YouVersion Logo
Search Icon

Mǒhtûlû̌hǎhtûsa 48

48
Yǎ̤kò howi̤ Ephare ta Manǎshe
1Dě anǒnu kò hèpwe̤ǐshǔ Jǒjè ta apha ǒmo̤ tò̤. Hǐnudě Jǒjè kaǎnṳ aphû̌makhû Manǎshe ta Epharenu sò̌gini̤ dě a cû̌kè̌ lǒkho apha. 2Bǎ kò pwe̤ǐ Yǎ̤kò ta, “Naphû̌ Jǒjè hèkè̌to̤ na hǒ,” akhanu, a jipwi̤ ihtǒhǎnòò̌lò̤ dě ala̤mi̤khû̌.
3Yǎ̤kò hî̌ Jǒjè, “Cǒmara htě apo̤aphǎnu tapwa̤ ǒlṳhtò̌ bǎ he Khana̤ga Lṳ̌sawî̤nu tò̤glò dě a howi̤ he.#Mǒhtûlû̌hǎhtûsa 28:13-14, 35:11 4Dě a hî̌ he, ‘He nophû̌ǒwo̤ǒphǎ na pě, dě nakhlinalè hǎte̤gilò̤ toǒ ǒwo̤ǒphǎ pě, dě he nohtûhtò̌plṳ̂ na ta khlilèphû̌ toǒ pě. Htodě Khana̤gahtǒonu he ǐ yǎta nakhlinalè hǎte̤gilò̤ toǒ dě nohtû yǎ asîta tûjûpwa̤ talakhǎ pě.’”
5Dě Yǎ̤kò hî̌ sělěpo̤, “Bǎ he hè to̤bǎ Egyptga bǎo hǒtò̤ akhanu, naphû̌makhû htě a ǒlò̤ bǎ Egyptga htǒosò̌gini̤nu, he bè̌ asî pwǐ hephû̌nu hǒ. Ephare ta Manǎshe htǒosò̌gini̤nu, a glè htû hephû̌makhû sǒsǒta Rube ta Simeonu hǒ. 6Naphû̌ htě a ǒlò̤ nǒ asî nǒkò bǎtè tapwa̤꤮ bǎbǎnu naphû̌tû̌ hǒ. Dě û̌cata̤bî̌ htě asî glè nî̤bǎ toǒnu kò khwè̌mǎnǎ ǐ nû̌ûdě Ephare ta Manǎshe ami̤ ata̤khwè̌mǎnǎ akû pě. 7Děnukha, bǎ he ǒ Pada araga dě he gekhîsǒ akha, pa gephǔ ta Ephratawî̤ dě pa ǒpepwǎ klè̌lo̤ akhanu, namo̤ Rakhelǎ sikè bǎ Khana̤gakûnu. Dě he bǎ lǔkè yǎ bǎ klè̌ la̤cû̌ Ephratawî̤kûnu tò̤glò.” Ephratawî̤ mî̌ Bè̌tèlèhèwî̤ htǒonu hǒ.#Mǒhtûlû̌hǎhtûsa 35:16-19
8Bǎ Yǎ̤kò#48:8 Yǎ̤kò ta Israel mî̌ tapwǎ̤pa pwǎ. kè̌shǐ Jǒjè aphû̌makhû toǒ akhanu, “Asî mî̌ ûpè?” a gwè hǐnu.
9Dě Jǒjè hî̌shǔ nû̌û, “Asî mî̌ hephû̌makhû htě Cǒmaradû̌ ǐ he bǎ he ǒ Egyptgakû htǒotoǒ hǒ.” Dě Yǎ̤kò hî̌, “Kaǎhè mò̌ heli̤ sî dě heǒ bǎo, dě he kǒtò̤ howi̤ asî pě.”
10Bǎnuakhadě Yǎ̤kò mo̤pwa̤ akhû̌akhî, ami̤sǎ sûprṳ̂kè hǒ, dě a kè̌shǐwǒpe tò̤. Hǐnuakhû̌akhî, Jǒjè kaǎhèphǔ aphû̌sî apha ǒ dě apha phǒměǐ ali̤ dě a gomo̤ asî.
11Dě Yǎ̤kò hî̌ Jǒjè, “He gènè̤to̤pe ta he kè̌shǐbò̌ gesǒ nami̤sǎ tò̤, pwǎ̤ta khònò̤htǒo Cǒmaradû̌ ǐ kè̌shǐpo̤ he ta naphû̌ toǒ hǒ.”
12Htodě Jǒjè kaǎhǎhtò̌kè aphû̌sî dě aphakhò̌plǎ,#48:12 Yǎ̤kò bè̌ǒ asî dě akhò̌plǎ amûasǎ mî̌ a bè̌nû̌û pwǐ aphû̌ ta ana̤nu hǒ, htǒo mî̌ Israel khlilèphû̌ ala̤klo tacǎ hǒ. dě a gene̤ û̌tṳglulò̤ lǒkho jûkhû̌ bǎ aphalo̤mo̤nu. 13Jǒjè kaǎhèbò aphû̌nu sò̌gini̤ dě a hèbè̌ǒ Ephare bǎ acǔdemû tokho pwǎ̤ta ahtûkè ta Yǎ̤kò acǔcocî̌ tokho, dě Manǎshe lè̌dě a hèbè̌ǒ nû̌û bǎ acǔcocî̌ tokho pwǎ̤ta a htûkèlè̌ ta Yǎ̤kò acǔdemû tokho, htodě Jǒjè nohèǒphǔ asî ta Yǎ̤kò. 14Pò̤̌ta Yǎ̤kò bè̌sekhěkè acǔde, dě Ephare pî̌tî̌khlo hǐnudě a dò̌htò̌ acǔdemû dě ahǐkǒkhû̌. Dě Manǎshe htû phû̌wè̤pwa̤ hǐnudě a dò̌htò̌ acǔcocî̌ dě ahǐkǒkhû̌.
15Htodě a howi̤homò̤ Jǒjè dě a hî̌, “Cǒmaradû̌ htě hephu Abraham ta hepha Isǎko ǒhtûpwa̤ ma̤to nû̌ûsò̌phlǒnu tapwa̤ howi̤tû̌ta phijaû̌ htǒotoǒ nî̌꤮. Cǒmaradû̌ htě a kè̌ǐkhwè̌ǐ he to̤khònò̤ htǒotapwa̤ howi̤homò̤tû̌ta phijaû̌ htǒotoǒ nî̌꤮. 16Mǒkhû̌tanaphû̌ htě a ma̤lû̌htò̌ he ta ta̤pò̤ta̤sha lǒ̤bònu tapwa̤ howi̤homò̤tû̌ta asî nî̌꤮. Hemi̤, hephu Abraham ami̤ ta hepha Isǎko ami̤ ǒkè tû̌ta asî akhû̌akhî pě nî̌꤮. Asî phû̌ǒwo̤ li̤ǒphǎhtò̌ tû̌ta bǎ hǎkhû̌ bǎo pě nî̌꤮.”
17Bǎ Jǒjè kè̌shǐ ta apha dò̌htò̌ acǔdemû dě aphû̌ Ephare ahǐkǒkhû̌ akhanu, asò̌phlǒmo̤ tò̤. Hǐnuakhû̌akhî, a pṳ̂ apha cǔdemû htě adò̌htò̌ nû̌û Ephare ahǐkǒkhû̌ htǒo dě a glè̌ dò̌cû̌ nû̌û Manǎshe ahǐkǒkhû̌. 18Dě Jǒjè hî̌ apha, “Pha, amè̤ tò̤, phû̌wè̤pwa̤ mî̌ htǒotapwa̤ tû̌, dò̌htò̌ nacǔdemû dě ahǐkǒkhû̌nu.”
19Pwǎ̤tadě apha htè̌shǔ nû̌û dě a hî̌, “He sî̌ya pwǎ, phû̌khû, he sî̌ya pwǎ, Manǎshe akhlialè mî̌ a htûhtò̌ khlilèdû̌ tacǎ pě. Akhlialè hǎte̤gilò̤ toǒ ǒwo̤ǒphǎ pěpě. Hî̌tètè̌꤮ bǎbǎ, apṳ akhlialè htǒonu a dû̌khlo ta a pě. Dě akhlialènu a htûhtò̌plṳ̂ khlilèdû̌ toǒ pě.” 20Bǎnu ti̤ni̤ a howi̤ asî dě a hî̌, “Bǎ Israelphû̌ toǒ howi̤hòmò̤ kò tapwa̤pwa̤ akhanu, a noǎ sîmi̤ pě, dě a glè hî̌ ta, ‘Cǒmaradû̌ nohtûhtò̌ tû̌ta sî pwǐ Ephare ta Manǎshenu pě nî̌꤮.’” Hǐnudě Yǎ̤kò kaǎwǐ Ephare ami̤ dě a kaǎnǒ Manǎshe ami̤.#Ebrephû̌ 11:21
21Htodě Yǎ̤kò hî̌ Jǒjè, “Phû̌ na kè̌shǐtû̌ htǒo hǒ, hemṳni̤ phǔto̤ hǒ, pwǎ̤ta Cǒmaradû̌ ǒkû̌ tû̌ta na pě dě a kaǎgesǒtû̌ na dě naphinaphusî toǒ aganu pě. 22Ta̤ htě he ǐ dû̌khlo na ta nawè̤sî toǒ ta napṳ Bejame tacǎ numî̌ khopa̤lo̤ htě he shěpe̤ǐ yǎta henò̌she ta hekhlǐ dě Amò̌rǐ khlilèphû̌ toǒ acǔdekû htǒotò̤glònu hǒ.”

Highlight

Share

Copy

None

Want to have your highlights saved across all your devices? Sign up or sign in