Matiu 3

Ia Tuturi Beana Ka Zone Ia Ta Rivai Seselebeana

Maki 1:2-8; Luku 3:3-9,16-18

1Ka fafata ianimu, Zone Ia Ta Rivai Seselebeana neke tatanigai tuturi beana ka ia malau koroghana ta karango ani Zudia kahe ghuana iahi, 2“Taghuru kairi ira sasakemu o fihiki lao ghu ka God, vununa ia Ravutu ka ia malau God fate to namo.” 3Zone lamu neke turi ghinio porofeti Aesaea kahe ghuana iahi,

“Manei mu ia leo ta kudo ka ia malau koroghana ta karango:

Va tanai ia hangana mala mehana ia Lod,

Riva vanani ia hangana ta lotoro.”#3:3 Aesaea 40:3

4Ira poko ka Zone mu dike fifihu ka kalana kamele, nia neke va vona lilihiti ta riva ghini ka kafuna popohi e ghua; ghena ghanora manei mu kupo nia mizuana mauke e ghua. 5Ira nonidi Zerusalemu nia ka ia Babarana kamoto Zudia nia ka ira leghu pelodi nga ka ira palu pelona Ketuhu Zodani e ghua, dike kave lao ka ia malau koroghana ta karango mala la nonomoho tuturi beanana ka manei. 6Di kahe kaveri ghu maneri ira sasakedi taghodi, to seselebeanari ma manei ka ia Ketuhu Zodani.

7Ghe ne finiri ghu manei laodira ira tehi noni ka ia butubutu Farisi nia ka ia butubutu Sadiusi e ghua ta mala la seselebeanana, manei neke kahe ghua iahi, “!Ghau ira toraina tuudi adogho minga! ?Hei neke va kahe ghini ghauna ta boka pelo kainina ia varifate ta la meha ka God? 8Va podoli ka ia dolimu, noto toraina taghuru kairi mamu ira sasakemu, noto fihiki lao ghu ka God, ta ghuana. 9Oka re kahe ghua mo ghu iahi, ‘Ghai mu ira nake pagusu mehao ka Ebarahamu, to doli ghemai ghu,’ ta ghuana. E torai deo hohoghona mu ianimu. God e boka holarari mo ghahipa irahi e mala nona rekaha ghu Ebarahamu. 10Ghatunaina nga ghe, ia malivi malana ia varifate ka God, to va tana mala keketerira ira zagharamu ghau. Uve, leghu heke ta deo nga gedi fua va veha ghu mu e age taraha kai hinaeri ghatu edi kai laori ghu ka ia totoi.

11“Ara a seselebeanari ka kolo heiri ira ta taghuru kairi ira sasakedi, ta fihiki lao ghu ka God. Ghe kaikeu ta toraina mana fuludu lao ka ara, e deo sepana e la meha ghu. Manei e toraina mana fuludu lao, e deo ghu ghe ga fata ghu ara ta mala posi vananina ira nona sadolo, taghe kaike noni mala varituhu ta ghuana. Manei e age seselebeana ghau ghatu ka ia Tarunga Ta Maduana nia ka totoi. 12Manei to va tana ta fotarira ira subudi witi ka ira kafudi ka ia nona foka mala fofota. Ianimu tuna ghe, ge age takusi nga tuna ia galahena mala fafaete, ge nairi ghu ira subudi witi ka ia nona suga mala nanakai, ghe ge saligari nga ira kafudi ka ia totoi ta deo ge boka leme ghu.”

Ia Seselebeana Ka Zisas

Maki 1:9-11; Luku 3:21-22

13Ianimu tuna ghe neke ghahe kaini nga Zisas Galili, neke lao ghu ka ia Ketuhu Zodani mala la seselebeanana ka Zone. 14Ghe Zone e deo geke kabai seselebeani ghu manei neke kahe ghua ghu iahi, “Ara mo ta fatai mala seselebeanana ka agho. ?Ne heve agho ghe, no la meha nga agho ka ara?”

15Ghe Zisas neke ungene tughui, “E torai ghuana mamu iahi ghatunaina, vununa ghita da toraina riva ghidi ira vahina leghutau ta lotoro ta kabai ghidi nga God.” Ianimu tuna ghe veha mo neke ghua nga Zone, neke seselebeani ghu Zisas.

16Ka ia leghuna seselebeanana Zisas ta ke kave meha ghu ka ia ketuhu, God neke tobehe vanani manei ia nona malau fate, neke fini ghu manei ia Tarunga ka God hinae meha taghe babahulu bora ta ghuana ta meha nohena ghu ka fatena taghonai. 17Ianimu tuna ghe neke la meha nga ia leo ka malauo God fate, kahe ghuana iahi, “Iahi mu ia Tuugu ta namaha ghini ara, na toraina va manemane ghini fuludu ghu.”

Currently Selected:

Matiu 3: kji

Highlight

Copy