TOKSAKHAIH 11

Piter Mah Jerusalem Khrihca Kangkom Ah

1Gentel kaminawk mah doeh Sithaw lok to talawk o toeng boah tito Judea prae thungih kaom kawkpatoehnawk hoi taangca kalahnawk mah a thaih o. 2Piter to Jerusalem ah a caeh na-ah Gentel kaminawk to tangzat hin aahsak han ka koeh kaminawk mah thuihsae o moa, 3“Nang loa tangzat hin ka aat ai Gentel kaminawk ih im ah na toemh moa anihcae hoiah nawnto buh doeh na cak haih!” tiah a naa o. 4Topongah Piter mah hmuen ka omnawk kawng to takung amtong nahoiah kacung bit ah a thuih pae o.

5“Joppa vangpui ah kho ka phoeh li nathuemah hnuksakhaih ih to ka hnuk. Kahni kalenpui hoiah kahmong hmuen maeto, taki palito hoiah van bang hoitoah pakhrak tathuk ih to ka hnuk. 6Athung ah ka bih het moa imboii hoi tawmoinawk, ka zaan ka vak hmuensak kahingnawk hoi taw thungih tavanawk to ka hnuk. 7Topacoengah lok maeto mah ka khaeah, ‘Piter, angthawk ah, bop aloa caa ah!’ tiah a naa. 8To-e kai mah, ‘Angraeng, ka caa mak ai! Bokhaih bangah kathoeng ai hoi kanuen cak naek loa ka pakhaa thungah akun vaih ai,’ tiah ka naa. 9Tona-ah van bang hoi-ih lok mah, ‘Sithaw mah a cai tiah a thuih ih hmuen boih to loa cai ai tiah dawn hmah,’ tiah a thuih pae bae. 10Hitiah vaithumto a oh moa hnukkhuem aloa ato hmuen boih to van bangah lak tahang boih ah oh let. 11To tue nathuem ta-ah Sisaria bang hoitoah kai khaeah patoeh ih kami longthumto kai ka toemhhaih ih im ah to ang phak o. 12Tidoeh hnonghaih om aiah anihcae hoiah caeh roep hanah Pakhra mah ang thuih. Hi Joppa vang ih taangca ampui longtaruk tonawk hae kai hnukah Sisaria ah to ang baang o toeng moa Kornelias im ah ka kun o boih. 13Anih mah angmah im thungah vanmi longto kangdoe a hnuk ih kawng to ang thuih o. Ato vanmi mah, ‘Kami longto a hmin kacung Simon Piter to kawk hanah Joppa vang ah kami longlongto patoeh ah. 14Anih mah nang khaeah lok thui ueloa ato lok thuihhaih ranghoiah nangmah hoi na imthungtako boih to pahlong ah om o tih,’ tiah a thuih. 15Topacoengah lokthuih kamtong na-ah atangsuek ah aicae khaeah angzoh batih toengah anihcae nuiah doeh Cai Pakhra to angzoh toeng. 16Tona-ah Angraeng mah, ‘Johan mah tui hoiah baptisma to a paek, to-e nangcae loa Cai Pakhra hoiah baptisma to paek ah om tih,’ tiah a thuih ih lok to palung thungah ka dawn let.#Tok 1:5 17Aicae mah Angraeng Jesuh to taang o na-ah Sithaw mah langrae ang paek o batih toengah Gentel kaminawk doeh Sithaw mah a paek pae toengh tito kacaipin ah amtueng; topongah kai hae ami ah maw ka oh moa Sithaw to ka pakaa thai halat tih?” tiah a naa pae.

18Ato lok to a thaih o na-ah thuihpronghaih ihnawk to a toengh o, Sithaw to pahlaw o moa, “Sithaw mah Gentel kaminawk doeh dawnpakhuem moa hingh hanah atue kahoih to a paek pae o toengh,” tiah a thuih o.

Antiok Ah Khrihca Kangkom

19Stefen a hum o pacoeng pacaekhlaekhaih ih ka om ranghoiah taangca thoemtonawk loa vang kruekah anghaeh o dung. Kami paroeai loa Fonisia, Saiparas hoi Antiok khoekto a caeh o moa Judah kaminawk khae khueh ah tamthang lok to a thuih o.#Tok 8:1-4 20To-e Saiparas hoi Sairin vang ih taangcanawk loa Antiok ah to a caeh o moa, Gentel kaminawk#11:20 Gentel kaminawk tihae thoemto banrikcabu pongah loa Grik lok kapae Judah kaminawk tiaibaloa Grik lok kapae kaminawk tiah oh. khaeah doehsoe tamthang lok to taphong o moa Angraeng Jesuh ih kawng Tamthang Kahoih to a thuih pae o. 21Angraeng ih tharahhaih ih anihcae khaeah a oh moa kami katingai mah a taang o moa Angraeng bangah to angqoi o.

22Ato tamthang to Jerusalem ih kaom Khrihca kangkom khaeah a phak moa topongah Barnabas to Antiok vang ah to patoeh o. 23A phak moa Sithaw mah natanto maw kaminawk to tahamhoihhaih a paek tito a hnuk na-ah palung anghoe moa Angraeng to palungthin boiboih hoiah oepom ta-ah oh han hoi palungthin tang hoiah kangcak ta-ah oh hanah anihcae boih to tha a paek. 24Barnabas loa kami kahoih ni, Cai Pakhra hoi taanghaih hoiah kakoi kami ah oh moa kami paroeai to Angraeng khaeah angzoh haih.

25Topacoengah Barnabas loa Saul to pakrong hanah Tarsas vang ah to a caeh. 26A hnuk na-ah Antiok vang ah to a caeh haih moa sangto thung anih hnit loa Khrihca kangkom kaminawk hoiah angqum o moa kami katingai to a patuk.

27To tue thuemtham ah tahma thoemto loa Jerusalem hoitoah Antiok ah to a caeh o. 28Anihcae thungih longto ahmin Agabas naa pae ih to angdoet moa longnui bum boih ah takang kana parai to angthoh tom boah tito Pakhra tharahhaih ih hoiah a thuihcoek. (Ato caknaek manghaih takang loa Klaudias to Rom ukkung sangpahrang tok nathuemah a thoh).#Tok 21:10 29Hnukbangnawk loa a sak o thai roekto ah Judea prae ih kho ka sah taangca naukamzanawk to abomhaih pat thai hanah lok a thuih o. 30Totitoah a sak o pacoengah abomhaih tangka to Barnabas hoi Saul ban ah Khrihca kangkom kacoetanawk khaeah to a pat o.

Currently Selected:

TOKSAKHAIH 11: AKNT2023

Highlight

Copy