YouVersion Logo
Search Icon

TOKSAKHAIH 10

10
Piter hoi Kornelias
1Samaria vang ah nongpa longto a oh moa ahmin loa Kornelias ni; anih loa “Itali Risa Bupui” naa pae ih Rom risa bupui ukkung risa angraeng ni. 2Anih loa bokhaih bangah palungthin kangpaek kami ah oh moa angmah hoi a imthungtako bum boih mah Sithaw to a bok o. Anih loa Judah kami kamtang kamlainawk to doeh katingai abom moa Sithaw khaeah khophoeh toemoe. 3Vaito loa aduembang nitue thumto na-ah thuemtham ah hnuksakhaih ih to a hnuk; ato hnuksakhaih ih thungah Sithaw ih vanmi longto angzoh moa, “Kornelias!” tiah ka kawk to kacaipin ah a hnuk.
4Anih loa zithaih hoiah mik pakhrip aiah a khet moa, “Timaw ka om, angraeng?” tiah a naa.
Vanmi mah, “Sithaw mah nang ih khophoehhaih hoi kamtang kaminawk na bomhaih ihnawk to ang talawk pae moa na hnik ih to a thaih boah. 5Topongah vaihiah Joppa vang ah Simon Piter to kawk hanah kami thoemto patoeh ah. 6Anih loa tuiculi taengah kho ka sah, moihin im ka sahkung Simon im ah anghak,” tiah a naa. 7Topacoengah loa vanmi loa a caeh ving moa Kornelias mah angmah im ih tamtoeh longhnetto hoi risa longto a kawk; ato risa loa bokhaih bangah palungthin ka caeh kami ah oh moa angmah ih congkungnawk thungih longto toeng ni. 8Anihcae khaeah hmuen ka omnawk boiboih to a thuih pae moa Joppa vang ah to a thak.
9Akhawnbang athun thuemtham ah Joppa vang a phak o tom na-ah Piter loa khophoeh hanah imnui ah a dawh. 10Anih loa zok amhlam moa maemaeto cak hanah a koeh; cak naek to patoem nathuemah hnuksakhaih ih to a tawnh. 11Anih loa van to kam-ong moa kahni kalenpui hoiah kahmong hmuen maeto taki palito hoiah long ah pakhrak tathuk ih to a hnuk. 12A thungah loa khok palito ka tawn tawmoi congca boih, ka zaan ka vak tawmoi congca boih hoi taw thungih tava congca boih to a oh. 13Lok maeto mah anih khaeah, “Piter, angthawk ah, bop aloa caa ah!” tiah a naa.
14To-e Piter mah, “Ka caa mak ai mue, Angraeng! Tawkcah bangah kathoeng ai hoi kanuen to loa tidoeh ka caa vaih ai,” tiah a naa.
15Tona-ah lok mah anih khaeah, “Sithaw mah tihmuen doeh a thoeng tiah thuih ih to loa thoeng ai tiah dawn hmah,” tiah a naa pae bae. 16Hi hmuen hae vaithumto roekto a oh moa topacoengah loa van bangah lak tahang let ah oh.
17Ato hnuksakhaih ih thuihkoehhaih kawng to Piter mah dawn anghmang li nathuemah Kornelias mah patoeh ih kaminawk Simon ih im to pakrong o moa vaihi khongkha hma-ah to angdoet o. 18A kawk o moa, “Hiah Simon Piter naa pae ih angvin to oh maw?” tiah a duengh o.
19Piter loa hnuksakhaih ih thuihkoehhaih to thaihkop hanah a panki li na-ah Pakhra mah, “Tahngai ah! Kami longthumto#10:19 Longthumto thoemto banrikcabu pongah thoemto banrikcabu maeto pongah hnetto mah nang to ang pakrong o. 20Topongah coengcoe ah om aloa ahum tathuk ah, anihcae hoiah nawnto caeh hanah hnong hmah, kawmawtiah anihcae khaeah kang patoeh boah,” tiah a thuih pae. 21Topongah Piter loa ahum tathuk moa ato kaminawk khaeah, “Nangcae mah pakrong o ih loa kai hae ni. Ti kangtoeng maw nangzoh o?” tiah a naa pae o.
22Anihcae mah, “Risa angraeng Kornelias mah ang patoeh o. Anih loa kami kahoih hoi Sithaw ka bok kami ah oh moa Judah kaminawk boih mah paroeai khangza o ih kami ni. Thuih hanah na tawnh ih to a thaih toeng hanah Sithaw ih vanmi longto mah nang to angmah im ah kawk hanah a thuih pae,” tiah a naa o. 23Piter mah ato kaminawk to im thungah akun hanah a kawk, duemto loa iih rae hanah a pacae pae o moa toah to a toemh o.
Akhawnbang loa amsak o moa anihcae hoiah nawnto a caeh o; Joppa vang ih taangca thoemto loa anih hoiah a caeh o nawn. 24Omvaih ah loa Sisaria ah to a phak o moa toah to Kornelias mah angmah ih sakawnawk hoi angmah ih ampui kahnai a pacae ihnawk hoiah nawnto ah anih to a zing o. 25Piter loa akun dui na-ah Kornelias mah a dawt moa a hma-ah tabok. 26Piter mah, “Angdoe tahang ah, kai doeh kami ah ni ka oh toeng,” tiah a naa. 27Im thungah akun na-ah Piter loa Kornelias to lok apaeh haih, toah to kami paroeai kamkhueng to a hnuk. 28Anihcae khaeah, “Nangcae mah Judah kami loa Gentel kaminawk khaeah paqai hoi angkom haih hanah bokhaih bangah tawk mah pakaa tito kacaipin ah na panoek o. Kawmawtiah Sithaw mah ami doeh bokhaih bangah ka thoengcai hoi kanuen tiah ka dawn han aiah Sithaw mah kai hae ang patuek boah. 29Topongah kai nang kawk na-ah aekhaih tita doeh om aiah kangzoh. Totibaloa tipongmaw kai hae nang kawk o? Na thui oah?” tiah a naa.
30Kornelias mah, “Ka laem tangcae ni thumto, hitih tue thuemtham duembang nitue thumto na-ah kaimah im thungah kho ka phoeh.#10:30 kho ka phoeh; thoemto banrikcabu ah loa buhzah hoi khophoeh tiah a oh. Nawnetta ah kahni kanglung kang khuk kami longto kai ih hma-ah to angdoet moa 31anih khaeah, ‘Kornelias! Sithaw mah nang ih khophoehhaih to a thaih boah moa kamtang kamlai kaminawk abomhaih na sak ihnawk to doeh panoek boah. 32Joppa vang ah kami longto patoeh aloa ahmin Simon Piter to kawksak ah. Anih loa tuiculi taengah kho ka sah, moihin ka sahkung Simon im ah to a toemh,’ tiah a thuih. 33Topongah nang to kang kawksak phrat, nangzoh thai moa a hoih boah. Angraeng mah nang khaeah thuih ih lok to tahngaih hanah vaihi kaicae boih hae hiah Sithaw hma-ah ka oh o,” tiah a naa.
Piter Ih Lokthuih
34Piter mah, “Sithaw mah kami boih hae vanto ah a khet tihae loktang ni tito vaihi loa ka panoek boah.#Deut 10:17 35Anih to ka bok kaminawk hoi hmuen kahoih ka sah kaminawk loa kawbatih caeng kami doehsoe talawk. 36Kami boiboih ih Angraeng ah ka om Jesuh Khrih ranghoiah angdaehhaih ih Tamthang Kahoih taphong moa Israel kaminawk khaeah Sithaw mah paek ih kawng to na panoek o. 37Johan mah baptisma kawng a thuih pacoengah Galili prae thung hoitoah amtong moa Israel prae thung boih ah hmuen kalen parai kaom kawng to doeh na panoek o. 38Nangcae mah Nazareth Jesuh to Sithaw mah kawbangmaw Cai Pakhra hoi tharahhaih to a paek tito na panoek o. Anih loa vang kruekah a caeh, hmuen kahoih to a sak moa Diabol ih tharahhaih thungah kaom kaminawk boih to ngantuisak, kawmawtiah Sithaw loa anih khaeah a oh pongah ni. 39Israel prae thung hoi Jerusalem vang thungah a sak ih cungriboih panoekkung saksi kaicae hae ni. Topacoengah anih to hum o moa kraws nuiah takhing moa a hum o. 40To-e ni thumto pacoengah Sithaw mah duekhaih thung hoitoah angthawksak let moa takbum amtuengsak, 41mi boih khaeah khueh na ai moa Sithaw mah qoih coek ih panoekkung saksi ah ka om kaicae khaeah khueh ni amtueng. Duekhaih thung hoitoah angthawklet pacoengah angmah hoiah cak o nawn moa naek o nawn. 42Kaminawk khaeah tamthang lok thuih han hoi anih loa kahing hoi kadueh kaminawk ih lokcaekkung ah Sithaw mah pahnut tih kami ni tito saksi ah angdoet haih hanah kaicae hae lok ang paek boah. 43Tahmanawk boih mah anih ih kawng to a thuih o moa angmah ka taang kaminawk boih loa a hmin tharahhaih ranghoiah anihcae ih zaehaih to tahmen ah om tih,” tiah a naa pae.
Gentel Kaminawk Mah Cai Pakhra Hak O
44Piter mah lokthuih li nathuemah a lok tahngai kaminawk boih nuiah Cai Pakhra to ahum tathuk. 45Sithaw mah angmah ih Cai Pakhra langrae to Gentel kaminawk nuiah doeh a kruenhthuih toengh tito Piter hoiah kangzo nawn Joppa vang ih Judah taangcanawk mah a hnuk o na-ah loa a dawnrai o. 46Kawmawtiah anihcae loa panoek ai lok apaeh o moa Sithaw lensawkhaih to pahlaw o. Piter mah, 47“Hi kaminawk mah doeh aicae batih toengah Cai Pakhra to a hak o boah. Totibaloa tui hoiah baptisma hak hanah mimah maw pakaa thaih tih?” tiah a naa. 48Topongah Jesuh hmin hoiah baptisma hak hanah lok a paek. Topacoengah anihcae to ni zetta thung oh haih rae hanah pacae pae o.

Currently Selected:

TOKSAKHAIH 10: AKNT2023

Highlight

Share

Copy

None

Want to have your highlights saved across all your devices? Sign up or sign in