Matej 26
26
E židovske vođe planirin te mudaren e Isuse
1Kana o Isus sas gata sa godole alavenca, phendas pire učenikonenđe: 2“Džanen kaj si pale duj đes o prazniko e bi kvascošće mangrengo. Askal man, e Čhave e Manušešće, izdaina te čhon man po trušul.”
3Askal ćidinepe e šorvale rašaja thaj e themešće starešine ando dvoro e bare rašajesko savo akhardolas Kajafa 4thaj dogovorisajle te astaren e Isuse po hohaipe thaj te mudaren les. 5Thaj phendine: “Ali či tromas godova te ćeras dok si o prazniko Pasha, te či pobunilpe o them.”
O Isus sas pomažime ande Vitanija
6A o Isus sas ande Vitanija ando ćher e Simonesko e gubavcesko. 7Dok sas pale sinija, avili dži leste varesavi manušnji e vasurjava savi sas ćerdi katar o kuč bar pherdi e kuč mirisosa savo čhordas pe Isusesko šoro. 8Kana dikhline godova, e učenikurja holjajle thaj phendine: “Sostar kasavo rspipe! 9Godova miris šaj kuč te bićindasaspe, a e love te denpe e čorenđe.” 10O Isus džanglas so ćeren svato thaj phendas lenđe: “Sostar zamerin akale manušnjaće? Voj ćerdas manđe lačho delo. 11Kaj e čore manušen uvek avela tumen paše tumende, a man či avela tumenca. 12Kana čhordas akava mirisno pomast pe mande, ćerdas godova pale mungro prahope. 13Čačes phenav tumenđe, kaj po sasto them propovedilape akaja Bahtali nevimata, ćerelape svato vi pale akava so voj ćerdas, laće palo spomen.”
O Juda dogovorilpe te izdail e Isuse
14Askal jek katar e dešuduj apostolurja, akhardo Juda andar o gav Iskariot, đelo ke šorvale rašaja, 15thaj phendas: “Kozom poćinena manđe te izdajiv tumenđe e Isuse?” Von đinadine lešće trjanda rupune kovanice. 16Katar askal o Juda počnisardas te rodel lačhi vrjama te izdail les.
O Isus bičhalel e učenikonen te pripremin e Pasha
17Prvo đes kana sas o prazniko bikvascošće mangrengo e učenikurja phučline e Isuses: “Kaj kames te ćeras tuće e pashalno večera?”
18A vo phendas lenđe: “Džan ando Jerusalim ke okova thaj okova manuš, thaj phenen lešće: ‘O sikavno phenel: Mungri vrjama si paše. Tute slaviva e pasha mungre učenikonenca.’” 19E učenikurja ćerdine sar phendas lenđe o Isus thaj pripremisardine e pashalno večera.
O Isus džanel kaj o Juda izdaila les
20A kana peli e rjat, o Isus sas pale sinija e dešuduje učenikonenca. 21Dok hanas vo phendas lenđe: “Čačes phenav tumenđe, jek tumendar izdaila man.” 22Von zurale ražalostisajle thaj jek pale avreste počnisardine te phučen les: “Te najsem možda me Gospode?” 23A vo phendas lenđe: “Okova savo bolel o mangro manca ando čaro, godova izdaila man. 24Vi čače me, o Čhavo e Manušesko, moraš te merav sago kaj ramol ando Sveto lil. Ali teško okolešće savo izdail man, e Čhaves e Manušešće! Majlačhe avilosas lešće te či ni bijandilosas!” 25A lesko izdajniko o Juda phučla: “Te najsem me godova, sikavneja?” A o Isus phendas lešće: “Korkoro phenes.”
O Isus hal e poslednjo večera e učenikonenca
26Dok hanas o Isus lija o mangro, zahvalisardas pale leste thaj phagla les, askal dijas pire učenikonenđe thaj phenda: “Len, thaj han akava si mungro telo.” 27Askal lijas o tahtaj mol, zahvalisardas e Devlešće pa dijas e učenikonenđe thaj phendas: “Pijen andar leste savora, 28kaj akava si mungro rat, o rat savo utemeljil o savezo, thaj čhordol pe pale butende te jartonpe lenđe bezeha. 29Thaj phenav tumenđe: či majbut pijava mol sa dži ke okova đes kana pijava tumenca nevi mol ando carstvo mungre Dadesko.” 30Askal đilabadine e psalmurja thaj uputisajle ande Maslinsko gora.
O Isus phenel kaj savora mućena les
31Askal o Isus phendas lenđe: “Arjat savora tumen mućena man, kaj ando Sveto lil ačhel ramome:
‘Dava dab e pastire
thaj e bakhre andar o stado našena.’
32Ali kana uštava andar e mule, džava angle tumende ande Galileja.”
33A o Petar phendas lešće: “Te mukline tut savora, me nisar či mukava tut!”
34A o Isus phendas lešće: “Čačes phenav tuće, još akaja rjat, majsigo nego so o bašno zakukuričil, trin drom hohaveja kaj či pindžares man.”
35O Petar phendas lešće: “Te trubul vi te merav tuva, me nisar či mukava tut.” A gajda phendine vi e sa aver učenikurja.
O Isus molilpe ande Getsimanija
36Askal o Isus đelo e učenikonenca po than savo akhardolas Getsimanija, thaj phendas lenđe “Bešen akate dok me džav inća te molima.” 37Lijas pesa e Petre thaj e liduj Zevedejevešće čhaven, thaj astarda les e žalost thaj o pharipe. 38Askal phendas lenđe: “Mungri duša si žalosno dži ko smrto. Ačhen akate thaj aven džungade manca.” 39Askal đelotar cara majdur lendar, thaj pelo e mujesa dži ke phuv thaj molisajlo e alavenca: “Dade mungreja, te šaj, te naćhel man akava tahtaj patnje! Ali neka či avel mungri volja, nego ćiri volja.” 40Askal boldape ke trin učenikurja thaj arakhla len sar soven, thaj phendas e Petrešće: “Gajda askal, naštik ačhiline džungade manca ni jek sato! 41Ačhen džungade thaj molin tumen te či peren ande kušnje! Kaj o duho kamel te ćerel okova so si lačhe ali o telo si slabo.” 42Askal po dujto drom palem đelotar lendar thaj molisajlo e alavenca: “Dade mungreja, ako naj moguće te naćhel man akava tahtaj patnje, neka avel ćiri volja.” 43A kana boldape palem arakhla len sar soven. Lenđe jakha korkoro phandadonas. 44Palem mukla len thaj đelo po trito drom te molilpe iste alavenca. 45Askal boldape ke učenikurja thaj phendas lenđe: “Još soven thaj odmorin tumen? Ake, avili e vrjama kana me, o Čhavo e Manušesko, avava dino ande vas e bezehalenđe. 46Ušten! Hajde te džastar! Kaj, ake akate si okova savo izdaila man!”
O Isus izdajime thaj astardo
47Dok o Isus još ćerelas svato, areslo o Juda, jek katar e dešuduj učenikurja. A lesa avilo vi o but o them e mačonenca thaj e rovljenca, saven bičhaldine e šorvale rašaja thaj e themešće starešine. 48A e Isusesko izdajniko dogovorisajlo lenca kaj dela len znako. Phendas lenđe: “Saves čumidava, godova si. Les astaren.” 49Vo odma avilo džiko Isus thaj phendas lešće: “Zdravo, sikavneja!” thaj čumida les. 50A o Isus phendas lešće: “Manušeja, ćer godova pale soste avilan!” A e manuša askal aviline džiko Isus, čhutine e vas pe leste thaj astardine les. 51Thaj ande data jek katar okola save sas e Isuseja astarda pe palo mačo, inkalda les thaj peklas lesa e bare rašaješće sluga thaj čhindas lesko kan. 52Askal o Isus phenda lešće: “Bolde ćiro mačo pe lesko than, kaj svako ko astarelpe palo mačo, katar o mačo vi merela. 53Zar či haćares kaj šaj te zamoliv mungre Dade thaj vo odma bičhaldas manđe majbut milje anđelurja? 54Ali te ćerdem godova, sar askal pherdilesas e Svete lila, save phenen kaj gajda moraš te avel?”
55Askal phendas e themešće: “Teljardine pe mande e mačonenca thaj e rovljenca sago po razbojniko! Svako đes bešavas ando Hramo thaj sikavavas, pa ipak či astardine man. 56Ali, sa akava trubul te avel te pherdol okova so e prorokurja majsigo ramosardine pale mande.” Pe godova sa e učenikurja mukline les thaj našline.
O Isus po sudo angle židovske vođe
57Okola save astardine e Isuse inđardine les ko baro rašaj ko Kajafa, ke savo ćidinepe e sikavne e zakonestar thaj e starešine. 58A o Petar dadural džalas pale leste džike avlija e bare rašaješći, pa dijas andre ande avlija thaj bešlo e slugenca te dićhel so avela. 59E šorvale rašaja thaj sasto baro veće rodenas hohavne dokazurja protiv o Isus sar šaj te mudardinesas les. 60Ali či arakhline len vi ako pojavisajle e but e hohavne svedokurja. Napokon aviline duj džene 61thaj phendine: “Akava phendas: ‘Me šaj haravav o Hramo e Devlesko thaj pale trin đes palem te vazdav les.’”
62Askal uštilo o baro rašaj thaj phučla e Isuse: “Khanči či pheneja pe akava so phenen protiv tute?” 63A o Isus samo ačhelas. A o baro rašaj phendas lešće: “Dav tut solah e džude Devlesa te phenes amenđe dali san tu o Hristo, e Devlesko Čhavo?” 64A o Isus phendas lešće: “Tu korkoro phenes. Thaj još phenav tumenđe kaj katar akana dićhena man, e Čhave e Manušešće, sar bešav pe desno rig e Svemoćno Devlešće thaj avav pe nebeske oblakurja.”
65Pe godova o baro rašaj pharadas pe peste o ogrtači thaj phendas: “Hulil po Del! So trubul amen još svedokurja. Ake, akana ašundine lešći hula! 66So gndin?”
A von phendine: “Zaslužisardas smrto!”
67Askal čhungarenas e Isuse po muj thaj denas les dab e dumukhenca. A aver denas les dab e palmenca po muj 68thaj phenenas: “Prorokuisar amenđe, Hriste, ko dija tut dab!”
O Petar hohavel kaj či pindžarel e Isuse
69Dok o Petar bešelas avri ande avlija, avili dži leste varesavi sluškinja thaj phendas: “Vi tu sanas e Isuseja andar e Galileja!”
70A o Petar angle savorende hohadas: “Či džanav so phenes!”
71A kana đelo prema e kapija, dikhla les jek aver sluškinja, thaj phendas okolenđe save sas okote: “Vi akava sas e Isuseja andar o Nazaret!”
72Vo palem hohadas thaj još hala solah: “Či pindžarav godole manušes!”
73A cara pale godova aviline dži leste e manuša save sas okote thaj phendine: “Pa tu san čačes jek lendar! Izdail tut o galilejsko naglasko.”
74Askal o Petar počnisardas te hal solah e alavenca: “Hav solah kaj či pindžarav godole manušes!” Thaj odma zakukuričisarda o bašno. 75Vo askal dijape gođi so phendas lešće o Isus: “Majsigo nego so o bašno zakukuričil, trin drom hohaveja kaj či pindžares man.” Inkljisto andar e avlija thaj zurales rujas.
Currently Selected:
Matej 26: RČB
Highlight
Share
Copy
Want to have your highlights saved across all your devices? Sign up or sign in
