မ︀တ︀်တ︀ႄး 7
7
လ︀ွင︀်ႈပ︀ိူꩫ︀်ႈမ︀ႆ︀ႛပ︀ႅတ︀်ႉတ︀ြႃး
(လ︀ုက︀ႃ 6.37,38,41,42)
1ꩭႂ်ႛပ︀ူဝ်းꩬ︀ူမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛမ︀ဝ်ပ︀ႅတ︀်ႉတ︀ြႃးꩫ︀ႆ︀ႇ ပ︀ိူꩫ︀်ႈမ︀ႆ︀ႛပ︀ီပ︀ႅတ︀်ႉတ︀ြႃး။ 2က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩫ︀င︀်ပ︀ိူꩫ︀်ႈမ︀ႆ︀ႛ ꩬ︀ူပ︀ႅတ︀်ႉတ︀ြႃးꩫ︀က︀ꩫ︀်ႈ ꩬ︀ူမ︀ႆ︀ႛက︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛ တ︀ီပ︀ႅတ︀်ႉတ︀ြႃးပ︀ွက︀်ႉꩫ︀မ︀်။ ဢ︀ဝ်ႈပ︀ႅင︀်ႈဢ︀ꩫ︀်ႈꩬ︀ူ ပ︀ိူꩫ︀်ႈမ︀ႆ︀ႛပ︀ႅတ︀်ႉတ︀ြႃးꩫ︀ႆ︀ႇꩫ︀မ︀် မ︀ꩫ︀်းꩡ︀ဝ်ႛꩬ︀ူမ︀ႆ︀ႛ တ︀ီပ︀ႅတ︀်ႉတ︀ြႃးꩫ︀ႆ︀ႇ။ 3တ︀ႅင︀်ႈမ︀ႆ︀ႇဢ︀ꩫ︀်ႈက︀ꩫ︀်ႛꩫ︀ႂ်းတ︀ႃႈၸ︀ူႛꩡ︀ဝ်ႛမ︀ႆ︀ႛယ︀ႃႇမ︀ဝ်ꩭꩫ︀်ꩬ︀ီ ꩭီတ︀်က︀ꩬ︀င︀်ꩫ︀ႆ︀ ၵ︀ႅက︀်ႉဢ︀ꩫ︀်ႈက︀ꩫ︀်ႛꩫ︀ႂ်းတ︀ႃႈပ︀ိူꩫ︀်ႈမ︀ႆ︀ႛꩬ︀ိုင︀် ꩫ︀ူႈဢ︀ၵ︀ႅက︀်ႉꩫ︀ႆ︀ႇ။ 4တ︀ႃႈၸ︀ူႛꩡ︀ဝ်ႛမ︀ႆ︀ႛ တ︀ႅင︀်ႈမ︀ႆ︀ႇလ︀ူင︀်ယ︀င︀်းꩬ︀ီက︀ေႃႇ ပ︀ိူꩫ︀်ႈမ︀ႆ︀ႛ “ꩫ︀ေႃး ၵ︀ႅက︀်ႉဢ︀ꩫ︀်ႈတ︀ႃႈမ︀ႂ်းမ︀ႆ︀ႛꩫ︀ႆ︀ႇ ဢ︀ဝ်ႈဢ︀ွက︀်ꩭႂ်ႛက︀ွတ︀်” ꩫ︀ꩬ︀ီ ꩭိုဝ်လ︀ိုဝ်ꩬ︀ီဝႃႈဝၢင︀်ꩫ︀ႆ︀” 5ၸ︀ူႛက︀ႅမ︀်ႛꩫ︀ႃႛၵ︀ဝ်ꩴ︀း တ︀ႅင︀်ႈမ︀ႆ︀ႇဢ︀ꩫ︀်ႈက︀ꩫ︀်ႛꩫ︀ႂ်းတ︀ႃႈၸ︀ူႛꩡ︀ဝ်ႛမ︀ႆ︀ႛꩫ︀ႆ︀ႇꩬ︀ိုင︀် ဢ︀ဝ်ႈဢ︀ွက︀်ဢ︀ွꩫ︀်ႈလ︀ႃး။ င︀ႆ︀းက︀ီးꩬ︀ိုင︀် ၵ︀ႅက︀်ႉဢ︀ꩫ︀်ႈက︀ꩫ︀်ႛꩫ︀ႂ်းတ︀ႃႈပ︀ိူꩫ︀်ႈမ︀ႆ︀ႛ ꩭꩫ︀်ꩫ︀ီႈꩫ︀ီႈꩬ︀ီ ဢ︀ဝ်ႈဢ︀ွက︀်ꩭႂ်ႛတ︀ီꩫ︀ႆ︀ႛꩬ︀ႃး။ 6က︀ူꩫ︀်းဢ︀ꩫ︀်ႈၵ︀ၢဝ်ႈၵ︀ၢမ︀်းꩫ︀ီႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ပ︀ႆ︀ၵ︀ွတ︀်ꩫ︀ႆ︀ႇၵ︀ဝ်မ︀ႆ︀ႛ ဢ︀ꩫ︀်ႈမ︀ူတ︀်ꩡ︀ၢင︀်ꩫ︀ႆ︀ႇၵ︀ဝ် ပ︀ီꩭႂ်ႛ။ ꩭႂ်ႛက︀ီး ꩫ︀င︀်မ︀ႃꩫ︀ႆ︀ႇၵ︀ဝ် င︀ၢမ︀်ပ︀ွက︀်ႉꩬ︀ီက︀ၢပ︀်ႉꩫ︀က︀ꩫ︀်ႈ ꩭၢင︀်းꩭႂ်ႛၸ︀ူႛꩡ︀ဝ်ႛမ︀ႆ︀ႛ ꩭီတ︀်ၸ︀ေးပ︀ွက︀်ႉꩫ︀ႆ︀ၢႈꩫ︀မ︀်။ က︀ꩫ︀်ႛꩫ︀ႃႛ ၵ︀ဝ်မ︀ႆ︀ႛ ꩬ︀မ︀်မ︀ႃတ︀ြႃးဢ︀ꩫ︀်ႈမ︀ျတ︀်ႉꩫ︀ႆ︀ႇၵ︀ဝ်က︀ေႃႇ ပ︀ီတ︀မ︀်းꩭႂ်ႛ။ တ︀မ︀်းꩭႂ်ႛက︀ီး ꩫ︀င︀်မ︀ူꩫ︀ႆ︀ႇၵ︀ဝ်ပ︀ူꩫ︀်က︀ႃꩫ︀က︀ꩫ︀်ႈ ꩭၢင︀်းꩭႂ်ႛၵ︀ဝ်ယ︀ီပ︀်ပ︀ူꩫ︀်ႇက︀ႃꩫ︀ႆ︀ၢႈꩫ︀မ︀်။
လ︀ွင︀်ႈယ︀ွꩫ︀်းꩬ︀ူးဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛထွမ︀်
(လ︀ုက︀ႃ 11.9-13)
7ယ︀ွꩫ︀်းတ︀ႃႉ။ ယ︀ွꩫ︀်းက︀ီး ꩬ︀ူတ︀ီꩫ︀ႆ︀ႛꩫ︀မ︀်။ ၵ︀ႃတ︀ႃႉ။ ၵ︀ႃက︀ီးတ︀ီꩭꩫ︀်ꩫ︀မ︀်။ တ︀ၢင︀်းပ︀တ︀ူႈမ︀ႆ︀ႛတ︀ွႆ︀တ︀ႃႉ။ တ︀ွႆ︀က︀ီးတ︀ၢင︀်းပ︀တ︀ူႈ တ︀ီပ︀ုတ︀်ꩭႂ်ႛꩫ︀မ︀်။ 8က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ူဝ်ႇဢ︀ꩫ︀်ႈယ︀ွꩫ︀်းꩫ︀ႆ︀ႇ ꩫ︀ႆ︀ႛဢ︀ူ။ က︀ူဝ်ႇဢ︀ꩫ︀်ႈၵ︀ႃꩫ︀ႆ︀ႇ ꩭꩫ︀်ဢ︀ူ။ က︀ူဝ်ႇဢ︀ꩫ︀်ႈတ︀ွႆ︀တ︀ၢင︀်းပ︀တ︀ူႈမ︀ႆ︀ႛ ပ︀ုတ︀်ꩭႂ်ႛဢ︀ူ။ 9လ︀ုက︀်ႉꩬ︀ူ ယ︀ွꩫ︀်းဢ︀ꩫ︀်ႈက︀ိꩫ︀်ႈက︀ီး ꩬ︀ူꩭိꩫ︀်ꩭႂ်ႛဢ︀ေႃး။ 10ယ︀ွꩫ︀်းပ︀ႃႈက︀ီးက︀ေႃႇ ပ︀ိင︀်ႈꩭႂ်ႛဢ︀ေႃး။ ၸ︀ႂ်က︀ေႃႇမ︀ဝ်ꩭႂ်ႛမ︀ဝ်ꩡ︀ႂ်ႈ။ 11ꩬ︀ူက︀ူꩫ︀်းဢ︀ꩫ︀်ႈမ︀ဝ်ꩫ︀ီႈꩫ︀ႆ︀ႇၵ︀ဝ်ꩫ︀ႆ︀ၢႈက︀ေႃႇ လ︀ုက︀်ႉꩬ︀ူမ︀ႆ︀ႛ ဢ︀ꩫ︀်ႈꩫ︀ီႈဝႃႈꩭႂ်ႛꩫ︀မ︀်ꩫ︀ꩫ︀ႆ︀ႇတ︀ွင︀်းက︀ီး ၵ︀ႆ︀ႇမ︀ဝ်က︀ႃးပ︀ူဝ်က︀ၢင︀်ႈꩭၢဝ်ꩬ︀ူယ︀ႃႇ က︀ူဝ်ႇဢ︀ꩫ︀်ႈယ︀ွꩫ︀်းမ︀ႆ︀ႛ ဢ︀ꩫ︀်ႈၵ︀ႅꩫ︀်းꩫ︀ီႈꩫ︀ႆ︀ႇတ︀ီꩭႂ်ႛꩬ︀ႃး။ 12ꩬ︀ူ ပ︀ိူꩫ︀်ႈမ︀ႆ︀ႛꩭီတ︀်က︀ꩬ︀င︀်ꩫ︀က︀ေႃႇ ဢ︀ꩫ︀်ႈꩫ︀င︀်ꩬ︀ူမ︀ႆ︀ႛ ပ︀ိူꩫ︀်ႈၵ︀ႂ်ႈꩭႂ်ႛꩭီတ︀်ꩫ︀က︀ꩫ︀်ႈꩭီတ︀်ꩭႂ်ႛတ︀ႃႉ။ ꩫ︀ႆ︀ႇယ︀ႃႇ လ︀ီႈဢ︀ꩫ︀်ႈက︀ျမ︀်းꩬ︀ိꩫ︀်မ︀ေႃꩬ︀ေꩫ︀ၵ︀ႃ က︀ျမ︀်းပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်ꩬ︀ွꩫ︀်ဝႆ︀ႇꩫ︀ႆ︀ႇꩫ︀မ︀်။
တ︀ၢင︀်းပ︀တ︀ူႈဢ︀ꩫ︀်ႈꩭိပ︀်ꩫ︀ၵ︀ႃ တ︀ၢင︀်းပ︀တ︀ူႈဢ︀ꩫ︀်ႈက︀ၢင︀်ႛ
(လ︀ုက︀ႃ 13.24)
13တ︀ၢင︀်းပ︀တ︀ူႈဢ︀ꩫ︀်ႈꩭိပ︀်မ︀ႆ︀ႛၵ︀ဝ်ႛတ︀ႃႉ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး တ︀ၢင︀်းပ︀တ︀ူႈပ︀ႃႛဢ︀ꩫ︀်ႈက︀ႃင︀ႃးလ︀ႆ︀ၢးယ︀ႃႇက︀ၢင︀်ႛင︀ႆ︀း တ︀ၢင︀်းက︀ႃက︀ေႃႇင︀ႆ︀ၢႈꩬ︀ီ တ︀ၢင︀်းပ︀တ︀ူႈဢ︀မ︀ႂ်းမ︀ႆ︀ႛ က︀ူꩫ︀်းဢ︀ၢꩫ︀်တ︀ၢꩫ︀်က︀ႃက︀ꩫ︀်ႈဢ︀ူ။ 14တ︀ၢင︀်းပ︀တ︀ူႈပ︀ႃႛဢ︀ꩫ︀်ႈက︀ႃတ︀ၢင︀်းဢ︀ꩬ︀ၢက︀်ႉယ︀ႃႇꩭိပ︀်င︀ႆ︀း တ︀ၢင︀်းက︀ႃက︀ေႃႇယ︀ပ︀်ꩬ︀ီ က︀ူꩫ︀်းꩡ︀ွꩫ︀်လ︀ိူင︀်ႈꩫ︀ႆ︀ၢႈꩫ︀မ︀် တ︀ၢင︀်းပ︀တ︀ူႈဢ︀မ︀ႂ်းမ︀ႆ︀ႛꩭꩫ︀်ꩫ︀ႆ︀ႇ။
လ︀ွင︀်ႈတ︀ူꩫ︀်ႛမ︀က︀်ꩫ︀ၵ︀ႃမ︀က︀်
(လ︀ုက︀ႃ 6.43,44)
15ပ︀ရ︀ေႃးၸ︀ႅတ︀်ႉမ︀ိက︀်ႉꩬ︀ႃꩫ︀ႆ︀ႇၵ︀ဝ်မ︀ႆ︀ႛ ꩬ︀တ︀ိတ︀ႃႉ။ ၵ︀ဝ်ယ︀ႃႇ မ︀ႃလ︀ႆ︀းဢ︀ꩫ︀်ႈꩭႆ︀ၢႇလ︀ူင︀်၊ ဢ︀ꩫ︀်ႈလ︀ွက︀်ႉၵ︀ၢပ︀်ႉပ︀ူႇꩫ︀ႆ︀ႇၵ︀ဝ်ꩫ︀က︀ꩫ︀်ႈꩫ︀မ︀်။ 16ဢ︀ꩫ︀်ႈၵ︀ဝ်ꩭီတ︀်မ︀ႆ︀ႛ လ︀ႅမ︀်းꩫ︀ီႈꩫ︀ီႈက︀ီး ၵ︀ဝ်ပ︀ီꩫ︀်ႈက︀ꩬ︀င︀်ꩫ︀ꩫ︀ႆ︀ႇꩬ︀ူတ︀ွင︀်းဢ︀ူ။ ပ︀ႃယ︀ုမ︀်းမ︀ႆ︀ႛ မ︀က︀်ꩡ︀ပ︀ႅတ︀်ႉမ︀ဝ်ပ︀ီꩫ︀်ႈꩫ︀က︀ꩫ︀်ႈ တ︀ူꩫ︀်ႛꩫ︀ၢမ︀်မ︀ႆ︀ႛက︀ေႃႇ မ︀က︀်ဝႃႈꩵ︀ႈပ︀ီꩫ︀်ႈ။ 17တ︀ူꩫ︀်ႛမ︀က︀်ဢ︀ꩫ︀်ႈꩫ︀ီႈꩫ︀ႆ︀ႇ မ︀က︀်ဢ︀ꩫ︀်ႈꩫ︀ီႈပ︀ီꩫ︀်ႈဢ︀ူ။ တ︀ူꩫ︀်ႛဢ︀ꩫ︀်ႈမ︀ဝ်ꩫ︀ီႈယ︀ႃႇ မ︀က︀်က︀ေႃႇꩵ︀ႈꩫ︀ီႈ။ 18တ︀ူꩫ︀်ႛဢ︀ꩫ︀်ႈꩫ︀ီႈယ︀ႃႇ မ︀က︀်ဢ︀ꩫ︀်ႈမ︀ဝ်ꩫ︀ီႈမ︀ဝ်ပ︀ီꩫ︀်ႈꩫ︀က︀ꩫ︀်ႈ တ︀ူꩫ︀်ႛဢ︀ꩫ︀်ႈမ︀ဝ်ꩫ︀ီႈꩫ︀ႆ︀ႇက︀ေႃႇ မ︀က︀်ဢ︀ꩫ︀်ႈꩫ︀ီႈꩵ︀ႈပ︀ီꩫ︀်ႈ။ 19တ︀ူꩫ︀်ႛမ︀က︀် ဢ︀ꩫ︀်ႈမ︀က︀်မ︀ဝ်ꩫ︀ီႈꩫ︀ႆ︀ႇၵ︀ဝ်မ︀ႆ︀ႛယ︀ႃႇ လ︀ႆ︀ၢးပ︀ိူဝ်ႈမ︀က︀်ꩫ︀ီႈမ︀ဝ်ပ︀ီꩫ︀်ႈꩫ︀ႆ︀ႇꩬ︀ီ က︀ူꩫ︀်းꩫ︀ႆ︀ႇၵ︀ဝ် ပ︀မ︀်ႛꩬ︀ီꩬ︀ုမ︀်ၸ︀ႆ︀းၵ︀ွတ︀်ဢ︀ူ။ 20င︀ႆ︀းꩫ︀ႆ︀ႇꩬ︀ီ ပ︀ရ︀ေႃးၸ︀ႅတ︀်ႉမ︀ိက︀်ႉꩬ︀ႃꩫ︀ႆ︀ႇၵ︀ဝ်မ︀ႆ︀ႛက︀ေႃႇ တ︀ၢင︀်းက︀ႅင︀်းၵ︀ဝ်မ︀ႆ︀ႛꩫ︀ူႈက︀ီးတ︀ွင︀်းဢ︀ူ။
လ︀ွင︀်ႈၸ︀ူႛယ︀ုမ︀်ယ︀မ︀်ႈဢ︀ꩫ︀်ႈယ︀ီင︀်ႈꩫ︀ႆ︀ႇၵ︀ဝ်
(လ︀ုက︀ႃ 13.25-27)
21က︀ူဝ်ႇဢ︀ꩫ︀်ႈက︀ဝ်ႈမ︀ႆ︀ႛ “ꩡ︀ဝ်ႛ ꩡ︀ဝ်ႛ” ꩫ︀ꩬ︀ီꩭွင︀်ႇꩫ︀ႆ︀ႇၵ︀ဝ်က︀ူႈက︀ူဝ်ႇယ︀ႃႇ မ︀ိူင︀်းက︀ၢင︀်ႈꩭၢဝ်မ︀ႆ︀ႛ ꩵ︀ႈꩫ︀ႆ︀ႛၵ︀ဝ်ႛ။ က︀ူဝ်ႇဢ︀ꩫ︀်ႈဢ︀လ︀ၢင︀်းပ︀ူဝ်က︀ၢင︀်ႈꩭၢဝ်က︀ဝ်ႈမ︀ႆ︀ႛ ꩡ︀ွမ︀်းꩫ︀ႆ︀ႇၵ︀ဝ်ꩫ︀ႆ︀ၢႈꩫ︀မ︀် တ︀ီꩫ︀ႆ︀ႛၵ︀ဝ်ႛꩫ︀ႆ︀ႇ။ 22ဝꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛပ︀ႅတ︀်ႉတ︀ြႃးထိုင︀်မ︀ႃးက︀ီး က︀ူꩫ︀်းဢ︀ၢꩫ︀်တ︀ၢꩫ︀် က︀ဝ်ႈမ︀ႆ︀ႛမ︀ႃးꩬ︀ီ “ꩡ︀ဝ်ႛꩴ︀း ꩡ︀ဝ်ႛꩴ︀း တ︀ူႈၵ︀ႃႛဢ︀ဝ်ႈဢ︀ႃꩫ︀ႃၵ︀ိင︀်းတ︀ူဝ်ꩡ︀ဝ်ႛ ၵ︀ၢဝ်ႈၵ︀ၢမ︀်းꩫ︀ီႈꩭူဝ်းမ︀ႃးယ︀ဝ်ႇ။ ဢ︀ဝ်ႈ ဢ︀ႃꩫ︀ႃၵ︀ိင︀်းတ︀ူဝ်ꩡ︀ဝ်ႛ ၸ︀ီꩭၢႆ︀ႇဢ︀ၢꩫ︀်တ︀ၢꩫ︀်မ︀ႆ︀ႛက︀ေႃႇ ꩭူဝ်ႛဢ︀ွက︀်မ︀ႃးတ︀ီၵ︀ႃႛယ︀ဝ်ႇ။ ဢ︀ꩫ︀်ႈၵ︀ိူင︀်ႈꩫ︀ီႈဢ︀ၢမ︀်းꩫ︀ႆ︀ႇၵ︀ဝ်က︀ေႃႇ ဢ︀ၢꩫ︀်တ︀ၢꩫ︀်ꩭီတ︀်မ︀ႃးတ︀ီၵ︀ႃႛယ︀ဝ်ႇ” ꩫ︀ꩬ︀ီက︀ဝ်ႈမ︀ႆ︀ႛ တ︀ီမ︀ႃးဝႃႈꩬ︀ႃး။ 23မ︀ိူဝ်ႈဢ︀မ︀ႂ်း က︀ဝ်ႈယ︀ႃႇၵ︀ဝ်မ︀ႆ︀ႛ “ꩭိူဝ်း က︀ူꩫ︀်းꩭင︀်ႛꩫ︀ႆ︀ႇၵ︀ဝ်။ ꩬ︀ူမ︀ႆ︀ႛက︀ဝ်ႈꩵ︀ႈတ︀ွင︀်းပ︀ိူင︀်ႈလ︀ူင︀်။ ဢ︀ွက︀်က︀ႃတ︀ႃႉ” ꩫ︀ꩬ︀ီတ︀ီဝႃႈꩫ︀မ︀်။
ၸ︀ူႛပ︀ူက︀်ꩭိူꩫ︀်းဢ︀ꩫ︀်ႈပ︀ိင︀်ꩥ︀ႃယ︀င︀်းꩫ︀ၵ︀ႃ ၸ︀ူႛပ︀ူက︀်ꩭိူꩫ︀်းဢ︀ꩫ︀်ႈမ︀ိူက︀်ႉ
(လ︀ုက︀ႃ 6.47-49)
24င︀ႆ︀းꩫ︀ႆ︀ႇꩬ︀ီ ၸ︀ူႛဢ︀ꩫ︀်ႈထွမ︀်ၵ︀ၢမ︀်းက︀ဝ်ႈꩬ︀ီ ꩭီတ︀်ꩡ︀ွမ︀်းꩫ︀ႆ︀ႇယ︀ႃႇ က︀ူဝ်ႇဢ︀ꩫ︀်ႈပ︀ိင︀်ꩥ︀ႃယ︀င︀်းꩬ︀ီ က︀ꩫ︀်ႛꩫ︀ိူဝ်ၸ︀ႃꩭိꩫ︀်မ︀ႆ︀ႛ ပ︀ူက︀်ꩭိူꩫ︀်းꩫ︀က︀ꩫ︀်ႈꩫ︀မ︀်။ 25ၸ︀ူꩫ︀်တ︀ူက︀်ၸ︀ႃႇꩭီက︀်၊ ꩫ︀မ︀်ႇလ︀ွင︀်းꩬ︀ီ လ︀ႅင︀်ႇတ︀ုက︀်မ︀ႃးꩫ︀က︀ေႃႇ ꩭိူꩫ︀်းမ︀ꩫ︀်းယ︀ႃႇ က︀ꩫ︀်ႛꩫ︀ိူဝ်ၸ︀ႃꩭိꩫ︀်မ︀ႆ︀ႛ ပ︀ူက︀်ဝႆ︀ႇꩫ︀ႆ︀ႇꩬ︀ီꩵ︀ႈလ︀ူမ︀်ႇ။ 26က︀ူဝ်ႇဢ︀ꩫ︀်ႈၵ︀ၢမ︀်းက︀ဝ်ႈꩫ︀ႆ︀ႛꩥ︀ိꩫ︀်းꩫ︀က︀ေႃႇ မ︀ဝ်ထွမ︀်ꩡ︀ွမ︀်းꩫ︀ႆ︀ႇယ︀ႃႇ က︀ူꩫ︀်းမ︀ိူက︀်ႉဢ︀ꩫ︀်ႈက︀ꩫ︀်ႛꩫ︀ိူဝ်ꩬ︀ႆ︀ၢးမ︀ႆ︀ႛ ပ︀ူက︀်ꩭိူꩫ︀်းꩫ︀က︀ꩫ︀်ႈꩫ︀မ︀်။ 27ၸ︀ူꩫ︀်တ︀ူက︀်ၸ︀ႃႇꩭီက︀်၊ ꩫ︀မ︀်ႇလ︀ွင︀်းꩬ︀ီ လ︀ႅင︀်ႇတ︀ုက︀်မ︀ႃးက︀ီး ꩭိူꩫ︀်းမ︀ꩫ︀်းယ︀ႃႇ လ︀ူႇလ︀တ︀်ႉၵ︀တ︀်ပ︀င︀်းက︀ႃဢ︀ူ” ꩫ︀ဝꩫ︀်ႇ။ 28ꩡ︀ဝ်ႛယ︀ေꩬ︀ု လ︀ွင︀်ႈꩫ︀ႆ︀ႇၵ︀ဝ်ဝႃႈ ယ︀ဝ်ႇက︀ီး က︀ူꩫ︀်းꩫ︀ႆ︀ႇၵ︀ဝ် ဢ︀ၢမ︀်းလ︀ူင︀်ဢ︀ၢမ︀်းလ︀ၢင︀်က︀ꩫ︀်ႈꩫ︀မ︀်။ 29က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး မ︀ꩫ︀်းꩡ︀ဝ်ႛယ︀ႃႇ ꩫ︀င︀်ꩬ︀ြႃတ︀ြႃးꩫ︀ႆ︀ႇၵ︀ဝ်ꩬ︀ွꩫ︀်ꩫ︀က︀ꩫ︀်ႈ မ︀ဝ်ꩡ︀ႂ်ႈꩬ︀ီ ꩫ︀င︀်ꩡ︀ဝ်ႛဢ︀ႃꩫ︀ႃꩫ︀က︀ꩫ︀်ႈꩬ︀ွꩫ︀်ꩬ︀ီꩫ︀မ︀်။
Currently Selected:
မ︀တ︀်တ︀ႄး 7: kht
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
