Luka 24

Muluk Fit i Yeso ta Fiyai

(Mat 28:1-10; Mak 16:1-8; Jwn 20:1-10)

1Tamwen wititit mwen ti bya', arofi si har ɗamam mafyongi ima si ɗak ti, si wa ti ta fiyaiyi. 2Si wisi afungi mati si tuk ya ta foi fiyaiyi, 3myan ima si rang ta, si far funat i Deembai Yeso wet. 4Sin ɗiri ambe'a' tasi aɗeng mai, fo abet ɗufal shini apilal sin ti faginan mapelani syak, si te mangrai nggas ti sin arofi. 5Myanat ka'us fwet si ni mwa' si shu i mafwaran shishat ames ta fisha, unai ɗufali si nyus, “Ami kin hu far ti mapweti na saa ti som ima si mot ya? 6Mana kwa, tu luk fit! Mbe' hun ti aɗeng ima laku myan ima yis ɗiri akul hu hun ta Galili. 7Ni, ‘A kpang si fa Al i Maɗufal ta ra i som mufwashi, si nggwakus tasi shanggam hai, mwen mutaat u luk fit ti mupwet.’ ” 8Unai arofi si mbe' findel amesi.

9Myan ima si humkyel ta fiyaiyi, si lak shak ɗamami wa kyel i fe muro ames hure mulang andeki hu anggumi. 10Arof ima si lak fe muro amesi, a hu Uryam ta Magdala, hu Ujwana, hu Uryam nasus ti Jemis, hu shini arof ima si wa tikul. 11Shak ta andi, si nggwes i fati mwawei, ɓurti si zan findel amesi fota a findel i gbya'.

12Shak ta andi, Pita lang rwa' ti tital, wa ta kyel i fiyaiyi, ni mwa' ɗing kyel ta wii, ɗing arom ima si laiyus tii. Unai humkyel yis mbe' ti aɗeng ima furi.

Ta Fisel i Wa Imawus

(Mak 16:12-13)

13Yit mweni hwak, shini apil ta saa yusti si lang ta hwen ima si lai ii Imawus, maleng amet ta Yerushalima kol mel pyoron.

14Sin findel ti ɗiyai ta si shak ɗamam ima si fur. 15Myan ima sin saa ti findeli sin mataa si ɗamam mii hai, unai Yeso yes wisus, si cu wei ti ɗa'at tikul. 16Shak ta andi, si vos shishat ya kan si shangus. 17Yeso lulus ni, “A findel i mi hu laki na fisel hun ti ɗa'at ya?”

Si te mangrai jiir, si kof kikyawat na mulwat. 18Andek ta saa yusti ma asum Kilyopas, lulus ni, “A ha je ha mii mwalmwat na Yerushalima haa? Ɗamam ima si fur nasi wufeni mukonan mii ha shangi kwani?”

19Yeso lulus ni, “Anggi ɗamami ya?”

Si nyus, “A ɗamam ta si Yeso i Nazaret hai. Yis a mashit, findel hu roha ames si mati mbaitat ta wei i DeeƁwe hu ɗufal shak. 20Mbayai i kocokak hu kaya si fas ta ra ɓa si lefus ɓur i mot, si nggwakus. 21Ai nin kintiɓwi nyai ayis ma wa bum ti Isar'ila. U mai kwai, mukon mataat moti ti mufur i ɗamam mii nasi wufeni hai. 22Andi hwak, shini arof aminin ni si lak nin ɗama i shok na fwai. Si ɗik wa ta fiyaiyi tamwen wititit kwai, 23si wa si far funat amesi ta wet. Si humkyel si lak nin nyai, si ɗing som lu' i DeeƁwe ima si ni mati mupwet. 24Myayus aminin shini si wa ta fiyaiyi si wisi ta ngga' ima arofi si lak ta, a yis kek si ɗingus kwa.”

25Yeso nyus, “Kai! Hun halyang, ami kin hu tiɗya na mulwat si fati mwawei tasi aɗeng ima som shit si lak ya? 26A kpang Kristi u wo shum nasi ɗamam mii hai, ɗak lang ta mbaitat ames, kwa haa?” 27Yeso furi tasi worong i Mosis, yes shak som shit, ɓus shishat ya tasi shak Worong i DeeƁwe ima si lak ta hai yusti.

28Myan ima si kat ndyong ti hwen ima si wa ta, Yeso masi fota mayus cwai ti wei ti ɗa'at. 29Si fwalus fwet si ni, “Kona na, ɗak wasan ha wa, ɓurti ɓwe ti ndak, fo' ti mas.” Unai matus hei, si wa tikul.

30Myan ima si te amun tikul hu sin, unai zan folok palang DeeƁwe, nggyalti kaarussi. 31Fo abet shishat ames si maɓu ya. Myan ima si kinus asum, nzelekus ta kyel ames. 32Unai si lul ta ɗiyai si ni, “I mbyar kwa! Mulwat amukan si cu kan myan ima yis findel sikan ta fisel, hu ngga' ima ɓukan shang ti Worong i DeeƁwe ta!”

33Si ni kabuta ta fisha muhumkyel ta Yerushalima. Si wa si wis fe muro hure mulang andeki, hu shini ɗufali, si suɓut ta kyel andek. 34Si nyus, “Awei! Deembai luk fit, pwak Siman hai hwak.” 35Unai ɗufal apili si lak aɗeng ima wisus ta fisel, hu ngga' ima si kinus asum si shangi a Yeso myan ima nggyal folok ɓa u kaarussi.

Yeso Pwak Fe Ro Ames Hai

(Mat 28:16-20; Mak 16:14-18; Jwn 20:19-23)

36Myan ima sin saa ti mba ti findelali, Yeso ti haisus pwakus hai te mangra ta saa yusti ɗak nyus, “Cala asu!”

37Myanat ka'us si aro i lo', sin nyai si ɗing tya malu'. 38Lakus ni, “Ami kin hu myanat fwet ya? Ami kin hu ma mulut apil-apil ya? 39Ɗinghun ra hu sisai amen. Ayin ti haisun! Ngge' huna hu hali, ɓurti malu' mati lo hu kyasas kwa, ngga' ima hu ɗingi i mati.”

40Myan ima lak mai, kofus ra ta sisai amesi. 41Si fa mwawei kwa ɓurti pipelat na mulut hu shok na fo, Yeso lulus ni, “Hu mati ɗama i cwai nin nanati haa?” 42Si fas gushe ima si ɗi, 43unai mat cu ta shishat yusti.

44Lakus ni, “A findelal ima i laku mii, myan ima ai kan tikul. Shak ɗamam ima si worong na hai yunti ta Anggut i Mosis, hu i Som Shit, hu i Nakwai, a kpang si hya.”

45Unai ɓus mulwat ames ya ɓa si shang Worong i DeeƁwe. 46Lakus ni, “Aɗeng ima si worong mai, Kristi ma wa woti shum, u luk fit ta fiyai mwen mutaat. 47Si wa mba ti findel i hatat, hu shwaiti mafwashi ya ti asum amen, wa kyel i ramam shak, furi ta Yerushalima. 48A hun hu wa lak ti ɗamam mii. 49I wa tuksu aɗeng ima Deen lak ni ma wa tuksui. Tehun na Yerushalima tawe, yes myan ima mbaitat ta fit ma wa muɗor su hai.”

Yeso Wa Fit

(Mak 16:19-20; RSM 1:9-11)

50Myan ima langtus ya ta si tur i Betani, haar ra ames ta fit kinus maɗesi. 51Yis saa ti kinsus maɗesi ndai, honus ta kyeli si zanus ya wa fit. 52Unai si cus afut ɗak si humkyel ta Yerushalima ti pipelat na mulwat fwet. 53Si cu wei ti mute ta Wur i DeeƁwe sin ha' ti asum i DeeƁwe fit.

Currently Selected:

Luka 24: AlisIRonNT

Highlight

Copy