مادتھا 21

حضرت عیسیٰ سی گیالپوے تشولّا گاسوس جْوس ۔

1یروشالیمّی گیالسے نیموا ذیتونی ریکا #21‏:1 ای ریبویکا ذیتونی لچانگما مانگپو سکیستے یودپا ایبوا ذیتونی ری زیرّادپین۔ یودکھان بیت فگے ڈونگسیبّا لیبکییس یودّاچیگ، حضرت عیسیٰ مسیح لوبٹوگس نیس سنگونلا لامچوگا زادتے 2مولس، ”ڈونگسیبّی نانّگا سونگ، تیرو لیبّاچیگ بونگبوجیک کھورانگی بونگسار نیامپو تاگستے تھونگچین۔ تیگون ٹولتے نگا یودسا کھیونگ۔ 3کالتیس سوجیکّی چی چواد زیرتے ٹینا، ’مسیحا گھوسدوم دوگ‘ زیر۔ تینّامالّا کھوے کھیوجا تیگون کھیر چوگّانوگ۔“

4پیغمبر گیُودتے خُدے مولکھانبو ڈانڈا ڈوبچیسّی پھیا، تیبو جُونگستے اینوگ،

5”یروشالیم پاگونلا#21‏:5 یُونانی سکادّی نانّگا ای تشیگسپو ”ری زییونّی بوموا زیر“ ڈِیستے دوگ۔ زیر،

ستوسّانگ، کھیوجے گیالپو کھیوجا یودسا یونگدوگ،

کھونگ نی نیامشونگ، بونگسارّیکا ژونتے یونگدوگ۔“

6لوبٹوگسگون سونگتے حضرت عیسیٰ سی یکا سالکھان نانگجین چوس۔ 7تینے کھونگونی بونگبو تانگ بونگساربو کھیونگستے کھونگرانگونّی کوس تیگونّیکا سدادس یانگ حضرت عیسیٰ سی بونگسارّیکا ژونّا زادس۔

8میتشوگسّی نانگنے مانگچھیابوے رانگرانگی کوس حضرت عیسیٰ سی سکیودسے لامیکا تینگس یانگ جانگونّی لچانگمے یالگا چادتے تینگس۔ 9حضرت عیسیٰ سی دونّے ڈولکھان یانگ گیابنے یونگکھانّی میتشوگسّی کُوچو تانگین زیرس،

”گیالپو حضرت داؤد ّی اولاد ی پھیا خُدا ستودپا پھول،

مسیح خُدے وانگچھے نانّگا سکیودکھانبو برکت چان۔

نامکھا جوگسکھانّی خُدا ستودپا پھول۔“ 10یروشالیمّی نانگکوگا لیبّاچیگ، گیالسا گانگپوے نانّگا ہیلینگس شور یانگ میگونّی چیگ تانگ چیگّا ٹیس، ”ای میبو سو اینوگ۔“

11حضرت عیسیٰ سی نیامپو یودکھانّی میتشوگسّی لانتانگس، ”کھونگ نی پیغمبر حضرت عیسیٰ سی گلِیلی یولجونگس ناصرة نے اینوگ۔“

تشونگپاگون بیت المقدِس سی نانگنے پھینّگا زادس۔

12حضرت عیسیٰ سی مسیح، خُدے بیت المقدِس لا سکیودتے قُربانلا پھولچیسّی سیمسچان تسونگکھان تانگ نیوکھان گُون پھینّگا زادس۔ پینے جیبکھانّی چوگتسیگون تانگ پھورگون تسونگکھونّی کورسیگون لوگّا زادس۔ 13حضرت عیسیٰ سی کھونگونلا مولس، ”ہلژخمہ شوقبُو بوے نانّگا خُدے مولّا زادتے دوگ، ’نگے کھانگپا دُعا چوسے کھانگپا زیرین‘ اِین نانگ کھیوجاگونّی تیبو چاگپاگونّی تشانگس چوستے دوگ۔“

14بیت المقدِس سی نانّگا حضرت عیسیٰ سی یودسا جارا تانگ جاؤ گُون یونگسپا کھونگی کھونگون پھانچوگا زادس۔ 15اِین نانگ اِمام کُنی چھونمو گونتانگ شریعتی عالِم گونّی حضرت عیسیٰ سی ہالاسّی زادپا زادکھان یانگ ٹھوگوگونّی بیت المقدِس سی نانّگا، ”گیالپو حضرت داؤد ّی اولاد ی پھیا خُدا ستودپا پھول“ زیرین کُوچو تانّگا تھونگپا، کھونگونلا ماثانٹے ثو یونگس۔

16کھونگونی حضرت عیسیٰ سی ٹیس، ”کھیورانّگا تشورّا، ای ٹھوگوگونّی چی زیرّاراگ؟“

حضرت عیسیٰ سی لانسالس، ”تشور۔ ہلژخمہ شوقبُو بوے نانّگا ’خُدے اومتھونگ تانگ جان ٹھوگوگون کھونگرانّگا ستودپا تانگچیسلا ڈالڈیگ زادس‘ ڈِیا زادکھانبو کھیوجے ماسیلپینّا؟“ 17تے ستینگنے حضرت عیسیٰ سی بَیت عَنِیّاؔہ ڈونگسیبّا سکیودس یانگ ژانلا تیرو ژوگس۔

پھیگی کھازاسّی لچانگما سکامس۔

18نگاتوگ نگامو گیالسا لوگستے سکیودین یود زانے لامّا حضرت عیسیٰ سی ہلتوخسے ۔ 19لامی تھاما کھونگی پھیگ کھازاسّی لچانگماجیک زِیگس، کھونگ تے لچانگما یودسا سکیودس اِین نانگ تیکا لوما مانے کھازاس میدکھانبو زیگسپا کھونگی لچانگما مولس، ”کھیورانّگا کھازاس مانے میچھاگس۔“ تینّامالّا لچانگمابو سکامس۔

20پھیگی کھازاسّی لچانگما سکامسّالا تھونگتے لوبٹوگسگون ہالاس یانگ حضرت عیسیٰ سی ٹیس، ”ایزام گیوگسپا پھیگی لچانگمابو کازوگی سکامستے اینوگ؟“

21حضرت عیسیٰ سی مولس، ”نگے کھیوجا لدینبا زیرّاد، کالتیس تھےژومس میدپا خُدا ایمان چونا، کھیوجے ای پھیگی لچانگما چوکھانبو چوچیس ماتشاد ای ریبوا، ’سونگ، کھیرانگ گیاتشوے نانّگا پھونگ‘ زیرنا تیبو چوا زادِین۔ 22کالتیس ایمان چوستے کھیوجے دُعا گونی نانّگا چیجیک ژونانگ کھیوجاگونلا تھوبین۔“

حضرت عیسیٰ سی وانگچھے سکورلا ٹیوا ٹیس۔

23حضرت عیسیٰ مسیح بیت المقدِس سی نانّگا سکیودس یانگ لابجا سالین یودتوس اِمام کُنی چھونمو گونتانگ یہُودی پے اُسکیونگون یونگستے ٹیس، ”کا وانگچھا نیامپو کھیرانگی یگون چواد یانگ کھیورانّگا ای وانگچھا سوی تانگس؟“

24حضرت عیسیٰ سی کھونگونلا مولس، ”نگیانگ کھیوجاگونلا ٹیواجیک ٹیاین، کالتیس کھیوجے لانتانگنا، تینے نگیانگ کا وانگچھا گیُودتے یگون چواد کھیوجا شادین۔ 25حضرت یُوؔحنّا ٰ غوتا سالچیسّی وانگچھا خُدے چھوگسنے تھوبتے اینّوگا یا می چھوگسنے؟“

کھونگونی کھورانگونّی ٹوا سپیرا تانگستے زیرس، ”کالتیس خُدے چھوگسنے اینوگ زیرنا کھوے نگاتانّگا، کھیوجے کھوے نانّگا چیا ایمان ماچوسپین زیرین۔ 26اِین نانگ کالتیس میی چھوگسنے اینوگ زیرنا، میتشوگسلا ثو یونّگانوگ، چیازیرنا کھونگونی حضرت یُوؔحنّا ٰ پیغمبر سیادپین۔“ 27تیبویپھیا کھونگونی حضرت عیسیٰ سی لانتانگس، ”نگاجا گیوسمید۔“

تینے حضرت عیسیٰ سی کھونگونلا مولس، ”نگیانگ میشاد، سوی وانگچھے نانّگا نگے یگون چواد۔“

بُوژا نییسّی سکورلا رومس۔

28حضرت عیسیٰ مسیح مولس، ”کھیوجے چی سامّاراگ؟ میجیکّا بُوژا نیس یودپین۔ کھو بُوژا چھینمو یودسا سونگتے زیرس، ’بُوژا، کھیرانگ دیرینگ رگونتشاسّی نانّگا لاس چوالا سونگ۔‘ 29کھوے زیرس، ’نگا چھامید‘ اِین نانگ ستینگنے سیمبا گیورتے لاس چوا سونگ۔ 30تینے ابا بُوژا چھونگون یودسا سونگتے تینّا ژوگس زیرسپا کھوے، ’ابالے نگا چھین‘ زیرس اِین نانگ ماسونگ۔“

31”کھونگ نیسکوے نانگنے ابے کھا سوی نیانس؟“

کھونگونی زیرس، ”بُوژا چھینموے۔“

حضرت عیسیٰ سی مولس، ”نگے کھیوجا لدینبا زیرّاد، ٹھالنینکھانگون تانگ زوگستسونگماگون کھیوجے سانگ سنگونلا نامکھے گیالثیدّی نانّگا لیباین اینوگ۔ 32ٹانگپو میتشے پھودچیسّی لام ستانّالا حضرت یُوؔحنّا ٰ کھیوجا یودسا یونگستیانگ، کھیوجاگونّی ایمان ماچوس، اِین نانگ ٹھالنینکھانگون تانگ زوگستسونگماگونّی ایمان چوس۔ کھیوجے تیگون تھونگتیانگ کھوے لونبوے نانّگا ایمان چوستے گیودپا ماچوس۔“

رگونتشاس شاسلا تانگکھانّی رومس۔

33حضرت عیسیٰ مسیح مولس، ”یانگ رومس شیگ نیون، جینگی داگپوے کھورانگی جینّگا رگون ژُوگستے گیانگسکور تانگس۔ رگون تسیرسے ناسّا ٹوس، یانگ رگونتشاسلا ستاچیسّی پھیا ناسّا تھونپو سیگس۔ تینے رگونتشاسپو جان جینگبادپاگونلا شاسلا تانگستے کھورانگ ژانیولجیکّا دوگّا سونگ۔ 34ستونتھوگی توسپو نیموا لیبّاچیگ، داگپوے شینگتوگی سکالّا لینّالا کھورانگی یوگپوگون شاسلا تانگکھانگونّیکا لامچوگس۔ 35شاسپاگونّی یوگپوگون زومستے، چیگّا ردونگس، چیگ سادس، یانگ چیگّا ردوا گیابس۔ 36تینے داگپوے سنگونّی سانگ مانّگا یوگپو لامچوگس، اِین نانگ کھونگونی کھونگون لانگ تینّا ژوگس نگانپا چوس۔“

37”ستینگجوگپویکا کھوے کھورانگی بُوژا لامچوگستے، ’کھونگونی تانتانلا نگے بُوژا سیوا چوانوگ‘ سام۔“

38”اینّانگ شاسپاگونّی بُوژا تھونّگاچیگ، کھونگونی چیگ تانگ چیگّا زیرس، ’ای جینگ نورسکالّا تھوبچیسچانبو یونّگالا، یونگشیگ، کھو سادتے نگاتانگی کھوے نورسکالبو کوگاین۔‘ 39تیبویپھیا کھونگونی کھو زومستے رگونتشاسنے پھیلوگا پھانگستے سادس۔“

40حضرت عیسیٰ سی یہُودی پے سپونبوگونلا ٹیا زادس، ”تا رگونتشاسّی داگپو یونّگاچیگ، کھوے شاسپاگونلا چی چوین؟“

41کھونگونی لانتانگس، ”کھوے تے مینگانگونلا ناگس ثانٹے ستانتے ساداین یانگ رگونتشاسپو کھوا ستونتھوگی سکالّا تانگکھانّی جان جینگبادپا ریگّا شاسلا تانگین۔“

42حضرت عیسیٰ سی کھونگونلا مولس، ”ہلژخمہ شوقبُو بوے نانّگا ڈِیستے یودکھانبو کھیوجے ماسیلپینّا؟

کا ردوابو کھانگپا سیگکھانگونّی پھانمیتھوگس تھیس،

تینّا ردوابو کھانگپے ٹُوردوابو گیور

کا بو تشانگمیسانگ کھاگچان ردوابو اینوگ۔

ایبو مسیحا چوا زادتے اینوگ،

تیبو تھونگتے نگاتانگ ما ہالاسین۔ #21‏:42 زابور شوقبُو 118‏۔ 22‏، 23

43تیبویپھیا نگے کھیرانگّونلا زیرّاد، تا نامکھے گیالثیدّی نانّگا لیبچیسّی سکابس کھیوجاگونّی کانے کھیرّا زادِین یانگ نامکھے گیالثیدّی ڈاسبو زانگپو سکییکھانگونلا سالّا زادِین۔ 44تے ردویکا گھاگیابکھانگون تومپاتومپے نانّگا چھاگاین، اِین نانگ تے ردوابو کھونگّونّیکا بودنا، کھونگون میدکھان چھین۔“ #21‏:44 سنگونمے یُونانی شوقبُو کھاچیگی نانّگا ای 21‏۔ 44 ڈِیستے میدتے اینوگ۔

45اِمام کُنی چھونمو گونتانگ فریسی پاگونّی رومسپو تشورّاچیگ، حضرت عیسیٰ سی کھونگونی سکورلا مولکھانبو ہاگو۔ 46کھونگونی حضرت عیسیٰ سی زومچیسّی دودپا یودپین، اِین نانگ کھونگون میگونلا جیگس چیازیرنا کھونگونی حضرت عیسیٰ سی پیغمبر سیادپین۔

Currently Selected:

مادتھا 21: LBJNT

Highlight

Copy