馬可福音 5
5
耶穌醫好邪神附身的人
(太 8.28-34；路 8.26-39)
1耶穌過去加利利湖的彼旁岸，格拉森人的地區。 2伊一下落船，有一個互邪神附身的人抵對墓仔埔出來，抵著伊。 3此個人攏住佇墓仔埔，人用鐵鍊都給伊鍊𣍐牢。 4真多遍人用鐵鍊及腳銬給伊捆縛，鐵鍊互伊擦斷，腳銬互伊摃碎，無人有氣力給伊制伏。 5伊暝日佇墓仔埔抑是山坪亂嚷，閣用石頭傷害家己。
6伊佇遠遠的所在看著耶穌，就走來跪佇伊的面前， 7大聲喝：「至高上帝的子耶穌，你插我！我指上帝的名懇求#5.7 「懇求」嘛通譯做「命令」。你毋通苦楚我。」 8因為耶穌有對伊講：「邪神，對此個人出去！」
9耶穌問伊：「你什麼名？」
伊應講：「我的名是『軍團』，因為阮真大陣。」 10伊迫切哀求耶穌毋通趕𪜶離開彼個地區。
11彼時，附近的山坪有一大群豬啲討食。 12邪神求耶穌講：「互阮去豬群遐，通入去𪜶內面。」 13耶穌准𪜶。邪神就出去，進入彼群豬；歸群豬，約有兩千隻，對山坪闖落去湖裡，互水死。
14飼豬的人就驚甲走去城內及鄉村報此個消息。眾人就出來欲看有發生什麼代誌。 15𪜶來耶穌遐，看著彼個互鬼附身，就是曾互「軍團」纏著的人坐佇遐，有穿衫，精神正常，就真著驚。 16看著的人就將互鬼附身的人及豬群所抵著的代誌給人講。 17𪜶就要求耶穌離開𪜶的地區。
18耶穌欲上船的時，曾互鬼附身彼個人求耶穌准伊做夥去。
19耶穌毋准，給伊講：「轉去恁兜，恁親人遐，將主憐憫你，對你所做赫呢大的代誌攏報𪜶知。」
20彼個人就離開，佇低加坡里傳揚耶穌對伊所做赫呢大的代誌；所有的人攏著驚奇怪。
會堂主管的查某子及致著血漏病的婦仁人
(太 9.18-26；路 8.40-56)
21耶穌閣坐船過去湖的彼旁岸；伊佇湖邊，有一大陣人聚集倚來。 22有一個會堂的主管叫做葉魯來，一下看著耶穌就仆佇伊的腳前， 23懇求伊，講：「我的細漢查某子啲欲死啊，請你來給伊按手，醫好，互伊會活。」
24耶穌就及伊去；有一大陣人嘛挨挨揢揢隨伊去。
25有一個婦仁人致著血漏病十二年久； 26伊有互真多醫生看過，受著真多痛苦，閣錢攏開了了，伊的病毋若無較好，顛倒哪傷重。 27伊有聽著耶穌的代誌，就揢入去群眾內面，行倚去耶穌的後面，摸伊的衫。 28伊想講：「我干焦摸著伊的衫，病就會好。」
29伊的血漏隨時止，感覺身軀的病已經好。 30耶穌隨時知有氣力對伊出去，就越過來，問群眾：「什麼人摸我的衫？」
31門徒應講：「你看歸陣人啲給你揢，你哪會講『什麼人給我摸』？」
32耶穌四箍輾轉看一下，愛知什麼人給伊摸。 33彼個婦仁人知佇伊身上所發生的代誌，驚甲皮皮惙，就仆佇耶穌腳前，將攏總的實情講出來。 34耶穌給伊講：「查某子，你的信心互你好去啦，平安倒去，你的病已經好啊。」
35耶穌猶啲講的時，有人對會堂主管的厝來，給葉魯講：「你的查某子已經死去，哪著閣勞煩老師。」
36耶穌有聽著𪜶講的話，就對會堂主管講：「毋免驚，只有著信！」 37伊就導彼得、雅各，及雅各的小弟約翰做夥去，以外毋准別人隨去。 38𪜶來到會堂主管的厝，耶穌看著場面真亂，有人啲哮，有人大聲啲哭。 39伊一下入去就給𪜶講：「恁哪哭甲亂操操？此個囝仔毋是死去，是啲睏。」
40𪜶就給伊恥笑，毋拘伊給𪜶攏趕出去，然後導囝仔的父母及彼三個門徒入去囝仔的房間。 41伊牽囝仔的手，對伊講：「大利大古米！」意思就是「查某囝仔，我給你講，起來！」
42查某囝仔隨時𬦰起來行，因為伊已經十二歲。𪜶非常著驚。 43耶穌嚴嚴警戒𪜶毋通將此個代誌互人知，閣叫𪜶提物件互查某囝仔食。
Currently Selected:
馬可福音 5: TTVH
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2021
