Matiə 16

Kɩɛr jɔfʋ bʋ dʋdara n ƴaal nɔ kpaa thɩ̃ɛ Jejura

(Mar 8:11–13; Lu 12:54–56)

1Dɩ jɔfʋ bʋ dʋdara, na wɩrɛ n yɛnɩ khi ɩɩrɛ na halaˈ, pɔr Jejura dɩ wa‐n fifiləə a bulee a nɛ nar nɔ kpaa thɩ̃ɛɛkɛ thɛnɩ thãgbara ƴũ.#Mat 12:38; Lu 11:16 2Dɩ Jeju birse wi: Dʋɔrɔ nɩ‐n sor aa, thãgba na pəbire wire, gɩdonɩ ƴũ bɩsɩrɛ. 3Dɩ duuro dɩ nɩ yɩ aa, thãgba na ɩnɛ nĩ, gɩdonɩ ƴũ#16:3 Ƴũ dor ndɔlɔ̃pa sɛ haar: Gɛr dɔ gɩrɛ Juifisɔ n jɩnanɩ dɩ thãgba na daan. Sɩ ado sɛr gɩ, a susuur na kʋ, gɛr sɩ‐n jɩrɔ dɩ thãgba nyʋɔn na daan. Sɩ a ɩɩr na kʋ, gɛr sɩ‐n jɩrɔ dɩ thãgba na dã dɔdɔaˈ. dor ndɔlɔ̃pa sɛ haar. Nɩ‐n punone dɩ nɩ jɩ mɔ̃ thɩ̃ɛ n hanɩ thãgbara ƴũ, sɩ na‐n ka dɩ nɩ puno jɩ jenasɔɔkɛ dɔnɩ bɔɔkɛɛda ga. 4Nĩdaraakɛ puuroni thakɛ, kɛ faanɩ awɩ Thãgba, n ƴaalɛlakɛ nɔ kpaa thɩ̃ɛ, sɩ nɔ kpaa thɩ̃ kpɩɩ na bir na yɩ saagado Jonasɩɩ nɔ kpaa thɩ̃ gaaga. Agɩpɩ a faa wɛr sa jal.#Mat 12:39; Lu 11:29

Tabɩɩr kɩɛr dʋɔn jɔfʋ bʋ dʋdara na wɩrɛ n yɛnɩ khi ɩɩrɛ na halaa dɩɩr

(Mar 8:14–21)

5Sɩ kpãkpãadara n kɔɔ iire sa diinə buru gbaar. 6Dɩ Jeju so war ayɩ: Na‐n jɩɛ dʋ bʋrɛ na‐n tɛ̃tɛna jɔfʋ bʋ dʋdarasɔ na wɩrɛ n yɛnɩ khi ɩɩrɛ na halaa tabaˈ.#Lu 12:1 7Dɩ kpãkpãadara ma dɩ wa‐n mɩɩ kha awɩ ha ayɩ: Gɩdonɩ sa kɔɔ gba buruəˈ, gɛr gɩ. 8Dɩ Jeju jɩ mɔ̃ wɩ‐n mɩɩnɩ kha a bule wi: Mɔ̃gɩdo dɩ na‐n mɩɩ kha anɩ ha, nɛr ha pɛ ˈlũdara aa, na kɔɔ gba buruə yaa? 9Jaa na jɩ kɩrʋ paa koe? Na jɩna buru yemɔɩɩkɛ tɩbɩla gbɩlanɩ yemɔɩ kɔɔ khonɩ na kpõ nʋɔɔkɛ nɩ kɔɔ uulnəə?#Mat 14:17–21 10Na buru makonyɔɔkɛ tɩbɩla gbɩlanɩ yenã kɔɔ khonɩ na kpõ nʋɔɔkɛ nɩ kɔɔ uulnəə?#Mat 15:34–38 11Mɔ̃ gɩ fʋ sɩ dɩ na jɩ kɩrʋ pa? Ga do burudaa mɩ mɩɩ naˈ. Sɩ na‐n jɩɛ dʋ bʋrɛ jɔfʋ bʋ dʋdara na wɩrɛ n yɛnɩ khi ɩɩrɛ na halaa tabɩra. 12Dɩ le wɩ jɩ dɩphã dɩ mɔ̃ a yɩnɩ wa‐n dɔ bʋrɛ, ga do buru cʋʋ tabɩɩr ga, sɩ jɔfʋ bʋ dʋdara na wɩrɛ n yɛnɩ khi ɩɩrɛ na halaa dɩɩr a so.

Kɩɛr Pɩɛr yɩ Jeju dʋɔn Kirisiti

(Mar 8:27–30; Lu 9:18–21)

13Dɩ mɔ̃ Jeju danɩ Sejare Filipi khʋra, a bulele ɔɔ kpãkpãadara thɩ̃ɛ thakɛ ayɩwɔɔ: Amɛ tɩbɩla n yɩ mɛr tibili Bikuun ka dor? 14Dɩ wɩ birsee: Ɩkhasɔ n yɩ, Jã Batɩsɩtɩ fɩ do. Wɛ n yɩ, Elɩ fɩ do. Wɛ n yɩ wo, fɛr dɔ Jeremɩ agɩbo Thãgbaa bobon bɩɛl.#Mat 14:1–2; Mar 6:14–15; Lu 9:7–8 15Dɩ bule wi: Sɩ ner, amɛ nɩ‐n yɩ mɩ dor? 16Dɩ Sɩmɔ̃ Pɩɛr birsee: Fɛr dʋɔn Kirisiti Thãgba yidaarɩ Bikuun.#Jã 6:68–69 17Dɩ Jeju sʋʋraa: Gɩ da farɛ Sɩmɔ̃ Jonasɩɩ bikuun, gɩdonɩ ga do tibil kpɩɛrɛra gɩ the dɩ fɩ jɩ thɩ̃ɛɛkaˈ, sɩ ɩ̃ Thɩɩkɛ hanɩle ƴũ gɩ. 18Sɩ mɛrɛ, mɩ so farɛ: Ga#16:18 Ga boka kɔ̃tɩnaakɛra gɩ sonɩ kɩɛr, Jeju gɩ so, kɛ dɔnɩ go kʋʋkɛ we gbɛbɩdara dɛbɩrɔnɩ. 1 Kor 3:11; 1 Pɩ 2:4 boka kɔ̃tɩnaakɛra ma ɩɩr ɩ̃ we gbɛbɩdara, sɩ fe wer Pɩɛr fa‐n do (i kɩrʋ dʋɔn bokaar), dɩ khĩdi dʋɔɔ fãgasɔ na mar na kəə war kpɩɩrakaˈ. 19Ma ha fɛr ƴũ fãgadaarɩ dɩɩ lakilesɔ, dɩ gɩrɛ fa lini thɩɩra, oti ga li Thãgbaa dʋɔ dakha, sɩ gɩrɛ fa thʋbɩnɩ thɩɩra, oti ga thʋbɩ Thãgbaa dʋɔ dakha.#Mat 18:18; Jã 20:23 20Dɩ a kpãkpaanɛ ɔɔ kpãkpãadarara dɩɩ khɩɩr ka ayɩ, wa‐n so tibillə dɩ Kirisiti ha naˈ.

Kɩɛr Jeju mɩɩ ɔɔ khi na ɔɔ khi ɩɩr

(Mar 8:31—9:1; Lu 9:22–27)

21Liir Jeju ma dɩphã da‐n so ɔɔ kpãkpãadarara casɩ, mɔ̃ ɔr teenanɩ a jala Jerujalɛm, kɔ̃tɩnasɔ, na bonɩ jidaar kɔ̃tɩnasɔ, na jɔfʋ dɩɩrdarasɔ n gaarʋʋ jɔɔ, sɩ wɩ kʋʋ dakha, sɩ wire yẽther wirera a na ɩɩrɛ na the khirera. 22Sɩ Pɩɛr kpaarɛ kana pa kpɩɩ, a ma da‐n phaanʋʋ ayɩ: Kɔ̃tɩn, Thãgba na thʋ̃ na tu dɩ thɩ̃ɛ thale na dã fɩ kpɩɩaˈ. 23Sɩ Jeju kɛr a so Pɩɛrra ayɩ: Hala mɩ ƴɔɔ Satã. Fɛr dɔ mar nɛ baradaa, gɩdonɩ ga do Thãgbaa kpɩɛr fɩ‐n kpɩɛraˈ, sɩ mɔ̃kɛ tibil n kpɩɛrnɩ gɩ.

24Le Jeju so ɔɔ kpãkpãadarara ayɩ: Ado ntɛ pɛr haar ɩna‐n kpa mar, dɔ a faa dɩbara yɩrnanɛ, sɩ a gba ɔɔ kʋkʋ thɩr a na‐n kpana mar.#Mat 10:38; Lu 14:27 25Gɩdonɩ tibilikɛ n kanɩ dɩ hana bʋ dʋr na ɔɔ yi, ga ka na buurəəre. Sɩ ʋrɛɛkɛɛ yi na bonɩ mɛrɛra, ɔr na ka na ˈlɛ gɩ waa gel.#Mat 10:39; Lu 17:33; Jã 12:25 26Gɩdonɩ anyee bɔ ca ga taa tibil, ado a ˈlɛ thɩ̃ɛ fɛʋ thɩɩraakɛ, sɩɩ do ɔɔ yi buurəəre? Dɩ agɩbo anye haankɛ dɩ tibil na gba na debina ɔɔ yi? 27Gɩdonɩ mɛr tibili Bikuun na bire na ɩ̃ na ɩ̃ Thɩɩ i dʋbɩ nakha ɩ̃ thɔ̃thɔ̃daar thusɔ. Liir ma ka tɩbɩla fɛʋ bɩɛlbɩɛl thɩ̃ɛ dɩ ga mɩɛna mɔ̃ ntɛɛ thɔna hanɩ.#Mat 25:31; Khɩ 62:12; Rɔm 2:6 28Sobɔr mɩ so nar, ɩkhasɔ wɩrɛraakɛ hanɩ kɩɛr na khiir, sɩɩ do wa yɩ mɛr tibili Bikuun ɔbɔɔkɛ ma‐n ɩnɩ ɩ̃ gba fãga gaaga.

Currently Selected:

Matiə 16: LOBIRI

Highlight

Copy