MARKA 12

Misur Takhaa ah Toksahkung Patahhaih

(Mat 21:33-46; Luk 20:9-19)

1 # Isa 5:1-2 Topacoengah Jesuh mah anihcae khaeah patahhaih lok hoiah a thuih pae: Zanghnii ah kami nongpa longto a oh moa misur takhaa to a sak; takhaa to paheet takui hmoek, misur pasawhhaih hanah tangqom to takaeh moa toephaih hanah buk maeto a sak. Topacoengah toksahkungnawk khaeah to a hlaisak moa angmah to kholong ah caehtak. 2Misur thaih to pakhrik tue phak na-ah angmah taham hnuk hanih to laksak hanah a misong longto a patoeh. 3Takhaa kahlainawk mah to a naeh o, a boh pae o moa tita doeh paek aiah amlaemsak o. 4Topacoengah takhaa tawnkung mah misong kalah to patoeh let bae; toksahkungnawk mah a lu ah a boh o moa azat ka om ah a sak o. 5Takhaa tawnkung mah misong kalah to patoeh let bae moa a hum o; misong kalah paroeai doeh ato batih toengah a sak o. Thoemto loa a boh a caep o moa thoemto loa paduek o. 6Patoeh hanah kanghmat loa palung phi ih a capa khueh ni ka om boah. Hnukkhuem koek ah a capa to takhaa kahlainawk khaeah to a patoeh moa, “Ka capa loa khangza o khaekhaeh tih,” tiah a tih. 7To-e takhaa ka hlaikungnawk loa, “Hi loa takhaa tawnkung ih capa ni. Angzo oh, hum o siloa a hmuenmae boih hae aicae iah om tih,” tiah longto hoi longto a ti o. 8Topongah a naeh o moa a hum o pacoengah a qok to loa takhaa laep bangah a vah o.

9“Totisoe nahaeloa takhaa tawnkung mah kawbangah maw sah tih?” tiah Jesuh mah a duengh pae. “Takhaa tawnkung to angzo ueloa takhaa ka hlaikungnawk to hum pacoengah takhaa to loa mi kalahnawk to a hlaisak tih. 10Cabu Kacai thungah:#Sam 118:22-23

‘Im sahkungnawk mah avang ai tiah

takhoe sut ih hlung to,

ka vang koek ah a coengh. 11Ato loa Angraeng mah sak ih ni;

aicae mikhnuk ah dawnrai ah oh!’ tiah

tarik ih to na kroek o vaih ai maw?” a naa pae.

12Judah kacoetanawk mah Jesuh to naeh hanah patoem o, kawmawtiah ato patahhaih lokthuih ih to anihcae thuihhaih ih ni tito a panoek o pongah ni. To-e mipui to a zit o pongah anih khae hoitoah tacawt moa a caeh o ving.

Tamut Paekhaih Kawng Duenghhaih

(Mat 22:15-22; Luk 20:20-26)

13Farasi kami thoemto hoi Herod ih kami thoemto loa Jesuh to lokduenghhaih hoiah a zaehaih pakrong hanah patoeh o. 14Anih khaeah to caeh o moa, “Patukkung, nang loa minawk mah kawbangmaw na thuih o tih, tito doeh aiah loktang to na thuih tito kang panoek o. Nang loa mi ih mikhmai doeh na khen ai moa mi pazit pakrawnhaih ih to na tawn ai. Sithaw koehhaih ih kawng loktang lok to ni loa minawk khaeah na patuk pae. Topongah kamnoek ta-ah na thui ah. Rom Sangpahrang khaeah tamut paek hae aicae ih Tawklok hoiah angdaeng maw, tiaibaloa angdaeng ai maw? Ka paek o han maw paek o han ai?” tiah a duengh pae o.

15To-e Jesuh mah anihcae ih laihacanhaih to a hnuk pae na-ah, “Tipongmaw thaang ah na mansak han na thuih o? Maku phoisa to angzoh haih oah, na khensak ah,” tiah a naa.

16Maeto a paek o moa anih mah, “Hi loa ami ih tungkraang hoi ahmin maw?” tiah a duengh.

Anihcae mah, “Sangpahrang ih tungkraang hoi ahmin,” tiah pathim pae o.

17Topongah Jesuh mah, “Totibaloa sangpahrang ih hmuen to loa sangpahrang to paek oloa Sithaw ih hmuen to loa Sithaw to paek oah,” tiah a naa pae.

Tona-ah anihcae loa a dawnrai o king.

Angthawklethaih Kawng Duenghhaih

(Mat 22:23-33; Luk 20:27-40)

18Topacoengah Sadusi thoemto, kami loa duek pacoengah loa angthawklet mak ai, tiah ka taangnawk to Jesuh khaeah angzoh o moa,#Tok 23:8 19“Patukkung, Mosi mah lokpaek tarik ih thungah ‘Kami nongpa longto a duek moa a catawn aiah a zu to caehtak sut nahaeloa caanawk to sak pae hanah a zuqawk to amnauk mah amthawn haih han a oh,’ tiah a oh.#Deut 25:5 20Vaito na-ah naukamza nongpa longsarihto a oh o; kacoeh koek loa zu a lak moa caanawk tawn aiah a duek. 21Ahlim ih amnauk mah a zuqawk to amthawn haih moa anih to doeh caanawk tawn aiah a duek bae. Ato batih toengah apathumhaih ih amnauk to mah ato nongpui to amthawn haih toengloeng let bae e a duek tak toengloeng bae. 22Kalahnawk boih doeh totiah a oh king. Nongpa longsarihto boih mah ato nongpui to angoh o haih boih moa caanawk to tawn aiah a duek o king. Hnukkhuem ah nongpui to doeh a duek toeng. 23Topongah angthawklethaih ih ni ah kadueh kaminawk boiboih angthawklet na-ah ato nongpui loa ami ih zu ah maw om tih? Longsarihto boih mah angoh o haih rip bae,” tiah a duengh pae o.

24Jesuh mah anihcae khaeah, “Na dawn pazae o hae loa! Tipongmaw na pazae o tito na panoek o maw? Cabu Kacai doehsoe, Sithaw hmuensak thaihaih ih doehsoe, na panoek o ai pongah ni. 25Kawmawtiah kadueh kaminawk angthawklet na-ah vannui ih vanminawk batiah om o ueloa zuva angohhaih ih om mak ai boah. 26Kami kadueh angthawklethaih ih kawng pongah loa Mosi ih Cabu thungah thingsabu hmai kangqong kawng to na kroek o vaih ai maw? Ato pongah to Sithaw mah Mosi khaeah, ‘Kai loa Abraham Sithaw, Isaak Sithaw, Jakob Sithaw ah ka oh,’ a tih.#Exo 3:6 27Sithaw loa kahing kaminawk ih Sithaw ah a oh, kadueh kaminawk ih Sithaw ah om ai. Nangcae loa na pazae o king!” tiah a naa.

Lokpaek Kalen

(Mat 22:34-40; Luk 1:25-28)

28Toah to lok aram ih ka thaih Tawklok patukkung longto a oh toeng. Jesuh mah Sadusinawk ih lokduenghhaih to pathim pae thaih parai tito a thaih na-ah Jesuh khaeah angzoh moa, “Lokpaek boih thungah kawbatih to maw a lokpui koek,” tiah a duengh pae.#Luk 10:25-28

29 # Deut 6:4-5 Jesuh mah, “Lokpui koek loa ahi ni: ‘Israel kaminawk tahngai oh! Aicae ih Angraeng Sithaw khueh ni Angraeng ah a oh.#12:29 Aicae ih Angraeng Sithaw khueh ni Angraeng ah a oh tihae Aicae ih Angraeng loa Sithaw ni, Angraeng khueh to tiah doeh thuih thaih. 30Angraeng na Sithaw to na palungthin boih hoi, na hinghaih boih hoi, na dawnhaih boih hoi, na thazung boih hoi palung ah.’ 31Apahnithaih lokpaek lokpui koek loa, ‘Na imdongpak to nangmah hoi nangmah to na palung batih toengah palung ah.’ Hi hnetto laep ah lokpui koek kalah lokpaek om ai,” a naa.#Lev 19:18

32Tawklok patukkung loa Jesuh khaeah, “A hoih parai, Patukkung! Na thuih ih batih toengah Angraeng khueh ni Sithaw ah oh moa sithaw kalah om ai, tito ahlong parai.#Deut 4:35 33Topongah Sithaw to na palungthin boih hoi, na poekdawnhaih boih hoi, na thazung boih hoi palung moa imdongpak to nangmah hoi nangmah palung batih toengah palung hae Sithaw khaeah boii angbawnhaih hoi angbawnhaih kalahnawk sak pongdoeh lokpui kue,” tiah a naa pae.#Hos 6:6

34Jesuh a lok pathimhaih ih loa a hoih parai tito panoek na-ah anih khaeah, “Sithaw Poenghaih hoitoah nang hla parai ai,” tiah a naa pae.

Topacoengah loa mita mah doeh lok to dueng o vam ai boah.

Messiah Kawng Lokduenghhaih

(Mat 22:41-46; Luk 20:41-44)

35Jesuh mah Tempal thungah patuk na-ah anih mah, “Tipongmaw Tawklok patukkungnawk mah Messiah loa David ih cadii ah om tih, tiah a thuih o thaih?” tiah a duengh. 36Cai Pakhra mah David khaeah:#Sam 110:1

‘Angraeng mah ka Angraeng khaeah to,

Na misanawk na khok hlimah kang suek airoek loa,

Hiah ka bantang bangah anghnu ah,’ tiah a naa.

37David angmah anih to ‘Angraeng’ tiah a kawk, totibaloa kawbangmaw David ih cadii ah om thaih tih,” tiah a naa.

Tawklok Patukkungnawk Acoe Oh

(Mat 23:1-36; Luk 20:45-47)

Kami zetpui mah Jesuh ih patukhaih to palung anghoehaih hoiah tahngaih o. 38A patuk pae na-ah Jesuh mah, “Tawklok patukkungnawk hae acoe aha oah. Anihcae loa kahni kathuk puipui hoi vawnsai zawhhaih hmuenh ah amkaeh o moa mimah khangza na soeloa loklaang na paeh o haih soe, tiah ka koehnawk ni. 39Sinakok ah anghnuthaih kahoih koek to a qoih o coek moa buhraeng sak na-ah anghnuthaih ahmuenh kahoih koek to a koeh o. 40Lumhmainawk to kamrai pakronghaih hanah a patoh o moa im lawk khoekto a lomh pae o. Tokhueh aiah mi boih mah hnuh soe ti koeh ah ka sawk puipui ah kho a phoeh o. Anihcae ih raekhaih loa nung aep tih,” a naa.

Lumhmai Nongpui Ih Paekhaih

(Luk 21:1-4)

41Jesuh loa Tempal phoisa suekhaih ih taengah anghnut moa tangka ka paeknawk to a khet pili. Angraeng kanang paroeainawk mah tangka zetpui pacaengh o. 42Tona-ah kamtang kamlai lumhmai longto angzoh moa rahumngan phoisa piahnetto to pacaengh toeng. 43Anih mah a hnukbangnawk to nawnto a kawk cu moa anihcae khaeah, “Kang thuih o: Hi lumhmai nongpui mah tangka tabu thungah kalahnawk boih pongdoeh kanoi koek ah pacaengh. 44Kawmawtiah kami kalahnawk loa a tawnh thungih kamhlai to a paek o; to-e hi lumhmai nongpui loa amtang nget eloa a tawnh ih boiboih to a pacaengh; zokzae angkokhaih hanah a tawnh ih boiboih to a paek kik,” tiah a naa.

Currently Selected:

MARKA 12: AKNT2023

Highlight

Copy