Tatanigaina 9
9
Ia Varivehai Ka God Taremehana Noa
1Vanani veha tuna Noa nia ira tuunamane neke ghua God neke va kahe ghidi ghu, “O hugara va tehi o va foudi ghu malau iahi peka. 2Ira leghu tagukava nga, memeha nga nia namari nga edi age au mamaghu ka ghau. Maneri haroharo edi au ka pekana ia mana ghau. 3Ira leghutau haroharo ta doli nia ta rizu edi mala age ghemu ghano ghau, taghe nake vanamuro la ira leghu heke ghano teri nga. Leghu irahi nga ara a vanamu mala ghemu ghano ghau.
4“Ghe ghau oka puina mahaini ghu ia vilahi neto au la nga ia busakana. Ara deo ga va malumi ghu iahi vununa ia doli ne au ka giliona ia busaka. 5Hei neto hio kaini la ia dolina ia keha noni, manei e age va kilasi ghatu. Ia tagukava ta hio kaini ia dolina noni mu, e toraina mala va lemei.
6“Hei ia ta atungu noni mu,
kehara ta age atungina manei ghatu.
vununa God neke riva taghe taghonai
neke ghua ghidi ira noni.
7Ghau o toraina age hugara va tehi mala ira pagusu ka ghau edi age au kamoti ghu malau iahi peka.”
8Ianimu tuna ghe neke kahe ghua nga iahi God ka Noa nia ira tuunamane, 9“Ara a riva ghini ghatunaina ia nogu varivehai taremehau agho nia taremehadi ira pagusu ka agho, 10nia taremehadi ira leghu va vuha dolidi dike auro nga ka agho—leghu memeha nga nia tagukava nga—ira vahina leghutau dike kave meharo ka ia zaghimaha taremehau agho. 11Ara a riva ghini ia nogu varivehai taremehau agho ka ngengene irahi: E deo kalasukai ke age atungurirani ghatu leghu va vuha dolidi nga ka kaike ologho; e deo kalasukai ke age va mukoinani ara malau iahi peka ka kaike ologho.”
12Nia God neke kahe ghua iahi, “Iahi mu ia va ghilaghilana ia varivehai ta riva ghini ara varihoataigu taghogu nia ghau nia ira leghu va vuha dolidi nga ta au taremehamu ghau e ghua, maladi ira leghu ubalana noni ta la meha nga keha nareo. 13Ara nato va tetui ia nogu solodara ka ira toba. Manei e age kaike va ghilaghilana ia varivehai varihoataigu ara nia malau iahi peka. 14Leleghu fafata va meha toba ara ka fatena malau iahi peka ta podolo ghu ia solodara ka ira toba, 15ara a age ngana leghui ia nogu varivehai taremehamu ghau nia taremehadi ira leghu kokolodi va vuha dolidi nga. E deo kalasukai ke age va mukorirani leghu doli nga ka kaike ologho. 16Leleghu fafata finini ara ia solodara podolonana ka ira toba, ara a age ngana leghui ia toghunaina varivehai varihoataigu ara nia ira noni haroharo nia taremehadi ira leghu kokolodi va vuha dolidi nga ka malau iahi peka, e ghua.”
17God neke kahe ghua ghu iahi ka Noa, “Iahi mu ia va ghilaghilana ia varivehai nake riva ghinio ara ka varihoataigu taghogu nia ira noni nia ira leghu va vuha nga ka malau iahi peka.”
Ira Tuunamane Noa
18Ira tuunamane Noa dike kave meharo ka ia zaghimaha mu Semu, Hamu nia Zafeti, e ghua. (Hamu lamu neke nona mamana Kenani.) 19Lito tuunamane irahi Noa lamu dike faadi mehara ira leghu noni nga ka malau iahi peka.
20Noa ia neke kaike mane ponogarao mu kusu mane neke numa ghinina kaike nunuma gerepi. 21Kaike ravata manei neke ketuhuri keha waeni ka neke riva ghidiro taghona, neke age gogosu ghu nia epu sosole tuna ka giliona ia nona suga tapole, neke ghua. 22Hamu ia nona mama Kenani neke finini nona mama sosolena, neke kave la va kahe ghidi ghu ira keha palu tahinamane. 23Ianimu tuna ghe dike hioi nga kaike poko ta bobo taghe totoufu ia ta ghua Semu ghe Zafeti, dike posi vonai ghu leghudi mo ka fatedi ira rafadi tetu taghuru laona, ghe dike ghaghahe suaraghi nga hagheledina ka ia suga tapole la toufina nodi mama. Ka riva ghinina iahi, maneri palu dike mato haza, mala deona gedi finini ghu nodi mama neke epu sosole ani.
24Ka ia ke age veha leghu Noa ta baghunu vona ghu, manei neke avohi heve neke riva ghinina ka taghonai ia tuunamane ta rekahana, 25neke kahe ghua ghu iahi,
“!Kenani e au ka pekana tibiri!
Manei e age mane mala varituhu
ka ira tahinamane.”
26Manei neke kahe ghua molamo iahi,
“!Helahela ghini Iahova ia God ka Semu!
Kenani e age mane mala varituhu ka Semu.
27!God e va faai ia kobosona malau ka Zafeti!
!Ira pagusu ka manei edi au taremehadi ira noni ka Semu!
Kenani e mane mala varituhu ka Zafeti.”
28Leghuna ia ologho Noa neke au laoni 350 komuhu, 29nia leme tuna ka neke age 950 komuhunao, neke ghua.
Currently Selected:
Tatanigaina 9: kji
Highlight
Share
Copy
Want to have your highlights saved across all your devices? Sign up or sign in
© 2022, Islands Bible Ministries. All rights reserved.
