مادتھا 20
20
رگونتشاسّی لاپے رومس۔
1حضرت عیسیٰ مسیح مولس، ”نامکھے گیالثید نی رگونتشاسّی داگپو نگاتوگ نگامونے رگونتشاسّی نانّگا لاس چوچیسلا لاپا ژالّا بینگکھان ژوگس این۔ 2نییما چیگی نینلا مولّی پینے چیگ تانگچیس کھاچھامستے لاپاگون رگونتشاسّی نانّگا لاس چوا لامچوگس۔“
3”ہالام چھوتشود لدونپاجیگیکا داگپو پھیلوگا بینگتے سونگ، یانگ ٹھومسلا لاس ماتھوبکھانّی جان لاپاگون تھونگتے 4کھونگونلا زیرس، ’کھیوجاگونّانگ نگے رگونتشاسّی نانّگا لاس چوا سونگ، اوسپا اینکھانّی لاچھا نگے تانگین۔‘ 5تینے کھونگون لاس چوالا سونگ۔ چھوتشود چوگنییس تانگ سومپیکا داگپو یانگسکیار پھیلوگا سونگتے، تینّا ژوگس چوس۔“
6”پھیتوگ چھوتشود ثنا پیکا داگپو یانگسکیار پھیلوگا بینگتے سونگ، تیرو لاس ماتھوبکھانّی لاپاگون دُوگستے یودا تھونگتے کھونگونلا ٹیس، کھیوجا نییما تشیرے لاس ماچوا ایکا دُوگستے چی چوستے این“
7”کھونگونی لانتانگس، نگاجا لاس چوالا سوینگ ماکھیرس۔“
”رگونتشاسّی داگپوے زیرس، کھیوجاگونّانگ سونگتے نگے رگونتشاسّی نانّگا لاس چوس۔“
8”پھیتوگ رگونتشاسّی داگپوے چھاگزوت لا زیرس، ’لاپاگونلا بودتے ستینگجوگا کھیونگکھانگونّے گوزوگستے گوما کھیونگکھانگون تسوگسپا لاچھا تونگ۔‘ 9چھوتشود ثناپیکا لاس چوالا کھیونگکھانگونلا نییما چیگی لاچھا تھوب پاسانگ 10شرُوعی کا لاس چوا کھیونگکھانگون لاچھا لینّا لیبّاچیگ جانگونّی سانگ مانّگا تھوبّانوگ سام۔ اِین نانگ کھونگون لانگ نییما چیگی نینلا مانے ماتھوب۔ 11لاچھا تھوبپاچیگ کھونگونی مابیبس چوستے داگپوا زیرس، 12’چھوتشود چیگ مانے لاس ماچوکھانگونلانگ نیرانگی نگاجا، نیمے تشادّی نانّگا ناگس تھونگین نییما تشیرے لاس چوکھانگون ژوگس لاچھا تانگس۔‘“
13”اینّانگ داگپوے لانتانگستے کھونگ چیگّا زیرس، دزاولے، نگے کھیرانگ نیامپو میوسپْا ماچوسپین۔ کھیرانگی نینلا، لاس چوچیسّی کھاچھاد ماچوسپینّا؟ 14رانگی پینے کھورتے سونگ۔ ستینگجوگی لاسمیگونلانگ کھیرانگ ڈانڈا لاچھا تانگچیس نگارانگی دودپا اِنپین۔ 15نگے نگارانگی پینیا چی چونانگ نگارانگ میتھادّا؟ یا نگے سنینگ پھیستے تانگس پاسانگ تشیگچیس یونّگا راگا؟“
16”سونگپاسانگ داگسا گویکا یودکھانگون ستینگجوگا لوسین یانگ داگسا ستینگجوگیکا یودکھانگون گویکا لیبین۔“
حضرت عیسیٰ سی کھونگرانگ ڈونگشیسّی سکور شادّا زادس۔
17حضرت عیسیٰ مسیح کیینلا یروشالیمّا سکیودین یودتوس لوبٹوگس چوگنییسپو سوسو کھیرتے مولس۔ 18”نیونشیگ، نگاتانگون کیینلا یروشالیمّا چھاچیس اینوگ، اِبنِ آدم اِمام کُنی چھونمو گونتانگ شریعتی عالِم گونّی لاگا ستاداین، یانگ کھونگونی کھوا شیچیسّی چھادپا چادتے 19یہُودی مانکھان گُونی لاگا ستاداین۔ تینے کھونگونی کھوا ٹھیلبا ستانتے، ستالچاگ گیابستے کیانگشینگیکا کیانگتے ساداین، یانگ جاگ سومپے جاگّا کھو سونتیا لانگسشوگّا زادِین۔“
جانماگونلا جابستوگ جوچیس۔
20تینے زبدی ناما، حضرت یعقُوبؔ تانگ یوحنّانی اما، کھونگون نیامپو حضرت عیسیٰ مسیح سکودونلا یونگس یانگ پِیکدونگ ژُوگستے کھویکا کاٹین زادچیسلا زیرس۔
21حضرت عیسیٰ سی کھوا مولس، ”نیرانّگا چی گوسّاد؟“
کھوے زیرس، ”نیرانگی گیالثیدّی نانّگا نگے بُوژا نیسکو نیرانگی چھاگ یاسپا تانگ یومے سیواچان کوسیکا دوگ چوگّا زادلے۔“
22حضرت عیسیٰ سی کھونگونلا لانسالس، ”کھیوجے جُووا پھولکھانبو کھیوجا ہاماگوا اینوگ، ردوگنگالّی کورے نگا تھونگچیسچانبو کھیوجے تھونگنیانچیس راگا؟“
کھونگونی زیرس، ”نیانچیسراگلے۔“
23حضرت عیسیٰ سی کھونگونلا مولس، ”کھیوجاگونّی تانتانلا نگے ردوگنگالّی کورے نانگنے تھونگین ، اِین نانگ نگے یاسپا تانگ یومیکا دوگچوگچیسّی وانگچھا نگا مید۔ نگے یابّی تے ناسّاگون کھونگی لدامّا زادکھانگونّی پھیا ڈالڈیگ زادتے این۔“
24تیبو تشورّاچیگ، جان لوبٹوگس رچُوبوا کھونگ نییسکویکا ثو یونگس۔ 25حضرت عیسیٰ سی کھونگ تشانگما بودّا زادتے مولس، ”کھیوجا گیوسمیدّا؟ یہُودی مانکھان وانگثولپاگونّی کھورانگی یولمیگونّیکا سنینگرجے میدپا وانگثولّانوگ، یانگ کھونگونی لونپوگونّیانگ میگونلا ثانٹے ناگس ستانین وانگثولّانوگ۔ 26کھیوجے نانّگا تیتسوگس یونگ ماگوس۔ کھیوجے ٹونے ٹاگپو گیورنِین یودکھانبو جانماگونّی یوگپو گیورگوس، 27یانگ کھیوجے ٹونے گویکا لیبنیین یودکھانبو جانگونّی تشیوگ گیورگوس۔ 28کازوگ اِبنِ آدم جابستوگ ژوچوگچیسلا مانپا جابستوگ جوالا یونگسپین، یانگ می مانگپوے ثوگرین شالچیسلا کھوے رانگثوگ تانگین۔“
حضرت عیسیٰ سی جارا نیسلا تھونگ چوگّا زادس۔
29یریحُو ڈونگکھیرنے حضرت عیسیٰ مسیح تانگ کھونگی لوبٹوگسگون بینگتے سکیود زانے، میتشوگس چھینموجیک کھونگی ستینگرانگنے یونگس۔ 30لامی تھامیکا یودکھانّی جارا نییسّی حضرت عیسیٰ سی تیکانے سکیودّوگ زیرتے تشورّاچیگ کُوچو تانگین زیرس، ”مسیح، گیالپو حضرت داؤد ّی اولاد، نگاجیکا سنینگرجے زاد۔“
31میتشوگسّی جارا نییسکوا کھاسکییستے چوبچود زیرس۔
اِین نانگ کھونگونی مانّگا کُوچو تانگستے زیرس، ”گیالپو حضرت داؤد ّی اولاد، نگاجیکا سنینگرجے زادّانگ۔“
32حضرت عیسیٰ سی ڈولّا مازادّا جوگس یانگ کھونگونلا بودتے ٹیا زادس، ”نگے کھیوجے پھیا چی چو؟“
33کھونگونی زیرس، ”مسیح لے، نگاجا تھونگچیسّی کھیود پو سالّانگ۔“ 34حضرت عیسیٰ سی کھونگی کا سنینگرجے سکیستے کھونگونی میگیکا چھاگ بورّا زادس، تینّامالّا کھونگونلا تھونگتھوب یانگ کھونگون حضرت عیسیٰ سی ڈانگستے سونگ۔
Currently Selected:
مادتھا 20: LBJNT
Highlight
Share
Copy
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
