Hechos 8

1Ati ni' zue' Saulo len nak xhtiidze'e lekz'ka' guludëëd'de Esteban.

Saulo rlaage bënni tayajle'ke Xan'ru

Larakz dza ni, gulazulau'e tulaage len tabiije yu'u bënni gdou' ki Jerusalén. Yugute'ke glas'laz'ze gia'a yeego ki Judea len ki Samaria, san bënni gbaaz kie' Xan'ru na'z gulaga'ane. 2Len la'ke bënni tayiijilaadxi'ke Dios yajka'chi'ke Esteban len gulabëëdx'tzka'ke kie'. 3Tzal'za, Saulo rlaage bënni gdou', len ryaazie yu'u yu'u len ra'i'je leke bënni len nguul len rsë'le'e leke liidx'gia.

Samaria tagixhjë'ke diidza kub dxia'a

4Ati bënni'a gululaage leke Jerusalén, tagixhjë'ke diidza kub dxia'a ga'ti'teez ga zjake. 5Tue' bënni le' Felipe glu'e nëëz ziije yëdz Samaria len gzulau'e rui'leene leke diidza kie' Cristo. 6Bunach tudzaag len dxia'a'du tuzenaage le rne' Felipe, koma tale'i'de yëla wak xhën le tak lu ne'e le'. 7Bënni zian bënni dzë'ë leke bë' xëwi tu'ueake, len kati turoj bë' xëwi ni tuskua'tzka; len lekz'ka' gulu'ueake bënni nat'zi'ke len bënni ti rak laza'ke. 8Nia'a ki le ni gyu'u'tzka yëla rudziiji lu yëdz'a.

9San zue' ni' tue' bënni le' Simón, len zia'a beene dxin udza' len gxhi'ye'i'de bënni yëdz Samaria, len rnëëz'de kuine bënni blou. 10Yugute'ke tuzenaage le', ley bi'dau' ley bënni yexu len tanáke kie': «Bënni ni nape “yëla wak xhën kie' Dios”.»

11Len tuzenaagi'de le' koma len udza' kie'a xhtzei chi gxhi'ye'i'de leke. 12San kati gulayajle'ke diidza kub dxia'a le rue'e Felipe ki yëla rnabe' kie' Dios len kie' Jesucristo, ley bënni len nguul guludiile nis. 13Len kuin'kze Simón gyajle'e len bdiile nis, ati gzulau'e rdzaage Felipe, len rubaan'de ki le tunn'be' yëla wak xhën le le' rle'i'de.

14Kati bënni gbaaz kie' Xan'ru bënni nakua'ke Jerusalén gulanëëz'de ki bënni Samaria gulazi'ke xhtiidze'e Dios, gulusë'la'ke ni' Pedro len Juan. 15Kati guladxiine ni' glui'leene diidza Dios naar ksë'le'e Bë' La'ay kie' kieke bënni'a gulayajle'ke yëdz Samaria. 16Koma ti zuiide len leke Bë' La'ay kie' Dios, nudiil'z'ke nis lu le' Xan'ru Jesús. 17Na' Pedro len Juan guluxua'naa'ke leke, len gulazi'ke Bë' La'ay kie' Dios.

18Kati ble'i'de Simón ki Bë' La'ay kie' Dios riide kati bënni gbaaz kie' Xan'ru tuxua'naa'ke bunach, gu'un'de gnëëdzje kieke dumi, 19len gudxe leke:

—Gulgunn kia' lekz'ka' yëla wak ni, naar bënni'a neda kxua'na'a'ne si'e lekz'ka' Bë' La'ay kie' Dios.

20Na' Pedro bubi'e diidza:

—¡Gnit'lau'leen xhdumiu'a, koma rak'du ki gunn len dumi si'u le ruzalaadxe'e kieeru Dios!. 21Li' ti naku bach si'u, koma ti nak dxia'a laadxi'dau'u lau'e Dios. 22Bubi'ilaadxu'u len gutayui'de Dios, naar xhki uzi'xhëëne lea rza' ikj'laadxi'dau'u. 23Koma rak'be'i'da ki nadze'iz'du yëla rdi'i len yëla xhe'e nazën li'.

24Simón bubi'e diidza:

—Gulgatayui'de Dios nia'a kia', naar ti gak kia' ka' chi gnaali'a.

25Kati buudx gulujxaka'lau'ke len glui'ke xhtiidze'e Xan'ru, bënni gbaaz kie' Xan'ru gulagixhji'de diidza kub dxia'a ni ziaani yëdz'du ki Samaria len ye'wake Jerusalén.

Felipe len bënni Etiopía

26Gdëëd ni, tue' gbaaz la'ay kie' Xan'ru gudxe Felipe: «Gyas len gyaj zga dxi'il, nëëz'a ziaj Jerusalén len rdxin'te yëdz Gaza.» Nëëz ni rdëëd lu yu biidx. 27Felipe gze'e ziije; len la nëëz'a budzaage tue' bënni Etiopía, le' nake tue' bënni blou len nak'lu'ne'e yëla tzawi kieenu nguul rnabe'nu Etiopía, bënni ni zuze'e gyiije Jerusalén gyiijilaadxe'e Dios. 28Len zuwëëje laadze, rë'e lu karret kie' len ru'le' gich la'ay le bzooje Isaías bënni be'e diidza ulaaz kie' Dios

29Le' Bë' La'ay kie' Dios gudxe Felipe: «Gyaj len gbiiga ga'la ga ziaj karret ni.» 30Kati Felipe gbiige'e ga'la, byëën'de ki bënni Etiopía ni rul'e gich kie' Isaías; na' bnaab'de le':

—¿Ba rajni'i'du lea ru'lu'a?

31Bënni Etiopía ni bubi'e diidza:

—¿Nakxh guuna tzajni'i'da xhki nutunu zua useedx'la'an kia' ley?

Len gutayui'de Felipe kueene len kë'leene le'. 32Diidza La'ay'a lea ziije rul'e bënni'a rna ki:

«Ka tuuba bëku'xhiila'du guluche'ke Le' lu yëla gut;

ka tuuba bëku'xhiila'du bua' tibi ruzbë' rzeeba

lau'ke bënni'a tuchuuge xhiila kieeba,

ka' beene Le' tibi ruzbë' gze'.

33Ki'kz ki guluka'ane Le', len nutunu gleki'xhbei kie';

len keg nu bënni xi'in'xhzue' gulakua'ke

Koma gulague' yëla naban kie' lu yëdz'lyu ni.»

34Le' bënni yëdz Etiopía bnaab'de Felipe:

—Ben klen, gdixhji'i neda, ¿Nuxh ki'a rne' bënni'a be'e diidza ulaaz kie' Dios ni, ba nak kie'kze u kie' bënni yubl'a?

35Na'ar Felipe gde'le'e lu Diidza La'ay'a rul'e bënni Etiopía ni, len gdixhji'de le' diidza kub dxia'a kie' Jesús 36Gdëëd tuchi'i, kati guladëëde ga de nis, le' bënni blou ni gne':

—Ni de nis; ¿Bixh rzaaga neda ku gdiila nis? 37[Felipe gne': Xhki rajle'u gdu laadxu'u wak, len le' bubi'e diidza: Rajle'a ki Jesucristo nake Xi'ine Dios.]

38Na' beene ga gulukëëze karret kie'a; len grop'te'ke glëtje, ati Felipe pkiile le' nis. 39Kati gulurooje lu nis'a, le' Bë' La'ay kie' Dios buche'e le' Felipe, ati bënni blou ni tir ble'i'de le'; san rudziiji'tzki'de bugie'le'e xhnëëze zuwëëje. 40Ati Felipe yajxa'ke'e yëdz Azoto, len gdëëde yëdz yëdz rgixhjë'e diidza kub dxia'a ni, len bdxin'tie' yëdz Cesarea.

Currently Selected:

Hechos 8: PZD

Highlight

Copy