लुका 3

1तिबिरियुस केसरोन राजोन पोंदरावा सालोमा जेतार पुन्तियुस पिलात यहुदियान सुबेदार होतु, एने गलीलमा हेरोद, ईतुरीया एने त्राखोनीती मा तेरु भाश फिलीप, एने अबिलेनेमा लुसनीयान, चौथाईन राजा होतु, 2एने जेतार हन्ना एने कैफा मोटला या पुजारा होता, तिने टेमे परमेश्वरोन वचन बोयळामा जखऱ्यान पुऱ्यु योहानोनचा पुग्यो. 3चू यरदन नोंदीन आळी-छेळीन आखा देसोमा जायीन, पापोन माफीन कोरता मोन फिरावनेन बाप्तिस्मान प्रचार कोरणे बाज गोयू. 4जोसो यशयाह भविष्य कोरतान कोयला वचनोन किताबमा लिखलो छे, “बोयळामा एक आयळने वावान बुल समवायने बाज रोयी कि, ‘प्रभून वाट तीयार कोरु, तेरी वाट सुदी बोनावू. 5होर एक खुबारा भोराय जासे, एने होर एक बोयळा एने टेकळा नेचा कोराय जासे; एने जे वाकला छे सुदा, एने जे उचा नेचा छे चे चारखुट वाटे बोनसे. 6एने होर एक माणूस परमेश्वरोन छुटकारा काजे देखसे.’”

7जो गोरदीन गोरदी तीना जुव बाप्तिस्मा लेणे कोरीन निकवीन आवती होती, तीनु काजे चू कोयतू होतु, “हे घोळसान पीला, तुमुक कुन जोताळ देदू कि आवने वावा रीसोसी ढासू.” 8आखरी मोन फिरावनेन लायकीन फोव लावू, एने आपना-आपना मोनोमा यो मा विचार कोरु कि आमरू बास अब्राहाम छे; काहाकि मे तुमु काजे कोयो कि “परमेश्वर इनू दोगोळासी आब्राहामोन कोरीन पुऱ्या पोयदा कोर सोकतेलू. 9हीमी कुराळो झाडोन थुळोमा मेकाय रोयो, इनान कोरता जे-जे झाड वारलो फोवे नि लावतलो, चो काटायीन आगठामा नाखाय जातलो छे.” 10तेत्यार माणसे तीना काजे पुछ्या, “ती आमु काय कोरजे?” 11चू तीनु काजे जोवाब आप्यू, “जीना जुव दुय डोगला होय, चू तेरे पुठी जिना जुव नि होय वाट लेये एने जीना जुव खाणो छे, चू बी ओसुत कोरे.” 12फावू लेनेवावा बी बाप्तिस्मा लेणे आव्या, एने तीनाक पूछया, “हे गुरु, आमु काय कोरजे?” 13चू तीनु काजे कोयू, “जो तुमरेन कोरता ठेराव गोयलो छे, तीना गोथो जादा मा लेवू.” 14सिपायळाबी तीना काजे यो पुछ्या, “आमु काय कोरजे?” चू तीनु काजे कोयू, “कुदा पोर जुलूम नी कोरजू एने नी झुटू गुणू लागाळजू, एने तुमरा पोगार पोर खुश रोयजू.” 15जेतार माणसे आस लागाळला होता, एने आखा आपना-आपना मोनोमा योहानोन बारामा विचार कोर रोया होता कि काय युत मसिह ते नि होय, 16तेत्यार योहान तीनु आखा काजे कोयू, मे ते तुमुक पाणीसी बाप्तिस्मा आपतलु, बाकीन चु आवने वावू छे जू मारे गोथू ताकत वावू छे; मे ते तेरे लायक बी नी होय कि तेरा खासळान बोंद छुळ सोको चू तुमुक पवित्र आत्मान एने आगठान बाप्तिस्मा आपसे. 17तेरो सुपळो, तेरा हातोमा छे; एने चू आपना खोवाक वारला रितीसी चापळो कोरसे; एने गोहू काजे आपना कुठामा एखठा कोरसे; बाकीन चारा काजे तिना आगठामा जो उलाये नी बाव देसे. 18आखरी चू लोकेत शिक्षा आपी आपीन माणसो काजे वारली खोबर सोमवाळतू रोयू. 19बाकीन जेतार चू चौथाईन देसोन राजा हेरोद काजे तेरु भाश फिलीपोन लाडी हेरोदीयान बारामा एने आखा भुंडला कामोन बारामा जो चू कोरलु होतु, गुणू लागाळयू, 20ती हेरोद इना आखा वातोसी बोढीन यो भुंडलो काम बी कोऱ्यु कि योहान काजे बंदी घोरमा नाख देदा. 21जेतार आखा माणसे बाप्तिस्मा लेदा एने येसु बी बाप्तिस्मा लीन प्रार्थना कोरणे बाज रोयू होतु, ती सोरग उगळी गोयो, 22एने पवित्र आत्मा डीलोन रूपोमा पेरवान सारको तीना पोर उतऱ्यु, एने जी सोरगोन बुल होयी “तु मारू मोंगावू पुऱ्यु छे, मे तार पोर खुश छे.” 23जेतार येसु खुद प्रचार कोरणे बाज गोयू, ती लग-भग तीस सालोन उमोरोन होतु एने (जोसो सोमजाय जातो होतो) युसूफोन पुऱ्यु होतु; एने चु एलीन, 24एने चू मत्तातोन, एने चू लेवीन, एने चू मलकीन, एने चू यन्नान, एने चू योसेफोन, 25एने चू मत्तित्याहन, एने चू आमोसोन, एने चू नहुमोन, एने चू असल्याहोन, एने चू नोगहोन, 26एने चू मातोन, एने चू मत्तित्याहनोन, एने चू शिमीन, एने चू योसेखोन, एने चू योदाहोन. 27एने चू योहानोन, एने चू रेसान, एने चू जरूब्बाबेलोन, एने शालतियेल, एने चू नेरीन, 28एने चू मलकीन, एने चु अद्दीन, एने चू कोसामोन, एने चू एल्‍मदामोन, एने चू एरेन, 29एने चू यहसून, एने चू एलीएजोरोन, एने चू योरीमोन, एने चू मत्तातोन, एने चू लेवीन, 30एने चु शिमोनोन, एने चू यहुदान, एने चू योसेफोन, एने चू योनामोन, एने चू एल्याकिमनोन, 31एने चू मलानोन, एने चू मिन्नानोन एने चू मत्तातोनोन, एने चू नाथानोन, एने चू दाऊदन, 32एने चू यिशैनोन, एने चू ओबेदोन, एने चू बोवाज, एने चू शलमोनोन, एने चू नहशोनोन, 33एने चू अम्मीनादाबोन, एने चू अरनीनोन, एने चू हेस्रोनोन, एने चू पेरसोन, एने चू यहुदान, 34एने चू याकुबोन, एने चू इसाहाकोन, एने चू अब्राहामन, एने चू तेरहोन, एने चू नाहोरोन, 35एने चू सरूगानोन, एने चू रऊ, एने चू पेलेगोन, एने चू एबेरनोन, एने चू शेलहनोन, 36एने चु केनानोन, एने चू अरफक्षदन, एने चू शेम, एने चू नोहान, एने चू लामेखोन, 37एने चू मथूशिलह, एने चू हनोखोन, एने चू यरदन, एने चू महलेलोन, एने चू केनानोन, 38एने चू अनोसोन, एने चू शेतन, एने चू आदोमोन, एने चु परमेश्वरोन पुऱ्यु होतु.

Currently Selected:

लुका 3: BFBNT

Highlight

Copy