Kɛkolu 14
14
Pɔli ni Baanabasi ka kawanili kɛ teme Ikoniyɔmu so kɔnɔ
1Pɔli ni Baanabasi senin Ikoniyɔmu so kɔnɔ, ai ka don Jahudiyalu ya Aladalibon na. Ai ka to kumala boloɲa dɔ ma, Jahudiya ni Gɛlɛkika siyama ka limaniya. 2Kɛɛ Jahudiya minu k'i ban limaniya la, wolu ka siboloma gbɛlɛ mɔɔlu lɔsun limaniyamɔɔlu kanma. 3Wo bɛ n'a kɛ, Pɔli ni Baanabasi ka waate siyama kɛ je, ai vɛ kawanili kɛla josolagbeleya boloma, ado mɔ Tii gbu tɛɛ seleya dila ka bɛn aa nɛɛma kuma ma, kamasɔlɔn a ka see di ai ma tɔɔmase ni kawanankolu kɛko lɔ. 4Ado sokɔnɔmɔɔlu ka falan a ma: a fan kelen tɛɛ Jahudiyalu fɛ, a fan kelen vɛ Isa ya keladennu fɛ.
5Jahudiyalu ni siboloma gbɛlɛ mɔɔlu ni ai ɲamɔɔlu ka bɛn a ma ko ai yi ben Pɔli ni Baanabasi kan, k'ai bon kawa la k'ai faa. 6Pɔli ni Baanabasi ka kɛ wo kalama mingɛ, ai vɛ bɔlila ka taa Laikoni koovi lɔ, Lisitile ni Dɛlɛbɛ ani so wolu laminin nɔ. 7Ai do ka to Samakan Kein lasena dingila wolu lɔ.
Pɔli ni Baanabasi ka kawanili kɛ Lisitile
8Wo k'a talan kɛ́ dɔ tɛɛ Lisitile so kɔnɔ, min sɔlɔnnin namalaniya lɔ, a do tɛɛ ma taama ba tuun. 9A tolomalɔnin ka to Pɔli la, wo do k'i ɲa kaa a lɔ k'a ye ko aa limaniya yi sene a lakɛnɛyala. 10Wo lɔ, Pɔli k'a kan labɔ, a vɛɛ: «I wuli, i lɔ i sen na!» A do k'i gban k'i lɔ ka taama damina. 11Jama ka wo kɛnin ye Pɔli bolo mingɛ, ai k'ai kan labɔ k'a fɔ Laikonikan nɔ, ai vɛɛ: «Mɔ tiilu vɛ jii mɔ tɛma adamaden sawula lɔ!» 12Ai ka Baanabasi tɔɔla ko Zuusu, ka Pɔli tɔɔla ko Hemesi, kamasɔlɔn ale le tɛɛ kumalaseba le. 13Wo k'a talan, batobon dɔ tɛɛ so donda dafɛ ai tii Zuusu yɛ. Wo lɔ, Zuusu salakalaseba ka na tola dɔlu le so donda la ani bin feelelu, kamasɔlɔn ale ni jama tɛɛ a fɛ ka salakalu bɔ Pɔli ni Baanabasi yɛ.
14Kɛɛ keladen fila wolu ka wo mɛn mingɛ, ai k'aiya faanibalu lɔfalafala niilafin boloma, ka ban ka bɔli ka don jama tɛma k'ai kan labɔ, ai vɛɛ: 15«Kɛ́lu, mindɛ lɔ ài yi ko suu min kɛla yi ne? Ǹu gbu yi mɔɔnivin ne le iwo àilu. Mɔ bɛ yi suu kelen ne le. Mɔ nanin Samakan Kein ne lasena ài ma, fɔsa ài yi kofuun minu to je ka Ɲɛnɛmayatii Ala bato, min na sangbolo ni duukolo ni kɔɔji ladanna ani ai kɔnɔlɔfen bɛ. 16Waate dɔlu vɛ timin, Ala ka siboloma bɛ to je, ai bɛ ka taa ai ta siya kɔkan. 17Wo bɛ lɔ, a m'a nɔningɛ a jɛlɛ seleya dila aa kokeinnu fɛ, a vɛ sanji lanala ài ma ka bɔ sangbolo lɔ, k'àiya sɛnɛfennu laɲia a waate lɔ, ka balo di ài ma, ani k'ài josokun lasawa.» 18Kɛɛ hali keladennu ka kuma wo bɛ fɔ, jama dansiiko ka gbeleya ai bolo salakabɔko lɔ.
19Ai ka to je, Jahudiya dɔlu ka na ka bɔ Antiyɔsi ni Ikoniyɔmu solu la ka jama kunnɔtɛɛ haan fɔɔ ai vɛ Pɔli bonna kawakulun na. Ai do k'a fɔnfɔn so kɔɔkan, kamasɔlɔn a tɛɛ ai kɔnɔ ko a vɛ sa. 20Kɛɛ Isa kɔbiladennu ka na a laminin mingɛ, Pɔli k'i wuli ka seikɔ so kɔnɔ. Wo dusagbɛlon, Pɔli ni Baanabasi ka bɔ je ka taa Dɛlɛbɛ.
Pɔli ni Baanabasi ka seikɔ Antiyɔsi teme
21Pɔli ni Baanabasi ka Samakan Kein lase so wo kɔnɔ ka mɔɔ siyama kɛ Isa kɔbiladen ne je. Wo kɔ, ai ka bɔ je ka seikɔ Lisitile, ka bɔ je ka taa Ikoniyɔmu, ka bɔ je ka taa Antiyɔsi, min yi Pisidi koovi lɔ. 22Ai tɛɛ Isa kɔbiladennu sɛmɛdonna so wolu la, k'ai kawani ko ai y'ai lɔja ka to limaniya siya kɔkan kudein, ai vɛɛ: «Jani m'i don Ala ya masaya lɔ, fɔ m'i tɔlɔya siyama masɔlɔn bene.»
23Pɔli ni Baanabasi ka ɲamɔɔlu lasii limaniyajama kelenkelenna bɛ kunna. Ai ka sun don ka Ala dali wolu yɛ, k'ai kalifa mɔ Tii la, ai tɛɛ vɛ limaniya min ma.
24Wo kɔ, Pɔli ni Baanabasi ka Pisidi koovi lɔtimin ka don Panfili koovi lɔ. 25Ai ka Ala kumakan lase mɔɔlu ma Pɛlɛga so kɔnɔ mingɛ, ai ka bɔ je ka jii Ataliya. 26Ai ka don kulunba kɔnɔ Ataliya ka seikɔ Antiyɔsi, limaniyajama tɛɛ vɛ ai kalifa Ala ya nɛɛma la tɛɛminja ka bɛn baale ma, ai na min kɛla ka dafa.
27Ai senin Antiyɔsi, ai ka limaniyajama ladɛn ka dandɛɛli kɛ ai yɛ ka bɛn ko bɛ ma, Ala na minu kɛla ai fɛ, ani a na limaniya siya lakala teme siboloma gbɛlɛ mɔɔlu yɛ. 28Ai do ka waate jaan kɛ Isa kɔbiladennu fɛ je.
Currently Selected:
Kɛkolu 14: MBT2023
Highlight
Share
Copy

Want to have your highlights saved across all your devices? Sign up or sign in
Manya Bible Translation, © SIM International, 2023