Matius 5
5
Ponudukan di Yisus siri Timpak do Kulud#5:1 Kulud: Kotud
(Luk. 6:20-23)
1Nga kaantangai nopo dii di Yisus do oguu tulun minaja Disido, takadno dii siri kulud#5:1 kulud: kotud om ogomno dii Isido. Korikot nopo dii i tongotulunJo, 2om timpuunno dii Isido do monuduk diolo do kaDisido,
3“Ososogitno iri tulun do kopuriman do au obobobos i ginavo diolo
do mokitulung di Kinoringan,
do iolono i porintawon di Kinoringan.
4Ososogitno iri tulun di osusa ginavo koondom di duso,
do toluodon#5:4 toluodon: insasamadan ko kosisian di Kinoringan iolo insan tadau.
5Ososogitno iri tulun di osuribak ginavo
do kaanu nogi iolo diri nijanji di Kinoringan insan tadau.
6Ososogitno iri tulun do vitilon om tuuvan
do maja di kouvangan do Kinoringan,
do uupan di Kinoringan iolo do maja diri kouvanganJo insan tadau.
7Ososogitno iri tulun di osianan do vokon
do i Kinoringan nga osianani diolo insan tadau.
8Ososogitno iri tulun di olidang ginavo
do iolono koontong di Kinoringan insan tadau.
9Ososogitno iri tulun di koilo popiandai do vokon
do iolono pinakatanak di Kinoringan insan tadau.
10Ososogitno iri tulun di pokorualan do vokon
sabap maja do kouvangan di Kinoringan,
do iolono porintawon di Kinoringan.
11Ososogit kouno nong insasanawon kou om pokorualan om pisimvuvudutan kou do tongotulun sabap maja kou Dogo. 12Ososogit kouno sabap iri tongonabi, i popolombus di tinangaran do Kinoringan di pogulu, nga pinokoruol nogi di tulun do irad dino. Jadi pasanangono ino ginavo muju om aandaian i ginavo muju nong irad dino pokorualan kou sabap agajo iri isuli di Kinoringan dikovu do korikot kou soi suruga do insan tadau,” kadi Yisus.
Poiradan di Tasin om Vinaang
(Mar. 4:21; 9:50; Luk. 14:34-35; Yaya 8:12)
13Om kadi Yisus kavagu di tongotulunJo, “Ikovu nopo nga irad do tasin i pongongosin do taakanon supaya au apasa, jadi sabap di gaagaya muju di aandai kokodos dii i tulun di gaagaya do araat. Nga nong malono iri rasa do tasin diri nga auno dii moilo poosinon kavagu. Irad dino auno apakai, taanpo do pataam om pipapasakan do tulun.
14Ikovu nogi nga irad do vinaang i pinakatanavau di tongotulun siti saralom vonuvo. Au kovi kolosok irad diri bandar pointimpak siri kulud#5:14 kulud: kotud antang-antangan do tulun mantad si gana. 15Om ausoi tulun momuang do lampu om tinggouban diri mital, nga pokoyon siri potimpakan do lampu, om otitianno kasangkat si saralom valai. 16Irad kou nogi dino do popoimbulai dino gaagaya muju taandai irad di vinaang do tumitiu do tulun vokon, om otutunani do tanak kou do Kinoringan om arajoui i Tama tokou silo suruga,” kadi Yisus.
Ponudukan Pasal do Undang-undang Ugama do Joudi
(Luk. 16:17)
17Om kadi Yisus kavagu, “Ada Oku tantamai dikovu do rumikot Oku siti vonuvo do popolijot diri Undang-undang Ugama nitulis pogulu, irad di tinulis di Musa om i ponudukan tinulis di tongonabi vokon. KorikatanKu nopo siti nga porikot diri kasangkat kinomoi diri nitulis diolo siri Kitab. 18Do patangaronKu marong dikovu iti, ontok do aupo olijot ilo tavan#5:18 tavan: langit om iti tana, insan iso urup ko titik diri Undang-undang Ugama nitulis diolo nga auso olijot, do kasangkat diri nga orikot.#5:18 kasangkat diri nga orikot: koduvo nopo komoion do tangar Yunani siti nga “orikot kasangkat iri ponudukan diri”. 19Nga irad dino isai-isai nopo iri au maja diri iso mantad diti undang-undang di agaan, om potuduk isido nogi di tulun vokon do, ‘Ada kou maja,’ ka, nga irino osuribak pangkat siri Kopomorintaan di Kinoringan. Nga isaai nopo maja marong diri undang-undang om potuduk isido nogi do tulun vokon do maja, om irino agajo pangkat siri Kopomorintaan do Kinoringan. 20Mitangar Oku dikovu do au kadapat kou masu si Kopomorintaan di Kinoringan nong au kou maja do kouvangan Disido. Misti do aandai marong i gaagaya muju mantad diri gaagaya di tulun vokon, irad di kumpulan Porisi om i tongotulun monunuduk do Undang-undang Ugama do Joudi,” kadi Yisus.
Ponudukan do Au Buli Araatan do Tulun Vokon
21Om kadi Yisus kavagu, “Norongou mujuno daa iri tinangaran nituduk diodu-aki tokou di pogulupo do, ‘Adano mamamatai do tulun, do isai mamamatai do tulun irino oukuman,’ ka.#Antangai Kinolobusan 20:13. 22Nga Ioku monuduk dikovu do isaai nopo iri araatani#5:22 isaai nopo iri araatani: kivaro piipiro solinan di poguluupo do, “isaai nopo iri rumaatan do auso kinoontodon.” do tulun om irino apatut do oukuman. Om iri mongintulus do tulun vokon, irino apatut do daawaan siri gotuvang do Pinonguntunan di Tongokotua. Om isaai nopo iri mangalava do tulun do, ‘Mondou dikau,’ ka, irino apatut do oukuman do potunuvon do tapui naraka.
23Jadi nong manaakko nopo do Kinoringan dino itaaknu toomod, insan noovitnupo minsomok diri panaraban, om tigogi do koondomko do kivaropo karaatan di tulun dika, 24gaam nogi do iopungpo iri itaaknu toomod siri somok do panaraban om mongoipo kumiandai di tulun diri, om ampa nogi do gulionnu kavagu do pataak diri itaaknu toomod si di Kinoringan.
25Nong angatanko nopo do tulun kumibisara sino poibisaraan, ontokpo do manau-panau koupo mongoi, piogono kumitoluod disido do aupo korikot siri pantok di poibisaraan. Nong au kumitoluodko, olombusanko disido momisara siri momumutus do bisara. Om i momumutus do bisara pataak dika siri pulis do pojiilon. 26Om patangaronKu marong dikau iti nong nokojiilko, aupo polobusonko nong aupo noopusannu mamarai iri tutangnu,” kadi Yisus.
Ponudukan do Au Buli Lumapau
(Mat. 18:6-11; Mar. 9:42-48)
27Om kadi Yisus kavagu, “Nokorongou kouno daa diri tangar do, ‘Ada kou lumapau,’ ka.#Antangai Kinolobusan 20:14. 28Nga Ioku monuduk dikovu do isaai nopo tulun mongontong do tongondu om kivaro giginavo#5:28 Giginavo: Kivaro giginavo nopo nga kiarati do kiginavo do mangantak. disido, om nakalapauno i ginavojo diri di tongondu,” ka. 29Om minaganu i Yisus do iso poiradan do, “Irad nopo diri nong matonu ponong vanan mongovit dika mamaal do duso, sungkitono#5:29 sungkito: suvilo i linsou matonu om pataamon. Gaam nogi do oidu ino matonu sampaping mantad do asangkaju ino kojuvannu#5:29 kojuvan: tinan do potunuvon siri tapui naraka. 30Om nogi nong longonnu ponong vanan mongovit dika mamaal do duso, totokono pataam. Gaam nogi do oidu ino longonnu sampaping mantad do asangkaju ino kojuvannu do pataamon siri tapui naraka,” kadi Yisus.
Ponudukan Pasal do Au Buli Miada
(Mat. 19:9; Mar. 10:11-12; Luk. 16:18)
31Om kadi Yisus kavagu, “Kivaro nogi tinangar do, ‘Isaai nopo mangada di savojo misti taakan do surat talak,’ ka.#Antangai Gulion 24:1. 32Nga Ioku monuduk dikovu do isai-isai nopo mangada di savojo iri okon nopoko linumapau, nga isidono i papalapau di savojo. Om i manansavo kavagu di tongondu di nakaada nogi nga kalapau,” kadi Yisus.
Ponudukan do Au Buli Sumumpa Mangarait di Ngaran do Kovuvusung
33Om kadi Yisus kavagu, “Norongou mujuno daa iri tangar nituduk di tulun di pogulupo do, ‘Ada mangajanji do ovuvudut, nga tumanono iri najanjinu si gotuvang do Tuhan,’ ka. 34Nga Ioku monuduk dikovu nong mangajanji kou, ada mangarait do onuu nopo do ngaran do onuon pongogirot di sumpa do mijanji. Adano roito ngaran do suruga do ilo toogomon di Kinoringan. 35Om adano roito ngaran do tana do ilono ulokon di Kinoringan, om adano roito ngaran do Yorusalim do ilono nijonon di Raja Tagajo. 36Om adano roito ino tulunu do isopo tobuknu nga aui oilaannu popurak ko poitom. 37Nong oinomod jawapan nopo do, ‘Oo,’ ka. Nga nong aui oinomod jawapan nopo do, ‘Au,’ ka, do sondiang nopo mantad diti om irino mantad di kotua do rogon,” kadi Yisus.
Ada Sumuli do Araat
(Luk. 6:29-30)
38Om kadi Yisus kavagu, “Nokorongou kouno di tangar do, ‘Nokobolouko nopo do mato do tulun, matonu nga bolooni. Nong nokotipuko nopo do nipon do tulun, niponnu nga tipuoni,’ ka.#Antangai Kinolobusan 21:24; Imam 24:20; Gulion 19:21. 39Nga Ioku monuduk dikovu do adano sumuli diri tulun do mangaraat dika. Nong tompilingon nopo do tulun ino porilingnu ponong vanan, pataanonpo ino porilingnu gibang. 40Om nong tulun momisara dikau si gotuvang do momumutus do bisara do mokianu dino singlitnu itaakpo kavagu ino sabungnu. 41Om pajalonko nopo do tulun mangangat mampanau do sabatu sinodu, nga majapo kavagu disido mampanau do sabatu kavagu. 42Onuannuno i tulun do mokianu dika, om poolosonno i tulun do mokiolos di poromponnu,” kadi Yisus.
Ponudukan do Au Kojuu dino Musu Muju
(Luk. 6:27-28, 32-36)
43Om kadi Yisus kavagu, “Nokorongou kou nogi diri tinangar do, ‘Misti do auko kojuu di songkoruangannu om kobonsino di musunu,’ ka.#Antangai Imam 19:18. 44Nga Ioku monuduk dikovu do misti do au kou kojuu nogi di musu muju, om sambayangaino i tulun di pokoruol dikovu. 45Irad nopo dino mantad di gaagaya muju di aandai kointutunan dikovu do tangaanak kou di Tama tokou soi suruga. Do Isidono potitiu do tadau kumaa si di tulun aandai om i tulun taraat. Om manaak Isido do darun di tulun do otulid i ginavo om i tulun do araat nogi. 46Nong iri noopo tulun do au kojuu dikovu do au muju kojuuan nga auso isuli di Kinoringan dikovu. Do insan iri tulun momumumpung do sukai nga irad nogi dino, kon? 47Om nong sumalam kou noopo diri songkoruangan muju, onuno dii gaagaya muju di lobi aandai mantad di tulun vokon? Auso. Do tulun kaapir nogi nga iradi dino gaagaya diolo. 48Aandai do oviivion muju papaandai dino gaagaya muju do irad nogi di Tama tokou soi suruga do aavi-avi i kaandaioJo,” kadi Yisus.
Currently Selected:
Matius 5: LabukPKV
Highlight
Share
Copy
Want to have your highlights saved across all your devices? Sign up or sign in
© 1995, Wycliffe Bible Translators, Inc. All rights reserved.
