Má-khó Hok-im 12

Pháiⁿ Tiān-lông ê Phì-jū

(Thài 21.33-46; Lō͘ 20.9-19)

1Iâ-so͘ koh ēng phì-jū tùi in kóng, “Ū chi̍t ê lâng khai-khún chi̍t khu phû-tô-hn̂g, sì-bīn ûi lî-pa, ó͘ chi̍t ê chiú-khut, khí chi̍t ê siú-bōng-tâi, chiong chit-khu hn̂g cho͘ hō͘ tiān-lông, āu-lâi chhut-gōa khì chin hn̄g ê só͘-chāi. 2Siu-sêng ê sî kàu, i chhe chi̍t ê po̍k-jîn khì tiān-lông hia, beh kā in siu hn̂g--ni̍h ê ké-chí. 3In lia̍h hit-ê po̍k-jîn, kā i phah, kóaⁿ i khang-chhiú tò--khì. 4I koh chhe lēng-gōa chi̍t ê po̍k-jîn khì, in siong-hāi i ê thâu-khak, kā i bú-jio̍k. 5Āu-lâi, hn̂g-chú koh chhe pa̍t-ê po̍k-jîn khì, in kā i thâi-sí. I koh chhe chin chōe po̍k-jîn khì, ū-ê hō͘ in phah, ū-ê hō͘ in thâi-sí. 6I iáu ū chi̍t ê, chiū-sī só͘ thiàⁿ ê kiáⁿ, chòe-āu mā chhe i khì tiān-lông hia, siūⁿ-kóng ‘In ōe chun-tiōng góa ê kiáⁿ’. 7M̄-kú hiah-ê tiān-lông chham-siông kóng, ‘Chit-ê sī i ê kè-sêng-jîn. Lâi, lán lâi kā thâi-sí, i ê châi-sán chiū pìⁿ-chòe lán ê.’ 8In chiū kā i lia̍h--khí-lâi, kā i thâi-sí, kā hiat chhut-khì phû-tô-hn̂g ê gōa-bīn.

9“Án-ni, phû-tô-hn̂g ê chú-lâng ōe án-chóaⁿ chhú-lí? I ōe lâi châu-bia̍t chiah-ê tiān-lông, chiong phû-tô-hn̂g cho͘ hō͘ pa̍t-lâng. 10Lín kiám m̄-bat tha̍k-tio̍h chit-tōaⁿ Sèng-keng ê kì-chài:

Khí-chhù sai-hū só͘ khì-sak ê chio̍h

í-keng chiâⁿ-chòe siōng tiōng-iàu ê ki-chio̍h.

11Che sī Chú ê chok-ûi,

tùi lán lâi khòaⁿ si̍t-chāi chin kî-biāu.”

12Hiah-ê Iû-thài-lâng ê léng-tō-chiá chai-iáⁿ Iâ-so͘ kóng chit-ê phì-jū sī teh chí in, chiū siūⁿ-beh kā I lia̍h, m̄-kú kiaⁿ kûn-chiòng, chiū lī-khui.

La̍p-sè ê Būn-tôe

(Thài 22.15-22; Lō͘ 20.20-26)

13In chhe kúi-nā ê Hoat-lī-sài-phài ê lâng kap Hi-lu̍t-tóng ê lâng khì Iâ-so͘ hia, beh chhē I ê ōe-pìⁿ thang kā I hām-hāi. 14In chiū khì, tùi Iâ-so͘ kóng, “Lāu-su, goán chai lí chin sêng-si̍t, bô-lūn sím-mi̍h khoán lâng, lí tùi-thāi in lóng bô chha-pia̍t, lí chí-ū tiong-si̍t kà-sī Siōng-tè ê tō-lí. Án-ni, la̍p-sè hō͘ Lô-má hông-tè Khái-sat ū ha̍h Lu̍t-hoat bô? Goán tio̍h la̍p-sè á m̄-bián?”

15Iâ-so͘ khòaⁿ-chhut in ê khúi-kè, chiū tùi in kóng, “Sī-án-chóaⁿ beh kā góa chhì-thàm? The̍h chi̍t ê gûn-pè hō͘ góa khòaⁿ-bāi leh.”

16In chiū the̍h chi̍t ê gûn-pè lâi. Iâ-so͘ mn̄g in, “Che sī sím-mi̍h-lâng ê siōng, sím-mi̍h-lâng ê jī-hō?”

In ìn kóng, “Khái-sat ê.”

17Iâ-so͘ kā in kóng, “Khái-sat ê mi̍h hō͘ Khái-sat; Siōng-tè ê mi̍h hō͘ Siōng-tè.”

In tùi Iâ-so͘ kám-kak chin tio̍h-kiaⁿ.

Sí-lâng Koh-oa̍h ê Būn-tôe

(Thài 22.23-33; Lō͘ 20.27-40)

18Ū chi̍t-kóa chú-tiuⁿ bô koh-oa̍h ê Sat-to͘-kai-phài ê lâng lâi Iâ-so͘ hia, mn̄g I kóng, 19“Lāu-su, Mô͘-se só͘ siá ê Lu̍t-hoat kā goán kóng, ‘Nā ū lâng i ê hiaⁿ-ko sí--khì, pàng bó͘ bô pàng kiáⁿ, i choh sió-tī--ê tio̍h chhōa hiaⁿ-só thòe hiaⁿ-ko thoân-chong-chiap-tāi.’ 20Í-chêng bat ū chhit ê hiaⁿ-tī, siōng-tōa--ê chhōa-bó͘, bô lâu hō͘-tāi chiū sí--khì. 21Tē-jī--ê chhōa i ê hiaⁿ-só, mā bô lâu hō͘-tāi chiū sí--khì. Tē-saⁿ--ê mā siâng-khoán. 22Chit chhit ê hiaⁿ-tī lóng bô lâu hō͘-tāi, chòe-āu chit-ê hū-jîn-lâng mā sí--khì. 23Koh-oa̍h ê sî, in lóng koh-oa̍h, án-ni chit-ê hū-jîn-lâng sī tó chi̍t ê lâng ê bó͘? In-ūi chit chhit ê lóng bat chhōa i chòe bó͘.”

24Iâ-so͘ kā in kóng, “Lín m̄-tio̍h, in-ūi lín m̄ bat Sèng-keng, mā m̄ bat Siōng-tè ê koân-lêng. 25In tùi sí-lâng tiong koh-oa̍h ê sî, kap thiⁿ-téng ê thiⁿ-sài siâng-khoán, bô kè bô chhōa. 26Koan-hē sí-lâng koh-oa̍h, lín kiám m̄-bat tha̍k-tio̍h Mô͘-se ê chheh ‘Teh to̍h ê chhì-phè’ hit-tōaⁿ? Siōng-tè tùi Mô͘-se kóng, ‘Góa sī A-pek-la-hán ê Siōng-tè, Í-sat ê Siōng-tè, Ngá-kok ê Siōng-tè.’ 27I m̄-sī sí-lâng ê Siōng-tè, sī oa̍h-lâng ê Siōng-tè. Lín oân-choân m̄-tio̍h!”

Tē-it Tiōng-iàu ê Kài-bēng

(Thài 22.34-40; Lō͘ 10.25-28)

28Ū chi̍t ê keng-ha̍k-kàu-su lâi, thiaⁿ-tio̍h Iâ-so͘ kap Sat-to͘-kai-phài ê lâng teh piān-lūn, khòaⁿ Iâ-so͘ ìn liáu chin tio̍h, chiū mn̄g I, “Só͘-ū ê kài-bēng tiong, tó chi̍t tiâu tē-it tiōng-iàu?”

29Iâ-so͘ ìn kóng, “Tē-it sī: Í-sek-lia̍t ah, lín tio̍h thiaⁿ! Chú — lán ê Siōng-tè sī to̍k-it ê Chú. 30Lí tio̍h choân-sim, choân-chêng, choân-ì, choân-le̍k thiàⁿ Chú — lí ê Siōng-tè. 31Tē-jī sī: Tio̍h thiàⁿ chhù-piⁿ chhin-chhiūⁿ thiàⁿ ka-kī. Bô pa̍t-ê kài-bēng pí chiah-ê koh-khah tiōng-iàu.”

32Hit-ê keng-ha̍k-kàu-su tùi Iâ-so͘ kóng, “Lāu-su, lí só͘ kóng--ê chin tio̍h. Lí kóng Siōng-tè chí-ū chi̍t ūi, I í-gōa bô pa̍t-ê; 33koh kóng tio̍h ēng choân-sim, choân-tì, choân-le̍k thiàⁿ Siōng-tè, koh thiàⁿ chhù-piⁿ chhin-chhiūⁿ thiàⁿ ka-kī sī pí hiàn lóng-chóng ê sio-hòa-chè kap chè-mi̍h koh-khah iàu-kín.”

34Iâ-so͘ khòaⁿ-tio̍h i ìn liáu chin ū tì-hūi, chiū kā i kóng, “Lí lī Siōng-tè-kok bô hn̄g.”

Hit-sî í-āu, bô lâng káⁿ koh mn̄g Iâ-so͘ sím-mi̍h būn-tôe.

Koan-hē Tāi-pi̍t Hō͘-tāi ê Būn-tôe

(Thài 22.41-46; Lō͘ 20.41-44)

35Iâ-so͘ tī Sèng-tiān teh kà-sī ê sî, mn̄g kóng, “Keng-ha̍k-kàu-su ná ōe kóng Ki-tok sī Tāi-pi̍t ê hō͘-tāi? 36Tāi-pi̍t pún-sin siū Sèng Sîn kám-tōng kóng:

Chú kā góa ê Chú kóng:

Lí chē góa ê chiàⁿ-pêng,

kàu góa hō͘ lí ê tùi-te̍k khut-ho̍k tī lí kha-ē.

37 Tāi-pi̍t pún-sin chheng-ho͘ Ki-tok chòe ‘Chú’, Ki-tok ná ōe sī Tāi-pi̍t ê hō͘-tāi?”

Tî-hông Keng-ha̍k-kàu-su

(Thài 23.1-36; Lō͘ 20.45-47)

Ū chi̍t tōa-kûn lâng ài thiaⁿ Iâ-so͘ ê kà-sī. 38Iâ-so͘ kà-sī kóng, “Tio̍h tî-hông keng-ha̍k-kàu-su. In ài chhēng tn̂g-saⁿ kiâⁿ-lâi-kiâⁿ-khì, tī chhī-tiûⁿ-kháu hō͘ lâng chhéng-an, 39tī hōe-tn̂g chē koân-ūi, tī iàn-hōe chē tōa-ūi. 40In chhim-chiàm kóaⁿ-hū ê ke-hé, thiau-kò͘-ì kî-tó chin tn̂g. In ōe siū koh-khah tāng ê hêng-hoa̍t.”

Kóaⁿ-hū ê Hōng-hiàn

(Lō͘ 21.1-4)

41Iâ-so͘ chē tī Sèng-tiān hōng-hiàn-kūi ê tùi-bīn teh khòaⁿ lâng hiàn chîⁿ lo̍h--khì. Chin chōe hó-gia̍h-lâng hiàn chin chōe chîⁿ. 42Ū chi̍t ê sàn-chhiah ê kóaⁿ-hū lâi, hiàn nn̄g ê tâng-chîⁿ-á, chiū-sī chi̍t kak gûn. 43Iâ-so͘ kiò bûn-tô͘ lâi, kā in kóng, “Góa si̍t-chāi kā lín kóng, chit-ê sàn-chhiah ê kóaⁿ-hū hiàn ji̍p-khì hōng-hiàn-kūi--ê, pí chèng-lâng hiàn--ê koh-khah chōe. 44In-ūi in lóng sī hiàn ēng chhun--ê, m̄-kú chit-ê kóaⁿ-hū sui-jiân chin sàn-chhiah, iáu-kú the̍h só͘-ū--ê, chiū-sī choân-pō͘ ê seng-oa̍h-hùi lóng hiàn--lo̍h-khì.”

Currently Selected:

Má-khó Hok-im 12: TTVR

Highlight

Copy