Matius 10

Minomili i Yisus di Opulu om Duvo TulunJo

(Mar. 3:13-19; Luk. 6:12-16)

1Om loovon ikoino dii di Yisus iri opulu om duvo tulunJo, om korikot dii ikoi siri Disido, onuai ikoino dii do kuasa monunsub do tongorogon, om mongolingos do moisosondiang toruol. 2Om itino ngaranja kasangkat di tongosusuuon di Yisus: timpuun i Simun i roitan do i Pitrus, om iOndorias iadijo, om i duvo misulod i Yakub om i Yaya tanak di Jobidi, 3om i Pilipus, om i Botulomius, om i Tumas, om ioku i Matius i momumumpung do sukai pogulu, om i Yakub tanak diAlpius, om i Tadius, 4om i Simun i otoboi maja do pati di bansaja kondiri, om i Yudas mantad Kampung Koriut i pojual di Yisus do insan tadau.

Sinuu di Yisus i TongotulunJo Mongoi Papaabar di Abar do Aandai

(Mar. 6:6-13; Luk. 9:1-6; 10:4-12)

5Ponuuno dii i Yisus dagai i opulu om duvo tulunJo do mampanau, om bilinaino dii ikoi do irad diti, “Ada kouno ongoi soi kababandaran do tulun Somoria om pantok do tulun sondiang do okonko bansa Joudi. 6Nga ongoi kouno soi kokokompungan do tulun do Israil iri nokoombo irad diri kambing biri-biri. 7Ongoi kouno om abaranno marong iolo do oruaino i Kinoringan monguasa di tongotulunJo. 8Isaai nopo iri tulun do au kataru om i tulun do rumanai i kojuvanjo nga lingasan mujuno. Om povijauon mujuno iri tongotulun napatai. Om sunsubon mujuno i tongorogon. Tulungon mujuno toomod iolo do kuasa dino okoniko binoli muju. 9Om ada kouno mongovit do siin amas ko pirak, ko iripo siin do tambaga sino kambot muju. 10Ada kouno mongovit do kontungan poijanan do kokorui, adano mongovit duvo sabung, ko kasut ko tungkat,#10:10 tungkat: tungkud do mimang i tulun di kumaraja nga apatuti do onuan onuu noopo iri taakanonjo.

11Korikot kou nopo inombo do bandar ko kampung, mogium kouno diri tulun di uvang do ijonon muju, om siri-sirino indadawon muju gosobi do lumombus kou. 12Om kivaro nopo tulun monorima dikovu om pokibarakatan mujuno di Kinoringan iolo. 13Nong osuau iolo dikovu, tumatap i barakat diri siri diolo. Nga nong au nopo osuau iolo dikovu gumuli si dikovu kavagu iri barakat diri. 14Nong kivaro tulun do au monorima dikovu ko au mongkinongou diri tangaron muju, iduai nopo i valai om i bandar diri om tantadon muju mampanau tantagono i lisovu si lukap muju tanda do au kouvangan iolo do Kinoringan. 15PatangaronKu marong dikovu iti do agaanpo i kosusaan di tulun soi Bandar do Sudom om Gomura mantad di tulun siri bandar diri ontok do Tadau Kopongukuman,” kadi Yisus.

Kosusaan Tagajo Rumikot

(Mar. 13:9-13; Luk. 21:12-17)

16Om kadi Yisus kavagu, “Oinomodno! SuuonKu ikovu irad di kambing biri-biri mongoi siri pantok do tulun taraat irad do kaakaa. Nong irad dino misti do opintar kou irad do vulanut, om otuud i gaagaya muju irad do kungkur. 17Ondodomo mujuno, do kivaro manangkap dikovu dino do mongovit do pataak si Pinonguntunan di Tongokotua, om pinlapasan kou siri valai sasambayangan diolo. 18Om oviton kou do tulun pogotuvang do tongomontiri om tongoraja do mangadaawa dikovu sabap do maja kou Dogo. Nga irino kosivatan muju do papaabar di tongotulun kipangkat om i tongotulun do okonko bansa Joudi diri Abar do Aandai. 19-20Om sombibia nopo di pataakon kou dino si diolo nga ada kouno kosurau nong onu i patangaron muju ontok diri, do kogotuvang koupo dino ampa koilo kou mitangar. Do tinangaran muju nopo diri om okoniko toilaan muju kondiri, do irino tinangaran mantad di Tatod di Tama tokou do monuduk di ginavo muju.

21Om pataakon di tulun iri sulodjo do ipapatai di tulun. Om pataakon nogi diamojo#10:21 diamo: diapa iri tanakjo do ipapatai di tulun. Om i tanakjo nga lumavan diamojo om iinojo gosob do ipapatai di tulun. 22Om kasaangkat di tongotulun nga obonsi dikovu sabap maja kou Dogo. Nga isaai nopo iri atagar ginavo gosob do koovion om irino kaanu do kovijaan di auso koovion. 23Nong pinokorualan kou siri bandar di nijonon muju, pogidu kouno soi bandar sondiang. Do patangaronKu marong dikovu iti, do aupo nokopingavi kou diri kakarajawon muju siti kababandaran do Israil om kogungguli Okuno siti vonuvo, do Iokuno i Sinumiliu do Tulun.

24Ausoi tulun di moguru do apandai mantad di gurujo. Om ausoi turipon do kikuasa mantad di tuanjo. 25Iokuno Guru om Tuan muju. Sukupno nong karantai kouno Dogo. Nga nong Ioku, i Tuan muju, roiton do koruang do i Bosibul, irino kotua do rogon, makinpo dii kararaat pongoroitan diolo dikovu i songonuvonKu,” kadi Yisus.

Iri Apatut do Rosijan

(Luk. 12:2-7)

26Om kadi Yisus kavagu, “Jadi nong irad dino, ada kou korosi di tulun vokon. Kasaangkat diri poinlosok nga pointalangoni laaid, om oilaani do laaid iri komoion si saralom ginavo. 27Iri nopo tangaronKu dikovu saralom totuvong diti om pavantango mujuno siri tanavau. Om onuu nopo iri poburungonKu dikovu popiabar-abaro mujuno inombo-nombo pantok. 28Om ada kouno rumosi diri tulun mamamatai do kojuvan#10:28 kojuvan: tinan muju, nga ausoi kuasa diolo mamamatai di tatod muju. Nga korosi kouno di Kinoringan do kikuasa mominasa do kojuvan om tatod siri tapui naraka. 29Okonko isoi siin bato i torogo di duvo tinan pirit? Nga aui apatai toomod nong okoniko kouvangan di Tama tokou. 30Om insan songkuropo ginuu dino tobuk do tulu muju nga noijapJoi laaid. 31Nong irad dino, ada kouno korosi, do ikovu nopo om kitorogo marong mantad di panon do pirit.

Mangakun di Yisus si Gotuvang di Tulun do Oguu

(Luk. 12:8-9)

32Irad nopo dino, isaai nopo i tulun do mangakun do nasanganuKu isido siri gotuvang do tongotulun toguu, Ioku nogi nga mangakun do manansanganu Oku disido siri gotuvang diAmoKu#10:32 diAmo: diApa soi suruga. 33Nga isai-isai nopo i tulun do mongolim siri gotuvang do tulun toguu do songonuvonKu isido, om Ioku nogi nga mongolim do manansanganu Oku disido siri gotuvang diAmoKu soi suruga,” kadi Yisus.

Okonko Popiandai nga Popiodu

(Luk. 12:51-53; 14:26-27)

34Om kadi Yisus kavagu, “Ada panantamai muju do mongovit Oku do kopoiandaian di tongotulun siti vonuvo do korikatanKu. Okoniko poiaandaian ovitonKu, nga irino poioduan. 35Do irino korikatanKu nontodon do pioduan miamo,#10:35 miamo: miapa pioduan miino om pioduan miivan. 36Irino komoion do moitutuntuli moioodu moianak-anak.#Antangai Mika 7:6.

37Nga aui apatut do roiton i tulun do tulunKu isido, nong au kojuu isido diamojo#10:37 diamo: diapa om iinojo lobi mantad Dogo. Irad nogi dino do aui apatut do roiton i tulun do tulunKu, nong au kojuu isido di tanakjo kusai om tongondu lobi mantad Dogo. 38Om aui apatut do roiton i tulun do tulunKu isido, nong au monimban di salibjo, irino do aui mijau matai tumaan diri kasansaraanjo sabap aparsaya Dogo om maja nogi Dogo. 39Om nong mongingkikit i tulun diri kovijaanjo kondiri nga iri nogi do oliangan isido do kovijaanjo do auso koovion. Oliongpo mai ino kovijaanjo sabap do maja Dogo nga iri nogi do kaanu isido di kovijaan diri auso koovion,” kadi Yisus.

Isuli mantad do Kinoringan

(Mat. 18:5; Mar. 9:37, 41)

40Om kadi Yisus kavagu, “Isaai nopo iri monorima dikovu nga irino monorima Dogo; om isaai nopo iri monorima Dogo nga irino monorima nogi di Kinoringan, i minonuu Dogo siti vonuvo. 41Isaai nopo iri monorima do nabi, i popolombus di tinangaran do Kinoringan, sabap do nabi isido, irino kaanu irad diri isuli di Kinoringan di nabi nogi. Om isaai nopo iri monorima di tulun di abanar sabap do abanar isido, iri nogi nga kaanu irad diri isuli di Kinoringan di tulun abanar. 42PatangaronKu marong dikovu iti, do isaai nopo iri manaak do insan sanggalas i vaig osogit do ipoiup di tulun ongosuribak pangkat sabap do tulunKu isido om aui olijot iri isuli disido mantad di Kinoringan,” kadi Yisus.

Currently Selected:

Matius 10: LabukPKV

Highlight

Copy