Matiə 22
22
Sokpaa wɩrɛraakɛ wɩ wenɩ dɩkorra
(Lu 14:15–24)
1Dɩ Jeju bire gba thɩmɩa wo da‐n mɩɩna wɩ na sokpaa ayɩ: 2Ƴũ fãgadaar do, gɩ hʋrɛ fãgadaarɩkɛ kɔɔ cʋɛnɩ fɛtɩ ɔɔ bikuuni herra. 3Agɩpɩ a thʋɔn ɔɔ thɔ̃daarsɔ wɩ jala wɛ wɩrɛ wɩ kɔɔ soronɩ wɩ pɔ he fɛtɩrara, sɩ wa kɔɔ tu na pɔaˈ. 4Dɩ a bire thɔ̃ thɔ̃daar kpɩɩsɔ wo a so war ayɩ: Nɩ sɔ wɩrɛrara wɩ wenɩ ayɛwɔɔ: Nɩ hɩnɛ, mɩ gbɛbɩrɛ he fɛtɩ dɩkorra pɩ, mɩ kʋʋrɛ nakena, a kʋʋrna nʋ̃ ƴɩkhasɔ wa khʋɔn kpãkpalã ga; thɩ̃ɛ fɛʋ gbɛbɩrɛ pɩ, nɩ ɩna he fɛtɩrara mɛ̃. 5Sɩ wa thernanakɛ werɩle wɩ we wɩnaˈ; sɩ ʋ n gbaar da‐n jal ɔɔ lɔɔ, ʋ n gba da‐n jal ɔɔ ƴabɩ pa. 6Sɩ wɛ fʋ thɔ̃dara a hʋɔlɔ sa kʋʋr wɩ. 7Dɩ nĩkhii fʋrɛ fãgadaarɩle dɩ thɔ̃ ɔɔ sɔrasɩsɔ, dɩ wɩ bũburõ tɩɩ kʋʋrdaraalera sa thii wi dɩɩ. 8Dɩ agɩpɩ a sor ɔɔ thɔ̃daarsɔrara ayɩ: Gɩdonɩ he fɛtɩ dɩkɔ gbɛbɩrɛ pɩ, sɩ wɩrɛ wɩ kɔɔ wenɩ dɩ ga do wɩ teena gɛraˈ, 9gɛr gɩ, nɩ jala hʋ lee paarsɔ a wɛ wɩrɛ fɛʋʋkɛ nɩ yɩnɩ, wɩ ɩ̃ he fɛtɩra. 10Dɩ thɔ̃daraale ɩɩr jal hʋɛsɔrara a khɩɩ wɩrɛ fɛʋʋkɛ wɩ yɩnɩ, tɩɩ puusɔ na tɩɩ bɔɩsɔ, dɩ welela wɩ wenɩ a pɔna wɩ hire he dɩko kho paar. 11Dɩ fãgadaarɩle lʋʋn da‐n hɩɩn wɩrɛ tɔɔnɩ dɩko kho paarra, dɩ a yɩrɛ le kũu bɩɛlɩkɛ na tɔnɩ he kɩ̃kɩɩnaˈ. 12Dɩ a buleele: Ɩ̃ kuun, mɔ̃ fɩ fʋ sa lõ kɩɛr, sɩ fa to he kɩ̃kɩɩnaˈ; dɩ kuunile pɩr pɔbɩ. 13Le fãgadaarɩle so thɔ̃darara: Nɩ fʋɔnɛɛ a le nɛɛ na nyɛ̃ɛ a dɔna faa jɩɛra dabirə paar, ka wa bɩnɩ wa‐n yɩrna nyɩma.#Mat 8:12; 25:30; Lu 13:28 14Gɩdonɩ wɩrɛ wɩ wenɩ wɩ jɔrɛ kpɛ, sɩ wɩrɛ wɩ phiirni wa kpɛraˈ.
Sejaarɩkɛ dɔnɩ Rɔmɛ̃ fãgadaarɩ lãpho thɩmɩɩ
(Mar 12:13–17; Lu 20:20–26)
15Le jɔfʋ bʋ dʋdarasɔ jal dɩ wa‐n gʋʋr kha, mɔ̃ wa fʋnɩ sɩ na nɔ Jeju thɩmɩɩraakɛ a na mɩɩnɩ. 16Dɩ wɩ thʋɔn ɔɔ pa awɩ kpãkpãadarasɔ na Ɛrɔɔdɩɩ too, dɩ wɩ sʋʋraa ayɩ: Dɩɩrdaar, sɩ jɩrɛ dɩ sobɔ tibil fɩ do, dɩ fɩ‐n dɩɩrɛ dakha Thãgbaa hʋ na sobɔr sɩ fa‐n ma tibiləˈ, gɩdonɩ fa‐n hɩɩn tɩbɩla dɩɩdɩaˈ; 17dɩ gɛr gɩ sɔ sar mɔ̃ fɩ yɩɛnɩ dɩɩ ha. Gɩ teere kha dɩ sa lɩmɩ Sejaar lãpho yaa, ga tee kha ga. 18Sɩ gɩdonɩ Jeju jɩrɛ awɩ bɩ̃ kpal thɩmɩɩ, a birse wer: Nɛr bɩnɛ yenyɔdara, mɔ̃gɩdo dɩ na‐n fifilə mi? 19Nɩ nɛ mar warɩkɛra nɩ‐n gbanɩ dɩ nɩ lɩmɩ lãphora. Dɩ wɩ gba war birera a pɔna. 20Dɩ a bule wer: Amɛ ha ʋrɛ fotoraakɛ, dɩ amɛɛ khere ha gɩrɛ? 21Dɩ wɩ birsee: Sejaar gɩ. Dɩ mɛ̃ a so war ayɩ: Nɩ ˈlaanɛ Sejaarra gɩrɛ dɔnɩ Sejaarɩda, a ˈlaanɛ Thãgbara gɩrɛ dɔnɩ Thãgbaada. 22Dɩ nʋɔ kɔɔ kpaa wɛr thɩmɩɩraale wɩ kɔɔ nɩɛnɩ, dɩ wɩ gba faa sa jal kɔ̃.
Khi ɩɩr thɩmɩɩr
(Mar 12:18–27; Lu 20:27–40)
23Ga wi bɩɛlɩlera Sadʋsɛ̃ɛsɔɔkɛ n yɛnɩ khi ɩɩrɛ na halaˈ, pɔr Jejura a bulee bulele thakɛ ayɩ:#Th t t 23:8 24Dɩɩrdaar, Mʋɩjɩ kɔɔ sor ayɩ: “A tibil hana khɛr sa khi sɩ bɩsaan na halaˈ, ɔɔ õkuun n gba khikhɛrʋʋlera a hɛ a kɔna bɩsana wɩ do ɔɔ õkuuni məl.”#Dət 25:5 25Sɩɩ do õkona makonyɔ wɛ a kɔɔ hale asɩ thɩ̃thɩɩn, dɩ cacadaar kɔɔ her khɛr a khi, sɩ gɩdonɩ bɩsaan na halaˈ dɩɩ do ɔɔ õkuunna a faa khɛrɩle mɛ̃. 26Thalera gɩ kɔɔ ha na balanyɔdaar, agɩpɩ na balãtherdaar, a jalna thalera waa a ba dana makonyɔdaar. 27A wele pɩ fɛʋ na pɩ, khɛr dakha khire. 28Dɩ gɛr gɩ, ado khe na ɩɩrɛ na the khirera, ʋmɔ̃ wɛr makonyɔra na hɩna khɛrɩlera dɩphã gɩrɛ, gɩdonɩ wɛr fɛʋra kɔɔ hɩɛ.
29Dɩ Jeju birse wi: Jaa, nɩ buure waa fĩi koe, gɩdonɩ na jɩ Thãgbaa sɛbɛ na Thãgbaa fãga ga, gɛr gɩ. 30Gɩdonɩ ado khe na ɩɩr na the khirera, kona na he khɛra bã, dɩ khɛra dakha na he kona bã, sɩ wa hʋrɛ Thãgbaa thɔ̃thɔ̃daar thusɔɔkɛ hanɩle Thãgbaa dʋɔ. 31Sɩ ado khee ɩɩr gɩ, na kɔɔ yɩɛ le Thãgbaa sɛbɛra gɩrɛɛkɛ Thãgba so narnaa? 32Mee ayɩ: “Ɩnɛr dʋɔn Abɩrahamɩ Thãgba, na Ɩjakɩɩ Thãgba, na Jakɔbɩɩ Thãgba.” Thãgba na do khee Thãgba ga, sɩ wɩrɛ hananɩ yiree Thãgba a do.#Thɩɩ 3:6 33Dɩ tibil jɔɔkɛ hanɩle dɩ wa‐n pɛ nũu, nʋɔ kɔɔ kpaa wɛr Jejuu dɩɩrra.
Thãgbaa caca jɔfʋ
(Mar 12:28–34; Lu 10:25–28)
34Mɔ̃ jɔfʋ bʋ dʋdara kɔɔ nɩɛnɩ dɩ wɩ yɩ, a cʋʋrɛ wɩrɛ n yɛnɩ khi ɩɩrɛ na halaˈ, dɩ wa yɩ nʋɔ bã, wɩ kpar kha a pɔ. 35Dɩ tibil bɩɛl wɛrraakɛ dɔnɩ jɔfʋ dɩɩrdaar ɩɩrnanaa bule ʋrɛ wo, da‐n fifiləə a hɩɩn ayɩ:#Lu 10:25–28 36Dɩɩrdaar, ʋmɔ̃ dɔrakɛ gɩrɛ jɔfʋ kɔ̃tɩ̃ɩ a jɔ jɔfʋsɔ fɛʋ? 37Dɩ Jeju birsee: “Dɔ fa‐n na Kɔ̃tɩn afɩ Thãgba na afɩ bɩ̃ fɛʋ, na afɩ ha fɛʋ, na afɩ kpɩɛr fɛʋ.”#Dət 6:5 38Ɔr dʋɔn cacadaa, kɛ kɔ̃tɩnanɩ a jɔ jɔfʋsɔ fɛʋ. 39Dɩ yɛ kɛ balanyɔdaa wo kɛ n hʋɔnɛɛnɩ: “Dɔ fa‐n na afɩ ˈwalãkha tibil mɔ̃kɛ fɩ‐n nanɩ afɩbara.”#Lev 19:18 40Jɔfʋ yenyɔraakɛ jɔfʋ fɛʋ na Thãgbaa bobonasɔɔ so jəəro yʋʋ fɛʋ.
Mesɩ na Davɩdɩ
(Mar 12:35–37; Lu 20:41–44)
41Mɔ̃ jɔfʋ bʋ dʋdarasɔ kpanɩ kha a jɛ, Jeju bule wer thɩ̃ɛ ayɩ: 42Anye nɩ‐n kpɩɛrna Kirisiti? Amɛɛ bikuun a do? Dɩ wɩ birsee: Davɩdɩɩ Bikuun gɩ. 43Dɩ Jeju so war: Dɩ mɔ̃ gɩ fʋ sɩ Thu Phuu cʋʋ Davɩdɩ da‐n wɩɩ Kɔ̃tɩn, ɔbɔɔkɛ a sonɩ ayɩ:
44“Thãgba sor ɩ̃ Kɔ̃tɩna ayɩ:
Tɔɔ ɩ̃ nyɔ̃bɔra,
phaphapha ɩ̃ cʋʋ afɩ lãlaardara wɩ do afɩ nɛ jəəda.”#Khɩ 110:1
45Dɩ ado Davɩdɩ n wɩɩrɛ Kɔ̃tɩn thale, mɔ̃ a na fʋ sɩ na do ɔɔ bikuun?
46Dɩ tibil bɩɛllakɛ na puno na deeraa ga. Dɩ a fʋna ga wiile tibil na‐n ˈla dɩ bulee thɩ̃ɛ bã.
Currently Selected:
Matiə 22: LOBIRI
Highlight
Share
Copy
Want to have your highlights saved across all your devices? Sign up or sign in
Bible Society of Burkino Faso 1985.
