लुका 2

बेथलेहेममा येसुन जन्मो

(मत्ती 1:18-25)

1तीनु दाहळामा औगुस्तुस केसरोनचा गोथी आग्या निकवी कि आखा जोगोन माणसोन नावे लिखाय जाय. 2या पेहेल नाव लिखायो तिने टेमे होयी, तेत्यार क्वीरीनीय सिरीयान डाहालू होतु. 3आखा माणसे नाव लिखाळणेन कोरता आपना-आपना सोहोरोमा गोया. 4आखरी युसूफ बी इनान कोरता कि चू दाऊदन घोरानान एने पोयदावारी होतु, गलीलोन नासरेथ सोहोरोमा गोथू यहुदियामा दाऊदन सोहोर बेथलेहेममा गोयू, 5कि तेरी जूळावनी मरीया साते जी भारीस होती नाव लिखाळे. 6तेरेनचा रोयती जायीन तेरा पोखळायनेन दाहळा पुरा होय गया, 7एने ची तेरा पेहेला पुऱ्या काजे जन्मो आपी एने तीना काजे कापळामा गुंडाविन वाळामा मेकी; काहाकि तिंदरेन कोरता जागा नि होती.

गुवाव्याक सोरगोदुतोन खोबर कोयनो

8एने तिना देसोमा कोतरा गाडरान गुवाव्या होता, जे राती खोयळामा रोयीन आपना टूवान राखवावी कोरता होता. 9एने प्रभून एक दूत तिंदरेनचा आवीन उबरोयू, एने प्रभून विजावो तिंदरे चारू धोळे चोमक्यो, एने चे घोना जुदा बिह गोया. 10तेत्यार सोरग दूत तीनु काजे कोयू, “मा बिहू; काहाकि देखू, मे तुमु काजे मोटीत वारली खोबर सोमवाळो यो आखा माणसोन कोरता होयसे, 11कि आज दाऊदन सोहोरोमा तुमरेन कोरता एक छुटकारू आपन्यु पोयदा होय रोयू, एने युत मसिह प्रभू छे. 12एने तेरु तुमरेन कोरता यु चिन्ह छे कि तुमु एक पुऱ्या काजे कापळामा गुंडावलो एने वाळामा लुटाळलो देखसु,” 13तेत्यार उचकालुन तिना सोरगो दूतो साते सोरगोन दूतोन टूवू परमेश्वरोन स्तुती कोरता जायीन एने यो कोयता देखाय पोळ्या, 14“सोरगोमा परमेश्वरोन महिमा एने धोरती पोर जीना माणसोमा चु खुश छे, शांती होये.”

बेथलेहेममा गुवाव्यान जाणो

15जेतार सोरगो दूत तिंदरेनचा गोथा सोरगे जात रोया, ती गाडरा गुवाव्या आपोसमा कोया, “आवू, आपु बेथलेहेममा जायीन जी वात होयली छे, एने जी प्रभू आपु काजे देखाळलू छे, देखता.” 16एने चे छाटा जायीन मरीया एने युसूफ काजे, एने गोवाणीमा तिना पुऱ्या काजे लुट रोयला देख्या. 17इनू काजे देखीन चे जी वात इना पुऱ्यान बारामा तीनु काजे कोयली होती, चे कोया, 18एने आखा सोमोवणे वावा इनी वातो पोरसी जे गाडरान गुवाव्या तीनु काजे कोया नोवलाय कोऱ्या. 19बाकीन मरीया ये आखा वाते तेरा मोनोमा मेकीन फोम कोरती रोयी. 20एने गाडरान गुवाव्या काजे जोसो कोयलो होतो, तोसोच आखो सोमवीन एने देखीन परमेश्वरोन महीमा एने महिमा कोरता जायीन पोछा जात रोया.

येसुन सुंता एने नवे मेकनो

21जेतार आठ दाहळा पुरा होय गोया एने तेरी सुंतान टेम आवी, ती तेरो नाव येसु मेकाय गोयो यो सोरगो दूत मरीयान पेटोमा आवनेन पेहेलेन कोयलु होतु. 22जेतार मुसान नियमन रितीन अनसारे तिंदरा चुखा होयनेन दाहळा पुरा होय गोया, ती चे तीना काजे यरुशलेममा लीगोया कि प्रभून सामने लावे, 23(जोसो कि प्रभून शास्त्रामा लिखलो छे “होर एक पेहेलो प्रभून कोरता चुखलो ठेरायसे.”) 24एने प्रभून नियमोन अनसारे हुलान एक जुळो, नीती पेरवान दुय पिला लावीन बलिदान कोरु.

शिमोनोन भविष्यवाणी

25यरुशलेममा शिमोन नावोन एक माणूस होतु, एने चू माणूस धोरमी एने भोक्ती कोरणे वावु होतु; एने इस्राईलोन शांतीन कोरीन वाट जुवतू होतु एने पवित्र आत्मा तेरे उपर होती. 26एने पवित्र आत्मान लारे तीना पोर देखायतो होतो कि जेतार तोक चू प्रभून मसिह काजे देखी नी लेये, तेत्यार तोक मोत काजे नी देखे. 27चु आत्मान सिकाळने पोरसी मंदीरमा आव्यु; एने जेतार आसी बासा तिना पुऱ्या येसु काजे माहाय लाव्या, कि तीना काजे नियमोन अनसारे कोरे, 28ती चू तीना काजे तेरा खुवामा लेदू एने परमेश्वरोन धन्यवाद कोरीन कोयू,

29“हे स्वामी, हीमी तू तारा चेला काजे तारा

वचनोन अनसारे शांतीसी जाने देतलू छे

30काहाकि मारा डूवा तारा छुटकारू काजे देख लेदला छे,

31जीना काजे तू आखा देसोन माणसो सामने तीयार कोरलु छे,

32कि चू दिसरा जाती काजे विजावो आपनेन कोरता दिवू,

एने तारा प्रेषितोन माणसे इस्राईलोन महिमा होये.”

33तेरु बास एने तेरी आया इनी वातो पोरसी जी तेरे बारामा कोवायती होती, भोनगालाय जाता होता. 34तेत्यार शिमोन तीना काजे आशिष आपीन, तेरी आया मरीया काजे कोयी, “देख, होयु इस्राईलमा घोना सोवटान पोळनो, एने जीव उठनेन कोरता, एने एक ओसो सोहलानी होयनेन कोरता ठेराव गोयलु छे, जिनान बारामा गलत वाते कोरायसे. 35एने ताराबी जीवोमा तलवारोन वार पार भोराय जासे-इनासी घोना आत्मान विचार सामने होयसे.”

हन्नान गोवायी

36आशेरोन पोयदावारी मायली हन्ना नावोन फनूएलोन बेटीस एक भविष्य कोरणे वावी होती ची घोनी डाहली होती, एने वीयाव होयनेन ओवतेन सात साल तेरा पाहणा पुठी रोय सोकली होती. 37ची चौर्यायशी सालोसी रोंडायली होती एने मंदीर काजे नि छूळती होती, एने उपास एने प्रार्थना कोर कोरीन रात-दाहळू आराधना कोरती होती. 38एने ची तिनी टेमे चा आवीन परमेश्वरोन बोडाई कोरणे बाज गोयी, एने तीनु सोबोकाजे, जे यरुशलेमोन छुटकारान वाट जुवता होता, तिना पुऱ्यान बारामा वाते कोरणे बाज गोयी.

युसूफ एने मरीयमन घोर आवनो

39जेतार चे प्रभून नियमोन अनसारे आखो काय पुरो कोर लेदा ती गलीलमा आपनो गाव नासरेथमा पोछा जात रोया. 40एने पुऱ्यो बोढतो, एने ताकत वावु होयतू गोयू, एने ग्यानसी पुरू होयतू गोयू; एने परमेश्वरोन मोंग तीना पोर होतो.

मंदीरमा येसुन रोयनो

41तेरा आसी-बासा होर साल वोलांडोनोन तीहीवारोन पेहेले यरुशलेममा जाया कोरता होता. 42जेतार येसु बारा सालोन होयू, तेत्यार चे जुनला रितीन अनसारे यरुशलेममा गोया. 43जेतार चे तीनु दाहळा काजे पुरा कोरीन पोछा आवने बाज गोया, ती चू पुऱ्यु, येसु यरुशलेममा रोय गोयू; एने यो तेरा आसी-बासा नि जानता होता. 44चे यो सोमज्या कि चू दिसरा माणसो साते होसे, एक दाहळान पोळावू निकवी गोयू एने तीनाक तेरा सोगासाईमा एने उवखायतामा हेरने बाज गोया. 45बाकीन जेतार नी जोळ्यू, ती हेरता-हेरता यरुशलेममा पोछा गोया, 46एने तीन दाहळान ओवतेन चे तीनाक मंदीरमा भोननेवावन इचमा बोस रोयलू, तिंदरो सोमवने एने तीनुक सोवाल कोरतेलू देखायू. 47जोतरा तेरो सोमवता होता, चे आखा तेरी सोमोज एने तेरा जोवाब पोरसी वाहरायता होता. 48तेत्यार चे तीनाक देखीन वाहाराया एने तेरी आया तीनाक कोयी, “हे पुऱ्या, तू आमरे साते काहा ओसू वेहवहार कोऱ्यु? देख, तारू बास एने मे तोकलीत कोरीन तुसेक हेरता होता?” 49येसु तीनु काजे कोयू, “तुमु मेसेक काहा हेरता होता? काय नि जानता होता कि मेसेक मारा बासोन घोरमा रोयनो जोरुरी छे?” 50बाकीन जी वात चू तीनु काजे कोयू, चे तिनीक नी सोमज्या. 51तेत्यार चू तिंदरे पुठी गोयू, एने नासरेथमा आव्यु, एने तिंदरा कोयामा रोयू; एने तेरी आया जे आखा वाते आपना मोनोमा राखी. 52एने येसु ग्यान एने डीलोमा, एने परमेश्वरोन एने माणसोन मोंगोमा मोटू होयतू गोयू.

Currently Selected:

लुका 2: BFBNT

Highlight

Copy