Mateo 17

Lau'rue'e Jesús ptza'

(Mr 9:2-13; Lc 9:28-36)

1Gdëëd xop dza, Jesús gyiije tu gia'a xhën len nuche'e Pedro, Santiago len Juan. 2Na', lau'ke bënni ni, yëla rna' kie' Jesús ptza'. Lau'rue'e gyep'yës'lni' ka rna' gbiidz, len laari nakue' guk xhiila'z ka yëla yeni. 3Na' gulale'i'de Moisés len Elías tui'leene diidza Jesús. 4Pedro gudxe Jesús:

—Xan, ¡dxia'a'kza zuaaru ni! Xhki ba re'en'du, guuna tson yu'u laari: tu kiu', tu kie' Moisés len ye tu kie' Elías.

5Tzal Pedro rui'e diidza, tu buaj rze'ni yajxua leke, len lu buaj ni byën tu chi'i le gna: «Bënni Xi'ina ni nadxi'i'tzki'da'ne len rdzag'laadxa'ne: guluzenaag'de.»

6Kati bënni useed kie' Jesús gulayëën'de le ni, guluzechue' lyu't ikj'ke, glaadxi'tzki'de. 7Jesús gbiige'e ga nakua'ke'a, gdaane leke len gne':

—Gultzas, ti gaadxi'li.

8Len kati guluchise lau'ke, nuturnu gulale'i'de, tuuze Jesús.

9Tzal guludinie gia'a, Jesús gnabe'i'de leke:

—Nutunu kiixhji'li le ble'i'li, nakati uban're lu yëla gut le' Xi'ine Bënni.

10Na' bënni useed kie' Jesús gulunaab'de Le':

—¿Bixhkia' bënni useed xhba kie' Dios tanáke ki Elías rala giide zia'a?

11Ati Jesús bubi'e diidza:

—Leel Elias giide zia'a, ati le' upe'e yugute'. 12San rea' lbi'ili ki Elias chi biide, ati leke ti gulumbe'e le' ati gulusake'e le' ka gna kieke. Larakz ka' ktzaage le' Xi'ine Bënni lu naa'ke.

13Na' bënni useed kie' gulak'be'i'de ki Jesús rui'e diidza kie' Juan bënni pkiile nis bunach.

Jesús ru'uune'bi tuubi bi kuidi yu'u lebi bë' xëwi

(Mr 9:14-29; Lc 9:37-43)

14Kati guladxiine ga nakua'ke bunach, tue' bënni gbiige'e ga ze' Jesús, len bzechu xhiibe lau'e len gudxe Le':

15—Xan, buechilaadxi'bi bi kia', koma re'i'bi xhjuti, len rsaka'dë'tzka lebi, ati zian lzu kati rbixh'bi rajtzu'u'bi lu gi' u lu nis. 16Ni' nuche'a'bi len bënni useed kiu', san leke ti glak'ke lu'uune'bi.

17Jesús bubi'e diidza:

—¡Bënni ti nayajle' len run'li le ku nak! ¿Gaxhkz zua' ka'tekz zua'leena lbi'ili? ¿Gaxhkz zua' ka'tekz kxikji'da lbi'ili? Gultzajxi'bi ni bi'dau'a.

18Na' Jesús gdil'leene bë' xëwi'a ati buroj, na'teez bueak'bi.

19Gdëëd'a bënni useed kie' gululiidze Jesús kiizi ati gulunaab'de le':

—¿Bixhkia' netu ti guk'tu yubiaj'tu bë' xëwi'a?

20Jesús gudxe leke:

—Koma yëla rajle' kieeli nak lati'iz. Blikz'da rea' lbi'ili, nar'la yëla rajle' kieeli nak ka tu xhsei mostaza, gunn gie'li gia'a ni: “Pkuit ga zu', len yajzua kuinu ga yubl”, ati gia'a ni ukuit. Gat'ga de le ku saki'li gun'li. 21[San bë xëwi'a nak ki, turoj'z kati rui'leen'ru'ne diidza Dios len run'ru gbas.]

Jesús rgixhjë'e burop lzu ki yëla gut kie'

(Mr 9:30-32; Lc 9:43-45)

22Tzal tadáke lu gia'a yeego ki Galilea, Jesús gudxe leke:

—Le Xi'ine Bënni uludëëde le' lu naa'ke bunach, 23len uludëëd'de le'; san na' gak tson dza'a ubaane lu yëla gut.

Kati gulayëën'de diidza ni gulakua'yechi'ke.

Laaz'sua'ke ki gdou'

24Kati Jesús len bënni useed kie' guladxiine Cafarnaúm, bënni tukiixhje laaz'sua'ke ki gdou' yajyu'ke Pedro len gulunaab'de le':

—¿Naru ti rgiixhje laaz'sui'i gdou' bënni useed kiu'?

25—Rgiixhje —bubi'e diidza Pedro.

Chi nak ka', kati Pedro gyaazie nu'yu'u, zia'a Jesús bliidze le' ati gudxe le':

—¿Bixh rnou' li', Simón? ¿Nuxh bënni'a tagiixhje laaz'sua'ke len tagu'e dumi kieke bënni tunabe'ke yëdz'lyu ni': bënni laadz'ke u bënni yëdz yubl?

26Pedro bubi'e diidza:

—Bënni yëdz yubl.

Jesús gne':

Ka nak, tibi rala lagiixhj'ke bënni laadze. 27San ki ku gun'ru ga bënni yubl labixe lu dula, gyaj lu nis len bzal lu nis'a gia'a rzëëni'du'ba bël ati bël'a bua' kuiiju'ba zia'a, psaalj rua'a'ba ati na' udzëël'du tu dumi, len ley kiixhj'du laaz'su'u len laaz'su'a.

Currently Selected:

Mateo 17: PZD

Highlight

Copy