Diketso 20
20
Diketso 20
1Eitse hobane moferefere o kokobele, Pauluse a bitsa barutuwa, a ba kopa, a ntoo tloha, a ya Masedonia.
2Yare ha a haola le dibaka tseo, mme a ba kgothaditse haholo, a fihla Greece.
3A hlola teng kgwedi tse tharo. Eitse hobane Bajuda ba mo laletse, ha a se a tla kena sekepeng ho ya Siria, a rera ho kgutla ka Masedonia.
4Mme a felehetswa ho ya fihla Asia ke Sopatere wa Berea; le ho Bathessalonika, Aristakase le Sekundo; le Gaiase wa Derbe, le Timothea; le ba Asia, Tykikase le Trofimase.
5Bao ba re eteletse pele, ba re emela Troase.
6Haele rona, ra tloha Filipi ka sekepe, kamora matsatsi a mahobe a se nang ditomoso, mme ra fihla Troase ka matsatsi a mahlano. ra hlola teng matsatsi a supileng.
7Ka letsatsi la pele la beke, ha barutuwa ba phuthehile ho ngwatha bohobe, Pauluse a ba bolella molaetsa o molemo, a itokisetsa ho tloha hosasane. a tsoela pele ho bua ho fihlela har’a mp’a bosiu.
8Ho ne ho le mabone a mangata phaposing e kahodimo, moo ba neng ba bokane teng.
9Mohlankana e mong ya bitswang Eutikase, o ne a dutse fesetereng, a tshwarwa ke boroko bo boholo, mme yare ha Pauluse a ntse a bolela nako e telele, a welwa ke boroko, a wela fatshe a le mokatong wa boraro, mme a nkelwa a shwele.
10Pauluse a theoha, a itihela hodima sona, a se kopa ka matsoho, a re: “Le se ke la itshwenya; hobane bophelo ba hae bo ho yena.
11Eitse hobane a boele a nyolohe, a ngwatha bohobe, a ja, a bua nako e telele, ha ba ha esa, a ntoo ikela.
12Ba tlisa mohlankana eo a ntse a phela, mme ba tshediseha haholo.
13Haele rona, ra etella pele ho kena sekepeng, ra ya Asose, moo re neng re rerile ho palama Pauluse;
14Eitse ha a kopana le rona Asose, ra mo nka, ra ya fihla Mitylene.
15Ra tloha teng ka sekepe, hosasane ra fihla mabapa le Kiose; ka la hosasane ra fihla Samo, ra hlola Trogilliame; mme ka le hlahlamang ra fihla Mileta.
16Pauluse o ne a rerile ho feta Efese ka sekepe, e le hore a tle a se ke a qeta nako Asia;
17Ha a le Mileta, a romela Efese, a bitsa baholo ba kereke.
18Eitse hobane ba fihle ho yena, a re ho bona: Le a tseba, e sa le ka tsatsi la pele la ha ke fihla Asia, kamoo ke nnileng ka ba le lona ka teng ka dinako tsohle.
19Ke ne ke sebeletsa Morena ka boikokobetso bohle le ka meokgo e mengata le meleko e ileng ya ntlhahela ka ho lalla Bajuda.
20le kamoo ke sa kang ka le hanela kateng, ha e se ka letho leo le le ruitseng molemo ka lona, empa ke le tsebisitse, ka le ruta phatlalatsa le ka ntlo le ntlo.
21ke pakela Bajuda, le Bagerike, pako ho Modimo, le tumelo ho Morena wa rona Jesu Kreste.
22Jwale, bonang, ke ya Jerusalema ke tlamilwe moyeng, ke sa tsebe tse tla ntlhahela teng.
23haese hore Moya o Halalelang o paka motseng o mong le o mong, o re ditlamo le dihloriso di nkemetse.
24Empa ha ho le e ’ngoe ea lintho tsena e ntšusumetsang, ’me ha ke nke bophelo ba ka e le ba bohlokoa ho ’na, hore ke tle ke qete leeto la ka ka thabo le tšebeletso eo ke e amohetseng ho Morena Jesu ea ho paka Evangeli ea mohau oa Molimo.
25Jwale, bonang, ke a tseba hobane lona bohle bao ke tsamaileng hara lona ke ntse ke bolela tsa mmuso wa Modimo, ha le sa tla hlola le bona sefahleho sa ka.
26Ka baka leo, ke le pakela kajeno hore ha ke na molato mading a batho bohle.
27Hobane ha ke a ka ka tswafa ho le bolella morero wohle wa Modimo.
28Itebeleng, le hlokomele le mohlape wohle, oo Moya o Halalelang o le beileng balebedi ba wona, ho alosa kereke ya Modimo, eo o ithuetseng yona ka madi a hae.
29Hobane ke tseba sena, hobane ha ke se ke tlohile, ho tla kena hara lona diphiri tse harolang, tse sa qeneheleng mohlape.
30Le ho lona ho tla hlaha banna, ba tla bua ditaba tse kgopo, ho ikhulela barutuwa hore ba ba sale morao.
31Ka baka leo, fadimehang, mme le hopole hore ka dilemo tse tharo, bosiu le motsheare ha ke a ka ka kgaotsa ho eletsa e mong le e mong ka meokgo.
32Mme jwale, banabeso, ke le laeletsa ho Modimo, le ho lentswe la mohau wa wona, o nang le matla a ho le haha, le ho le nea lefa hara bahalaledi bohle.
33Ha ke a ka ka lakatsa silefera ya motho, leha e le kgauta, leha e le seaparo sa hae.
34Le lona ka bolona le a tseba hore matsoho ana a sebeleditse ditlhoko tsa ka le tsa bao ke neng ke ena le bona.
35Ke le bontshitse nthong tsohle hore ka ho sebetsa jwalo le tshwanetse ho thusa ba fokolang, le ho hopola mantswe a Morena Jesu, kamoo a itseng: Ho fana ho tlisa lehlohonolo le fetisang ho fuwa.
36Eitse hobane a bue jwalo, a kgumama, a rapela le bona bohle.
37Yaba ba lla bohle haholo, ba itihela molaleng wa Pauluse, ba mo aka.
38Ba hloname haholo ka baka la polelo eo a e boletseng, hore ba se ke ba hlola ba bona sefahleho sa hae. Yaba ba mo felehetsa ho ya fihla sekepeng.
Currently Selected:
Diketso 20: SothoNT
Highlight
Share
Copy
Want to have your highlights saved across all your devices? Sign up or sign in
Copyright of City Bible Foundation in cooperation with Baasraak Bible Translation from Baasraak Media © 2023.
