Má-khó Hok-im 16

Iâ-so͘ ê Koh-oa̍h

(Thài 28.1-8; Lō͘ 24.1-12; Iok 20.1-10)

1An-hioh-ji̍t kè-liáu, Boa̍t-tāi-lia̍p ê Má-lī-a, Ngá-kok ê lāu-bú Má-lī-a, kap Sat-lô-bí bóe phang-liāu beh khì boah Iâ-so͘ ê ûi-thé. 2Lé-pài-ji̍t#16.2 “Lé-pài-ji̍t” goân-bûn sī “Chhit ji̍t ê thâu chi̍t ji̍t”, chiū-sī Iû-thài-le̍k ta̍k lé-pài ê tē-it ji̍t. thàu-chá, ji̍t tú-á chhut ê sî, in chiū khì bōng-tōe. 3In hō͘-siōng kóng, “Sím-mi̍h-lâng beh thòe lán chiong bōng-kháu hit-tè chio̍h kō-khui?” 4Hit-tè chio̍h hui-siông tōa tè. In chi̍t-ē gia̍h-thâu, khòaⁿ-tio̍h hit-tè chio̍h í-keng kō-khui. 5In ji̍p-khì bōng-lāi, khòaⁿ-tio̍h chi̍t ê chhēng pe̍h-saⁿ ê siàu-liân-lâng chē tī chiàⁿ-pêng, hui-siông tio̍h-kiaⁿ.

6Hit-ê siàu-liân-lâng tùi in kóng, “Bián kiaⁿ! Góa chai lín teh chhē hō͘ lâng tèng si̍p-jī-kè ê Ná-sat-le̍k-lâng Iâ-so͘; I í-keng koh-oa̍h, bô tī chia. Lâi khòaⁿ khǹg I ê só͘-chāi. 7Lín khì, khì kā I ê bûn-tô͘ kap Pí-tek kóng, ‘I pí lín seng khì Ka-lī-lī, tī hia lín ōe kìⁿ-tio̍h I, tú-tú chiàu I kā lín kóng--ê.’”

8In kiaⁿ kah phi̍h-phi̍h-chhoah, m̄-chai beh án-chóaⁿ, chiū tùi bōng--ni̍h chhut--lâi, ti̍t-ti̍t cháu. In lóng bô tùi lâng kóng sím-mi̍h, in-ūi in chin kiaⁿ.#16.8 Ū ê chhau-pún kàu tē-poeh chat chiū kiat-sok. Ū chi̍t ê chhau-pún ke kiat-gú I; ū chi̍t-kóa chhau-pún ke kiat-gú I kap II.

KIAT-GÚ I

9Hiah-ê hū-jîn-lâng khì Pí-tek kap i ê pêng-iú hia, tùi in kán-tan pò-kò só͘ thiaⁿ--kìⁿ lóng-chóng ê tāi-chì. Chiah-ê tāi-chì í-āu, Iâ-so͘ pún-sin chhe-khián I ê bûn-tô͘, tùi tang kàu sai soan-iông sîn-sèng, put-bia̍t, hō͘ lâng tit-tio̍h éng-oán chín-kiù ê sìn-sit. Amen!

KIAT-GÚ II

Iâ-so͘ tùi Boa̍t-tāi-lia̍p ê Má-lī-a Hián-hiān

(Thài 28.9-10; Iok 20.11-18)

9Lé-pài-ji̍t thàu-chá, Iâ-so͘ koh-oa̍h liáu-āu, tāi-seng tùi Boa̍t-tāi-lia̍p ê Má-lī-a hián-hiān; Iâ-so͘ bat kā i kóaⁿ-chhut chhit ê kúi. 10I khì kā hiah-ê tè Iâ-so͘ ê lâng pò-kò, hit-sî in teh ai-siong thî-khàu. 11In thiaⁿ-kìⁿ Iâ-so͘ koh-oa̍h koh ū hō͘ Má-lī-a khòaⁿ--tio̍h, in iáu m̄ sìn.

Iâ-so͘ tùi Nn̄g Ê Bûn-tô͘ Hián-hiān

(Lō͘ 24.13-35)

12Chiah-ê tāi-chì í-āu, ū nn̄g ê bûn-tô͘ kiâⁿ-lō͘ beh khì chng-kha ê sî, Iâ-so͘ ēng pa̍t-khoán ê hêng-siōng tùi in hián-hiān. 13In tńg-khì kā kî-tha ê lâng pò-kò, m̄-kú hiah-ê lâng lóng m̄ sìn.

Iâ-so͘ tùi Cha̍p-it Ê Sù-tô͘ Hián-hiān

(Thài 28.16-20; Lō͘ 24.36-49; Iok 20.19-23; Tô͘ 1.6-8)

14Āu-lâi, cha̍p-it ê sù-tô͘ teh chia̍h-pn̄g ê sî, Iâ-so͘ tùi in hián-hiān. I chek-pī in m̄ sìn kap ngī-sim, in-ūi in bô sìn khòaⁿ-tio̍h Iâ-so͘ koh-oa̍h ê lâng kā in kóng ê ōe. 15Iâ-so͘ kā in kóng, “Lín tio̍h khì choân sè-kài tùi só͘-ū pī-chō--ê soan-iông hok-im. 16Sìn lâi niá-siū sóe-lé ê lâng ōe tit-tio̍h kiù; m̄-sìn ê lâng ōe siū tēng-chōe. 17Sìn ê lâng ōe kiâⁿ ē-bīn chiah-ê sîn-jiah: In ōe hōng góa ê miâ kóaⁿ-kúi; in ōe kóng sin ê gú-giân; 18in lia̍h chôa á-sī lim to̍k mā bōe siū siong-hāi; in kā pīⁿ-lâng hōaⁿ-chhiú, pīⁿ-lâng ōe tit-tio̍h i-hó.”

Iâ-so͘ Chiūⁿ-thiⁿ

(Lō͘ 24.50-53; Tô͘ 1.9-11)

19Chú Iâ-so͘ kā in kóng chiah-ê ōe liáu-āu siū chiap chiūⁿ-thiⁿ, chē tī Siōng-tè ê chiàⁿ-pêng. 20Bûn-tô͘ chhut-khì ta̍k só͘-chāi thoân hok-im. Chú kap in tâng-kang, ēng in só͘ kiâⁿ ê sîn-jiah chèng-si̍t in só͘ thoân ê tō-lí.

Currently Selected:

Má-khó Hok-im 16: TTVR

Highlight

Copy