Marko 7
7
O Isus sikavel te avas andral čiste
1Oko Isus ćidine pe varesave fariseja thaj e sikavne palo Mojsijesko zakono save aviline andar o Jerusalim. 2Von dikhline varesave lešće učenikonen kaj han mangro bithode vastenca so značil kaj sas lenđe vas obredno melale. 3A e Židovurja, posebno e fariseja, či hanas mangro, a te majsigo či laće thodinesas obredno pire vas, pa gajda inćarenas e purane običaja katar pire prapapurja. 4Thaj kana avenas ćhere katar o pijaco, či hanas, a te majsigo či obredno thodinesas pes. A sas len još majbut purane običaja save inćarenas, sago kaj si: o obred te thovenpe e tahta, e bokalurja thaj e bakhrene vasurja. 5Thaj zbog godova e fariseja thaj e sikavne palo Mojsijesko zakono phučline e Isuse: “Sostar ćire učenikurja či inćaren e purane običaja save mukline amenđe amare prapapurja, nego han e melale vastenca?” 6A o Isus phenda lenđe: “Licemerja! Lačhe prorokuisardas o Isaija pale tumende sago kaj o Del phendas ando Sveto lil:
Akala manuša samo e alavenca poštuin man,
ali lengo ilo si dur mandar.
7Ivja lenđe kaj slavin man,
kana e manušenđe zapovesti sikaven sago kaj si mungro sikavipe.
8E Devlešće zapovesti mukline, a inćaren e manušenđe običaja.”
9Thaj još phendas lenđe: “Baš šukar tumendar, odbacin e Devlešće zapovesti te šaj inćaren tumare običaja. 10O Mojsija phendas: ‘Poštuisar ćire dades thaj će deja’ thaj: ‘Ko del romaja pire dade ili pire deja, neka avel kaznime po smrto.’ 11A tumen phenen: ‘Lačhe si te o manuš phenel pire dadešće ili pire dejaće: “Sa sova šaj pomogniv tut si te prinesiv kurbano – so značil žrtveno daro e Devlešće”’, 12gajda tumen či mućen e manušes te vodil briga pale piro dad ili pale piri dej. 13Thaj gajda odbacin e Devlesko alav tumare običajenca save sikaven avren. Thaj but gajda vareso ćeren.”
O Isus phenel so meljarel e manušes
14Askal palem akharda e theme peste thaj phendas: “Ašunen man savora thaj haćaren! 15Khanči so avrjal del ando manuš naštik meljarel e manuše andral. Nego okova so inkljel andar o manuš meljarel e manuše andral. 16[Ako varekas si kan, nek ašunel!]” 17A kana đelotar e themestar thaj dijas ando ćher, e učenikurja phučline les te objasnil lenđe akaja paramiči. 18A o Isus phučla len: “Pa ni tumen či haćaren? Sar či haćaren kaj khanči so del avrjal ando manuš naštik meljarel e manušes, 19kaj či džal lešće ando ilo, nego džal ande lesko ođi, thaj inkljel avri andar lesko telo?” (Gajda o Isus mothodas kaj si sa o hamasko čisto.) 20Thaj još majdur motholas: “Okova so inkljel andar e manušesko ilo ćerel e manuš te avel melalo anglo Del. 21Kaj andral, andar e manušesko ilo, aven e bilačhe gindurja, o blud, o čoripe, o mudaripe, 22o preljub, e pohlepa, o bilačho narav, e prevara, o bilađavipe, e zavist, o vređope, o barikanipe thaj o dilipe. 23Sa akava bilačhipe inkljel andar o manuš thaj meljarel e manušes anglo Del.”
O Isus pomožil e romnjaće savi nas židovka
24Pale godova o Isus andar e Galileja đelo ande tirske thaj sidonske krajurja thaj smestisajlo ande varesosko ćher. Či kamlas te bilo ko džanel kaj si okote, ali naštik ačhilo garado. 25Varesavi manušnji ande kašći čhejori sas o bilačho duho, čim ašunda pale leste avili thaj peli angle lešće pungre pe koča e mujesa dži ke phuv. 26A godoja manušnji nas Židovka thaj sas bijandi ande sirisko Fenikija. Molilas e Isuse te tradel e benđe andar laći čhej. 27O Isus phenda laće: “Muk majsigo te čaljon e čhavra, kaj naj lačhe te lel pe o mangro katar e čhavra thaj te čhudelpe e džućhelorenđe.” 28A voj phenda: “Gajda si, Gospode, ali vi e džućhelora tale sinija han e prušuka kaj peren e čhavrenđe.” 29Askal o Isus phendas laće: “Zbog godova kaj phendan akava, dža ćhere. O bilačho duho inkljisto andar ćiri čhej.” 30Kana e manušnji đeli ćhere, arakhla e čhora sar pašljol ando kreveto, a o bilačho duho već inkljisto andar late.
O Isus sastarel e manušes savo si kašuko thaj nemo
31Askal o Isus đelotar andar e tirske krajurja, thaj preko Sidono areslo dži ko Galilejsko jezero ande dekapoljsko krajo. 32Kote andine lešće jeće kašuće manuše, savo vi phare ćerelas svato thaj zamolisardine e Isuse te čhol piro vas pe leste. 33O Isus inđarda les cara majdur katar o them te šaj avel lesa korkoro, čhuta pešće naja ande lešće kan, thaj pešće čhungarava dotaknisardas lešći čhib. 34Dikhla ando nebo, uzdahnisarda thaj phendas lešće: “Efata!”, so znaćil: “Putar tut!” 35Thaj odmah boldape e manušesko sluho, thaj lešći phangli čhib putajli thaj šaj lačhe ćerelas svato. 36O Isus zabranisardas e themešće te mothon bilo kašće pale akava. Ali so vo majbut branilas lenđe, von sa majbut ćerenas svato pale akava. 37But divinaspe thaj phenenas: “Sa so ćerel si zurale lačhe – vo ćerel te e kašuće manuša ašunen thaj e neme te ćeren svato!”
Currently Selected:
Marko 7: RČB
Highlight
Share
Copy
Want to have your highlights saved across all your devices? Sign up or sign in
