لوکا 4

شیطانی حضرت عیسیٰ سی تشودلتا لینس۔

1حضرت عیسیٰ مسیح ہلژخمہ رُوح بوے گنگستے یوردان لژانگسپو نے لوگستے سکیودس، یانگ ہلژخمہ رُوح بوے کھونگ ریستونگی نانّگا کھیرّا زادس۔ 2تشانّیین ژیبچو شیطان گونّی گوبے حضرت عیسیٰ سی دِیگپے نانّگا گییلچوگچیسلا سونڈوس چوس۔ طِطُس گانگپو کھونگ دونتانگ چانگ مادونپا ستینگجوگپیکا کھونگ ہلتوخسے ۔

3شیطان گونّی گوبابوے کھونّگا زیرس، ”کالتیس نیرانگ خُدےبوژا اینّا ای ردواگون تاگی گیورچیسلا کا سال؟“

4حضرت عیسیٰ سی لانسالس، ”ہلژخمہ شوقبُو بوے نانّگا ڈِیازادتے دوگ،

’می تاگی چیگپوے سونتیا میلوس‘۔“ #4‏:4 شریعتی شوقبُو نیسپے 8‏۔ 3

5شیطان گونّی گوبے کھونگ ناسّا تھونپوجیگیکا کھیرتے کھونّگا دُنیائی گیالثید تشانگما ثیبچیگی نانّگا ستانتے، 6شیطانی حضرت عیسیٰ سی زیرس، ”نگے کھیورانّگا ایگونّی سپال تانگ وانگچھا تشانگما تانگین، چیازیرنا تیگون نگا تانگستے اینپا نگے، نگارانگ تھادکھانبوا تانگین۔ 7کالتیس کھیرانگی نگا چھاگ پھولتے چولنا نگے کھیورانّگا ای تشانگما تانگین۔“

8حضرت عیسیٰ سی کھوا لانسالس، ”ہلژخمہ شوقبُو بوے نانّگا ڈِیازادتے دوگ،

’کھیوجے مسیح کھیوجارانگی خُدا چولگوس۔

یانگ کھونگ چیگپوا جابستوگ جوگوس‘۔“ #4‏:8 شریعتی شوقبُو نیسپے 6‏۔ 13

9تینے ردودگونّی گوبے حضرت عیسیٰ سی یروشالیمّی گیالسا ٹھیدتے کھیرس یانگ بیت المقدِس سی گولینّگا کھیرتے زیرس، ”کالتیس نیرانگ خُدےبوژا اینّا یکانے تُھورلا لچیبّانگ 10چیازیرنا شوقبُو بوے نانّگا ڈِیازادتے دوگ،

’ کھیرانگ سکیوبچیسلا خُدے فرشتاگونلا کا سالین،

11کھیرانگی کانگپانگ ردویکا پھوگ میچوگچیسّی پھیا

فرشتاگونّی لاگپا کیانگستے کھیرانگ زومّا زادِین‘۔“ #4‏:11 زابور شوقبُوئ 91‏۔ 11‏، 12

12حضرت عیسیٰ سی کھوا لانسالس، ”ہلژخمہ شوقبُو بوے نانّگا ایبوانگ مولدوگ، ’مسیح کھیوجارانگی خُدا تشود ماستا۔‘“ #4‏:12 شریعتی شوقبُو نیسپے 6‏۔ 16 13شیطان گونّی گوبے حضرت عیسیٰ سی تشودلتا تشارّاچیگ کھوا یانگ سکابس تھوبتھوب تشوگپا کھونگنے بیتے سونگ۔

ناصرة پاگونّی حضرت عیسیٰ سی سیوا ماچوس۔

14تینے حضرت عیسیٰ مسیح ہلژخمہ رُوح بوے ستوبسّی گنگستے ، گلِیلی یولجونگسلا لوگستے سکیودس یانگ کھونگی سکورلا ناتشول یولجونگس گانگپوے نانّگا پھیل۔ 15کھونگی یہُودی پے مجلِس گُونی نانّگا لابجا سالچیس گوزوگ زادس یانگ تشانگمے کھونّگا ستودپا پھولس۔

16حضرت عیسیٰ سی ناصرة ای ڈونگکھیرلا سکیودس کارُو کھونگ لدانتے اینپین یانگ کھونگرانگی لوبس نانگجین شابّاد آرام چوچیسی جاگّا مجلِسی نانّگا سکیودس، یانگ ہلژخمہ شوقبُو بوے نانگنے سیلّا زادچیسلا جانگس۔ 17حضرت یسعیاہ پیغمبری ڈیسکھانّی شوقبُو کھونگی لاگا تانگس یانگ شوقبُو پھیستے ژالّا زادکھانبو تھوب، تیبو نی،

18‏-19”مسیح خُدے رُوح نگیکا ناس،

چیازیرنا کھونگی نگا نیامشونگّونلا

گاموےناتسُول شادچیسلا سکوا زادس۔

تسونپاگونلا تھارپا تھوبچیس، جارا گونلا تھونگچیس،

ردوگنگالّی نانّگا یودکھانگون پھودچیس

یانگ مسیح خُدے کھونگرانگی میگونّیکا

شزدے زادچیسّی توس لیبکھانبو کھیابڈاگس چوچیسلا

کھونگی نگا کالا زادس۔“ #4‏:18‏،19 حضرت یسعیاہ شوقبُوئ 61: 1

20کھونگی شوقبُو سیل تشارّاچیگ، ثیلتے مجلِسی روگس چوکھانبوا سالتے سیکا ژوگس۔ عبادت خانہے نانّگا دزومستے یودکھان تشانگمے کھونّگا ستاستے دُوگس۔ 21کھونگی کھونگونلا مولس، ”ہلژخمہ شوقبُو بوے نانگنے داگسا کھیوجے تشورکھانگون، دیرینگ ڈانڈا ڈوبتے اینوگ۔“

22تشانگمے کھونّگا ستودپا تانگس یانگ کھونگی کھاسپا تانگ لاگمو ژالتاگون تشورتے تشانگما ہالاس یانگ زیرس، ”کھو حضرت یُوسفؔ بی بُوژا مانوگا؟“

23حضرت عیسیٰ سی کھونگونلا مولس، ”تانتانلا کھیوجے ای تامسپیبو نگا زیرین، ’امچھی رانگ پھانچوگّانگ، کفرنحُوم مّی ڈونگکھیرّی نانّگا چوکھانّی لاس نگاجے تشورکھانگون ژوگس رانگی یولّی نانّگا چوسّانگ۔‘ 24نگے کھیوجا لدینبا زیرّاد، پیغمبر سوجیگّانگ کھورانگونّی یولّا گاسوس میتھوب۔

25پیغمبر حضرت اِلیاس سی توسلا لو سومناپھید نامکھانا چھارپا مابابسّا یول گانگپوے نانّگا موگے ٹاگپو چونگی توسلا بنی اِسرائیلی یولّی نانّگا انے مارانگمو مانگپو یودکھانبو تانتان اینوگ۔ 26اِین نانگ خُدے پیغمبر حضرت اِلیاس کھونگ سوجیگیکانگ کالا مازادّا، یہُودی مانکھان صیدا یولجونگسّی زاریپاد یولّی نانّگا دوگکھانّی انے مارانگموبویکا کالا زادس۔ 27یانگ پیغمبر ایلیشے توسلانگ بنی اِسرائیلی نانّگا دزینادچانّی می مانگپو یودکھانّی ٹونے چیگّانگ پھانچوگا مازادّا سیرییاپا نامان چیگپو پھانچوگا زادتے ژانگما زادس۔“

28تیبو تشورتے مجلِسی نانّگا یودکھان تشانگمالا ثو ثانٹے یونگس۔ 29کھونگون لانگستے حضرت عیسیٰ سی ڈونگکھیرنے پھیلوگا پھینگستے ڈونگکھیربو تشوگستے یودکھانّی ری زورّیکا پھانگچیسلا کھونگ کھیرس۔ 30اِین نانگ کھونگ کھونگونی ٹونے چانگ گھاگژا میدّا بینگتے سکیودس۔

حضرت عیسیٰ سی ردود پو پھینّگا زادس۔

31تینے حضرت عیسیٰ مسیح گلِیلی یولجونگسّی کفرنحُوم ڈونگکھیرلا سکیودس یانگ شابّادّی آرام چوچیسی جاگّا میمانگسلا لابجا سالچیس گوزوگس۔ 32کھونگون حضرت عیسیٰ سی لابجاگونّیکا ہالاس، چیازیرنا کھونگی وانگچھا نیامپو مولّا زادّادپین۔

33مجلِسی نانّگا ردود ژوگسکھانّی میجیگ یودپین۔ کھوے کُوچو ثانٹے تانگین زیرس، 34”ناصرة پا حضرت عیسیٰ، نیرانّگا نگاجا گُونی کانے چی گوسّاد؟ نیرانگ نگاجا گُون میدکھان چوالا سکیودتے اینّا؟ نیرانگ سو جُوگستے اینکھانبو نگا گیوسیود۔ نیرانگ خُدے ہلژخمہ بو جُوگستے اینوگ“

35حضرت عیسیٰ سی کھوا کھاسکییا زادتے مولس، ”چوبچود کھوے نانگنے بینگتے یونگ۔“ تینّامالّا ردود پوے میگونّی لدُونلا تے میبو سا ردابستے نودپا ماسکیالّا کھوے نانگنے بینگتے سونگ۔

36میتشانگما ہالاستے چیگ تانگ چیگّا زیرس، ”ای می بوے تسامشیگی کھیود تانگ وانگچھا نیامپو زیردوگ، کھوے کا تانگکھانبوا ردودگونّیانگ کھانیانتے بینگتے یونگدوگ۔“ 37یانگ کھونگی سکورلا ناتشولبو یولجونگس گانگپوا پھیل۔

حضرت عیسیٰ سی نادپاگون پھانچوگا زادس۔

38حضرت عیسیٰ مسیح مجلِس نے بینگتے شمعُوؔن حضرت پطرؔس سی کھانگپا سکیودس۔ شمعُوؔن ی نامے اما تشاد ثانٹے یونگستے یودپین۔یانگ کھونگونی حضرت عیسیٰ سی کھوا روگس زادچیسلا جْوس پا 39کھونگ کھوے مالتسے لدُونلا جانگستے تشادپوا کھاسکییاچیگ تشادپو میدکھان سونگ، تینّامالّا کھو لانگستے کھونگونلا جابستوگ جْوس ۔

40نییما نوباین یود زانے میگونّی زُومو سناتشوگس یودکھان تشانگما حضرت عیسیٰ سی یودسا کھیونگس، یانگ کھونگی ریریکا چھاگ بورّا زادتے، کھونگون گیالچوگّا زادس۔ 41کھونگ مانگپوے نانگنے ردودگون بینگستے یونگ زانے کُوچو تانگین زیرس، ”نیرانگ خُدےبوژا اینوگ۔“ اِین نانگ حضرت عیسیٰ سی تیگونلا کھاسکییستے سپیرا زیر ماچوگس چیازیرنا تیگونّی کھونگ خُدے لدامّا زادکھانّی مسیحا اینکھانبو شیسّادپین۔ 42ناملانگسّاچیگ حضرت عیسیٰ سی یانگ سوانگ میدسے ناسّاجیگّا سکیودس۔ میتشوگسّی کھونگ ژالّادپین یانگ کھونگ تھوبّاچیگ کھونگونی حضرت عیسیٰ سی جوجو جوین کھونگون بورتے میسکیودچیسلا زیرس۔ 43کھونگی کھونگونلا مولس، ”نگا جان ڈونگکھیرگونّی نانّگانگ خُدے گیالثیدّی گاموےناتسُول شادگوس۔ تینّا گیونتشانبوے پھیا خُدے نگا کالا زادتے این۔“ 44تینے کھونگی یہُودیہ یولجونگس گانگپوے نانّگا سکیودتے مجلِس گُونی نانّگا لابجا سالّادپین۔

Currently Selected:

لوکا 4: LBJNT

Highlight

Copy