Susuuon 6

Turu Kojuvan Pinili do Mangatur do Siin

1Nga ontok diri, muang-ruang nopo dii koguuo diri tongotulun di Yisus. Om tadau-tadau taakan diri tongotulun di Yisus do siin i tongotongondu napatajan do savo. Nga au kopiinong iri pananaak diolo diri siin di tongondu napatajan do savo. Jadi iri nopo tongotulun Joudi i mitangar do tangar Yunani nga kumiodu#6:1 kumiodu: kumiatu diri tongotulun Joudi vokon i mitangar do tangar Ibrani. Om kadi tongotulun Joudi i mitangar do tangar Yunani, “Au kosukup iri siin itaak di tongotongondu napatajan do savo i mitangar do tangar Yunani,” ka. 2Om loovo nopo dii di opulu om duvo susuuon di Yisus i tongotulun di Yisus vokon, om kadiolo, “Au apatut do pisingkoolingaija#6:2 pisingkoolingai: mongoling monuduk do tinangaran do Kinoringan om mangatur do siin. 3Oou kosusuladanja, irad nopo dino pilio mujuno pogi turu kusai siti pialatan muju. Om misti do momili kou di tulun diri roroiton do tulun do aandai, om tulun do kikopintaran om noponu i ginavo doisido di kuasa di Tatod Tolidang. Om ampa nogi dino do manantu ikoi diolo mangatur diti siin. 4Nga ikoi nopo om soumur sumambayang om monuduk di tinangaran do Kinoringan,” kadiolo.

5Om aandaian dii i tongotulun i naparsaya di Yisus diri tinangaran di susuuon di Yisus. Jadi piliono dii di tongotulun iri turu kojuvan. Ngaran nopo diolo nga i Sotipanus, om i Pilipus, om i Porokus, om i Nikanur, om i Timan, om i Pomunas, om i Nikolous mantad Ontukia, iso tulun di okonko bansa Joudi i nakavaja di ugama Joudi diri aupo naparsaya di Yisus. I Sotipanus nopo nga oinomod do aparsaya om noponu i ginavojo do kuasa di Tatod Tolidang. 6Om ovitono dii diolo iri turu kojuvan diri do gumotuvang di susuuon di Yisus. Om sambayangaino dii di susuuon di Yisus om kamawo nogi dii diolo i turu kojuvan supaya oilaan dii di tongotulun do irino tulun kipangkat.

7Makin nogi dii do nokotongkop i tinangaran do Kinoringan. Om ginuu nopo di tongotulun di Yisus siri Yorusalim nga muang-ruang dii, om oguu dii i tongoimam nogi naparsaya di Yisus.

Tinangkap i Sotipanus

8I Sotipanus nopo nga nabarakatan marong di Kinoringan om agajo kuasajo do mamaal do koiranan om pongintutunan siri di tongotulun. 9Nga kivaro piipiro tulun Joudi lumavan di Sotipanus. Iolo nopo nga mantad soi Bandar Korini om soi Bandar Sokondoria, om sumambayang iolo siri valai sasambayangan do tulun Joudi iri pinonguranan do Valai Sasambayangan do Tulun Obojou.#6:9 Tulun Obojou: Iolo nopo nga tulun Joudi diri inuripon di pogulu, nga nakapamarai di torogo di pinongolukatan diolo supaya obojou ko pinobojou iolo di tuanjo. Om maja i tongotulun Joudi mantad Vonuvo Kilikia om Vonuvo Osia diolo kumisival di Sotipanus. 10Nga au iolo kalavan di tinangaran di Sotipanus, do kikopintaran gia isido mantad di kuasa do Tatod do Kinoringan.

11Jadi onuan dii diolo do siin i piipiro tulun, om suuon iolo mitangar do irad diti, “Nokorongou ikoi di Sotipanus mangararaat di Musa om i Kinoringan,” ka.

12Irad nopo diri nga popibonsi iri musu di Sotipanus di tongotulun gosob do ongobonsi i tongomoloingon, om i tongotulun monunuduk do Undang-undang Ugama do Joudi om i tongotulun vokon di Sotipanus. Jadi korikot iolo manangkap di Sotipanus, om ovitono dii diolo siri gotuvang di Pinonguntunan di Tongokotua. 13Om angataino dii diolo i piipiro tulun saksi do minomudut di Sotipanus. Om misimpudali iolo do momumudut do irad diti, “Aui tumingkod i Sotipanus do papasala diti Valai Sasambayangan tokou Tagajo i tolidang. Om au tumingkod isido papasala di Undang-undang di Musa. 14Do norongoujano isido mitangar do ilo Yisus mantad Bandar Nasarit monguyas diti Valai Sasambayangan Tagajo, om mongimban di adat-adat i nitaak di Musa daton,”#6:14 daton: ditokou kadi tulun saksi momumudut.

15Om kasangkat di Pinonguntunan di Tongokotua nga songingogom siri om mongontong di Sotipanus. Om aantangan diolo i pamarasan#6:15 pamarasan: vuros disido irad do pamarasan do moloikat.

Currently Selected:

Susuuon 6: LabukPKV

Highlight

Copy