YouVersion Logo
Search Icon

Kɛkolu 15

15
Limaniyajama ɲamɔɔlu ka ladɛn ba kɛ Jelusalɛmu teme
1Wo kɔ, kɛ́ dɔlu ka na Antiyɔsi ka bɔ Jude koovi lɔ, minu tɛɛ limaniyamɔɔlu kalanna, ai vɛɛ: «Ni ài ma kɛnɛkɛ ka bɛn Nabi Musa ya laana ma, ài tɛnala sena kisila.» 2Wo lɔ, sɔsɔyali ba ka don kalanmɔɔ wolu ani Pɔli ni Baanabasi wotɛ. Wo le k'a kɛ, limaniyajama ka Pɔli ni Baanabasi ta, ani ai lɔ mɔɔ dɔlu, k'ai bɛ lataa Jelusalɛmu fɔsa ai yi ko min lase keladennu ni ɲamɔɔlu ma.
3Limaniyajama k'ai lasalanna, ai do ka Fenisi ni Samaliya koovilu lɔtimin, ai v'a ɲafɔla je limaniyamɔɔlu yɛ ko siboloma gbɛlɛ mɔɔlu vɛ tube. Wo ka diya wolu yɛ kosɛvɛ.
4Ai ka se mingɛ Jelusalɛmu, limaniyajama ni keladennu ni ɲamɔɔlu k'ai bolo sii ai kɔlɔ. Pɔli nu do ka dandɛɛli kɛ ai yɛ ka bɛn ko bɛ ma, Ala na minu kɛla ai fɛ.
5Kɛɛ limaniyamɔɔ dɔlu tɛɛ je, minu fɛ tɛɛ Falisilu la. Ai do k'i lɔ k'a fɔ, ai vɛɛ: «Siboloma gbɛlɛ mɔɔ minu limaniyanin Isa ma, fɔ wolu lɔ kɛ́lu yi kɛnɛkɛ, ani m'ai jamali Nabi Musa ya seliya latelenko la.»
6Wo fɔ, keladennu ni ɲamɔɔlu k'i kun bilin i ɲɔɔ ma k'i ɲa kaa ko wo lɔ kosɛvɛ. 7#Kɛkolu 10.1-43.Ai mɛnnin sɔsɔyalila, Piyɛli k'i wuli wo lɔ k'a fɔ ai yɛ, a vɛɛ: «M̀ badenmalu, àilu gbu k'a lɔn ko kolu damina lɔ, Ala na ǹ tala ài tɛma Samakan Kein lasenko lɔ siboloma gbɛlɛ mɔɔlu yɛ, fɔsa ai yi wo mɛn ka limaniya. 8#Kɛkolu 10.44; 2.4.Ala min ka adamaden bɛ josokun lɔn, a v'a lagbɛ ko a bolo siinin siboloma gbɛlɛ mɔɔlu kɔlɔ, kamasɔlɔn a na Nii Sɛnɛyanin dila ai ma iwo a na a dila mɔ ma teme. 9Wo ma, Ala ma lafisayali kɛ ǹu ni ailu wotɛ, kamasɔlɔn a n'ai josokun lasɛnɛyala ka bɛn aiya limaniya le ma. 10Wo lɔ saa, mindɛ lɔ ài y'a fɛ ka Ala lɔsuma ka doni sii kɔbiladen wolu kun, ǹu ni mɔ bemanu ma se min kɔlɔ? 11Mɔ limaniyanin teme k'a fɔ ko mɔ kisinin ka bɛn mɔ Tii Isa ya nɛɛma le ma, wolu fana kisinin ten ne.»
12Jama bɛ jedennin ka to k'ai tolomalɔ Baanabasi ni Pɔli la, wolu vɛ dandɛɛli kɛla ka bɛn tɔɔmase ni kawanankolu ma, Ala na minu kɛla ai fɛ siboloma gbɛlɛ mɔɔlu tɛma.
13Pɔli ni Baanabasi wɔlinin kumala, Janguba ka kuma ta, a vɛɛ: «M̀ badenmalu, ài y'ài tolomalɔ ǹ na. 14Simɔn Piyɛli n'a ɲafɔla mɔ yɛ, Ala na a hangili bilala teme siboloma gbɛlɛ mɔɔlu lɔ kunfɔlɔ le, k'ai dɔlu kɛ a ta le. 15Kuma min ni kelalu ya kuma bɛnnin i ɲɔɔ ma, kamasɔlɔn a sɛvɛnin kitabu kɔnɔ, ko:
16‹Mɔ Tii vɛɛ: ko wolu vɛ timinna, ǹ kɛtɔ seikɔla ka Dawuda ya bon lɔ kɔtunun, min tenin.
Ǹ kɛtɔ a lɔla kula le aa bongbala le kɔkan.
17Wo vɛ kɛla, mɔɔ tɔlu kɛtɔ ǹe ai Tii ɲininna,
siboloma gbɛlɛ mɔɔlu koni,
ǹ na minu bɛ kilila ǹ tɔɔ lɔ k'ai kɛ ǹ ta le.
Ǹe ài Tii le na wo fɔla, ǹe min na ko wo bɛ kɛla,
18min lɔnnin m̀ bolo kɔlɔkɔlɔ le.› »
19Janguba vɛɛ ai yɛ kɔtunun: «Wo lɔ saa, m̀'ɛ a latɛɛ k'a fɔ ko mɔ kà siboloma gbɛlɛ mɔɔlu ɲagba, minu y'ai jɛlɛ laseila Ala ma. 20Kɛɛ fɔ m'i sɛvɛ lataa ai ma k'a fɔ ko ai kà joosɔsoo dɔn, ni wotɛ jufaasoo, niwotɛ jeli, ani ai kà kanu kɛ. 21Kamasɔlɔn seliya min dinin Nabi Musa ma, ka ta waate jaan ma, ai yi wo kalanna Aladalibonnu la Nɔningɛlon bɛ, ani a kumakan la yi sena so kelenkelenna bɛ la.»
Ai ka sɛvɛ min lataa siboloma gbɛlɛ limaniyamɔɔlu ma
22Wo le k'a kɛ, keladennu ni ɲamɔɔlu ni limaniyajama bɛ k'a latɛɛ ko ai yi kɛ́ dɔlu ta ka wolu lɔ Pɔli ni Baanabasi malɔla Antiyɔsi. Wo lɔ, ai ka Judasi ta (ai tɛɛ a fɔla min ma ko Baasabasi), ani Silasi, minu tɛɛ ɲamɔɔlu le limaniyamɔɔlu tɛma.
23Ai ka sɛvɛ don wolu bolo ko ai yi taa a le. A sɛvɛnin tɛɛ ko:
«Ǹu keladennu ni ɲamɔɔlu, ài badenmalu koni, m'i lɛtɛlɛ min lataala siboloma gbɛlɛ limaniyamɔɔlu ma Antiyɔsi so kɔnɔ ni Siliya ni Silisiya jamanalu lɔ. M'ài fola. 24Mɔ n'a mɛnna ko mɔɔ dɔlu bɔnin mɔ tɛma ka taa ài ɲagba kuma dɔ le, min n'ài kɔnɔlɔfilila. Ǹu do ma wolu lataa ài ma. 25Wo le n'a kɛla, mɔ bɛ na bɛnna a ma ko ka mɔɔ dɔlu ta k'ai bila mɔ diyananmɔɔ Baanabasi ni Pɔli fɛ k'ai lataa ài ma. 26Kɛ́ minu n'i banna ai nii lɔ ka bɛn mɔ Tii Masa Tɔɔmasenin Isa tɔɔ le ma. 27Wo le n'a kɛla, mɔ na Judasi ni Silasi lataala ai ma, minu dalakan kɛtɔ ko minu lagbɛla ài yɛ. 28A diyayine Nii Sɛnɛyanin yɛ, ani ǹu gbu, k'a fɔ ko mɔ kà doni gbili sii ài kun, mafɔ diyanigbeya ko minu: 29Ài kà joosɔsoo dɔn, niwotɛ jufaasoo, niwotɛ jeli, ani ài kà kanu kɛ. Ni ài ka ko wolu matanga, wo yi bɛnne. Ala yi to ài fɛ.»
30Keladen wolu lasalannin, ai ka taa Antiyɔsi ka limaniyajama ladɛn, ka sɛvɛ wo don ai bolo. 31Sɛvɛ kalannin, wo k'ai sɛmɛdon k'ai kɔnɔlɔdiya bubale. 32Judasi ni Silasi, minu gbu taanin kɛla kelalu le, wolu k'ai sɛmɛdon ani k'ai lasawati kuma siyama le. 33Judasi ni Silasi wɔlinin waateni kɛla je, limaniyamɔɔlu ka duwawu kɛ ai yɛ k'ai labila, ko ai yi seikɔ ai kelabalu ma josolajii lɔ.#15.33 Sɛvɛli kɔlɔ dɔlu ka haya min la a kɔkan: 15.34
35Kɛɛ Pɔli ni Baanabasi ka to Antiyɔsi, ai vɛ mɔɔlu kalanna ka mɔ Tii kumakan lase, ailu ni mɔɔ siyama.
Pɔli ni Baanabasi ka falan a ma teme
36Tele dana timin kɔ, Pɔli vɛɛ Baanabasi yɛ: «Mɔ na mɔ Tii kumakan lasena so minu la, ài m'i kɔsei wolu kelenkelenna bɛ lɔ ka mɔ badenmalu kɛɲa lɔn.»
37Baanabasi tɛɛ a fɛ Yohana tɛɛ taa ai fɛ (ai tɛɛ a fɔla min ma ko Malɛkɛ). 38#Kɛkolu 13.13.Kɛɛ Yohana bilako ai fɛ, Pɔli ma wo jate kobɛnnin ne, kamasɔlɔn Yohana tɛɛ vɛ bɔ ai fɛ Panfili koovi lɔ. A tɛɛ ma to ai kɔ aiya baale lɔ. 39Wo ko ka kɛ sɔsɔyali ba le Pɔli ni Baanabasi wotɛ, haan fɔɔ ai ka falan a ma. Ado Baanabasi ka Malɛkɛ ta ka taa a le Sipele kɔɔtɛmaduu lɔ kulun kɔnɔ. 40Kɛɛ Pɔli ka Silasi ta ka bɔ je, limaniyamɔɔlu ban kɔ ai kalifala mɔ Tii ya nɛɛma la. 41Wo lɔ, ai ka Siliya ni Silisiya koovilu lɔtimin, ai vɛ limaniyajamalu sɛmɛdonna fan bɛ lɔ.

Currently Selected:

Kɛkolu 15: MBT2023

Highlight

Share

Copy

None

Want to have your highlights saved across all your devices? Sign up or sign in