مادتھا 23

حضرت عیسیٰ سی شریعتی لابکھان گون لا سکیون رجود زادس۔

1حضرت عیسیٰ مسیح میتشوگس تانگ کھونگی لوبٹوگس گونلا مولس، 2” شریعتی عالِم تانگ فریسی پا گُونلا، حضرت مُوسیٰؔ سی شریعت گون یہُودی پاگونلا ہاگوچوگچیسّی وانگچھا یودتے اینوگ۔ 3تیبویپھیا کھونگونی کھیوجا لابکھانگون کھانیانتے چوشیگ۔ اِین نانگ کھونگونی چوکھان تسوگسپو کھیوجاگونّی ماچوشیگ چیازیرنا کھونگونی لابکھانبو کھورانگونّی لاگلین چوا مانوگ۔ 4چھوسٹھیمسّی کھورو لچینتے جانمے گیابّا کالچیسلا کھونگون تھادّانوگ، اِین نانگ یاتو چوستے تیگون ستاگچیسلا کھورانگونّی دزیگوانگ کیانّگا تھادّا مانوگ۔“

5”کھونگونی لاس چوکھان تشانگما میگونلا ستانچیسّی پھیا چوانوگ، سپیرنا کھونگونی تھودپا تانگ لاگپیکا لدامسکھان چھوس ڈیسکھانگون جانگچان تانگ شانتابّی روگون رینگمو چوانوگ۔ 6ڈونّی نانّگا ڈالگو یانگ مجلِسی نانّگا سیواچانّی ناسّا ژالّانوگ۔ 7ٹھومسّی نانّگا میگونّی کانے سیوا تھوبچیس تانگ رابّی زیرتے بودّالا تھادّانوگ۔“

8”اینّانگ کھیوجاگونلا رابّی#23‏:8 عِبرانی سکادّی نانّگا رابّی دونّی رابّی اینوگ۔ زیر ماچوگ چیازیرنا کھیوجا لوبپون چیگ چیگ مانے مید، یانگ کھیوجا تشانگما فونو اینوگ۔ 9یانگ دُنیائیکا سوانگ یاب مازیر، چیازیرنا نامکھا جوگسکھانبو نی کھیوجاگونّی یاب چیگپو این۔ 10یا کھیوجاگونلا لوبپون زیر ماچوگ چیازیرنا لدامّا زادکھانّی مسیحا چیگپو نی کھیوجاگونّی لوبپون این۔ 11کھیوجاگونّی ٹونے ٹاگشوگ گیورنِین یودکھانبو جانگونّی یوگپو گیورگوس۔ 12ٹاگپو ستانکھانگونلا پاسمو چوا زادِین یانگ کھورانگ پاسمو بورکھانگونلا سیوا سالّا زادِین۔“

13” شریعتی عالِم تانگ فریسی پا ریاکاری گُون، کھیوجا تسامشیگی جیگسپا مییونگ۔ کھیوجے میگونّی لدونگیکا نامکھے گیالثیدّی گھو چوگدوگ، کھیوجارانگون تینانّگا چھا میدوگ ماتشاد تینانّگا چھاچیسّی سونڈوس چوکھانگون چھاچوگّا میدوگ۔“

14ّ(شریعتی عالِم تانگ فریسی پا، کھیوجاگونلا تسامشیگی جیگسپا مییونگ۔ ریاکاری کھیوجاگونّی انے مارانگموگونلا گوبسکورتے کھونگی کھانگپاگون کھیرچیس، یانگ میگونلا ستانچیسّی پھیا دُعا رینگمو جُودوگ۔ تینّابویپھیا کھیوجاگونلا چھادپا ثانٹے تانگین) #23‏:14 سنگانمے یُونانی شوقبُو 23‏۔ 14 ڈِیستے میدتے اینوگ، اِین نانگ ستینگماگونّی نانّگا ” شریعتی عالِم تانگ فریسی پا، کھیوجاگونلا تسامشیگی جیگسپا مییونگ۔ ریاکاری کھیوجاگونّی انے مارانگموگونلا گوبسکورتے کھونگی کھانگپاگون کھیرچیس، یانگ میگونلا ستانچیسّی پھیا دُعا رینگمو جُودوگ۔ تینّابویپھیا کھیوجاگونلا چھادپا ثانٹے تانگین“ تھودتے اینوگ۔ 15”لے ریاکاری چھوکنگون کھیوجا شریعتی عالِم تانگ فریسی پا گُونلا تسامشیگی جیگسپا مییونگ۔ می چیگ لوبٹوگس چوچیسلا کھیوجا ساکیاد تانگ تشو مانگپو رگالتے چھادوگ۔ لوبٹوگس گیور تشارّاچیگ، کھونگون کھیوجارانگی سانگ نییلداب نگانپا گیورچوگدوگ۔“

16”لامستانپا جارا کھیوجا تسامشیگی جیگسپا مییونگ۔ کھیوجاگونّی زیردوگ، بیت المقدِس سی ناسکیالکھانگونلا چانگ میستو، اِین نانگ بیت المقدِس سی نانّگا یودکھانّی سیرّی ناسکیالکھانگونلا تے نا سکیالکھانبو چوگوسین۔ 17جارا ، سامبا میدکھان گُون سیربو ٹاگا اینّوگا یا بیت المقدِس کابوے تے سیرپو ہلژخمہ چواد؟ 18کھیوجاگونّی زیردوگ، قُربان تانگسا ناسکیالکھانگونلا چانگ میستو، اِین نانگ قُربان تانگسایکا یودکھانّی چھودپے ناسکیالکھانگونلا تے نا سکیالکھانبو چوگوسین۔ 19جاراگون، چھودپا ٹاگا اینّوگا یا قُربان تانگسا کابوے چھودپابو ہلژخمہ چواد؟ 20تینے قُربان تانگسا نا سکیالکھانگونّی قُربان تانگسا تانگ قُربان تانگسایکا یودکھان تشانگمے ناسکیالتے اینوگ۔ 21یانگ بیت المقدِس سی نا سکیالکھانگونّی بیت المقدِس تانگ بیت المقدِس سی نانّگا ناسّا زادکھانبوے ناسکیالتے اینوگ۔ 22یانگ نامکھے نا سکیالکھانگونّی خُدے ژوگسٹھیس تانگ تیکا جُوگستے یودکھانّی خُدے ناسکیالتے اینوگ۔“

23” شریعتی عالِم تانگ فریسی پا ریاکاری گُون، کھیوجا تسامشیگی جیگسپا مییونگ۔ کھیوجاگونّی ماسالا تابسکھانّی یونگو چھونگشوگی نانگنیانگ رچوکھاگ چیگتا پھولدوگپا، اِین نانگ حضرت مُوسیٰؔ سی ما کھاگچان شریعت گونلا سنانگمید چوروگ سپیرنا اوسپے ٹھیمسچاد، سنینگرجے تانگ ایمان چانّی میتشے پھودچیس۔ کھیوجے تے شریعت گونلا سنانّگا چوچیس ماتشاد یونگّوے رچوکھاگپوانگ خُدا پھولگوس۔ 24شریعتی لامستانکھان جاراگون، کھیوجے چھو تھونگی سانگ سنگونلا تینانگنے تشیتو چوکھانّی بوتسیگ چھونگونبو پھینگدوگ اِین نانگ رنگابونگبو سمیدتانگدوگ۔“

25” شریعتی عالِم تانگ فریسی پا ریاکاری گُون، کھیوجا تسامشیگی جیگسپا مییونگ۔ کورے تانگ تھالّی پھیلوگپو لاگمو چوروگ، اِین نانگ کھیوجے نانگکوگپو نابسیمس تانگ رانگدودّی گنگستے دوگ۔ 26فریسی پا جاراگون، گوما کورے تانگ تھالّی نانگکوگپو لاگمو چوسّانگ، تینے پھیلوگپوانگ لاگمو چھین۔“

27” شریعتی عالِم تانگ فریسی پا ریاکاری گُون، کھیوجا تسامشیگی جیگسپا مییونگ۔ کھیوجاگون کارتسی سکوسکھانّی رومکھانگ ژوگس اینوگ، کا بو پھیلوگنے لدیمو تھونگنانگ نانگکوگپو روے روسپا تانگ تشیتوی ریگس تشانگما گنگستے یودتے اینوگ۔ 28تینّا تسوگسلا کھیوجا پھیلوگنے میگونلا چھوسپا تھونگنانگ کھیوجے نانگکوگپو کھاچھوس تانگ نگانپا گُونی گنگستے یودتے اینوگ۔“

29” شریعتی عالِم تانگ فریسی پا ریاکاری گُون، کھیوجا تسامشیگی جیگسپا مییونگ۔ کھیوجے پیغمبر گونلا قبرستان سیگدوگ، یانگ می ٹانگپوگونّی قبرستان سیثولتے لدیمو چوروگ۔ 30یانگ کھیوجے زیردوگ، کالتیس نگاجا نگاجے اتا اپو گونّی توسلا یودپینّا، پیغمبر گون سادچیسّی نانّگا نگاجا ڈِیستے میدڈو۔“

31”کھیوجے زیرکھانبوے کھیوجا پیغمبر گون سادکھانّی اولاد اینکھانبوے گوا تانّگانوگ۔ 32تا سونگتے کھیوجے اتا اپو گونّی گوزوگ چوکھانّی لاس نگانبو ڈوبچوگ۔ 33رُولگون، کھیوجا توگرولّی گیودگون، نیالوے چھادپانے کازوگی کھیوجا تھارتھوبین؟“

34”تیبویپھیا کھیوجیکا نگے پیغمبر گون، شیسراپچان کُن تانگ لوبپون گُون کالین ۔ یانگ کھونگون ژالّا ڈونگکھیرنے ڈونگکھیرلا سونگتے کھیوجے کھاچیگ کیانگشینگا کیانگستے ساداین، کھاچیگّا مجلِسی نانّگا ستالچاگ گیاباین۔ 35تیبوے جاستے دُنیا چھاگسپانے پھارلا می ٹانگپو تشانگمے سروک لینکھانّی نیادگالبو کھیوجاگونّیکا پھوگین، حضرت ہابِیلی می ٹانگپو سادکھان نے تانگستے بیت المقدِس تانگ قُربان تانگسای پارلا سادکھانّی باراگیی بُوژا حضرت زکریے تشوگپا۔ 36نگے لدینبا زیرّاد، تے جونگکھان تشانگمے چھادپابو ای میرابسپویکا پھوگین۔“

حضرت عیسیٰ سی یروشالیم پاگونّیکا تھوگستشیر زادس۔

37حضرت عیسیٰ مسیح مولس، ”یروشالیم پا، یروشالیم پا، پیغمبر گون سادکھان یانگ کھیوجیکا لامچوگا زادکھانگونلا ردوا گیابستے سادکھان گُون، چاموے رانگی ٹھوگوگون سکیوبچیسلا شوگپے یوگا کابّا تسوگسلا، نگیانگ کھیوجا لان مانگپو کابچیسّی دودپا چوسپین، اِین نانگ کھیوجے نگا چو ماچوگس۔ 38تا ستوس، ناستے یودکھانبو بینگتے سکیودپا کھیوجے بیت المقدِس ستونگپا اینوگ۔ 39نگے کھیوجا لدینبا زیرّاد، کھیوجا نگا یانگسکیار میتُھونگ نامتشوگپا کھیوجے، ’مسیح خُدے وانگچھے نانّگا سکیودکھانبو برکت چان این‘ میزیر۔“

Currently Selected:

مادتھا 23: LBJNT

Highlight

Copy