Matius 26

Miupakat Mamatai di Yisus

(Mar. 14:1-2; Luk. 22:1-2; Yaya 11:45-53)

1Koopod nopo dii i Yisus monuduk dagai di tongotulunJo, om pitangarno dii do, 2“Oilaan mujui, do duvopo tadau om orikotno iri Tadau Tagajo do Paska, iri pangandaman tokou di kinopogiduan diodu-aki tokou mantad si Vonuvo Masir di pogulu. Om ontokno diri do pataakon Oku i Sinumiliu do Tulun diri tulun vokon do posolibon Oku,” kadi Yisus.

3Ontokno dii diri, om untunno dii iri tongokotua do imam om i tongomoloingon do Joudi siri valai di Imam Tagajo, i Kayapas ngaranjo. 4Om moiupapakat iolo do mogium koontodon do manangkap di Yisus ontok do au aantangan daa di tongotulun, om patajon nogi dino daa diolo Isido. 5Nga moitatangar dino iolo do, “Ada tokoupo tangkapo Isido ontok do tadau tagajo, supaya au tokovi urunan do tongotulun mamatai,” kadino diolo.

Tinuntugan i Yisus di Lana

(Mar. 14:3-9; Yaya 12:1-8)

6Nga ontok di Yisus siri Kampung Boitani, kivaro iso tulun do rumanai i kojuvanjo i nolingasan, ngaranjo i Simun, do poongoi di Yisus mangakan siri valaijo. 7Nga ontok diri mangakan i Yisus,#26:7 Koubasan nopo do tulun di pogulu nga mili-kili si toodopon ontok do mangakan. Tongotoodopon nopo diri nga misoliput di mija poijanan do taakanon. kivaro dii iso tongondu rinumikot do minongovit do sombutul lana di aangod om oorogo marong di vinaal mantad bolinanaan, om potuntugono dii i lana siri tulu di Yisus.

8Nga kaantangaija nopo dii di tongotulunJo do irad diri om santangar-tangar dii ikoi do aasaban, om kadagai, “Nokuro ilo do potuntugon do orubat? 9Nga torogo dilo amaar marong. Gaam nogi padagangonno om itaak di tongotulun ongomimiskin iri torogo ko mantad do pinsirubatan!” kanja.

10Nga oilaani di Yisus i ginavoja om kaDisido, “Nokuro do poposusa kou disido? Do aandai gia gaagayajo siti Dogo. 11Do tulun nopo tomiskin soumur poirunggum dikovu. Nga Ioku nopo om okoniko soumur poirunggum dikovu. 12Do ilo nopo kotutuntugjo diti kojuvanKu nga irad do monodia isido do lobongon Oku. 13PatangaronKu marong dikovu iti, do ombo nopo kotongkopo siti vonuvo iti Abar do Aandai, om iti gaagaya do aandai diti tongondu siti Dogo nogi nga arait, om aandamani isido di tongotulun,” kadi Yisus.

Minongupakat i Yudas diri Tongoimam

(Mar. 14:10-11; Luk. 22:3-6)

14Nga kivaro iso tulun mantad di opulu om duvo tulun di Yisus, ngaranjo i Yudas, i tulun mantad soi Kampung Koriut. Om ongoino dii isido kumiupakat di tongokotua di imam. 15Kadisido, “Onu itaak muju dogo, nong jualonku i Yisus si dikovu?” ka. Nga ijapono dii diolo iri siin tolu nopulu koping pirak vinaal, do itaak di Yudas. 16Om mantad dii diri do minogium i Yudas do akal nong potingkuro itaak i Yisus si di tongokotua di imam.

Minangakan i Yisus Mivaja di TongotulunJo

(Mar. 14:12-21; Luk. 22:7-14; Yaya 13:21-30)

17Om norikot nopo dii tadau koiso, irino kotimpuunon do tadau tagajo dagai tulun Joudi do Kapangakananja di Kuui do Auso Poudor, om rikot ikoino dii i tongotulun di Yisus mongoduat Disido do, “Inombo pantok kouvanganNu do ponodiaanja do pangakanan tokou di kambing biri-biri, do akanon di Paska?” kanja.

18Om jawap dii i Yisus dagai do, “Ongoi kou pogi silo Bandar Yorusalim om somungon mujuno i kuvoon om tangaron muju isido irad diti, ‘ “Auno alaid nasipKu, nga mongoi ikoi di tongotulunKu sino valainu mangakan-ngakan di kambing biri-biri do Paska,” kadi Guru,’ kanto nono disido,” kadi Yisus. 19Om pampanauno dii iolo mongoi siri nisuu di Yisus diolo do monodia diri akanon do Paska.

20Om osodop nopo dii i tadau, om rikotno dii i Yisus mivaja dagai i opulu om duvo tulunJo om miniurukno dii ikoi mangakan. 21Nga ontok do mangakan ikoi om pitangarno dii i Yisus do, “PatangaronKu marong dikovu iti, do kivaro iso tulun sino dikovu do pojual Dogo,” kadi Yisus.

22Om sumurauno dii marong ikoi do nokorongou di tinangar di Yisus do irad diri, om poisusuvolino dii ikoi mongoduat di Yisus do, “Ioku naku ino, Tuhan?” kanja.

23Om jawapno dii i Yisus dagai do, “Isai iri muruk Dogo do potutu di kuui siti pinggan, irino pojual Dogo. 24Om Iokuno i Sinumiliu do Tulun, om mimang apatai Oku irad di nokotulis siri Kitab. Nga songkuro karaat nasip di tulun di pojual Dogo! Gaam nogi daa do au naanak isido,” kadi Yisus.

25Nga kadi Yudas, “Rabi,#Antangai Matius 23:7. ioku naku ino?” ka, do isidono iri pojual di Yisus.

Jawapai dii di Yisus do, “Oo, oinomodno ino tangarnu,” ka.

Pangakanan do Pangandaman di Kinapatajo di Tuhan

(Mar. 14:22-26; Luk. 22:14-20; 1 Kor. 11:23-25)

26Om ontok di sangakan-akan ikoi doi Yisus, om paganuno dii Isido di kuui, om pangarajouno#26:26 pangarajou: pongompod dii Isido di Kinoringan, om poikokib-kokibo, om taakai nogi dii dagai di tongotulunJo, om kaDisido, “Paganu kouno diti kuui, om akanoni do itino kojuvanKu,” ka.

27Om kuutaiJono dii iri sangkir do kivaig do anggur, om ponorimakasi nogi dii Isido di Kinoringan, om pataako nogi dii Disido dagai, om kaDisido, “Pongiup kouno kasangkat diti vaig anggur, 28do itino raaKu do pomogirot di pongojonjian do Kinoringan, do tumuntug i raaKu supaya ompunanKu i duso di tongotulun. 29Om patangaronKu marong dikovu iti, do mantad do maino au Okuno koiup kavagu diti vaig do anggur gosob do orikot i kopongiupan tokou do vaig do anggur di kavavagu saralom Kopomorintaan diAmoKu,”#26:29 diAmo: diApa kadi Yisus.

30Om sinding#26:30 sinding: lolongoi ikoino dii do minangarajou do Kinoringan om labus ikoi nogi dii do mongoi siri Kulud#26:30 Kulud: Kotud Joitun.

Popoilo Laaid i Yisus do Mongolim i Pitrus

(Mar. 14:27-31; Luk. 22:31-34; Yaya 13:36-38)

31Nga kadi Yisus dagai, “Pingiduan Oku dikovu sodop maino sabap do tangkapon Oku do maja di nokotulis saralom Kitab do ka,

‘PatajonKuno i tulun di momimiara do kambing biri-biri,

om kopoiririjang nogi dino i kinoguuan di kambing biri-biri,’

kadi Kinoringan.#Antangai Jokoria 13:7.

32Nga ovijau Oku nopo kavagu, om mogulu Oku mantad dikovu mongoi soi Vonuvo Golilia,” kadi Yisus.

33Om kadi Pitrus di Yisus, “Insan do pingiduanKopo kasangkat diolo sabap do tangkaponKo, nga au okui dogo mogidu,” ka.

34Nga kadi Yisus di Pitrus, “NoilaanKuno ika, do aupo kopongingkukuuk i tandaa do sodop maino, om intolukono mitangar do, ‘Au oku kotutun di Yisus,’ kanu dino,” kadi Yisus.

35Nga kadii kavagu di Pitrus, “Insan kaavaja okupo Dikau do patajon do tulun, au oku mongolim do kotutun Dikau,” kadisido. Om kasangkat dagai nogi nga mitangar do irad diri.

Sinumambayang i Yisus siri Kabun Gitsamani

(Mar. 14:32-42; Luk. 22:39-46)

36Nga korikot nopo dii ikoi mivaja di Yisus siri iso pantok do pinonguranan do Kabun Gitsamani si Kulud#26:36 Kulud: Kotud Jaitun, om pitangarno dii i Yisus dagai, i tongotulunJo, do, “Ogom koupo pogi siti. Mongoi Okupo sambayang siilo,” ka. 37I Pitrus nopo om i duvo tanak di Jobidi nga inangatan Disido. Om timpuunno dii i ginavo di Yisus sumurau om sumusa do oilaan Disido do patajon Isido. 38Om kaDisido diolo, “Oludus#26:38 oludus: olunggui ko osusa marong ginavo marong Oku inong do sipapatai Oku kopurimananKu. Nga indada koupo siti, om kumoruang Dogo pipupurimon,” kaDisido.

39Om lombusno dii i Yisus siri ososodu kopoyok mantad di tulunJo, om loubno dii do sinumambayang di Kinoringan do mokitulung. Om kadi Yisus, “Ou Amo,#26:39 Amo: Apa poinsoduo daa Dogo iti kasansaraanKu. Nga insan do irad dino okoniko maja Oku do kouvanganKu kondiri, nga irino kouvanganNu,” kadi Yisus.

40Om gulino dii Isido siri nindadawon di tongotulunJo, nga nokosupan dii Disido iolo do nokoodop, om kadi Yisus di Pitrus, “Au kou naku kogoos kumoruang Dogo pipupurimon do ongosanjaami, do au koodop! 41Pipupurimanai mujuno om sambayang kouno supaya om au kovi osuat do ponsubaan, do agajo daa ino ginavo muju dino, nga oluoi i kojuvan muju,” ka.

42Om gulino dii kavagu i Yisus siri pantok sinambayangonJo di togina. Om kaDisido, “Ou Amo, kukuroyonpo dino nong auno obuli poinsoduon Dogo iti kosusaan do Iokui posongonuvonNu. Ombo nopo ino kouvanganNu,” ka.

43Om gunggulino dii kavagu Isido siri diolo, om nokosupani dii do iri om iri nokopingodop iolo, do avagat i matojo do siodopon marong.

44Om pobojoo nopo dii di Yisus iolo do irad diri, om gunggulino kavagu Isido di kumointolu, iri om iri sambayangJo. 45Om gunggulino dii kavagu i Yisus si diolo. Irad om irad diri do nokoodop iolo, om kaDisido diolo, “Modop koupo bala! Aupo nobobos kou mingkojod! Norikotno di maso do pojualon Oku, i Sinumiliu do Tulun, siri tulun kiduso. 46Tungag kouno pogi, om kayo tokouno mampanau. Antangai, nga alono dii ilo tulun do pojual Dogo,” kadi Yisus.

Tinangkap i Yisus

(Mar. 14:43-50; Luk. 22:47-53; Yaya 18:3-11)

47Om ontok di mangar-tangarpo dii i Yisus dagai, iri opulu om iso tulunJo, om rikotno dii i Yudas, i songkoruanganja. Om oguu dii marong iri tongotulun maja-vaja disido do sasasangkil do gampa om songkuut-kuut do lalapos, do sinuu diri tongokotua do imam om iri tongomoloingon do Joudi. 48Om ontok di mongupakatpo i Yudas, irino i pojual di Yisus, om nakatangarno isido diolo laid do irad diti, “Isaai nopo iri tungubanku monium om Isidono iri. Om tangkapon mujuno Isido,” kadi Yudas. 49Om korikot nopo dii i Yudas om sondikoto nopo dii disido i Yisus, om kadisido, “Rabi!#26:49 Rabi: Antangai Matius 23:7. Potingkukurono?” ka, om tungubaino dii disido monium i Yisus, do sumalam isido di Yisus.

50Nga kadi Yisus, “Apa, polombusoi pogi ino kouvangannu nong inono kaangaiannu siti,”#26:50 Apa, polombusoi pogi ino kouvangannu nong inono kaangaiannu siti: siri solinan vokon pinotulis do: Apa, onu ongoionnu siti? ka.

Om rikotno dii kasangkat iolo do manangkap di Yisus. 51Nga kivaro iso tulun songkoruangan di Yisus do minongunus di gampa om minonibas di turipon di Imam Tagajo gosob do napapas i tolingojo.

52Nga pitangarno dii i Yisus do, “Poosuono kavagu ino gampa sino sarungjo, do isaai nopo iri mangaarap do gampa om gampano iri kapatai disido. 53Panantamannu bato om au buli Oku mokiatod kosikap diAmoKu#26:53 diAmo: diApa do lobi opulu om duvono ribu moloikat do monulung Dogo nong uvang Okuno? 54Nga nong mokitulung Oku potingkukurono orikot iri tangar siri Kitab, do nakatangar siri do misti kooyon Oku diolo irad diti?” ka.

55Om pitangar nogi dii i Yisus di kinoguuan do tongotulun do, “Nokuro do kisinangkil kou do gampa om songkuut-kuut kou do lalapos, do mongoi manangkap Dogo? Panantaman mujupo bato om parampuk Oku? Tikid tadau Oku mogom-ogom monuduk silo natad do Valai Sasambayangan Tagajo, nga aui tinangkap Okui dikovu. 56Nga itino kinatangkapan muju Dogo do porikot diri tinangaran nokotulis siri buuk tinulis di tongonabi, i popolombus di tinangaran do Kinoringan pogulu,” kadii di Yisus. Om iduai nopo dii kasangkat di tongotulunJo do minoitotomburijang mogidu.

Pinogotuvang i Yisus di Pinonguntunan di Tongokotua

(Mar. 14:53-65; Luk. 22:54-55, 63-71; Yaya 18:13-14, 19-24)

57Om katangkap nopo dii diolo i Yisus, om ovitono dii diolo muli siri valai di Kayapas, irino Imam Tagajo. Nga nountunno laid siri i tongokotua do tulun Joudi, irino i tulun monunuduk do Undang-undang Ugama om i tongomoloingon do Joudi. 58Nga suutno dii i Pitrus di Yisus siri sodu gosob do nakaasu siri natad di valai di Imam Tagajo, om rinumunggum isido di pulis di Imam Tagajo mogom do mongontong di Yisus nong kukuroyon diolo Isido.

59Nga iri nopo dii i tongokotua do imam om kasangkat di tongotulun vokon si Pinonguntunan di Tongokotua nga mogium do koontodon do vuvuduton do mangadaawa daa di Yisus, supaya kadapat iolo mamatai Disido. 60Nga aui dii kaayang iolo di tulun do sumaksi, do oguui daa i tulun do sumaksi do vuvuduton nga okonkopo iri kopotutan.

Nga laid-laid nopo dii, om ingkakat iri duvo tulun 61mitangar do, “Isidono iri minitangar do, ‘Kouyas Okui diti Valai Sasambayangan Tagajo do Kinoringan om tolui tadau obuli vaalonKu kavagu,’ kaDisido,” kadiri duvo tulun.

62Om ingkakatno dii iri Imam Tagajo do minongoduat di Yisus do, “Auso ijawapNu dilo pangadaawaan diolo Dikau?” ka. 63Nga ootos nopo i Yisus do au minungkomi.

Om posumpawon di Imam Tagajo i Yisus supaya i Yisus katangar do kadi Imam Tagajo, “Uvang oku do sumumpaKo siti gotuvang do Kinoringan i poimvijau nong isaiKo. Ikano naku i Koristus, i Tanak do Kinoringan?” ka.

64Om jawap nogi dii i Yisus do, “Oinomodno ino tangarnu do Iokuno iri, om Iokuno i Sinumiliu do Tulun. Mantad maino aantangan Oku dikovu do poingogom siri ponong vanan#26:64 poingogom siri ponong vanan: Antangai “vanan” si Kamus Kitab. do Kinoringan, iri Agajo Marong Kuasa. Om aantangan Oku nogi dino dikovu do insan tadau rumikot mantad silo tavan#26:64 tavan: langit do si soribau do kavut,” kadi Yisus.

65Om karangaai nopo dii di Imam Tagajo i tinangar di Yisus turus ruako dii disido i sabungjo kondiri,#26:65 ruako dii disido i sabungjo kondiri: Itino gaagaya do tulun Joudi nong araatan. om kadisido kavagu, “Antangaipo nga mangararaat Isido do Kinoringan. Onuupo dii koiumai tokou do saksi? Na, maino nokorongou kouno di tinangaranJo do mangararaat do Kinoringan do rumantai Isido do Kinoringan. 66Potingkuro dii koputusan muju?” kadi Imam Tagajo.

Nga kadiolo, “Nong irad dino apatutno Isido do patajon,” ka.

67Om pindulaaino dii diolo i pamarasan#26:67 pamarasan: vuros di Yisus, om pisampakai dii diolo om tapapon diolo vokon. 68Om kadiolo, “Uu Koristus, intutunai daa nong isai ino minanampak Dika?” ka.

Minongolim i Pitrus do Kotutun di Yisus

(Mar. 14:66-72; Luk. 22:56-62; Yaya 18:15-18, 25-27)

69Om i Pitrus nopo ontok diri nga poingogom siri natad di poibisaraan. Nga kivaro dii iso tongondu raraa poinggaji si di Imam Tagajo, minongoi si di Pitrus do minitangar do ka, “Ika nogi nga koruangi di Yisus, ilo tulun mantad Vonuvo Golilia,” kadi raraa.

70Om timpuunno dii i Pitrus do mongolim si gotuvang di kinoguuan di tongotulun do, “Au oku nokoilo nong onu ino komoionnu,” kadisido.

71Om ontok diri minongoi i Pitrus mindada si somok do pintu. Nga kaantangaino dii kavagu di raraa vokon gojian, om pitangarno isido di tulun di songingkakat siri, “Itino tulun songkoruangan di Yisus, tulun mantad Bandar Nasarit,” ka.

72Om sumpano dii i Pitrus do mongolim di kumoinduvo do, “Au okui kotutun tulun dino,” ka.

73Om au kalalaid mantad diri, rikotno dii i tongotulun songingkakat siri do rumomut si di Pitrus om pitangar do, “Oinomodno bo do ika nogi nga koruang diolo, do otutunanja ino tangarnu,” kadiolo.

74Om jawapno dii kavagu i Pitrus diolo di kumointolu do, “Sumumpa oku do oinomod iti tangarku. Matai okuno nong kotutun okuno di tulun dino,” kadi Pitrus.

Om turus pongingkukuukno dii i tandaa. 75Om kaandamai nogi dii di Piturus iri tinangar di Yisus do, “Aupo kopongingkukuuk i tandaa, om intolukono mitangar do, ‘Au oku kotutun di Yisus,’ kanu dino,” kadi Yisus, om labusno dii i Pitrus om pogiadno dii do opuod.

Currently Selected:

Matius 26: LabukPKV

Highlight

Copy