Matiə 17

Kɩɛr Jejuu tomɩ debi

(Mar 9:2–13; Lu 9:28–36)

1A wire maadõ ka pɩ, Jeju kpar Pɩɛr na Jakɩ na Jã Jakɩɩ õkuun, dɩ wɩ jal kha pa kpɩɩ a jʋʋn gɔ̃gɔ̃ gbaana.#2 Pɩ 1:17–18 #Jən 22:2; Dət 18:15; Khɩ 2:7; Eja 42:1; Mat 3:17; 12:18; Mar 1:11; Lu 3:22 2Dɩ Jejuu tomɩ debire awɩ ƴɛ thɩ̃thɩɩn, dɩ ɔɔ ƴɛ na‐n carbara mɔ̃ wire n carbaranɩ, ɔɔ kẽkẽsɔ debi a bulolo phõphõphõ mɔ̃ dahɩrɛ n hanɩ. 3Dɩ hɩnɛ Mʋɩjɩ na Elɩ kɔɔ the warɛ dɩ wa‐n khʋɛ kha na Jeju. 4Dɩ Pɩɛr so Jejura: Kɔ̃tɩn, gɩ bɔrɛ sɩ hanɩ kɩɛr. Ado fɩ ture, ma dʋrɛ waa yẽther kɩɛr, bɩɛl n do afɩda, bɩɛl n do Mʋɩjɩɩda, bɩɛl n do Elɩɩda. 5Mɔna a hanɩ mɩɩrɔ, ndɔlɔ̃pa bulo phɩphɩphɩl gbune a thi war. Dɩ hɩnɛ nʋɔ ther le ndɔlɔ̃paarrara ayɩ: Ʋrɛɛkɛra dʋɔn ɩ̃ Bikuunikɛ mɩ‐n nanɩ, a lõ mer haar kpɛ. Na‐n pɩɛ nũu. 6Ɔbɔɔkɛ kpãkpãadara nɩɛnɩ nʋɔɔle, wɩ jiire sumo thɩɩra, gɩdonɩ maar fʋlɛnɛ wɩ jɔɔ ka. 7Sɩ Jeju tɔr dã wɩ a tha war sa so war: Nɩ ɩrɛ, na‐n do maar n fʋ naˈ. 8Dɩ wɩ gbaar ƴɩɛ na hɩɩn, wa yɩ tibil saagado Jeju gɩ dɩbara gaaga. 9Mɔ̃ wɩ thenɩ gɔ̃gʋɔna dɩ wa‐n gbũ, Jeju kpãkpãa warɛ thakɛ ayɩ: Na‐n gba thɩ̃ɛɛlera nɩ yɩnɩ a mɩɩ tibil bɩɛllakaˈ, phaphapha mɛr tibili Bikuun n ɩɩr ɩ̃ the khirera.

Kɩɛr kpãkpãadara bule Jeju Elɩɩda

10Dɩ kpãkpãadara kɔɔ bulele Jeju ayɩ: Dɩ a thale gɩ, mɔ̃gɩdo dɩ jɔfʋ dɩɩrdarasɔ na‐n so ayɩ: Elɩ kɔɔ teana a ɩna ɓo?#Mal 4:5 11Dɩ birse wi: Sobɔr gɩ wer, Elɩ na ɩna na wɛbɩ thɩ̃ɛ fɛʋ. 12Sɩ mɩ so narɛ Elɩ kɔɔ mãa ɩɩn sɩ wa kɔɔ jɩaˈ, sa cʋgʋʋ mɔ̃ wɩ pɛrnɩ haar. Dɩ ɔmɛna wa gaar gɩrɛ mɛr tibili Bikuun.#Mat 11:14 13Dɩ liir kpãkpãadara jɩ dɩphã dɩ Jã Batɩsɩtɩɩda a mɩɩ wɩ.

Kɩɛr Jeju wee kɔ̃tɛɛbuukɛ hanɩ bɩsaanna

(Mar 9:14–29; Lu 9:37–43)

14Ɔbɔɔkɛ wɩ kɔɔ danɩ tibil jɔ, kũu bɩɛl pɔr a gulẽga Jejura a sʋʋraa: 15Kɔ̃tɩn, jɛ ɩ̃ bikuun bʋɔra, gɩdonɩ ji khidaar gɩ da‐n gaar jɔɔ ka. Dɩ wire wire a‐n ji dɔɔ na nyʋɔnɔ. 16Dɩ mɩ kɔɔ kpaarɛ ha afɩ kpãkpãadara, sɩ wa kɔɔ punoo a kpɛaˈ. 17Dɩ Jeju birse: Nɛr nĩ babala na puu cʋʋdaraakɛɛ, ʋmɔ̃ bɔɔ ma thʋ̃ na toona nɩnakɛ gɩ dana? Dɩ ʋmɔ̃ bɔɔ ma thʋ̃ na fʋ nar haarrarakɛ gɩ dana? Nɩ kpaa ɛna mar kɩɛr. 18Dɩ Jeju mananɛ kɔ̃tɛɛbuule dɩ the bɩsaannaale, dɩ dapaara a kpɛɛrɛ.

19Dɩ kpãkpãadara tɔr pɔ Jejura a bulee hɛllɩ ayɩ: Mɔ̃gɩdo dɩ ser na kɔɔ puno a wee kɔ̃tɛɛbuulera a fa ga? 20Dɩ Jeju birse wi ayɩ: Gɩdonɩ anɩ ha pɛ na kpɛraˈ, gɛr gɩ. Sobɔr mɩ so nar, ado nɩ hananɛ ha pɛrɛ dɩɩ ho seneve bireekɛ n hanɩ fɩɩʋ, na punone na so gɔ̃gʋɔnaakɛ nayɩ: Ələ kɩɛr a jala pal, dɩ a na əlle na jal. Dɩ thɩ̃ bɩɛl na hale dɩ na thʋnɔ kpɩɩrakaˈ.#Mat 21:21; Mar 11:23; 1 Kor 13:2 [ 21Sɩ kɔ̃tɛɛbu ca ʋrɛ na ha therra na the, saagado Thãgba bɩɛlɛ gɩ na nɔ lirəə ga.]

Kɩɛr Jeju bir mɩɩ ɔɔ khi na ɔɔ khi ɩɩr

(Mar 9:30–32; Lu 9:43–45)

22Dɩ ɔbɔɔkɛ wɩ hanɩ dɩ wa‐n kpaar Galile, Jeju so warɛ ayɩ: Wa fʋrɛ mɛrkɛ dɔnɩ tibili Bikuun na ha tɩbɩla, 23dɩ wa kʋ mɩ, sɩ wire yẽther wirera ma ɩɩrɛ a na the khirera. Dɩ wɩ gbobire jɔɔ ka.

Jeju lɩmɩnɛ Thãgba fʋɔr cɔ lãpho

24Ɔbɔɔkɛ Jeju na ɔɔ kpãkpãadara danɩ Kapɛrnayʋm dɩɩ, wɩrɛ n gbaannɩ Thãgba fʋɔr cɔ lãpho wer Pɩɛr a bulee ayɩ: Anɩ dɩɩrdaarra, a‐n lɩmɩnɛ Thãgba fʋɔr cɔ lãpho bɛ?#Thɩɩ 30:13; 38:26 25Dɩ birse wi: Ɔɔ, a‐n lɩmɩnɛ. Dɩ ɔbɔɔkɛ Pɩɛr lonɩ cʋɔrɔ, Jeju kɔɔ kʋʋlɛ ƴɩɛ a bulee: Sɩmɔ̃, mɔ̃ fɩ‐n kpɩɛr? Fãgadara thɩɩra, anara wɩ‐n tee lãpho, dɩ agɩbo ana dʋɔnyɛ̃ n tee war? Awɩ bɩsãsɔra wɛ yaa, kpakpalala wɛ? 26Dɩ birsee: Kpakpalala wɛ. Dɩ Jeju sʋʋraa: Dɩ gɛr gɩ, bɩsana na hana lɩmɩnɛ na lɩmaˈ. 27Sɩ mɔ̃ sa cʋʋnɩ sɩ gɩ do sa do war nɛ baradaa ga, jala dɔna thʋ̃ pheru mɩɩr nɔ nyʋɔnɔ, sa hala te caca thʋmɩkɛ fa fʋnɩ. Khɛraa nʋɔ. Fa yɩrɛ le war bireekɛ na dananɩ tɩbɩla yenyɔɔ lãpho lɩmɩ. Te jalana a ˈlaanɛ ɩ̃da na afɩda.

Currently Selected:

Matiə 17: LOBIRI

Highlight

Copy