馬可福音 6
6
耶穌佇拿撒勒受拒絕
(太 13.53-58；路 4.16-30)
1耶穌離開遐，倒去家己的故鄉，門徒隨伊去。 2安歇日，伊佇會堂教示人。真多人聽著伊的教示，攏真著驚，講：「此個人的本事對叨位來？伊得著的到底是什麼款的智慧？伊的手哪會當行此款神跡？ 3伊豈毋是木匠？豈毋是馬利亞的子，雅各、約西、猶大，及西門的兄弟？伊的小妹豈毋是及咱住佇遮？」𪜶煞對耶穌起反感。
4耶穌給𪜶講：「先知佇家己的故鄉，家己的親人，家己的家族以外，一定會受尊重。」
5伊佇遐𣍐當行什麼神跡，只有給幾個仔病人按手，給𪜶醫好。 6耶穌對𪜶的毋信感覺真奇怪。
十二使徒的使命
(太 10.1, 5-15；路 9.1-6)
耶穌行透周圍的庄社教示人。 7伊召集十二使徒來，差𪜶兩個兩個出去，互𪜶有權柄通制壓邪神。 8伊吩咐𪜶，出門的時柺仔以外什麼攏毋通帶；毋通帶食物；毋通帶旅行袋；腰帶內面毋通帶錢； 9只有穿涼鞋；毋通穿兩領內衫。 10伊閣給𪜶講：「恁無論入去什麼人的厝，著住遐到離開彼所在。 11無論什麼所在，人若毋接納恁，毋聽恁的教示，恁離開的時著將腳裡的土粉拌掉，表示對𪜶警告。」
12使徒就出去傳道，勸人悔改。 13𪜶閣趕出真多鬼，嘛用油抹真多病人，給𪜶醫好。
施洗者約翰的死
(太 14.1-12；路 9.7-9)
14 希律王有聽著耶穌的事，因為伊的名傳遍逐所在。有人講：「伊是施洗者約翰對死人中閣活，所以有權能行諸個神跡。」
15毋拘嘛有人講：「伊是以利亞」；閣有人講：「伊是先知，親像古早的一個先知。」
16 希律聽著就講：「是我給伊斬頭彼個約翰，伊有閣活。」 17希律有派人去掠約翰，給伊鍊佇監裡，原因是希律有娶小弟腓力的某希羅底做某； 18因為約翰定定對希律講：「你娶小弟的某無合法！」
19 希羅底心內對約翰拾恨，想欲給伊刣，毋拘𣍐當照心願， 20因為希律驚約翰，知影伊是正義閣聖潔的人，有給伊保護。希律逐遍聽約翰的話，非常不安，猶久真愛聽。
21 希羅底的機會來啦。希律作生日的時，辦宴席請文武百官及加利利民間的領袖。 22希羅底的查某子入來跳舞，互希律及在座的貴賓歡喜。王給彼個查某囝仔講：「看你愛什麼，做你求，我攏欲互你。」 23希律閣對伊宣誓講：「你無論求什麼，連我王國的一半嘛會互你。」
24查某囝仔出去問伊的老母：「我著求什麼？」伊的老母給伊講：「施洗者約翰的頭。」
25伊隨時趕倒轉來，對王要求講：「請你隨時將施洗者約翰的頭殼囥佇盤裡互我。」
26王的心非常艱苦，不過因為已經佇貴賓的面前咒誓，就無給伊拒絕。 27王隨時差一個警衛去提約翰的頭。警衛就去監裡斬約翰的頭， 28將頭殼下佇盤裡捧來互查某囝仔，查某囝仔就互伊的老母。 29約翰的門徒聽著就來收伊的身屍，給伊埋葬佇墓裡。
耶穌互五千人食飽
(太 14.13-21；路 9.10-17；約 6.1-15)
30使徒轉來耶穌遐，將𪜶所做所教示的攏給伊報告。 31耶穌給𪜶講：「按呢，恁嘛著家己去偏僻無人住的所在小可歇睏一下。」因為出出入入的人真多，𪜶連食飯的時間都無。 32𪜶就坐船干焦𪜶家己去偏僻無人住的所在。
33真多人看著𪜶離開，認出是𪜶，就對逐個城市順陸路走進前，比𪜶代先到彼所在。 34耶穌上岸，看著一大陣人就可憐𪜶，因為𪜶親像無牧者的羊。伊就教示𪜶真多項事。 35時間已經真晏，門徒倚來給伊講：「此個所在真偏僻，時間嘛真晏啦。 36請給𪜶解散，互𪜶去附近的鄉村庄社家己買物件食。」
37耶穌應講：「恁互𪜶食。」
門徒問講：「阮著去買兩百個銀仔的餅互𪜶食噢？」
38耶穌講：「恁有偌多餅，去看覓咧！」𪜶看了就講：「有五個；嘛有兩尾魚。」
39耶穌吩咐門徒給眾人分組，互𪜶坐佇青翠的草埔。 40眾人就一組一組坐落去，有的一百個，有的五十個。 41後來耶穌提彼五個餅及兩尾魚，向天感謝，擘開，提互門徒去分互眾人。伊閣將彼兩尾魚分互眾人。 42大家攏食，食到飽。 43門徒拾食賰的餅幼仔及魚屑仔，滿十二籃。 44食餅的，干焦查甫人就有五千。
耶穌佇湖的頂面行
(太 14.22-33；約 6.16-21)
45耶穌隨時迫伊的門徒上船先過去對面岸，去伯賽大，家己留啲解散群眾。 46耶穌離開群眾了後就上山祈禱。 47天暗的時，船行到湖的中央；耶穌家己一個佇岸頂。 48伊看著門徒搢風啲划槳，划甲真艱苦。天欲光的時，耶穌佇湖的頂面向𪜶遐行去，想欲對邊仔過去。 49門徒看著伊佇湖的頂面啲行，想講是鬼，就大聲喝， 50因為大家攏有看著伊，真驚。
耶穌隨時給𪜶講：「安心，是我，免驚！」
51耶穌上船去及𪜶做夥，風就恬去。門徒非常著驚， 52因為𪜶無明白彼個餅的意義，心猶真鈍。
耶穌佇革尼撒勒醫好病人
(太 14.34-36)
53耶穌及門徒過湖了後佇革尼撒勒上岸，給船拋佇岸邊。 54𪜶一下落船，眾人隨時認出耶穌， 55就四界行透透，聽著耶穌佇叨位就用床舖扛病人去遐。 56耶穌無論行到什麼庄社、城市、鄉村，人就給病人扛來囥佇市場口，懇求耶穌上無嘛互病人摸著伊衫仔裾的鬚；所有摸著的人攏得著醫好。
Currently Selected:
馬可福音 6: TTVH
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2021
