लुका 1
1
लुकान उद्देश
1लोकेत जोना तिनी वातो काजे आमरे इचमा वीतली छे, इतिहास लिखनेमा हात लागाळला छे, 2जोसा कि चे यो पेहेलेन इनी वातो काजे देखने वावा एने वचनोन चेला होता, आमरेनचा तोक पुगाळ्या. 3इनान कोरता, हे माहाराज थियुफिलुस, मेसेक बी यो वारूत मालूम होयो कि इनी आखी वातोन आखी हाल आखान पेहेलेन खोरो-खोरो तोपास कोरीन, तीना काजे तारे जुगू आकळावारी लिखो. 4काहाकि तू यो पाको जान लेये कि चे वाते जेरो तू शिक्षा लेदलु छे, कोसो पाको छे.
जखऱ्या एने एलीशिबा
5यहुदियान राजा हेरोदोन टेमे अबिय्याहोन वर्गवारी मायला जखऱ्या नावोन एक पुजारू होतु, एने तेरी लाडी हारुनोन पिढी मायली होती जेरो नाव एलीशिबा होतो. 6चे दुयु परमेश्वरोन सामने धोरमी होता, एने प्रभून आखी आग्या एने रिती पोर निरदोष चालने वावा होता. 7तिंदरो पुऱ्या नि होता, काहाकि एलीशिबा वांजाय होती, एने चे दुय बी डुकरा होता.
योहानोन जन्मोन भविष्यवाणी
8जेतार चू आपना वर्गवारी पोर, परमेश्वरोन सामने पुजारान काम कोरतू होतु, 9ती पुजारान रितीन अनसारे तेरा नावोन चिट्ठी निकवी कि प्रभून मंदीरमा जायीन धूप बावे. 10धुप बावनेन टेमे माणसोन आखी मंडवी बारथे प्रार्थना कोरती होती. 11तिने टेमे प्रभून एक दूत धुपोन वेदीन जेवळे धोळे उबरोयलु तिनाक देखाय पोळ्यु. 12जखऱ्या देखीन बिहयु एने चू घोनु बिह गोयू. 13बाकीन सोरगोन दूत तीना काजे कोयू, “हे जखऱ्या बिहे मा, काहाकि तारी प्रार्थना सोमवाय गोयली छे; एने तारी लाडी एलीशिबा सी तारेन कोरता एक पुऱ्यु पोयदा होयसे, एने तू तेरो नाव योहान मेकजी. 14तुसेक आनंद एने खुशी होयसे एने घोना माणसे तेरा जन्मोन वोजेसी खुश होयसे, 15काहाकि चू प्रभून सामने मोटू होयसे; एने आंगुरोन रोस एने मोंद कोबी नि पिये; एने आपनी आशोन कुखोमा गोथूच पवित्र आत्मासी भोराय जासे;. 16एने इस्राईलमा गोथू घोना जोना काजे तिंदरा प्रभू परमेश्वर भूनी फिराव से. 17चू एलियान आत्मा एने ताकतसी तेरे ओगोव-ओगोव चालसे कि बासोन मोन पुऱ्या पारी भूनी फिराव देसे; एने आग्या नि मानने वावा काजे धोरमीन समजदारी पोर लावसे; एने प्रभून कोरता एक लायक प्रजा तीयार कोरे.” 18जखऱ्या सोरगोन दूत काजे पुछु, “यो मे कोसो सोमजो? काहाकि मे ते डाहलू छे; एने मारी लाडी बी डाहली होय गोयली छे.” 19सोरगोन दूत तीना काजे जोवाब आप्यू “मे गब्रिएल छे, जु परमेश्वरोन सामने उबरोयतेलू; एने मे तारे पुठी वाते कोरणे एने तुसेक जी वारली खोबर सोमवाळने कोरीन मुकलाय गोयलु छे. 20देख, जिने दाहळे तोक ये वाते पुरा नि होय जाय, तिने दाहळे तोक तू मुक्कू रोयसे एने बुल नी सोके, इनान कोरता कि तू मारी वातो काजे जी आपना टेम पोर पुरी होयसे, भुरसू नी कोऱ्यु.” 21माणसे जखऱ्यान वाट देखता रोया एने नोवलाय कोरणे बाज गोया कि तीना काजे मंदीरमा ओतरी वार काहा लागी. 22जेतार चू बारथे आव्यु, ती तिंदरे पुठी बुली नी सोक्यू आखरी चे सोमजी गोया कि चू मंदीरमा काहीन दर्शन देखलू छे; एने चू तिंदरेसी इशारू कोरतू रोयू, एने मुक्कू रोय गोयू. 23जेतार तेरा सेवा कोरनेन दाहळा पुरा होय गोया, ती चू तेरे घोर जात रोयू. 24इनू दाहळान ओवतेन तेरी लाडी एलीशिबा भारीस होय गोयी; एने पाच मोहना तोक खुदो काजे यो कोयीन डुकाळीन राखी, 25माणसोमा मारी अपमान नांबे कोरनेन कोरता, प्रभू इनू दाहळामा मोंगोन नोजोर कोरीन मारेन कोरता ओसू कोरलु छे.
सोरगो दूत एने मरीयम
26छोव मोहनामा परमेश्वरोनचा गोथू गब्रिएल सोरगो दूत, गलीलोन नासरेथ सोहोरोमा, एक कुवारीन चा मुकलायु. 27जेरी जूळावनी युसूफ नावोन दाऊदन घोरानान एक ओदमी साते होयली होती तिनी कुवारीन नाव मरीया होतो. 28एने सोरगो दूत तीनिनचा माहाय आवीन कोयू, “खुशी एने जीत तारी होये, जीना पोर परमेश्वरोन दया होयली छे! प्रभू तारे पुठी छे.” 29ची इना वचनोपोर सी घोनी बिह गोयी, एने फोम कोरणे बाज गोयी कि यो काहना भातीन अभिवादन छे. 30सोरग दूत तिनी काजे कोयू, “हे मरीया, बिहे मा, काहाकि परमेश्वरोन दया तार पोर होयली छे.” 31देख, तू भारीस होयीस, एने तारू एक पुऱ्यु पोयदा होयसे; तू तेरो नाव येसु मेकजी. 32चू मोटू होयसे एने परमप्रधानोन पुऱ्यु कोवायसे; एने प्रभू परमेश्वर तेरु बास दाऊदन राज गादी तीना काजे आपसे, 33एने चू याकुबोन घोरोपोर हमेशा राज कोरसे; एने तेरा राजोन आखरी नी होये. 34मरीया सोरगो दूत काजे कोयी, “यो कोसो होयसे मे ते ओदमी काजे जानतेली तोक नी.” 35सोरगो दूत तिनी काजे जोवाब आप्यू, पवित्र आत्मा तारे पोर आवसे, एने परमप्रधानोन ताकत तारे पोर सहावू कोरसे; इनान कोरता चू पवित्र जू पोयदा होयने वावू छे, परमेश्वरोन पुऱ्यु कोवायसे. 36एने देख तारा परिवार मायली एलीशिबान बी डाहावारामा पुऱ्यु होयने वावु छे, यो तेरो, जी वांजाय कोवायती होती छोव मोहनो छे. 37काहाकि यो वचन परमेश्वर भूनी गोथो रोयतेला छे चो होये नी ओसो नी रोयतेला. 38मरीया कोयी, “देख, मे प्रभून सेविका छे, मेसेक तारा वचनोन अनसारे होये,” तेत्यार सोरगो दूत तीनिनचा गोथू जात रोयू.
मारियान एने एलीशिबान भेट
39तीनु दाहळामा मरीया उठीन मामार बोयळान देसोमा यहुदा सोहोरोमा गोयी, 40एने जखऱ्यान घोरोमा जायीन एलीशिबा काजे नमस्कार कोरी. 41जोसी एलीशिबा मरीयान नमस्कार सोमवी, तोसोच पुऱ्यो तेरा पेटमा उछव्यो, एने अलीशीबा पवित्र आत्मासी भोराय गोयी. 42एने ची मोटेत बुलोसी आयळीन कोयी, “तु बायरामा सोयावी छे, एने तारो पेटोन फोव सोयावो छे.” 43यो मोंग मार पोर का गोथो होयो कि मारा प्रभून आया मारेंचा आवी? 44देख, जोसो तारू नमस्कारोन बुल मारे कानटे पोळ्यु, तोसोच पुऱ्यो मारा पेटोमा खुशीसी उछोव पोळ्यो. 45सोयावा छे जे तीना पोर भुरसू कोऱ्या कि जी वात प्रभून तोरोफसी तीनुक कोवायली, ची पुरी होयसे.
मरीयमन बोडाइन गीत
46तेत्यार मरीया कोयी,
“मारू जीव प्रभून बोढाई कोरे
47एने मारी आत्मा मारू छुटकारू कोरणे वावा
परमेश्वर पोर खुश होयी,
48काहाकि चू आपनी सेविकान दिनतापोर
नोजोर कोरलु छे;
इनान कोरता देखू हीमी गोथा आखा कोवी-कोवीन
माणसे मेसेक सोयावी कोयसे,
49काहाकि चू ताकत वावू मारेन कोरीन
मोट-मोटा कामे कोरलु छे तेरो नाव चुखलो छे,
50एने तेरी दया इनुपोर,
जे तीना काजे बिहतेला छे,
पिढ्यान पिढ्या तोक बोनली रोयतली छे
51चू आपनु पोराक्रोम देखाळ्यू,
एने जे खुदो काजे मोटा सोमजता होता,
तीनु काजे वेरा-वेर कोऱ्यु
52चू अधिपती काजे तिंदरा राज गादीपोर गोथू
पाळ देदू;
एने गोरीबो काजे उचा कोऱ्यु
53चू भूकला काजे वारला चीजोसी
आफराव देदू,
एने मालदार काजे ठारले हाते निकाव देदू
54चु आपना सेवक इस्राईल काजे सोमाव लेदू
कि आपनी तिनी दया काजे फोम कोरे,
55जु अब्राहाम एने तेरा पिढीपोर हमेशा रोयसे,
जोसू चू आमरा आडा-बुढा काजे कोयलु होतु.” 56मरीया लोग-भोग तीन मोहना तेरे पुठी रोयीन तेरे घोर आवती रोयी.
बाप्तिस्मा आपनेवावान जन्मो
57तेत्यार एलीशिबान पोखळायनेन टेम पुरी होय गोयी, एने ची पुऱ्या काजे जन्मो आपी. 58तेरे साते वावा एने परिवार वावा यो सोमवीन कि प्रभू तिनी पोर मोटीत दया कोरलु छे, तेरे साते खुशी कोऱ्या, 59एने ओसो होयो कि आठवे दाहळे चे पुऱ्यान सुंता कोरणे आव्या एने तेरो नाव बासोन नावोपोरसी जखऱ्या मेकने बाज गोया. 60इनापोरसी तेरी आया जोवाब आपी, “नि बाकीन हेरो नाव योहान मेकनो जुवे.” 61चे तिनी काजे कोया, “तारा परिवार मा कुदान यो नाव नि होय.” 62तेत्यार चे तेरा बाबा काजे इशारू कोरीन पुछ्या कि तू तेरो नाव काय मेकने होय रोयू? 63चू लिखनेन पाटी मांगाळीन लिख देदू, “तिनान नाव योहान छे, एने आखा काजे नोवलाय लागी.” 64तेत्यार तेरो मुय एने जीब तेत्यारुत उगळी गोयी; एने चू बुलणे एने परमेश्वरोन धन्यवाद कोरणे बाज गोयू. 65तेरे आळी छेळी आखा रोयने वावामा बिक भोराय गोयी; एने इनी आखी वातोन खोबर यहुदिया आखा बोयळा मायला देसोमा फीर गोयी, 66एने आखा सोमवने वावा आपना-आपना मोनोमा विचार कोरीन कोया, “यु पुऱ्यु कोसू होसे?” काहाकि परमेश्वरोन हात तेरे पुठी होतु.
जखऱ्यान भविष्यवाणी
67तेरु बास जखऱ्या पवित्र आत्मासी भोराय गोयू, एने भविष्यवाणी कोरणे बाज गोय.
68प्रभू इस्राईलोन परमेश्वर सोयावा होये,
काहाकि चु आपना माणसो पोर नोजोर कोऱ्यु
एने तिंदरू छुटकारू कोरलु छे,
69एने आपनु सेवक दाऊदन घोरानामा
आमरेन कोरीन छुटकारान सिंगडा निकव्यो,
70(जोसू चू आपना चुखला भविष्य कोरतान
लारे जो जोगोमा पेहेले गोथो होयतो
आवलो छे कोयलु होतु,)
71मतलब आमरा दुष्मोनसी, एने आमरा आखा
दुष्मोनोन हातोसी आमरू छुटकारू कोरलु छे,
72कि आमरा आळखा-बुळकापोर दया कोरीन आपनी
चुखला वायदान फोम कोरे,
73एने ची कोसोम जी चू आमरू बास
अब्राहाम साते कोरलु होतु,
74कि चू आमुक यो आपे कि आमु
आमरा दुष्मोन हातोसी छुटकारू होये एने नि बिहता जाईन परमेश्वरोन सेवा कोरनेन कोरता मोकू जुळे,
75तेरे सामने पवित्र एने धोरमीसी
उमोर भोर मजबूत रोयीन तेरी सेवा कोरता रोयजे
76एने तू हे पुऱ्या, परमप्रधानोन
भविष्य कोरता कोवायीस,
काहाकि तु प्रभून वाट तीयार कोरणे कोरता
तेरे ओगोव-ओगोव चालीस,
77कि तेरा माणसो काजे छुटकारान ग्यान आपे,
यो तिंदरा पापोन माफीसी जोळतेलो छे
78यो आमरा परमेश्वरोन इनी मोटीत दयासी होयसे;
जिनान वजेसी आमरेपोर सोंदारेन विजावो उगसे,
79कि आंदारान एने मोतोन सहावामा बोसने वावा काजे विजावो आपे,
एने आमरा पायो काजे शांतीन वाटे सुदा चालाळे,
80एने चो पुऱ्यो मोटो होयतो एने आत्मामा मजबूत होयतो गोयो, एने इस्राईलोन सामने आवनेन दाहळे तोक बोयळामा रोयू.
Currently Selected:
लुका 1: BFBNT
Highlight
Share
Copy
Want to have your highlights saved across all your devices? Sign up or sign in
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.
