लुका 4

येसुन पारख

(मत्ती 4:1-11; मरकुस 1:12-13)

1ओवतेन येसु पवित्र आत्मासी भोरायलू, यरदन नोंदीमा गोथू पोछु आव्यु; एने चावीस दाहळा तोक आत्मान सिकाळने पोरसी बोयळामा फिरतू रोयू; 2एने भुतडू तेरी परीक्षा कोरतू रोयू तीनु दाहळामा चू काहीन नी खादु, एने जेतार चे दाहळा पुरा होय गोया, ती तीनाक भुक लागी. 3तेत्यार भुतडू तीना काजे कोयू, “ओगर तु परमेश्वरोन पुऱ्यु छे, ती इना दोगळा काजे कोय, कि रुटू बोन जा.” 4येसु तीनाक जोवाब आप्यू, “लिखलो छे, माणूस निस्तु रुटासी जीवतू नि रोये.” 5तेत्यार भुतडू तीनाक लीगोयू एने तीना काजे थुलिक वारमा जोगोन आखा राज देखाळ्यू, 6एने भुतडू तीना काजे कोयू, “मे यो आखो होक एने इंदरो महिमा तुसेक आपीस, काहाकि चो मेसेक आपायलो छे एने मेसेक गोवे तीना काजे आप देतलू छे. 7इनान कोरता हिमी तू मेसेक नोमोन कोरे, ती यो आखो तारो होय जासे.” 8येसु तीनाक जोवाब आप्यू लिखलो छे, “तु प्रभू आपना परमेश्वर काजे नोमोन कोर; एने निस्तू तेरी भोक्ती कोर.” 9तेत्यार चू तीनाक यरुशलेममा लीजायीन मंदीरोन छिगा पोर उबू कोऱ्यु, एने तीना काजे कोयू, “अगर तू परमेश्वरोन पुऱ्यु छे, ती खुदो काजे न्या गोथू नेचू पाळ दे.” 10काहाकि लिखलो छे “चू तारे बारामा आपना सोरगो दूतो काजे आग्या आपसे, कि चे तारी राखवावी कोरे,” 11एने “चे तुसेक हातो पोर झेल लेसे, ओसो नि होये कि तारा पायो काजे दोगळान ठेस लागे.” 12येसु तीना काजे जोवाब आप्यू, “यो बी कोयलो छे ‘तू प्रभू आपना परमेश्वरोन पारख मा कोरे.’” 13जेतार भुतडू आखी परीक्षा कोर लेदू, तेत्यार थुलिक टेमोन कोरता तेरेनचा गोथू जात रोयू.

गलीलमा येसुन सेवा

(मत्ती 4:12-17; मरकुस 1:14-15)

14ओवते येसु आत्मान ताकतसी भोरायलु गलीलमा पोछु आव्यु, एने तेरी वाते आस-पासोन आखा देसमा फेल गोयी. 15चु तिंदरा प्रार्थना घोरोमा सिकाळतू रोयू, एने आखा तेरी महिमा कोरता होता.

नासरेतमा येसुन इनकार

(मत्ती 13:53-58; मरकुस 6:1-6)

16ओवतेन चू नासरेथ गावमा आव्यु, जा मोटू होयलू होतु; एने आपनी रितीन अनसारे शब्बाथोन दाहळे प्रार्थना घोरमा जायीन भोननेन कोरता उबरोयू. 17यशयाह भविष्य कोरतान किताब तीनाक आप देदा, एने चु किताब उगाळीन, चू ची जागा निकाव्यू जा यो लिखलो होतो

18“प्रभून आत्मा मार पोर छे

इनान कोरता कि चू गरीब काजे वारली खोबर

सोमवाळनेन कोरता मारू अभिषेक कोरलु छे,

एने मेसेक इनान कोरता मुकेल्लू छे कि

बोंदी वावा काजे छुटकारान

एने आंदवा काजे नोजोर

मेवाळणेन वारली खोबरोन प्रचार कोरो एने

छेंदायला काजे छुळावू,

19एने प्रभून खुश रोयनेन सालोन प्रचार कोरो.”

20तेत्यार येसु किताब बोंद कोरीन सेवकोन हातोमा आप देदू एने बोस गोयू; एने प्रार्थना घोरोन आखा माणसोन डूवा तीना पोर लागला होता. 21तेत्यार चू तीनुक कोयने बाज गोयू, “आजुत यो लिखलो पवित्र शास्त्र तुमरे सामने पुरो होयलो छे.” 22आखा तीनाक वारू कोया, एने जी मोंगोन वाते तेरे मुयोम गोथी निकोवती होती, तेरेसी वाहाराय गोया; एने कोयने बाज गोया, “काय यु युसूफोन पुऱ्यु नि होय?” 23येसु तीनु काजे कोयू, “तुमु मारे पोर जी वात जरूर कोयसू कि ‘हे डाक्टर, आपना खुदो काजे वारू कोर, यो काय आमु सोमवला छे कि कफर्णहुममा कोरायलो छे, तीनाक न्या आपना देसोमा बी कोर.’” 24एने चू कोयू, “मे तुमु काजे छाचलीन कोयने बाज रोयू कि लोकेत भविष्य कोरता काजे आपना देसमा मान-संमान नी जोळतेलो.” 25मे तुमु काजे छाचलीन कोयो कि एलियान दाहळामा जेतार साळे तीन साल तोक सोरग बोंद रोयो, न्या तोक कि आखा देसोमा मोटलू काव पोळ्यु, ती इस्राईल लोकेत रोंडायला बायरा होता. 26बाकीन एलिया तिंदरे मायीन कुदानचा नि मूकल्यु, निस्तू सिदोनोन सारफतमा एक रोंडायलीनचा. 27एने एलीशा भविष्य कोरतान टेमे इस्राईलमा घोना सोवटा कुळावा होता, बाकीन सिरीया वावू नामान काजे छुळीन तिंदरेमा गोथू कुदाक चुखो नी कोरायू. 28ये वाते सोमवतात जोतरा प्रार्थना घोरोमा होता, आखा रीसवाय गोया, 29एने उठीन तीनाक सोहोरोन बारथे निकाव्या, एने जीना बोयळा पोर तिंदरो सोहोर वसलो होतो, धोळे लीगोया कि तीनाक चा गोथू नेचू पाळ देजे. 30बाकीन येसु तिंदरेमा गोथू निकवीन जात रोयू.

भुंडली आत्माक निकावनो

(मरकुस 1:21-28)

31ओवतेन चू गलीलोन कफर्णहुम सोहोरोमा गोयू; एने शब्बाथोन दाहळे माणसो काजे भोनने आपतू होतु. 32चे तेरा सिकापोन सी वाहाराय गोया काहाकि तेरो वचन होकोसी होतो. 33प्रार्थना घोरोमा एक माणूस होतु, जीनामा भुंडली आत्मा होती चु उचा ओवाजमा आयळ्यु, 34“हे येसु नासरी, मेसेक तारसी काय काम?, काय तू आमुक नाश कोरणे आवलु छे? मे तुसेक जानतलु तू कुन छे? तु परमेश्वरोन चुखला जोन छे.” 35येसु तीनाक धोमकावीन कोयू, “हुगरो, एने हीनामा गोथू निकवी जा” तेत्यार भुंडली आत्मा तीनाक इचमा आसटीन बिना जोखम होयते तीनामा गोथी निकवी गोयी. 36इनापोरसी आखा वाहाराय गोया, एने चे आपसमा वाते कोरणे बाज गोया, “यो कोसो वचन छे? काहाकि चु होक एने ताकत पुठी भुंडली आत्मा काजे आग्या आपतलु छे, एने ची निकवी जातली.” 37इना रितीसी चारू धोळे आखे जागे तेरी वात होयने बाज गोयी.

पतरसोन सासूस काजे एने दिसरा मांदला काजे वारू करनो

(मत्ती 8:14-17; मरकुस 1:29-34)

38चु प्रार्थना घोरोमा गोथू उठीन शिमोनोन घोरमा गोयू शिमोनोन सासू काजे सेरी चोळ रोयो होतो, एने चे तीनिन कोरता येसु काजे विनता कोऱ्या. 39चू तेरे साते उबरोयीन सेरी काजे धोमकाव्यू एने सेरी उतरी गोयो, एने ची तेत्यारुत उठीन तिंदरा सेवा-चाकरी कोरणे बाज गोयी. 40दाहळू डूबणेन टेमे, जिंदरे-जिंदरेनचा माणसे होर एक भातीन बिमारीमा पोड रोया होता, चे आखा तीनुक तेरेनचा लीन लाव्या, एने चू एक-एक पोर हात मेकीन तीनुक वारू कोऱ्यु. 41एने भुंडली आत्मा बी आयळती एने यो कोयती जायीन कि, “तु परमेश्वरोन पुऱ्यु छे,” लोकेत जोनामा गोथी नीकवी गोयी बाकीन चू तीनुक धोमकावतू एने बुलणे नि देतु होतु, काहाकि ची उवेखती होती कि चू मसिह होतु.

गलीलमा प्रचार

(मरकुस 1:35-39)

42जेतार दाहळू उग्यु ती चू निकवीन एक सुनले जागे गोयू, एने गोरदीन गोरदी तीनाक हेरता जायीन तेरेनचा आव्या, एने तीनाक रुकने बाज गोया कि चू तिंदरेचा गोथू नि जाय. 43बाकीन चू तीनुक कोयू, “मेसेक दिसरा सोहोरोमा बी परमेश्वरोन राजोन वारली खोबर सोमवाळने जोरुरी छे काहाकि मे इनान कोरता आवलु छे.” 44एने चू गलीलोन प्रार्थना घोरमा प्रचार कोरतू रोयू.

Currently Selected:

लुका 4: BFBNT

Highlight

Copy