ꤮ ꤗꤢꤪꤋꤢꤨ꤬ ꤙꤢꤧ꤬ꤡꤢꤩ꤬, ꤟꤢꤩ꤬ꤋꤢꤨ꤬ ꤙꤢꤧ꤬ꤡꤢꤩ꤬, ꤠꤢꤧ꤭ꤖꤢꤩ꤭ ꤡꤢꤪꤗꤣꤧ꤬ꤚꤢꤧ꤬꤮, ꤠꤢꤧ꤭ ꤟꤢꤩꤙꤝꤤꤟꤢꤩꤒꤣꤧ꤬ꤚꤣꤧ꤭ ꤔꤢꤧ꤬, ꤒꤢꤩ꤬ ꤘꤣ ꤔꤢꤧ꤬ ꤘꤢꤧ꤬ ꤘꤢꤪꤥꤘꤢꤪꤙꤤ ꤕ꤫ꤢꤩ꤬ ꤖꤚꤢꤩ꤬ꤞꤤꤖꤢꤩꤖꤢꤨ ꤒꤣꤧ꤬ꤟꤢꤩ꤬ ꤔꤢꤧ ꤖꤚꤢꤩ꤬ꤗꤢꤧꤕꤢꤨ꤭ꤞꤤꤑꤢꤩ꤭ꤒꤢꤩ꤬ꤖꤢꤨ ꤒꤣꤧ꤬ꤟꤢꤩ꤬ꤔꤣꤧ꤬, ꤔꤢꤧ꤬ ꤘꤣꤧꤜꤥ꤭ꤓꤢꤧ꤬ ꤕ꤫ꤢꤩ꤬ꤟꤣꤧ ꤔꤢꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤒꤣꤧ꤬ꤔꤢꤩ꤬ꤕꤣꤧ꤬ꤒꤤ ꤚꤣꤧꤘꤢꤦ꤬ ꤢ꤬ꤔ꤫ꤢꤩ꤬ ꤞꤢꤧꤔꤢꤧ ꤖꤢꤨꤡ꤫ꤢꤩ꤬ꤟꤢꤨ ꤔꤣꤧ꤬ꤒꤣꤧ꤬ꤟꤢꤩ꤬ꤟꤣꤧ ꤢ꤬ꤋꤝꤢ꤬ꤢ꤬ꤋꤛꤢ꤭, ꤠꤢꤧ꤭ ꤟꤢꤩꤙꤝꤤꤟꤢꤩꤒꤣꤧ꤬ꤚꤣꤧ꤭ꤓꤢꤧ꤬ ꤔꤢꤧ꤬꤯ ꤊꤣ꤮ ꤖꤢꤩ꤭꤮, ꤔꤢꤧ꤬ ꤞꤤꤕꤜꤢꤪ꤬ꤥ꤬ ꤞꤤꤕꤜꤢꤪ꤬ꤒꤥ꤭ ꤗ꤫ꤢ꤬ꤔꤢꤧ꤬ꤟꤣꤧ ꤔꤢꤧ ꤢ꤬ ꤊ꤫ꤢꤦ꤬ꤙꤢꤩ꤬ ꤓꤝꤢ꤭ꤓꤢꤧ꤬ꤔꤢꤧ꤭ ꤟꤢꤨꤣꤧ꤭ꤟꤣꤧ ꤢ꤬ꤋꤝꤢ꤬ꤢ꤬ꤋꤛꤢ꤭, ꤠꤢꤧ꤭ ꤟꤢꤩꤙꤝꤤꤟꤢꤩꤒꤣꤧ꤬ꤚꤣꤧ꤭ ꤔꤢꤧ꤬ꤡꤣꤧ ꤔꤢꤧ꤬꤯

22“ꤠꤢꤧ꤭ꤖꤢꤩ꤭ ꤘꤣꤧꤒꤢ꤭ꤜꤢꤪ꤭ ꤟꤣꤧ ꤠꤢꤧ꤭ ꤒꤢꤩ꤬ꤕꤝꤢ꤭꤮ ꤒꤣ꤬ꤡꤣ꤬ ꤟꤣꤧ꤯#ꤛꤥ꤭ꤟꤢ꤬ ꤃:꤃꤅ ꤖꤢꤨꤖꤚꤢꤩ꤬ꤋꤢꤨ꤭ ꤗꤢ꤬ ꤢꤨ꤭ꤕꤢꤩ꤭ꤔꤣꤧ꤬ ꤢꤨ꤭ ꤞꤤꤑꤢꤩ꤭ ꤒꤣ꤬ꤖꤚꤢꤩ꤬꤮ ꤒꤥ꤬꤯ ꤞꤤꤑꤢꤩ꤭ ꤒꤢꤦꤖꤢꤧ ꤖꤢꤩ꤭ꤒꤣ꤬ꤖꤚꤢꤩ꤬ ꤖꤢꤧ꤯ ꤚꤣꤧ꤬ ꤖꤢꤩ꤭ ꤗꤢ꤬ ꤢꤨ꤭ꤕꤢꤩ꤭ꤔꤣꤧ꤬ ꤢꤨ꤭ ꤞꤤꤑꤢꤩ꤭ ꤒꤣ꤬ꤖꤚꤢꤩ꤬꤮ ꤒꤥ꤬, ꤞꤤꤑꤢꤩ꤭ ꤒꤢꤦꤖꤢꤧ ꤖꤢꤨꤖꤚꤢꤩ꤬ꤋꤢꤨ꤭ ꤔꤢꤧ ꤊꤣꤧ꤬ꤛꤢꤧ꤭ ꤘꤣ ꤖꤢꤨꤖꤚꤢꤩ꤬ꤋꤢꤨ꤭ ꤔꤝꤢꤓꤢꤧ꤬ ꤜꤢꤨ꤭ ꤘꤣ ꤢ꤬ ꤊ꤫ꤢꤦ꤬ ꤘꤣꤧꤜꤥ꤭ ꤕ꤫ꤢꤩ꤬ ꤜꤢꤨ꤭ ꤕꤢ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤖꤢꤧ꤯”#ꤛꤥ꤭ꤟꤢ꤬ ꤁꤀:꤁꤅

23ꤓꤥ꤭ꤚꤣꤧ꤬ ꤛꤢꤩ꤬ꤏꤛꤢꤨ ꤒꤣꤧ꤬ꤚꤤ ꤊꤢ꤬ꤋꤛꤢ꤭ ꤘꤣ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤢ꤬ ꤥ꤬ ꤚꤣꤧ꤬ ꤢ꤬ ꤟꤢꤩꤏꤥ꤬ꤟꤥ꤬ ꤕ꤫ꤢꤩ꤬ ꤛꤢꤩ꤬ꤞꤤ꤭ ꤔꤢꤧ, “ꤜꤢꤪ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤗꤢꤧꤓ꤫ꤣꤧ꤬ ꤟꤣꤧ ꤒꤢꤩ꤬ꤘꤣ ꤞꤤ꤭ ꤗꤢꤧꤓ꤫ꤣꤧ꤬ ꤟꤣꤧ ꤣꤧ꤭ꤒꤣꤧ꤬ꤟꤢꤩ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤛꤢꤩ꤬ꤞꤤ꤭ ꤔ꤫ꤤ꤬ꤙꤢꤩ꤬ꤟꤣꤧ ꤒꤢꤩ꤬ꤏꤢꤪ꤭ꤚꤤ꤬ꤏꤢꤪ꤭ꤙꤢꤨ꤭ ꤟꤣꤧ꤯ 24ꤠꤢꤧ꤭ ꤟꤢꤩ ꤕ꤫ꤢꤩ꤬ ꤞꤤ꤭, ꤖꤚꤢꤩ꤬ꤖꤚꤥ꤬ ꤢꤩꤖꤚꤢꤩ꤬ ꤔꤢꤧ ꤡꤢꤪꤖꤢꤧ꤬ ꤢꤩꤖꤚꤢꤩ꤬ ꤘꤣ ꤢ꤬ ꤥ꤬ꤞꤣꤧ꤭ꤖꤚꤢꤩ꤬ ꤘꤣ꤮ ꤑꤢꤔꤢꤨ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤛꤢꤩ꤬ꤞꤤ꤭ ꤞꤤꤛ꤫ꤢꤦ꤬ ꤗꤢꤧꤓꤣꤧ꤭ꤊꤣꤧ꤭ ꤜꤢ꤭ꤋꤢꤧ꤭ ꤒꤢꤩ꤬ ꤘꤣ ꤞꤤ꤭ ꤗꤢꤧꤓ꤫ꤣꤧ꤬ ꤣꤧ꤭ꤔꤣꤧ꤬ꤒꤣꤧ꤬ꤟꤢꤩ꤬ ꤒꤣꤧ꤬ꤘꤢꤦꤚꤣꤧ꤬ ꤛꤢꤩ꤬ꤞꤤ꤭ ꤗꤢꤧꤓ꤫ꤣꤧ꤬ꤔꤢꤪ ꤊꤣꤧ꤭ꤢꤨ꤭ ꤒꤥ꤬꤯ ꤓꤥ꤭ꤒꤥ꤬ ꤛꤢꤩ꤬ꤞꤤ꤭ ꤞꤤꤛ꤫ꤢꤦ꤬ ꤔ꤫ꤤ꤬ꤟꤥ꤭ꤊꤣꤧ꤭ ꤜꤢ꤭ꤋꤢꤧ꤭ ꤒꤢꤩ꤬ ꤘꤣ ꤞꤤ꤭ ꤔ꤫ꤤ꤬ꤟꤥ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤒꤣꤧ꤬ꤘꤢꤦꤚꤣꤧ꤬ ꤛꤢꤩ꤬ꤞꤤ꤭ ꤔ꤫ꤤ꤬ꤟꤥ꤭ꤔꤢꤪ ꤊꤣꤧ꤭ꤢꤨ꤭ ꤒꤥ꤬꤯”

ꤏꤛꤢ꤬ꤗꤢ꤬ꤚꤤꤖꤢꤨ ꤘꤣ ꤢ꤬ꤚꤢꤧ ꤒꤣ꤬ꤖꤚꤢꤩ꤬ ꤢ꤬ꤒꤢꤩ꤬ꤘꤢꤧ ꤋꤢꤋꤥ꤬ꤍ꤫ꤥ꤬

25ꤖꤚꤢꤩ꤬ꤤ꤬ꤞꤝꤢ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤢ꤬ꤞꤢꤚꤢ ꤒꤣ꤬ꤖꤚꤢꤩ꤬ ꤊꤣꤧ꤬ꤓꤢꤪ꤬ ꤚꤣꤧ꤬ ꤢ꤬ ꤞꤤꤛ꤫ꤢꤦ꤬ ꤡꤢꤩ꤭ꤗꤢꤧꤗꤢꤩ꤬ꤗꤢꤧ ꤛꤢꤩ꤬ꤏꤛꤢꤨ ꤢ꤬ ꤒꤢꤩ꤬ꤡ꤫ꤢꤧ꤬ꤒꤣꤧ꤬ꤟꤢꤩ꤬ ꤚꤣꤧ꤬ ꤢ꤬ ꤘꤣꤧꤟꤣꤧ꤭ ꤛꤢꤩ꤬ꤏꤛꤢꤨ ꤔꤢꤧ, “ꤞꤢꤚꤢ꤮, ꤞꤢꤧꤟꤢꤨ ꤠꤢꤧ꤭ ꤊ꤫ꤢꤦ꤬ ꤔ꤫ꤤ꤬ꤙꤢꤩ꤬ ꤛ꤫ꤢꤧ꤬ꤛꤥ꤬ꤞꤣꤧ꤭ꤖꤚꤢꤩ꤬ ꤒꤣꤧ꤬ꤡꤢꤨ꤬ꤖꤚꤢꤩ꤬ ꤔꤣꤧ꤬, ꤠꤢꤧ꤭ ꤒꤥ꤭ꤙꤢꤩ꤬ ꤗꤢꤩ꤬ ꤟꤢꤨꤒꤢꤩ꤭?”#ꤗꤢꤞꤢꤧ ꤂꤂:꤃꤅-꤄꤀, ꤗꤢ꤬ꤊꤢꤨ ꤁꤂:꤂꤈-꤃꤄

26ꤛꤢꤩ꤬ꤏꤛꤢꤨ ꤟꤢꤩꤏꤢꤦ꤬ ꤢ꤬ ꤔꤢꤧ, “ꤜꤤ꤬ꤓꤢꤩ꤭ꤞꤢꤪ꤬ꤖꤢꤊꤢꤨ꤭ ꤢ꤬ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤟꤢꤩ ꤟꤢꤨꤒꤢꤩ꤭? ꤔꤢꤧ꤬ ꤘꤢꤧꤞꤤꤒꤣ꤬ꤔꤢꤪ ꤚꤣꤧ꤬ ꤔꤢꤧ꤬ ꤞꤤꤑꤢꤩ꤭ ꤟꤢꤨꤒꤢꤩ꤭?”

27ꤚꤣꤧ꤬ ꤢ꤬ ꤟꤢꤩꤏꤢꤦ꤬ ꤔꤢꤧ, “‘ꤞꤤ꤭ ꤙꤢꤩ꤬ ꤗꤥ꤬ ꤜꤢꤪ꤭ꤞꤢꤨ꤬ꤜꤢꤪ꤭ꤞꤢꤩ ꤞꤤ꤭ ꤙꤢꤧ꤬ꤡꤢꤩ꤬ ꤡꤢꤪꤗꤣꤧ꤬ꤚꤢꤧ꤬ ꤔꤢꤧ ꤞꤤ꤭ ꤞꤤꤕꤜꤢꤪ꤬ ꤏꤤ꤭ꤗꤢꤩ꤭ꤜꤢꤪ꤭, ꤗꤥ꤬ ꤜꤢꤪ꤭ꤞꤢꤨ꤬ꤜꤢꤪ꤭ꤞꤢꤩ ꤢ꤬ ꤔꤢꤧ ꤞꤤ꤭ ꤒꤢꤩ꤬ꤥ꤬ꤞꤣꤧ꤭ꤖꤚꤢꤩ꤬ ꤜꤢꤪ꤭꤮ ꤕꤜꤤ꤭, ꤗꤥ꤬ ꤜꤢꤪ꤭ꤞꤢꤨ꤬ꤜꤢꤪ꤭ꤞꤢꤩ ꤢ꤬ ꤔꤢꤧ ꤞꤤ꤭ꤟꤢꤧ꤭ꤞꤤ꤭ꤚꤢꤩ꤬, ꤗꤥ꤬ ꤜꤢꤪ꤭ꤞꤢꤨ꤬ꤜꤢꤪ꤭ꤞꤢꤩ ꤢ꤬ ꤔꤢꤧ ꤞꤤ꤭ ꤒꤢꤩ꤬ꤒꤣꤧ꤬ꤔꤢꤩ꤬ ꤜꤢꤪ꤭꤮ ꤕꤜꤤ꤭꤯#ꤘꤥ꤬ꤔꤢꤧ꤭ ꤆:꤅ ꤞꤤ꤭ ꤙꤢꤩ꤬ ꤗꤥ꤬ ꤚꤣꤧꤘꤢꤦ꤬ ꤞꤤ꤭ꤟꤤ꤬ ꤊꤢꤧ꤭ꤏꤢꤪ꤭ꤊꤢꤧ꤭ꤏꤢ ꤒꤣꤧ꤬ꤟꤢꤩ꤬ ꤟꤢꤨ ꤞꤤ꤭ ꤗꤥ꤬ꤜꤢꤧ꤬ ꤚꤣꤧꤘꤢꤦ꤬ ꤞꤤ꤭ꤔ꤫ꤢꤩ꤬ ꤔꤣꤧ꤬꤯’”#ꤡꤢꤪꤙꤢꤨ꤬ꤡꤢꤪꤙꤢꤩ꤭ ꤁꤉:꤁꤈

28ꤛꤢꤩ꤬ꤏꤛꤢꤨ ꤟꤢꤩꤏꤢꤦ꤬ ꤢ꤬ ꤔꤢꤧ, “ꤔꤢꤧ꤬ ꤒꤢꤩ꤬ꤟꤢꤩꤏꤢꤦ꤬ ꤠꤢꤧ꤭ ꤔꤣꤧ꤬ꤗꤢ꤬ ꤢ꤬ꤒꤥ꤭ ꤟꤣꤧ꤯ ꤥ꤬ꤞꤣꤧ꤭ꤖꤚꤢꤩ꤬ ꤋꤚꤝꤢ꤭ ꤞꤢꤧꤔꤢꤧ ꤔꤢꤧ꤬ ꤟꤢꤩꤔꤣꤧ꤬, ꤚꤣꤧ꤬ ꤔꤢꤧ꤬ ꤊ꤫ꤢꤦ꤬ ꤔ꤫ꤤ꤬ꤙꤢꤩ꤬ ꤘꤢꤦ꤬ ꤛ꤫ꤢꤧ꤬ꤛꤥ꤬ꤞꤣꤧ꤭ꤖꤚꤢꤩ꤬ ꤒꤣꤧ꤬ꤡꤢꤨ꤬ꤖꤚꤢꤩ꤬ ꤕꤢ꤭꤯”#ꤡꤢꤪꤙꤢꤨ꤬ꤡꤢꤪꤙꤢꤩ꤭ ꤁꤈:꤅

29ꤗꤢ꤬ꤔꤢꤧꤚꤣꤧ꤬ ꤢ꤬ ꤞꤤꤛ꤫ꤢꤦ꤬ ꤘꤣꤧꤜꤥ꤭ ꤢ꤬ꤔ꤫ꤢꤩ꤬ ꤟꤢꤨ ꤊꤣꤧ꤬ꤛꤢꤧ꤭ ꤡꤢꤪ ꤒꤣ꤬ꤖꤚꤢꤩ꤬ꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤢ꤬ ꤘꤣꤧꤟꤣꤧ꤭ ꤛꤢꤩ꤬ꤏꤛꤢꤨ ꤔꤢꤧ, “ꤊꤣꤧ꤬ꤛꤢꤧ꤭ ꤥ꤬ ꤘꤣ ꤠꤢꤧ꤭ꤟꤤ꤬ ꤊꤢꤧ꤭ꤏꤢꤪ꤭ꤊꤢꤧ꤭ꤏꤢ ꤒꤣꤧ꤬ꤟꤢꤩ꤬ ꤚꤣꤧ꤬ ꤗꤢ꤬ ꤢꤨ꤭ꤕꤢꤩ꤭ꤕꤢꤩ꤭?”

30ꤛꤢꤩ꤬ꤏꤛꤢꤨ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤒꤣ꤬ꤖꤥꤢ꤬ꤋꤢꤩ꤭, ꤊꤣꤧ꤬ꤛꤢꤧ꤭ ꤥ꤬ ꤒꤣ꤬ꤖꤚꤢꤩ꤬, ꤢ꤬ ꤥ꤬ ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬ ꤚꤣꤧ꤬ ꤢ꤬ ꤡꤝꤢ ꤘꤣ ꤠꤤ꤭ꤛꤢ꤬ꤚꤤ꤬ꤋꤢꤪ꤯ ꤚꤣꤧ꤬ ꤙꤣꤧ ꤢ꤬ ꤡꤝꤢ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤡꤝꤢ ꤒꤢ꤭ꤏꤢꤦ꤬ ꤔꤢꤧ ꤖꤚꤢꤩ꤬ꤕ꤫ꤢꤦ꤬ꤖꤢꤩ꤬ꤛꤢꤩꤕꤜꤢꤩꤢꤩ꤬ ꤢꤨ꤭ ꤒꤣꤧ꤬ꤟꤢꤩ꤬, ꤚꤣꤧ꤬ ꤛꤢꤩ꤬ꤞꤤ꤭ ꤕꤜꤥꤊꤢꤧ꤭ ꤜꤢꤪ꤭ ꤜꤢꤨ꤭ ꤟꤣꤧ꤬ꤡꤢ꤬, ꤗꤢꤦ꤭ꤕꤢꤪ꤬ ꤜꤢꤪ꤭ ꤜꤢꤨ꤭ ꤚꤣꤧ꤬ ꤢ꤬ ꤖꤢꤦ꤬ꤞꤣꤧ꤭ ꤒꤣꤧ꤬ꤜꤤ ꤡꤣꤧ ꤚꤣꤧ꤬ ꤢ꤬ ꤘꤢꤧ꤬ꤥ꤬ꤊꤢꤧ꤭ ꤖꤢꤧ ꤜꤢꤨ꤭ ꤟꤢꤨꤔꤣꤧ꤬ ꤖꤢꤧ꤯ 31ꤙꤣꤧꤔꤣꤧ꤬ꤢ꤬ꤋꤢꤩ꤭, ꤖꤚꤢꤩ꤬ꤜꤢꤨ꤭ꤒꤢꤧ꤭ ꤒꤣ꤬ꤖꤚꤢꤩ꤬ ꤡꤝꤢꤚꤝꤢꤊꤜꤢꤧ ꤔꤣꤧ꤬ꤒꤣ꤬ꤙꤥ꤭ ꤚꤣꤧ꤬ ꤢ꤬ ꤗꤢꤧꤓ꤫ꤣꤧ꤬ ꤜꤢꤨ꤭ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤡꤝꤢꤠꤢꤪ꤬ꤊꤢꤧ꤭ ꤖꤢꤧ ꤜꤢꤨ꤭ ꤖꤢꤧ꤯ 32ꤑꤢ꤭ꤒꤢꤧ꤬ꤒꤥ꤬ ꤚꤣꤧ꤬ ꤜꤢꤩ꤬ꤠꤤꤖꤢꤨ ꤒꤣ꤬ꤖꤚꤢꤩ꤬ ꤟꤢꤧ꤭ꤒ꤫ꤥ꤬ꤊꤣꤧ꤭ ꤙꤣꤧꤔꤣꤧ꤬ ꤟꤣꤧ ꤚꤣꤧ꤬ ꤢ꤬ ꤗꤢꤧꤓ꤫ꤣꤧ꤬ ꤜꤢꤨ꤭ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤡꤝꤢꤠꤢꤪ꤬ꤊꤢꤧ꤭ ꤊꤣꤧ꤭ ꤖꤢꤧꤖꤢꤧ꤯ 33ꤗꤢ꤬ꤔꤢꤧꤚꤣꤧ꤬ ꤏꤛꤢ꤬ꤗꤢ꤬ꤚꤤꤖꤢꤨ ꤒꤣ꤬ꤖꤚꤢꤩ꤬ ꤓꤢꤩ꤬ꤡꤝꤢꤊꤜꤢꤧ ꤚꤣꤧ꤬ ꤙꤣꤧ ꤢ꤬ ꤟꤢꤧ꤭ꤒ꤫ꤥ꤬ ꤙꤣꤧ ꤊꤣꤧ꤬ꤛꤢꤧ꤭ ꤙꤢꤩ꤬ꤕ꤫ꤢꤧ꤬ꤙꤢꤩ꤬ꤏꤢꤩ꤭ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ ꤥ꤬ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤗꤢꤧꤓ꤫ꤣꤧ꤬ ꤜꤢꤨ꤭ ꤚꤣꤧ꤬ ꤢ꤬ ꤞꤤꤛꤢꤪ꤬ꤚꤣꤧ ꤜꤢꤨ꤭꤯#ꤚꤢ꤭ꤗꤢꤚꤢ꤭ꤒꤢꤩ꤭ ꤔꤣꤧ꤭ꤙꤢ꤬ ꤒꤣ꤬ꤙꤢ꤬ ꤂꤈:꤁꤅ 34ꤢ꤬ ꤡꤝꤢ ꤘꤣ ꤜꤢꤨ꤭ꤥ꤬ ꤚꤣꤧ꤬ ꤢ꤬ ꤕꤜ꤫ꤥ꤬ ꤕ꤫ꤢꤩ꤬ ꤜꤢꤨ꤭ꤔ꤫ꤢꤩ꤬ꤓꤢꤧ꤭ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤔꤢꤧ ꤒꤢꤩ꤬ꤋꤢꤨ꤬ꤓꤣꤧ꤭, ꤚꤣꤧ꤬ ꤢ꤬ ꤙꤥ꤬ꤙꤤ ꤕ꤫ꤢꤩ꤬ ꤜꤢꤨ꤭꤯ ꤢ꤬ ꤗꤢꤩ꤬ꤓꤥ꤭ ꤟꤢꤨꤔꤣꤧ꤬ꤚꤣꤧ꤬ ꤢ꤬ ꤘꤢꤧ꤬ꤓꤢꤧ꤬ꤔ꤫ꤤ꤬ ꤜꤢꤨ꤭ ꤘꤣ ꤢ꤬ ꤒꤣꤧ꤬ꤞꤤꤜꤥ꤬, ꤚꤣꤧ꤬ ꤢ꤬ ꤡꤝꤢ ꤞꤢꤨ꤭ ꤜꤢꤨ꤭ ꤘꤣ ꤞꤤꤖꤚ꤫ꤢꤩ꤬ꤜ꤫ꤢꤩ꤬ꤥ꤬ ꤟꤤ꤬ꤒꤣ꤬ꤗꤢꤩ꤭ ꤢ꤬ꤊꤢꤨ꤭ ꤚꤣꤧ꤬ ꤢ꤬ ꤗꤢꤧꤡꤢꤧ꤬ꤚꤣꤧ ꤜꤢꤨ꤭ ꤙꤣꤧꤔꤣꤧ꤬꤯ 35ꤘꤣꤋꤛꤢ꤭ ꤒꤣ꤬ꤔꤣꤧ꤭ꤔꤣꤧ꤬, ꤢ꤬ ꤖꤛꤢꤓꤢꤩ꤬ ꤚꤢꤦ꤭ꤛꤢ꤬ ꤔꤣꤧ꤭ꤙꤢꤩ꤬#10:35 ꤚꤢꤦ꤭ꤛꤢ꤬ ꤘꤢꤩ꤬ꤔꤢ꤬ꤚꤤ ꤔꤣꤧ꤭ꤙꤢꤩ꤬ ꤚꤣꤧ꤬ ꤢ꤬ ꤘꤣꤧ ꤔꤢꤧ ꤖꤚꤢꤩ꤬ꤥ꤬ꤕ꤫ꤢꤪ꤬ꤟꤤ꤬ ꤣꤧ꤭ꤒꤣ꤬ꤖꤚꤢꤩ꤬ ꤚꤣꤧ꤬ ꤢ꤬ ꤟꤢꤩ ꤜꤢꤨ꤭ ꤔꤢꤧ, ‘ꤗꤢꤧꤡꤢꤧ꤬ ꤚꤢꤧꤚꤣꤧ ꤢ꤬ ꤔꤤ꤮ ꤚꤣꤧ꤬ ꤏꤢ꤮ ꤠꤢꤧ꤭ ꤊꤢ꤬ꤒ꤫ꤥ꤬ ꤋꤛꤢ꤭ꤞꤢꤧ ꤕꤢ꤭ ꤚꤣꤧ꤬, ꤢ꤬ꤜꤢꤪ꤭ ꤕ꤫ꤥ꤬ ꤙꤢ꤮ ꤒꤢꤩ꤭ ꤕꤢ꤭ꤔꤣꤧ꤬ ꤠꤢꤧ꤭ ꤊ꤫ꤢꤦ꤬ ꤘꤣꤧ ꤕ꤫ꤥ꤬ ꤘꤢꤦ꤬ ꤔꤢꤧ꤬ ꤕꤢ꤭꤯’”

36ꤚꤣꤧ꤬ ꤛꤢꤩ꤬ꤏꤛꤢꤨ ꤗꤢꤩ꤬ꤒꤣꤧ꤬ꤘꤢꤦ꤬ꤊꤢꤧ꤭ ꤢ꤬ꤒꤢꤩ꤬ꤘꤢꤧ ꤚꤣꤧ꤬ ꤢ꤬ ꤘꤣꤧꤟꤣꤧ꤭ ꤖꤚꤢꤩ꤬ꤤ꤬ꤞꤝꤢ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤢ꤬ꤞꤢꤚꤢ ꤣꤧ꤭ꤒꤣ꤬ꤖꤚꤢꤩ꤬ ꤔꤢꤧ, “ꤔꤢꤧ꤬ ꤒꤣꤧ꤬ꤔꤢꤩ꤬ ꤗꤢꤧꤗꤢꤧ ꤊꤣꤧ꤬ꤛꤢꤧ꤭ ꤣꤧ꤭ꤞꤤꤞꤥ꤭ ꤢ꤬ꤊꤜꤢꤩ꤭ ꤔꤣꤧ꤬ꤗꤢ꤬, ꤙꤣꤧꤒꤢꤩ꤭ꤒꤣ꤬ꤖꤚꤢꤩ꤬ ꤚꤣꤧ꤬ ꤢ꤬ ꤓꤝꤢ꤭ ꤖꤚꤢꤩ꤬ꤕ꤫ꤢꤦ꤬ꤖꤢꤩ꤬ꤛꤢꤩꤕꤜꤢꤩꤢꤩ꤬ ꤢꤨ꤭ ꤣꤧ꤭ꤒꤣꤧ꤬ꤟꤢꤩ꤬ ꤗꤢꤦ꤭ ꤜꤢꤨ꤭ ꤔꤣꤧ꤬ꤒꤣ꤬ꤖꤚꤢꤩ꤬ ꤢ꤬ꤟꤤ꤬ ꤊꤢꤧ꤭ꤏꤢꤪ꤭ꤊꤢꤧ꤭ꤏꤢ ꤕꤢꤩ꤭?”

37ꤚꤣꤧ꤬ ꤢ꤬ ꤟꤢꤩꤏꤢꤦ꤬ ꤛꤢꤩ꤬ꤏꤛꤢꤨ ꤔꤢꤧ, “ꤊꤣꤧ꤬ꤛꤢꤧ꤭ ꤘꤣ ꤢ꤬ ꤞꤤꤛꤢꤪ꤬ ꤗꤢꤩ꤬ꤡꤝ꤫ꤢ꤬ꤚꤣꤧ ꤜꤢꤨ꤭ ꤔꤣꤧ꤬ꤒꤣ꤬ꤖꤚꤢꤩ꤬ ꤖꤢꤧ꤯”

ꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤡꤝꤢ ꤗꤢꤩ꤬ꤊꤣꤧ꤭ ꤟꤢꤨꤔꤣꤧ꤬ ꤔꤤ꤮꤯”

ꤛꤢꤩ꤬ꤏꤛꤢꤨ ꤡꤝꤢꤥ꤬ꤜꤢꤩ꤭ ꤊꤣꤧ꤭ ꤗꤢꤪ꤬ꤗꤢ꤬ꤞꤢ ꤔꤢꤧ ꤗꤢꤪ꤬ꤗꤢ꤬ꤚꤤ

38ꤙꤣꤧ ꤛꤢꤩ꤬ꤏꤛꤢꤨ ꤔꤢꤧ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤡꤝꤢ ꤟꤢꤧ꤭ꤑꤢꤩ꤭ ꤕ꤫ꤥ꤬ ꤊꤜꤢꤧ ꤘꤣ ꤑꤢꤩ꤭ ꤢ꤬ꤋꤢꤩ꤭ꤔꤣꤧ꤬, ꤛꤢꤩ꤬ꤞꤤ꤭ ꤡꤝꤢꤔꤥ꤭ ꤘꤣ ꤘꤢꤪ꤭ꤒꤣ꤬ꤘꤢꤪ꤭ ꤚꤣꤧ꤬ ꤖꤚꤢꤩ꤬ꤗꤢꤪ꤬ ꤘꤣ ꤢ꤬ꤗꤝꤤ꤭ ꤔꤢꤧ ꤗꤢꤪ꤬ꤗꤢ꤬ꤞꤢ ꤟꤢꤩꤣꤧ꤭ ꤒꤣ꤬ꤖꤚꤢꤩ꤬ꤔꤣꤧ꤬ ꤢ꤬ ꤢꤩꤗꤥ꤬ꤏꤢꤦ꤬ ꤜꤢꤨ꤭ ꤘꤣ ꤢ꤬ ꤟꤤ꤬ꤘꤢꤪꤊꤢꤨ꤭꤯#ꤛꤥ꤭ꤟꤢ꤬ ꤁꤁:꤁ 39ꤢ꤬ꤕ꤫ꤥ꤬ꤖꤚꤢꤩ꤬ꤗꤢꤪ꤬ ꤘꤣ ꤢ꤬ꤗꤝꤤ꤭ ꤔꤢꤧ ꤗꤢꤪ꤬ꤗꤢ꤬ꤚꤤ ꤥ꤬ ꤒꤣ꤬ꤖꤚꤢꤩ꤬꤯ ꤚꤣꤧ꤬ ꤢ꤬ ꤥ꤬ꤔꤢꤧ꤭ꤥ꤬ ꤙꤣꤧ ꤙꤢꤧ꤬ꤡꤢꤩ꤬ ꤢ꤬ ꤋꤢꤧꤘꤥ꤬ꤏꤢ ꤚꤣꤧ꤬ ꤢ꤬ ꤔ꤫ꤤ꤬ꤘꤢ꤭ ꤜꤢꤨ꤭ ꤒꤢꤩ꤬ꤤ꤬ꤞꤝꤢꤤ꤬ꤞꤢꤧ꤬ ꤒꤣꤧ꤬ꤟꤢꤩ꤬꤯ 40ꤗꤢꤪ꤬ꤗꤢ꤬ꤞꤢ ꤒꤣꤧ꤬ꤔꤢꤩ꤬ꤞꤢꤨꤞꤢ ꤔꤢꤧ ꤢ꤬ ꤒꤢꤩ꤬ꤖꤛꤢꤒꤢꤩ꤬ꤗꤢꤩ꤬ ꤒꤣꤧ꤬ꤟꤢꤩ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤢ꤬ ꤡꤝꤢꤒꤥ꤭ ꤘꤣ ꤛꤢꤩ꤬ꤏꤛꤢꤨ ꤢ꤬ ꤥ꤬ ꤚꤣꤧ꤬ ꤢ꤬ ꤡꤝꤢ ꤟꤢꤩ ꤜꤢꤨ꤭ ꤔꤢꤧ, “ꤙꤢꤧ꤬ꤡꤢꤩ꤬꤮ ꤠꤢꤧ꤭ ꤕ꤫ꤥ꤬ꤖꤚꤢꤩ꤬ꤗꤢꤪ꤬ ꤗꤢꤩ꤬ꤡꤝ꤫ꤢ꤬ꤊꤣꤧ꤭ ꤠꤢꤧ꤭ ꤒꤣ꤬ꤡꤣ꤬꤮ ꤒꤥ꤬, ꤠꤢꤧ꤭ ꤙꤢꤩ꤬ꤗꤢꤩ꤬ ꤜꤢꤪ꤭ ꤚꤣꤧꤘꤢꤦ꤬ ꤒꤢꤦꤖꤢꤧ ꤒꤣ꤬ꤖꤚꤢꤩ꤬ ꤖꤢꤧ, ꤚꤣꤧ꤬ ꤔꤢꤧ꤬ ꤟꤢꤩ ꤊꤣꤧ꤭ ꤕ꤫ꤢꤩ꤬ ꤠꤢꤧ꤭ ꤒꤣ꤬ꤡꤣ꤬꤮ ꤒꤥ꤬ ꤟꤢꤧ꤭? ꤟꤢꤩ ꤕ꤫ꤢꤩ꤬ ꤠꤢꤧ꤭ ꤚꤣꤧ꤬ ꤔꤢꤪ꤭ꤡꤝꤢ ꤗꤢꤩ꤬ꤡꤝ꤫ꤢ꤬ ꤊꤣꤧ꤭ ꤠꤢꤧ꤭ ꤒ꤫ꤢꤧ꤬!”

41ꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤗꤢꤪ꤬ꤗꤢ꤬ꤞꤢ, ꤗꤢꤪ꤬ꤗꤢ꤬ꤞꤢ! ꤔꤢꤧ꤬ꤊ꤫ꤢꤨ꤬ꤔꤢꤧ꤬ꤊꤢꤧ꤭ ꤚꤣꤧ꤬ ꤔꤢꤧ꤬ ꤞꤤꤕꤜꤢꤪ꤬ ꤞꤢꤨꤞꤢ ꤔꤢꤧ ꤒꤢꤩ꤬ꤗꤢꤩ꤬ ꤢꤩꤗꤤ꤭ꤢꤩꤡꤣ꤬ ꤡꤣꤧ꤯ 42ꤗꤢ꤬ꤔꤢꤧꤚꤣꤧ꤬ ꤒꤢꤩ꤬ ꤘꤣ ꤢ꤬ꤜ꤫ꤥ꤬ꤔꤣꤧ꤬ ꤢ꤬ ꤥ꤬ ꤖꤢꤧ ꤒꤣ꤬ꤡꤣ꤬ꤡꤣ꤬꤮ ꤟ꤫ꤢꤨ꤬ ꤖꤢꤧ꤯ ꤗꤢꤪ꤬ꤗꤢ꤬ꤚꤤ ꤔꤝꤢꤖꤛꤢ ꤓꤥ꤭ꤟꤣꤧ ꤒꤢꤩ꤬ ꤘꤣ ꤢ꤬ꤚꤢꤧꤜꤣ ꤣꤧ꤭ꤒꤣ꤬ꤡꤣ꤬ ꤟꤣꤧ꤯ ꤢꤨ꤭ ꤖꤛꤢꤖꤢꤩ꤬ꤊꤢꤧ꤭ ꤡ꤫ꤢꤧ꤬ ꤕꤢ꤬ ꤢ꤬ ꤒꤣ꤬ꤖꤚꤢꤩ꤬꤮ ꤒꤥ꤬ ꤟꤣꤧ꤯”

Currently Selected:

ꤜꤢꤨꤊꤢ꤬ 10: eky-Kali-MM

Highlight

Copy