Jwon 10

Maɗing ti Tutwai Manderei

1Yeso ni, “I ma laksu mwawei, shak maɗufal ima wa' lang ta ɗom i tutwai ta fo i mahom kwa, ɗak langus ta hai i sat, ani mayus ii masher hu ma har ti ɗam i ɗufal ti njeng. 2Maɗufal ma ɗing ti tutwayi ma wa mulang ii ta fo i mahom. 3Maɗufal ma ɗing ti fo i kyeli ma wa ɓwaisus kyel ya. Sin tutwayi si shang la asus. Yis laai tutwai ames u langtus ya ta saikyel. 4Na mbit suɓut ti ima si mii ames ta saikyel, ma wa mutong ta wei ɗak sin tifai asussi, ɓurti si shang la asus. 5Si wa koltifai ti mwalmwat kwa. Na si ɗing mwalmwat si yus wa tital, ɓurti si shang la asus kwa.” 6Myan ima Yeso mas kaan ti findel mai, som ima si hali, si far fo i maɗeng ima ma laki wet.

7Unai Yeso humuskyel ti findel ta nyus, “I ma laksu mwawei, ayin a fo i kwap i tutwaiyi. 8Shak som ima si tongun yes ani a asher hu som i haar ti ɗam i ɗufal ti njeng. Ɓurti andi, tutwai mwawei si nggwes i halsus. 9Ayin a fo i kwapi, maɗufal ima lang ta kyel amen ma wa wis ti mupwet. Ma wa mulang ta, u lang ya, u wis shala' maɗesi. 10Asher yas ɓa u shir ɗam, u foor ɗufal, u nggwal kyel ya. Yin i yes a ɓurti ɓa si wis mupwet, si wisi gilik.

11“Ayin a maɗing ti tutwai manderei. Maɗufal maɗing manderei ma wa fati mupwet ames ɓurti tutwaiyi. 12Maɗufal ima yes a ro i cef, yis a maɗing ti tutwaiyi kwa. Ma wa tital u hon tutwaiyi ta ma ɗing ambal yis yes, ɓurti tutwaiyi a ames kwa. Ambali ma wa ka'ti tutwayi, u kikish anggumi ya. 13Maro i cef mayus wa tital ɓurti yis yesus a ro i cef, ɗama hanus ta ti tutwaiyi kwa.

14“Ayin a maɗing ti tutwai manderei. I shang tutwai amen, sin hwak si shangun. 15Fota ngga' ima Dee shangun, yin hwak i shangus. I fati mupwet asun ɓurti tutwaiyi hwak. 16I mati shini tutwaiyi hwak, ima si na saa ti mii wi kwa. Te a kpang i yes ti sinyi hwak. Sin hwak si wa hal ti la asun. Shak si wa mute i sufat andek, ti maɗingsus andek. 17Aɗeng ima kin Deen ɓwetun a ɓurti i fa mupwet amen, ɓa i hum wisi ta wei. 18Ɗeng ndok u ka'un ti mupwet amen kwa, ɓurti ayin i fati ɓweti i mulut amen. I ti mundok ima i fa mupwet amen hu mundok i faiya hwak. Mai lakii i mat i ta kyel i Deen.”

19Myan ima Yeso lak findel mai, som Ju kaarus apil hwak, si langus uɓet ti ɗiyai. 20Shini si ni, “Mati rin mafwashi, ɓurti andi mayus a wangan. Ami kin hu ma halsus hee?” 21Shini si ni, “Wawa', mai a findel i maɗufal ima mati rin mafwashi kwa. Rin mafwashi ndok u ɓu shishat i manzyau ya haa?”

Munggwya i Fati Mwawei i Ju

22Mukonani tasi a myan i humbil, se yis fu' ti kyel, Yeso yis ta Yerushalima ɓurti Got i Fati DeeƁwe ima si ta'usi. 23Yeso nggar ta ɓwai i Wur i DeeƁwe ima si layani ii Muru' i Solomon. 24Unai mbayai i som Ju si yes si nggarus ya si lulus si ni, “A mukon awen ha wa ha'i ima ha nin ti ɗafot fo ya? Na a ha a Kristi, laka nin ti mangra.” 25Yeso matussi ta ni, “Ti i mbit laksu wa, hun nai hu nggyu i fati mwawei. Ro i shok na fo ima i masi ti asum i Deen a sin si wa kofi nyai ayin awe. 26Hun hu nggyu i fati mwawei ɓurti hun a tutwai amen kwa. 27Tutwai amen si shang la asun, yin i shangus, sin si koltifai asuni. 28Yin i fas mupwet i myan hu myan, si wa mot kwa fweng. Ɗeng ndok u vyamus ya na ra amen kwa hwak. 29Yis Deen ima fanin i na ra, ɓin ɗufal shak njeng. Ɗeng ndok u vyamus ya ta ra ames kwa. 30Yin hu Deen ni ma andek.”

31Unai som Ju si hum haar ti afyai ɓa si hwyaiyus ti, 32unai Yeso lakus ni, “I kofu ɗamam maɗesi hyang ta kyel i Deen. Anggi ta saa ti ɗamam mii kin hu ɓweti hwyayansun ya?”

33Som i Ju si matussi ta si ni, “A ɓurti ɗama maɗesi nin ima ha masi ni ɓweti hwyayan sa ya kwa. A ɓurti kom ti DeeƁwe ya ima ha ma masi kin, ha ima ha ya ii maɗufal kek ha ha' haisa kiga' hu DeeƁwe.”

34Yeso matussi ta ni, “Mata worong i anggut amu wii nyai, ‘DeeƁwe ni hu ma fota DeeƁwe.’#10:34 Ɗing huni hwak: Nak 82:6. 35Hu shangi nyai findel i DeeƁwe ima si worong ta kaada ma wa mushen kwa, na yis DeeƁwe ni som ima si hal muro ames, ‘sima fota DeeƁwe,’ 36yin masapai ima DeeƁwe rohun na naya, hu nyai i kom ti DeeƁwe ya ɓurti i ni, ‘Yin a Al i DeeƁwe haa?’ 37Ma ɗamam ima i masi ami ii ta kyel i Deen kwa, kan hu fa mwawei si yin hai kwa. 38Na i masti a ro ames, fahun mwawei ɓurti ro ima i masi ma hu ni hu wa fati mwawei ta si yin hai kwa, ɓurti ɓa hu shangi nyai DeeƁwe mana wii amen, yin hwak yin ta wii ames.” 39Unai si ni gɓwuk ɓa si hum ka'sus wet, si pwan, unai ka' fisel wis.

40Unai Yeso hum kyel ta fit i Ɗara i Jodan, ta kyel ima ai Jwon tong masti batisma ta, tes ta kyeli. 41Unai ɗufal hyang si kolfai asussi ta kyeli, sin nyai, “Jwon a myana mas ɗama i shok na fo kwa, shak ta andi ɗamam ima lak tasi maɗufal mai shak a mwaweiyi.” 42Ɗufal hyang ta kyeli si fa mwawei tasi Yeso.

Currently Selected:

Jwon 10: AlisIRonNT

Highlight

Copy