Kɛkolu 17

Mɔɔlu k'i wuli Pɔli ni Silasi kanma Tɛsalonika teme

1Pɔli ni Silasi wɔlinin Amfipolisi ni Apoloni solu lɔtiminna, ai ka se Tɛsalonika sɔ kɔnɔ, Jahudiyalu ya Aladalibon dɔ tɛɛ tɛɛminja. 2Wo lɔ, Pɔli ka taa je Nɔningɛlon, iwo a deinin tɛɛ a kɛla teme. A do ka Nɔningɛlon sawa kɛ je, a vɛ kumala mɔɔlu yɛ ka bɛn kitabulu ma, 3ka wolu kɔlɔ fɔ k'a lagbɛ ko Masa Tɔɔmasenin tɛɛ ka kan ka tɔlɔya, ka ban k'i wuli ka bɔ saya lɔ. A do vɛɛ: «Ǹ'i Isa min ya ko lasena ài ma yi ne, ale le Masa Tɔɔmasenin ne.»

4Jahudiya dɔlu ka la kuma wo la, ani Gɛlɛkika Alaɲasiyanɲɛmɔɔ siyama, ani moso tɔɔlama jilika. Ai bɛ k'ai lɔ Pɔli ni Silasi fɛ.

5Kɛɛ wo ɲangbeya ka Jahudiya tɔlu mina mingɛ, ai ka taa lɔɔ lɔ ka mɔɔ kundan dɔlu ta k'ai lamulutu, minu ka so lamaamaa. Ai bɛ k'a latelen Jason ya bon na Pɔli ni Silasi ɲininya lɔ, fɔsa ai tɛɛ na ai le jama ɲakɔlɔ. 6Ai ma ai ye je mingɛ, ai ka Jason ni limaniyamɔɔ dɔlu mina, k'ai fɔnfɔn ka taa ai le so ɲamɔɔlu ɲakɔlɔ. Ai do tɛɛ gbanɔla, ai vɛɛ: «Mɔɔ minu na dunuɲa bɛ ɲaamina, ai vɛ se maa so kɔnɔ. 7Jason ne do n'ai jiyala. Ai wulinin Lɔmu masakɛba Sezale ya jamalilu kanma, ko masakɛ gbɛlɛ yi je, min tɔɔ yi ko Isa.»

8Kuma wo ka ɲamɔɔlu ni jama niilafin bubale. 9So ɲamɔɔlu ka kunmaka wɔli mina Jason ni a tɔvalu la, ka ban k'ai bila.

Pɔli ni Silasi ka mɔɔlu kawani Beleya teme

10Su ka ko mingɛ feeya, limaniyamɔɔlu ka Pɔli ni Silasi lataa so gbɛlɛ la, min tɔɔ yi ko Beleya. Ai senin je, ai ka taa Jahudiyalu ya Aladalibon na. 11Je mɔɔlu josolɔgbɛyine tɛɛ ka timin mɔɔlu la minu tɛɛ Tɛsalonika, kamasɔlɔn ai k'ai bolo sii Ala kumakan kɔlɔ sɛmɛdon boloma, ai vɛ kitabulu mafɛlɛnna lon bɛ k'a lɔn ni ko wolu yi tuɲa le le. 12Wo le k'a kɛ, Jahudiya wolu siyama ka limaniya, ani Gɛlɛkika tɔɔlama siyama, kɛ́lu ni mosolu.

13Kɛɛ Tɛsalonika Jahudiyalu k'a mɛn mingɛ ko Pɔli yi Ala kumakan lasena Beleya, ai vɛ taala je ka jama lɔsun ka mangan lawuli. 14Wo kɛ, limaniyamɔɔlu k'i wuli telemanin ka Pɔli lataa kɔɔji dala, kɛɛ Silasi ni Timote ka to Beleya. 15Pɔli malɔbalu ka taa a le haan fɔɔ Atɛn so kɔnɔ. Ai kɔseitɔla, Pɔli k'i sala ai la ko Silasi ni Timote yi na a fɛlɔ telemanin.

Pɔli ka Samakan Kein lase Atɛn so kɔnɔ teme

16Pɔli ka to a tɔvalu makɔnɔna Atɛn, a joso ka tɔlɔya bubale, kamasɔlɔn a k'a ye ko so wo lafanin tɛɛ joo siyama la. 17A do tɛɛ taala Aladalibon na je ka kuma Jahudiyalu yɛ, ani siboloma gbɛlɛ minu tɛɛ siyanna Ala ɲa. Lon bɛ, a tɛɛ taala bala lɔ fana ka kuma mɔɔlu yɛ minu tɛɛ kɛla je. 18Mɔɔ kalannin dɔlu tɛɛ je, ai tɛɛ a fɔla minu ma ko Epikuli ani Sitoisi ya mɔɔlu, minu ka Pɔli sɔsɔ damina. A dɔlu vɛɛ: «Kumafuunfɔba min y'a fɛ ka mindɛ le fɔ?»

A dɔgbɛlɛlu vɛɛ: «A kɛyine iwo a yi kumala ka bɛn tii dɔlu ma minu lɔnin tɛ mɔ bolo.» Ai ka wo fɔ kamasɔlɔn Pɔli tɛɛ Isa ya Samakan Kein ne lasena, ko a v'i wuli ka bɔ saya lɔ.

19Wo lɔ, ai ka Pɔli mina ka taa a le Aleyopase ladɛnmɔɔlu ɲakɔlɔ, ai v'a fɔla a yɛ, ai vɛɛ: «M'i sene ka ko lɔn ka bɛn iya kalan kula ma, i yi min lasena? 20Mɔ na ko min mɛnna i da yi ne, mɔ ma wo suu mɛn ba bene. M'a fɛ wo lɔ k'a kɔlɔ lɔn.» 21Wo k'a talan, Atɛnkalu ni aiya lonalu tɛɛ tɛ foi la, mafɔ k'ai tolomalɔ ko kulalu la, ani ka wolu lase i ɲɔɔ ma.

22Wo lɔ, Pɔli k'i lɔ Aleyopase ladɛnmɔɔlu ɲakɔlɔ k'a fɔ ai yɛ: «Àilu Atɛnkalu, m̀'ɛ a ye ko diinako diyanin ài yɛ boloɲa suu bɛ ma. 23Kamasɔlɔn ǹ tɛɛ m̀ mataamana so kɔnɔ waate min nɔ k'àiya batofennu lasaa, ǹ na salakagbalan dɔ yena, a sɛvɛnin min kan, ko: ‹Mɔ ma tii min lɔn, wo ta salakagbalan ne min ne.› Wo lɔ, ài y'ài tii min batola k'a talan ài m'a lɔn, ǹ nanin wo le ya ko lasena ài ma yi ne. 24#Kɛkolu 7.48.Ala min na dunuɲa ni a kɔnɔlɔfen bɛ ladanna, wo le yi sangbolo ni duukolo Tii le. Adamadennu yi batobon minu lɔla ai bolo la, Ala t'i siila wo suu suu kɔlɔ. 25A mako tɛ foi la k'a fɔ adamadennu y'a madɛmɛn min na, kamasɔlɔn ale gbu le yi niimaya ni nunakili dila mɔɔlu ma, ani fen bɛ. 26A na siboloma bɛ bɔla mɔɔ kelen ne lɔ, k'ai lasii duukolo fan bɛ lɔ, k'aiya waate ni ai makɛya dannu latɛɛ ai ma. 27Ala ka wo bɛ kɛ, fɔsa adamadennu tɛɛ a ɲinin. Ai vɛ ai bolo mɛmɛla, tumadɔ ai tɛɛ a yene, k'a talan a majaannin tɛ mɔ kelenkelenna bɛ la. 28Kamasɔlɔn a kɛyine iwo àiya mɔɔ dɔ n'a sɛvɛla teme, ko:

‹Mɔ balonin, ani m'i taamana, ani m'i mɔ nii la aa seetiiya le lɔ.›

A kɛyine fana iwo àiya lɔnnila dɔlu n'a fɔla teme, ai vɛɛ:

‹Ǹu fana yi Ala den ne le.›

29Komi Ala den ne mɔ le, wo lɔ, mɔ k'i mili ko a kɛɲa kɛyine iwo sanu le, niwotɛ wɔligbɛ, niwotɛ kawa, fen sawula min ladannin ka bɛn adamadennu ya jatesiili ni ai miliya ma. 30Waate lɔ, Ala ma aiya kolɔnbaliya jate ko le, kɛɛ tandainɔ, a yi mɔɔ bɛ jamalila fan bɛ lɔ ko ai yi tube. 31Kamasɔlɔn lon dɔ latɛɛnin a bolo, a kɛtɔ dunuɲamɔɔlu bɛ ya kiti tɛɛla lon min na telenmandeya boloma aa kɛ́ tanin sabu la. A do na wo lagbɛla bɛ yɛ ka bɛn a lawuliko ma ka bɔ saya lɔ.»

32Ladɛnmɔɔlu ka fulenilu lawuliko mɛn Pɔli da mingɛ, a dɔlu v'a majɛlɛla. Kɛɛ a dɔgbɛlɛlu vɛɛ: «M'a fɛ i y'a dɔ la kuma min kɔkan lon gbɛlɛ.» 33Wo lɔ, Pɔli ka bɔ ai fɛlɔ. 34Wo bɛ n'a kɛ, mɔɔ dɔlu ka kafon Pɔli kɔkan ka limaniya Isa ma. Aleyopase ladɛnmɔɔ dɔ min tɔɔ tɛɛ ko Denisi, wo tɛɛ ai lɔ, ani moso min tɔɔ tɛɛ ko Damalisi, ani mɔɔ dɔgbɛlɛlu.

Currently Selected:

Kɛkolu 17: MBT2023

Highlight

Copy