पठालोबितामन 2
2
पवितर आत्मा चो ऐतोर
1जिदलदाय पेन्तीकुस चो दिन ईली, तेबे हुनमन सपाय गोटक जगा रूंड़ा रवत।
2आउर उधापड़े बादरी ले बड़े लेहरा धुका चो असन गरजन चो शब्द होली, आउर हुनचो ले पुईतराय घर जोन थाने हुनमन बोसुन रवत, गुंजुन गेली।
3आउर हुनमन के आईग चो असन जीबमन फाटलो असन दका दीली आउर हुनमन ले सपाय चो उपरे ऐऊन ठेबली।
4हुनमन सपाय पवितर आत्मा ले भरून गेला, आउर जसन परकार आत्मा हुनमन के बोलतोर सामरत दीली, हुनमन दुसर-दुसर भाषा बोलुक मुरयाला।
5बादरी चो खाले चो सपाय जातिमन ले भक्त यहूदी यरूशलेम ने रते रवत।
6जिदलदाय ऐ शब्द होली तेबे भीड़ लगुन गेली आउर लोग घबराऊन गेला, कसनबल्लोने हरकोनी के ऐई ची सुना देते रये, कि ऐ मोचीई भाषा ने बोले सोत।
7हुनमन सपाय भकवा आउर अकचकित होऊन भाती बोलुक मुरयाला, “दका, ऐ मन जोन बले सोत काय सपाय गलीली नुआत?”
8तेबे फेर केंव आमीमन ले हरकोनी आपलो-आपलो जनम भुईं चो भाषा सुनु से?
9आमी जोन पारथी आउर मेदी आउर एलामी आउर मेसोपोटामिया आउर यहूदिया आउर कप्पदुकिया आउर पुन्तुस आउर आसिया,
10आउर फ्रुगिया आउर पंफूलिया आउर मिस्र आउर लीबिया देश जोन कुरेने चो लगे-लगे आसे, ऐ सपाय देशमन चो रतो बितामन आउर रोमि परवासी,
11“बल्लोने यहूदी आउर यहूदी दल धारन करतो बितामन, क्रेती आउर अरबी बले आत, मान्तर आपलो-आपलो भाषा ने हुनमन ले माहापुरू चो बड़े-बड़े काममन चो गोठ बात सुनु आत।”
12आउर हुनमन सपाय भकवा होला आउर घबराऊन भाती, गोटक दुसर ले बोलुक मुरयाला, “ऐ काय होयसे?”
13मान्तर दुसरमन मजाक करून बल्ला, “हुनमन तो नवा मंद चो निशा ने मतभुल होला सोत।”
पिन्तेकुस्त चो दिने पतरस चो भाषण
14तेबे पतरस हुन गियारा झान चो संगे उबा होलो आउर जोर ले बोलुक मुरयालो, “हे यहूदीमन आउर हे यरूशलेम चो सपाय रतो बितामन, ऐ जाना, आउर कान लगाऊन भाती मोचो गोठमन सुना।”
15जसन तुमी समजेसास, ऐ लोग निशा ने नाई, कसनबल्लोने ऐबे तो पाहरक ची दिन चेगली से।
16मान्तर ऐ हुन गोठ आय, जोन योएल अगम गिआनी चो बाटले बोला जाऊ रली:
17माहापुरू बोलु आय, कि आखरी दिनमन ने असन होये दे कि
मय आपलो आत्मा सपाय माने उपरे रिकायेंदे, आउर तुमचो बेटामन आउर
तुमचो बेटीमन अगम गोठ करदे,
आउर तुमचो जुआन दरशन दकदे,
आउर तुमचो डोकरामन सपना दकदे।
18मान्तर मय आपलो दासमन आउर आपलो दासीमन थाने बले हुन दिनमन
ने आपलो आत्मा ले रिकायें दे, आउर हुनमन अगम गोठ करदे।
19आउर मय उपरे बादरी ने भयंकर काम
आउर खाले धरतनी ने चिना, बल्लोने
लऊ आउर आईग आउर कुमरा चो बादरी दकायेंदे।
20परबु चो माहान आउर तेज बिती दिन चो ऐतोर पयले
बेर अंधार
आउर जोन लऊ असन होऊन जायदे।
21आउर जोन कोनी परबु चो नाव धरेदे, हुन मुक्ति पायदे।
22“हे इस्राएलीमन, ऐ गोठमन सुना ईशु नासरी गोटक माने रलो जेचो माहापुरू चो बाटले होतोर सबुत हुन सामरत चो काममन आउर अकचकित चो काममन आउर चिनामन ले उजागर आसे, जोन माहापुरू तुमचो मंजी हुनचो बाटले करून दकालो जेके तुमी खुदे ची जानेसास।”
23हुनी ईशु के, जोन माहापुरू चो ठेबालोर उआट आउर पयले चो गिआन चो अनुसार धराया गेलो, तुमी अधरमीमन चो हाथ ले कुरूस थाने चेगाऊन भाती मारून दिलास।
24मान्तर हुनी के माहापुरू मरना चो बान्दनमन ले छंड़ाऊन भाती जिआ लो; कसनबल्लोने ऐ नी होतो लायक रली कि हुन हुनचो बस ने रतो।
25कसनबल्लोने दाऊद हुनचो बारे ने बलेसे,
“मय परबु के हरमेशा आपलो पुरे दकते रले
कसनबल्लोने हुन मोचो उजा पाट आसे, बल्ले मय डोलुन नी जायें।
26ऐई कारन मोचो मन हरिक होली, आउर मोचो जिब मतभुल होली;
मान्तर मोचो देंह बले आशा ने बनुन रयदे।
27कसनबल्लोने तुय मोचो जीव के अधलोक ने नी छांड से;
आउर ना आपलो पवितर लोग के कुऊक देये दे।
28तुय मोके जीवना चो बाट सांगली सीस;
तुय मोके आपलो दरशन चो कारन हरिक ले भरून दे से।”
29“हे भाईमन, मय कुलपती दाऊद चो बारे ने तुमनमन ले साहास चो संगे बोलुक सकें कि हुन तो मरून गेलो आउर माटी दिआय बले गेलो आउर हुनचो कबर आजी ले आमचो थाने हाजिर आसे।”
30हुन अगम गिआनी रलो, हुन जानते रलो कि माहापुरू मोचो ले किरिया खादलो से कि मय तुचो बंश ले गोटक माने के तुचो सिंघासन थाने बसायें दे;
31हुन होतो बिती गोठ के पयले ले दकुन भाती मसीह चो जीव उठतोर बारे ने अगम गोठ करलो
कि ना तो हुनचो जीव अधलोक ने छांडा गेली आउर ना हुनचो देंह कुअली।
32ऐई ईशु के माहापुरू जिआ लो, जेचो आमी सपाय गोहई आंसु।
33असने परकार माहापुरू चो उजा हाथ ले सपाय ले बड़े पद पाऊन भाती, आउर बुआ ले हुन पवितर आत्मा पाऊन भाती जेचो बायदा करा जाऊ रली, हुन ऐ रिकाऊन दिलो से जोन के तुमी दकेसास आउर सुनेसास।
34कसनबल्लोने दाऊद तो सरग थाने नी चेगलो; मान्तर हुन खुद बोलु आय,
परबु मोचो परबु ले बल्लो, मोचो उजा घाई बस,
35जिदलदाय ले कि मय तुचो बयरीमन के तुचो पाँयमन खाले चो चौंकी नी करून देंयें।
36“आउर अदायं इस्राएल चो सपाय घरमन पक्का रूप ले जानोत कि माहापुरू हुनी ईशु के जेके तुमी कुरूस उपरे चेगालासास, परबु बले ठेबालो आउर मसीह बले।”
37तेबे सुनतो बितामन चो मन भेदुन गेली, आउर हुनमन पतरस आउर बाकी पठालोबितामन के पचारूक मुरयाला, “हे भाईमन, आमी काय करवां?”
38पतरस हुनमन के बल्लो, “मन फिरावा, आउर तुमनमन ले हरकोनी आपलो-आपलो पापमन चो छमा काजे ईशु मसीह चो नाव ले डूबन धरा; तेबे तुमी पवितर आत्मा चो दान पाआसे।
39“कसनबल्लोने ऐ बायदा तुमी, आउर तुमचो पिलामन, आउर हुन सपाय लापी-लापी चो लोगमन काजे बले आय जोनमन के परबु आमचो माहापुरू आपलो लगे हाग देये दे।”
40हुन खुबे आउर गोठमन ले बले गोहई देऊन भाती समजालो कि आपन खुद के ऐ टेड़गा जाति ले बाचावां।
41आउर जोनमन हुनचो बचन के गरहन करला हुनमन डूबन धरला; आउर हुनी दिने तीन हजार मानेमन लग-भग हुनमन ने मिसुन गेला।
बिश्वासीमन चो संगत जीवना
42आउर हुनमन पठालोबितामन ले सिक्या पाऊक, आउर संगत संगाऊक, आउर रोटी टुटाऊक, आउर पारथना करतो ने मतभुल रवत।
43आउर सपाय लोगमन उपरे भय छांई होली, आउर खुबे असन अदभूत काम आउर चिना पठालोबितामन चो बाटले उजागर होते रये।
44आउर सपाय बिश्वास करतो बिता रूंड़ा रते रवत, आउर हुनमन चो सपाय तीजमन मांदी ने रली।
45हुनमन आपलो-आपलो धनमाल आउर समान बिकुन-बिकुन भाती जसन जेचो जरूरत होते रली बाटते रवत।
46हुनमन रोजे दिना गोटक मन होऊन भाती मंदिर ने रूंड़ा होते रवत, आउर घरे-घरे रोटी टुटाते-टुटाते हरिक आउर मन चो सोज ले भात खाते रवत,
47आउर माहापुरू चो स्तुति करते रवत, आउर सपाय लोग हुनमन ले हरिक रवत; आउर जोन मुक्ति पाते रवत, हुनमन के परबु रोजे दिना हुनमन ने मिसान देते रये।
Currently Selected:
पठालोबितामन 2: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
